Të tjerët për Hashim Thaçin..

[niemand]

TE GJITHË - NJERËZIT E THAÇIT

SI NEGOCION BATON HAXHIU NË EMËR TË KRYEMINISTRIT THAÇI PËR KRYESPIUNIN E KOSOVES

Baton Haxhiu, ‘zëvendëskryeministri’ i Qeverisë Thaçi, i autorizuar nga Kryeministri për punë të dyshimta (dhe për lidhjet me Sali Berishën, që Haxhiu i mban përmes Blendi Fevziut), po zhvillon takime dhe bisedime intenzive për të caktuar dhe identifikuar emrin që duhet Kryeministri më pastaj ta përkrah dhe eventualisht ta propozojë si shefin e Shërbimit Intelegjent të Kosovës edhe para ndërkombëtarëve.

Emrat që shtypi kosovar i hodhi në publik si Arianit Koci, Ylber Hysa, Dukagjin Gorani…njëkohësisht po ky shtyp (sidomos Koha ditore) i prezentoi si emra që do jenë më të afërt e më lojalë me ndërkombëtarët, sesa me Kryeministrin dhe Qeverinë e tij. Por, Hashim Thaçi nuk do ishte Hashim Thaçi po të mos ishte gjithmonë dy hapa më para se opinioni kosovar dhe ndërkombëtarët (e sidomos Koha ditore!).

Emri që më së shumti u përfolë dhe u lakua si propozimi më i dashur dhe më i afërt për Kryeministrin, Kadri Veseli, me emrin konspirativ “Luli”, që jo vetëm gjatë luftës, po gjithmonë ishte pjesa e padukshme e Hashim Thaçit, engjulli mbrojtës i Thaçit, guximi dhe trimnia e të cilit nuk kontestohet nga askush brenda PDK, si për habi të opinionit, papritmas vullnetarisht dhe publikisht hoqi dorë nga ky oportunitet. Me një prononcim ekskluziv në RTK, lexoi një shpërbërje publike të një shërbimi sekret për të cilin të gjithë e dinin, por vetëm me këtë akt shpërbërjeje u mësua publikisht dhe zyrtarisht se – paska ekzistuar!

Kryeministri Thaçi, nga ana tjetër, me këtë lëvizje taktike të zhvendosjes së emrit të

Veselit si kryespiun i mundshëm, në të vërtetë fitonte dy herë: plotësonte kërkesat e ndërkombëtarëve që i kandiduari për këtë post të mos jetë në asnjë mënyrë njeri i partisë së tij, si dhe në anën tjetër, hapte rrugë për disa emra që njihen si “të pavarur”, si Hysa, Gorani, Koci…që opinioni dhe ndërkombëtarët e kanë të vështirë t’i lidhin drejtpërdrejtë me Kryeministrin Thaçi, po që në të vërtetë për të informuarit njihen si “Njerëzit e Thaçit”. Si lidhen këta emra Gorani, Koci, Hysa…me Kryeministrin?



Dukagjin Gorani është mik i studimeve dhe i rinisë i Hashim Thaçit. Cimera! Aktualisht këshilltar zyrtar i tij. Kur Hashim Thaçi si shef politik i UÇK kishte hyrë në Prishtinë pas çlirimit nga NATO, njëra nga shtëpitë ku Thaçi ka qëndruar është edhe shtëpia e babait të Goranit, një tregim që Gorani e tregon gjithandej, sa për të theksuar lidhjet dhe afërsinë që ka ai me Thaçin, si “shokë të luftës”.

Vetë fakti se Gorani në përgjithësi është i prirur për t’i bërë publike sekretet, si këtë afërsi me Thaçin, i zvoglon mundësitë që ky të jetë kandidat serioz për këtë post të ‘rojtarit të sekreteve’.


Ylber Hysa, emër që përmendej shumë kohë më parë sesa këta emra shpërthyen në media, si kandidat shumë serioz për këtë post, është një nga tregimet ma spektakulare të jetës partiake kosovare, nëse spekulimet që ndjekin Hysën provohen vetëm pak si të vërtetë.

