Kryeministri Berisha ballafaqohet me Tadiqin

[Arb]

Kreu i qeverisë shqiptare bën thirrje për dhënien edhe "de jure" të pavarësisë së Kosovës

Kryeministri i Shqipërisë, Sali Berisha, ka replikuar ashpër me Presidentin serb Boris Tadiç, për çështjen e statusit të Kosovës gjatë takimit të nivelit të lartë të vendeve të Nismës së Bashkëpunimit Ekonomik të Detit të Zi në Stamboll.

Gjatë fjalimit të tij, Kryeministri shqiptar, ka bërë thirrje për të miratuar planin e OKB-së, i cili i jep Kosovës pavarësinë. Kryeministri Berisha, para krerëve të shteteve që bëjnë pjesë në organizmin e Nismës së Bashkëpunimit Ekonomik të Detit të Zi, theksoi se "tani është momenti final, momenti "de jure", për t‘i dhënë fund procesit të ndarjes së Kosovës nga Serbia.

Korniza më e mirë për këtë është ajo e dokumentit të Presidentit Ahtisari", tha kreu i qeverisë shqiptare, duke shtuar se "për këtë, Shqipëria ka zgjedhur të mbështesë plotësisht planin Ahtisari", dhe se "ky propozim njeh si zgjidhje të vetme pavarësinë e Kosovës, për hir të paqes dhe stabilitetit në Kosovë dhe në gjithë rajonin, si dhe garanton të drejta të plota për minoritetet".

Kosova, tha zoti Berisha, është një rast i veçantë, i vetëm në llojin e tij, sepse që nga viti 1368 deri më 1912, Kosova ka qenë vilajet i Perandorisë Osmane, i banuar kryesisht nga shqiptarë dhe se pavarësisht se populli i saj organizoi kryengritjen më të madhe që Evropa përjetoi në atë kohë, ajo u ndëshkua dhe iu dhurua një vendi tjetër, vetëm për arsyen se ishte vilajet i një perandorie të rënë.

Ndërhyrja e NATO-s në vitin 1999, sipas Kryeministrit Berisha, i dha fund "de facto" lidhjes së Serbisë me Kosovën. Deklarata e Kryeministrit shqiptar për pavarësinë dhe veçanërisht referencat historike të sjella në vëmendje prej tij, provokuan një kundërshtim të hapur të Presidentit serb Boris Tadiç, sipas të cilit Kosova është vendi i origjinës së serbëve dhe se dhënia e pavarësisë do të krijonte sipas tij një seri precedentësh të rrezikshëm.

Gazeta Shqip