Petersen-kryeadministrori i fundit i Kosove, largohet me 20 qershor 2006.

[Kalt]

Petersen, mbreti i fundit në Kosovë

Soren Jessen-Petersen pritet të largohet së shpejti nga Kosova. Kryeadministratori më popullor - do të jetë edhe Kryeadministratori i fundit në Kosovë

Shpend Limoni
[email protected]

I kanë mbetur vetëm edhe pak ditë në Kosovë dhe temën e largimit të tij tashmë ka filluar ta hapë në muhabetet e darkave me zyrtarë të Kosovës dhe ndërkombëtarë. Danezit, i cili në krye të UNMIK'ut i ka mbushur dy vjet të mandatit të tij, i ka ardhur koha për t'i dhënë fund punës në vendin e administruar nga Kombet e Bashkuara që pas përfundimit të luftës në vitin 1999.

Soren Jessen-Petersen është emëruar nga Kofi Annan si shef i administratës ndërkombëtare më 16 qershor të viti 2004, ndërsa largimi i tij pritet të ndodhë në fund të këtij qershori. Ndonëse çështja e largimit të tij është përmendur nga vetë Soren Jessen-Petersen dhe është bërë pjesë e përfoljeve në rrethe të ngushta, UNMIK nuk do që të flasë publikisht për këtë.
Zyrtarë për informim të UNMIK'ut e konsiderojnë këtë si një punë personale të shefit të tyre.
Zëdhënësi Aleksander Ivanko nuk ka dashur të përgjigjet për Express
se kur do t'i skadojë kontrata danezit dhe nëse ai do të largohet nga Kosova.
"Ne nuk komentojmë rreth çështjeve personale dhe çështjeve që kanë të bëjnë me kontratat", ka thënë Ivanko, të ma rtën. Ai ka thënë vetëm se Soren Jessen-Petersen do të vazhdojë të punojë edhe tutje. "Ai është duke punuar sikur që ka bërë edhe më parë".
Soren Jessen-Petersen në Kosovë ka ardhur nga Maqedonia, ku ishte duke shërbyer si përfaqësues special i BE-së, duke u shndërruar në mënyrë të rrufeshme në një personalitet shumë popullor.
Si Kryeadministratori i pestë i Kosovës, sipas sondazheve vendore
e ndërkombëtare, ai konsiderohet edhe më i suksesshmi. Ditë më parë, vetë danezi nuk ka pranuar të flasë nëse do të largohet nga Kosova, duke thënë se do të vazhdojë të punën.
"Unë momentalisht jam duke punuar për UNMIK'un. Dhe, nuk kam dëshirë që të spekuloj". Shefi i UNMIK'ut më 20 qershor do të udhëtojë drejt Neë York'ut,
për të raportuar për herë të fundit për vendin të cilën e ka administruar dy vjetët e fundit.
Më pas, pritet të niset drejt Danimarkës, duke përmbyllur rrugëtimin e tij dinamik me Kosovën. Pas largimit të tij, siç pohohet, në Kosovë nuk do të ketë më Kryeadministrator të ri, ndërsa administrata ndërkombëtare do të mbetet nën udhëheqjen e zëvendësit të tij, amerikanit Steven Schook. "Kosova po hyn në fazën e fundit të negociatave për statusin dhe roli kryesor ka kaluar tek Martti Ahtisaari dhe Albert Rohan. Ata tash janë 'zotët' e këtij vendi. Prandaj, nuk parashihet të ketë edhe një kryeadministrator të ri", ka thënë për Express një zyrtar i lartë ndërkombëtar në Prishtinë.
UNMIK po përgatitet për dalje nga Kosova, kur Këshilli i Sigurimit ta definojë se statusi është adoptuar dhe Rezolutës 1244 do t'i vijë fundi. Rezoluta 1244 përfaqësuesve të OKB'së në Kosovë u ka ofruar pushtet tej mase, ndërsa Soren Jessen-Petersen ishte munduar që të balancojë ato, duke shfaqur afinitetet demokratike. Edhe pse ka udhëhequr një aparat të ndërlikuar burokratik, i veshur me kompetenca prej sovrani, atij asnjëherë nuk i ka shkuar mendja se është mbret në Kosovë. "Nuk e konsideroj vetën mbret.
Termi mbret është shumë i mirë për ndonjë panoramë. Ne në Danimarkë nuk kemi mbret. E kemi një mbretëreshë", kishte deklaruar kohë më parë Jessen- Petersen, në një intervistë për Express. Nëse anashkalohet një letër paralajmëruese e Veton Surroit për Shefin e UNMIK'ut, në të cilën i kishte sugjeruar që të mos vite fare në Kosovë, qëndrimin e Jessen-Petersen në vend e kanë karakterizuar raporte të mira me liderët.

Gjatë periudhës dyvjeçare ai ka pasur rastin të punojë me katër kryeministra kosovarë. Është komentuar gjatë refuzimi i tij për t'u përfshirë në kombinimet e
kosovarëve për koalicione qeveritare, të cilën e ka arsyetuar para "bosëve" të tij me argumentin e respektimit të demokracisë. Me krenari ka theksuar disa herë qasjen e vet të mospërzierjes në procese brenda-politike, por nuk kanë munguar kritikat se ndonjëherë ka "shkelur" opozitën, njashtu siç është akuzuar se ka toleruar korrupsionin.


Gazeta Tema
07 Qershor 2006