Si lidhet njeriu i dytë i partisë “ORA”, miku më i ngushtë i Veton Surroit, me Hashim Thaçin?

Sipas burimeve të “Javës”, Hysa nuk lidhet direkt me Thaçin, por Hysa lidhet me elemente të shërbimit intelegjent që udhëhiqej nga Kadri Veseli. Elemente brenda këtij shërbimi, e kanë suportuar e kanë bindur dhe e kanë përkrahur Hysën në idenë që t’ia plasojë dhe sugjerojë idenë e themelimit të një partie politike, njërit nga reprezentët më të shquar të shoqërisë civile të Kosovës, Veton Surroit. Sipas këtyre burimeve, themelues i vërtetë i partisë “ORA” gjatë gjithë kohës ishte tërthorazi – Hashim Thaçi - me idenë e tij për të përkrahur çfarëdo partish e inciativash qytetare, të cilat do kishin mundësi që ta zvogëlonin përkrahjen e qytetareve që gëzonte LDK dhe Ibrahim Rugova asokohe.

Sipas këtyre burimeve, Ylber Hysa, pak muaj para themelimit të partisë “ORA”, është parë “natë për natë” në shoqëri rakie e miqësie me elemente brenda shërbimit intelegjent të udhëhequr nga Kadri Veseli. Në këto takime, Hysa shpesheherë është parë në këto kafe me një pjesëtar të SHIK-ut - i njohur për redaksinë – ku në këto ndeja shumëherë ka qenë i pranishëm edhe ish nënkryetari i KMDLNJ-së, Ibrahim Makolli, sot nënkryetar i AKR-së. Hysa e kishte për detyrë ta bindte Surroin të krijonte parti. Hysa, Makolli dhe pjesëtari i SHIK-ut ( i njohur për redaksinë) janë parë bashkë shpeshëherë edhe pas formimit të Partisë “Ora” – në kafiterinë “Strip-Depo”, një kafiteri e njohur në kryeqytet, ku rrijnë themeluesit dhe drejtuesit e gazetës “Express” dhe reprezentë të PDK, që simbas burimeve të “Javës”, janë finansuesit dhe themeluesit e gazetës “Express”. Në fakt, ideja dhe të gjitha mbledhjet për themelimin e gazetës “Express” janë mbajtur në këtë kafiteri. Një nga ftuesit që ka ftuar gazetarë të redaksive, disa prej këtyre emrave të ditur edhe për redaksinë, e që janë ysht që t’i lëshojnë redaksitë e tyre e t’i bashkohen gazetës “Express” është vetë - Kryeministri Thaçi.



Po Arianit Koci? Nga lindi Koci?

Koci nuk ka lidhje me Thaçin, thonë burimet e “Javës”. Koci ka lidhje me Baton Haxhiun. Haxhiu është i autorizuar nga Kryeministri që ta përpunojë Kocin, si emrin më të panjohur dhe më të mundshëm për kryespiun, sepse që të gjithë emrat tjerë disi ‘kompromitohen’ shkaku i afërsisë direkte apo indirekte me Kryeministrin.

Arianit Koci, i biri i kompozitorit Akil Koci, që ka filluar karierën si argjentar, për të vazhduar më pas studimet e muzikës dhe për të përfunduar si avokat, është propozimi ‘gjenial’ i Haxhiut. Koci ishte avokati që reprezentonte gazetën “Express” në seanca gjyqsore, gjatë kohës sa ishte Haxhiu drejtor i kësaj gazete (të gjitha proceset Koci zakonisht i ka humbur!). Si politikisht virgjin, aspak i lidhur me ndonjë parti a lider, një autsajder i përkryer, shihet dhe propozohet nga Haxhiu si një kandidat i gjetur, të cilin janë të bindur Thaçi e Haxhiu se disi do ta kapërcejnë nëpër “detektorin e rrenave” të ndërkombëtarëve që ta shesin si ‘të pavarur”, e ta ‘mjelin’ si të vetin.

Haxhiu këto ditë po zhvillon bisedime intenzive jo vetëm me Kocin (shif foton), po edhe me persona tjerë që shihen nga Haxhiu, si i angazhuar nga Kryeministri, për t’ia propozuar ndonjë emër që kishte për ta kaluar ‘detektorin e rrenave’ të ndërkombëtarëve dhe njëkohësisht do mbetej i tyre.

Kush do kapërcejë nëpër ‘detekorin e rrenave’ për t’u bërë Kryespiuni i Kosovës, njëri nga emrat e lakuar, apo ndonjëri nga emrat që s’u lakuan në këtë eksplorim, mbetet të shihet. Të gjithë po e presin Tinën.



Pse është i rëndësishëm drejtimi i Agjencisë së Ardhshme të Intelegjencës?

SHIK-u ka qenë më i sukseshëm në Kosovë sesa shërbimet e partive tjera politike në Kosovë, falë lidhjeve të krijuara me SHIK-un e Shqipërisë gjatë kohës së luftës. Sot SHIK-u (Shërbimi Informativ Kombëtar) i Shqipërisë është konvertuar në SHISH (Shërbimi Informativ i Shqipërisë). SHISH, në fakt, edhe i ka hapur rrugën SHIK-ut për zhvillimin e kontakteve të mëtutjshme me vendet e huaja. SHIK dhe SHISH edhe sot mbajnë marrëdhënie të mira. Konsiderohet se SHISH i ka krijuar “Lulit” dhe SHIK-ut të tij marrëdheniet e mira me shërbimet izraelite – ku janë trajnuar një pjesë e “agjentëve” të SHIK-ut.

Por, megjithatë, Shërbimet Informative të partive, deri tash, gati kryesisht janë marrë me kontrollin e bizneseve të mëdha në Kosovë, si biznesi i naftës, alkoolit dhe duhanit - sesa me informacionin në shërbim të qytetarëve ose shtetit. Shërbimi Informativ Kombëtar, i njohur si SHIK, është formuar gjatë kohës së luftës në Kosovë – i cili më shumë është marrë me fondet e “Vendlindjes Thërret”, sesa me zbulimin e informacioneve në dobi të luftës së UÇK-së. Në atë kohë, Kadri Veseli, i njohur si “LULI”, kishte krijuar një Njësit të Shërbimit të tij Informativ - të quajtur ZKZ (Zbulim Kundër Zbulimit), një Njësit i udhëhequr dhe përbërë kryesisht nga studentë të asaj kohe, të gatshëm për t’i ndihmuar UÇK-së. Njësit i cili merrej me mbledhjen e informacioneve, kryesisht, nga zonat dhe qytetet ku nuk vepronte UÇK. Kurse, vetë SHIK-u, më shumë merrej me “transferimin” e fondeve nga “Fondi i Tre Përqindëshit” në fondin “Vendlindja Thërret”. Një “aksion” që pati sukses sidomos në disa vende të Europës dhe te një pjesë të shqiptarëve të Amerikës. Pas luftës, ky Shërbim është marrë me krijimin e “dosjeve të zeza” të partive rivale, sikur rasti i krijimit të “Dosjes” kundër LDK, të cilën ky shërbim e lansoi pikërisht përmes gazetës së saponisurt asokohe – “Express”. Në fakt, kundër Ramë Marajt dhe Shërbimit të tij, i cili më vonë është hetuar nga policia ndërkombëtare për veprimtari të dyshimta.

SHIK-u i “Lulit” edhe pse i titulluar si Shërbim… Kombëtar, i ka shërbyer vetëm interesave të Hashim Thaçit (Cimerit), madje as partisë (PDK). Meqenëse Kadri Veseli, në Kosovë është identifikuar, botërisht, si njeri shumë i afërt me Hashim Thaçin, me siguri se edhe nuk do të jetë në krye të Agjencisë së Ardhshme të Intelegjencës së Kosovës. Mirëpo, “Luli” enigmatikë qysh sot lakohet si emër i mundshëm për – Ministër të Mbrojtjes.


© by GazetaJava

[niemand]

Përkundër përpjekjeve personale të botuesit të gazetës, që të vë kontakt me kryeministrin Thaçi për t’i davaritur spekulimet që kanë përfshi botën e mediave të Kosovës, se Hashim Thaçi dhe Baton Haxhiu tashmë i kanë hy realizimit të projektit që ka për qëllim dhurimin e frekuencave nacionale të Kosovës dy projekteve televizive të Shqipërisë, kjo gjë u vërtetua e pamundur.



Po çfarë përmban në vete ky spekulim që ka tallazitur botën e medias në Kosovë.

Si gjithmonë, sa here bëhet fjalë për televizionet e Shqipërisë dhe qeverinë e Kosovës, e pashmangshme në këto relata na paraqitet figura (kryesisht e tallur) edhe në Tiranë edhe në Prishtinë – Baton Haxhiu. I zgjedhur nga klane të dyshimta e në rrugë të dyshimta të qarqeve mediale të Shqipërisë, Baton Haxhiu sot është bërë reprezentuesi i interesave të dyshimta të disa qarqeve mediale që kanë për ambicie abuzimin me pasurinë kombëtare të Kosovës, në rastin konkret – frekuencat televizive.

Spekulimi thotë se kryeministri i Kosovës Hashim Thaçi, ministri i ministrisë respektive Limaj, Baton Haxhiu dhe pronari i Top Channel Dritan Hoxha, tashmë e kanë ngrënë “darkën” e këtij pazari, i cili i garanton ndihmën e pakursyer të Qeverisë Thaçi që Top Channel të sigurojë të paktën frekuencë lokale në Prishtinë (sic!). Kjo duhet të fillojë së pari me hapjen e një studioje të vocërr në Prishtinë, sa për t’u instaluar. Dritan Hoxha, nga ana tjetër, i ka trullu edhe kryeministrin edhe ministrin respektiv se do t’i investojë, si thotë spekulimi - 10 milionë euro n’Kosovë.

Kjo shumë parash duket e thënë me aso lehtësie me të cilën prindët i mashtrojnë fëmijtë për dhurata, sepse kur Qeveria Berisha i kërkoi po këtij njeriu që në emër të taksave të abuzuara t’i paguaj shtetit aprx.11 milionë euro, pronari Hoxha publikisht doli duke thënë se kjo do e bankrotonte firmën. Ku i ka këto 10 milionë euro të premtuara z.Hoxha, këte me gjasë e di vetëm kryeministri Thaçi.



Frekuencat nacionale, si një kafshatë më e madhe, sipas të njëjtit spekulim, kanë mbetur që të ndërtohen më me kopili e përgatitje më të gjata, brenda një projekti që si kulisë do ta kishte një fantom kompani kosovare, ku përflitet se B.Haxhiu do e themelonte, po që në të vërtetë, prapa këtij fantomi do fshiheshin dy emra – Aleksandër Frangaj dhe Blendi Fevziu, si dy nga aksionerët kryesorë të Televizionit KLAN nga Tirana.

Baton Haxhiu qysh sot menaxhon një pajisje për shtypje të posterave gjigandë, që ka për pronarë njerëz nga Shqipëria të afërt me Ilir Metën dhe gruan e tij, por që në Kosovë janë regjistru si kompani e tij, të cilat pasi kishin kryer punë në zgjedhjet e fundit në Shqipëri, u transferuan në Kosovë që të jenë në dispozicion të kampanjës së PDK dhe zotit Thaçi, si dhe të Baton Haxhiut, i cili pos Thaçit, ia kishte fut mirë çmimin edhe Behxhet Pacollit, duke ja marrë mbi 70 mijë euro për shtypje pllakatesh dhe për fushatën.

[niemand]

“Pastrimi i Terenit”



Ky penetrim dhe abuzim me eterin mbi Kosovë, të cilin e organizojnë dhe udhëheqin Hashim Thaçi dhe Baton Haxhiu, nuk do mbetej i vetmuar, thotë spekulimi. Krejt kjo “dallavare hashim-batoniane” si e kualifikuan, do përcillej me përgatitje tereni, ose si thuhet në këtë spekulim, me ‘pastrim tereni’.

Po çfarë nënkupton “Pastrimi i Terenit”?

Strategjia e instalimit të 2 televizioneve të Shqipërisë, do përcillej me atë pjesë të kësaj strategjia e cila ka për qëllim dobësimin e tri televizioneve që përdorin frekuencë nacionale RTK, KTV dhe RTV21, si dhe ndërtimin e një muri administrativ ndaj të gjitha projekteve tjera kosovare që do kishin për ambicie këto frekuenca.

Kështu, sipas spekulimit, kjo detyrë e flliqtë dhe e padenjë për cilëndo qeveri, i ka ra hise Qeverisë Thaçi. Ky skenar do fillonte me destabilizimin finansiar dhe dobësimin e ndikimit që redaksia e lajmeve në RTK ka në publikun e Kosovës. Edhe pse sot për sot RTK është një servis në duart e Qeverisë Thaçi, ku ose ai personalisht ose dikush nga bashkëpunëtorët mund të telefonojë në këtë shtëpi dhe të kërkojë hapësirë sa të dojë, si thonë burimet brenda RTK, si në “bashqe t’babës”. Një takim i kryeministrit Thaçi me qytetarët këto ditë, që ishte mendu vetëm për efekte mediale, u përcollë me paraqitjen “live” të RTK nga kryeministria ku intervistoheshin qytetarët në hall që kishin ardhur për ta taku kryemnistrin, dhe ku reporteri lavdonte gjestin e kryeministrit dhe i pyeste qytetarët “kryeministri është i mirë apo jo(sic!)”. As televizioni i babës nuk ja kishte siguru kësi komoditeti këtij kryeministri. Atëherë, prej nga kjo ambicie që RTK të destabilizohet finansiarisht dhe të dobësohen “Lajmet” e orës 19:30? Si spjegojnë burimet brenda RTK, po kështu siç ka mundësi që Thaçi ta marrë në telefon Agim Zatriqin, drejtorin e përgjithshëm të RTK, të njëjtën mundësi e ka dhe e gëzon edhe rivali i zotiti Thaçi, Ramush Haradinaj. Duke mos pasur kontroll të plotë mbi këtë medium, sepse po këtë mundësi e ka edhe rivali Ramush Haradinaj, Qeveria Thaçi kërkon edhe në mënyra direkte – dobësimin e ndikimit të “Lajmeve” të orës 19:30 që ato kanë në publikun e Kosovës dhe përgjithësisht destabilizimin finansiar të këtij mediumi. (Këto telefonata dhe ky flirt i liderave të partive me një menaxher të një servisi publik flasin vetë për vete, por kjo le të mbetet për ndonjë eksplorim tjetër të “Javës”).

Ky skenar vazhdon më tej me destabilizimin finansiar edhe të dy projekteve tjera RTV21 dhe KTV, duke i zhvendosur nga hapësirat që i kanë shfrytëzuar deri sot. (Stafi i KTV tashmë është njoftuar se do shpërngulen me zyre diku n’Ajvali, afër Prishtinës, shumë shpejtë.) Edhe pse, mbetet një e vërtetë e madhe se këto dy projekte kanë gëzuar privilegje të papara në Kosovë, duke u trajtuar jo si dy projekte të rëndomta komerciale që i nënshtrohen konkurencës së tregut, po si edhe dy Servise Publike tjera (për gjithë këtë kohë, këto dy projekte janë donatuar me nga 4 milionë dollarë secila dhe imagjinoni: deri sot nuk kanë pagu qirra në Kosovë?!!!), prapëseprapë, zhvendosja e këtyre dy projekteve nga hapësirat e tyre do t’i destabilizonte për një kohë dhe do t’i traumatizonte. Për sa kohë? Për njaq kohë sa do i nevojitej dy projekteve televizive nga Shqipëria që të infiltrohen dhe të instalohen në Kosovë.

[niemand]

Le ta zëvendësojmë Hashim Thaçin e Drenicës, me Edi Ramën e Tiranës




Ky spekulim, edhe pse mbetet në domenin e spekulimit, ka një bazë. Sepse si i tillë vjen pas njërit nga turpet më të mëdha, që mundet një qeveri me ia leju vetes dhe me ia bë interesave dhe publikut të vet (si u kualifikua nga media e Kosovës, shih “Koha Ditore” dhe komentet e Televizionit RROKUM nga Dita e Pavarësisë së Kosovës), ashtu si veproi Qeveria Thaçi për Ditën e Shpalljes së Pavarësisë. Si e dini, Qeveria Thaçi e ka mbajtur sekret edhe modelin e flamurit që është zgjedhur, edhe vendin prej nga do nisej për t’u dërgu në parlamentin e Kosovës në ceremoninë solemne, edhe orën edhe gjithçka tjetër që lidhet për ato momente historike. I vetmi medium që ishte njoftuar për këto sekrete ka qenë një medium i Shqipërisë: Televizioni KLAN(sic!)

Pas këtij ”turpi e kësaj tradhtie”, si u kualifikua ky gjest flagrant e i pajustifikueshëm, kjo Qeveri ka qenë dashur të bojkotohej me javë nga të gjitha mediumet e Kosovës. Qeveria e Kosovës e cila nuk ka respekt për mediumet e Kosovës, nuk e meriton të mbulohet e transmetohet nga këto mediume. Qeveria e Kosovës e cila ka për detyrë ta stimulojë, garantojë, zhvillojë dhe kultivojë Shtypin e Lirë të Kosovës, flerton dhe “tradhton” me një medium nga Shqipëria.



Sipas burimeve shumë të afërta me kryeministrin Thaçi dhe ministrinë respektive, arsyeja e këtij flirti dhe ‘tradhtie’ për Ditën e Pavarësisë e kryeministrit Thaçi, si dhe kjo ambicie për t’i sjell televizionet e Shqipërisë në Kosovë, buron nga një bindje e pjekur e zotit Thaçi, dhe jo vetëm e tij, se Televizionet e Shqipërisë disi janë shumë më të mira. Kanë gjuhë më të mirë, po duken më mirë, etj. Ose si e tha Baton Haxhiu, “televizionet e Shqipërisë kanë kryer një Revolucion Kulturor” (sic!)

Krejt ky percepcion provincial i një qeverie provinciale gjen pak mbështetje kur ke parasysh vetëm raportin e fundit të Freedom House, ku media e Shqipërisë kualifikohet si më së paku e emancipuar e profesionale n’Ballkan. Ku e shohin avansimin e kësaj medie kryeministri dhe qeveria e tij, kjo mbetet një çështje për t’u diskutuar.

Kjo qeveri ia ka lejua vetes komoditetin t’i gjykojë e kualifikojë mediat e Kosovës si primitive dhe të pazhvilluara, dhe prandaj ka konkluduar se u dashka që t’i sjellim nga jashtë. Po ta ndjekësh vijën e kësaj logjike atëherë u dashka edhe ne si qytetarë që të sjellim një qeveri më të përgjegjshme, më pak provinciale, që ka dinjitet e vetërespekt, e jo t’i durojmë këta që të trajnohen, eksperimentojnë e tregtojnë me interesat e qytetarëve të Kosovës.

Nëse u dashka që t’i sjellim mediat nga Shqipëria, atëhere le ta sjellim edhe një qeveri ma të mirë prej andej! Le ta zëvendësojmë Hashim Thaçin e Drenicës, me Edi Ramën e Tiranës. Ide shumë e mirë, apo jo?

[niemand]

“Klanizimi” i hapësirës mediale të Kosovës




Jo aq shumë Top Channel sa Televizioni KLAN janë modele flagrante të abuzimit të interesit publik, dhe një gazetarie e cila në Serbinë e Milosevicit njihej si Gazetari Milanoviciane.

Po kush është ky Milanovic?

Milanovic ishte drejtori i Radio Televizionit të Serbisë (RTS), emëruar nga Milosevic. Ishte model i një gazetari i cili fund e majë kredon e tij e fuste në funksion të Milosevicit dhe interesave të ngushta të partisë së tij SPS. Deri në atë masë sa në fund, pas bombardimeve të NATOs dhe rënies së Milosevicit, këtë gazetar njerëzit e Beogradit aq shumë e urrejnë sa e ndjekin rrugëve të qytetit dhe e rrahin publikisht. Më vonë, Milanovic edhe denohet me 10 vjet burg, ku gjindet edhe sot.

Në Shqipërinë berishiane dhe nanoiane, nuk është servisi publik ai që e kryen këtë punë të flliqtë për qeverinë. Jo, në Shqipëri vetimponohet një tjetër projekt medial që quhet KLAN. KLAN që nga dita e parë e tij, promovohet si projekt i cili është kryekreje në funksion të qeverive, cilado që të jetë ajo. Kujtojeni vetëm salto-mortalen e fundit të këtij mediumi i cili, i themeluar dhe lansuar nga Qeveria Nano, kapërcen në taborin e Qeverisë Berisha, dhe mund ta keni pak-a-shumë të qartë profilin edhe profesional edhe kredon e themeluesve dhe reprezentëve të këtij mediumi.

Ky botëkuptim gazetarie dhe ky profil nuk është i ditur n’Kosovë. Në Kosovë sidoqoftë, shitet mend duke i bërë watchdog qeverive, e jo duke e futur hundën n’prapanicën e kryeministrave. Në Kosovë dihen mirë gazetat dhe mediumet që e kanë ‘brown nose’ si thuhet, dhe pak e hiq njerëzit kanë respekt për to.

Duke pasur parasysh vetëm dy pikëpjekjet e fundit të kryeministrit Hashim Thaçi dhe ministrit Fatmir Limajt me këtë medium (KLAN), ju e kuptoni se viktimat e para të këtij mediumi janë dhe sidomos kanë me qenë vetë këta.

Në emisionin e televizionit KLAN, ku ishin ftuar dy kryeministrat Berisha dhe Thaçi, ky i fundit tallej edhe nga analistat e ftuar në studion në Tiranë, edhe nga Haxhiu në Prishtinë. Ai prezentim i zotiti Thaçi ishte një tallje me te. E ai i shkreti, e mendonte këte si favor dhe mundësi për t’u parë(sic!)

Moment tjetër që mund të kujtojmë është intervista e këtyre ditëve e ministrit të Telekomunikacionit Fatmir Limaj në emisionin e Blendi Fevziut “Opinion Plus”. Nuk është e rastit që ministri ftohet mu pas asaj “darke të hangërme të frekuancave televizive” aq shumë të spekuluar, që me grua e me vlla t’ia bëjnë një vizitë Televizionit KLAN. Fatkeqësia e këtyre personazheve ministrore kosovare në përvojat e tyre me këtë televizion (Klan) gjithmonë dalin të disfavorshme për këta vetë. Intervista e zotit Limaj n’Klan mbeti e humbur nën efektin medial që shkaktoi në Prishtinë publikimi i fotos së makinës zyrtare të Ministrisë së Telekomunikacionit që e voziste i vëllai i ministrit Limaj gjatë atij qëndrimi në Tiranë si mysafir i KLAN. Kush e solli foton në “Kohën Ditore”?


Le të mbeten këto dy momente televizive si momente reflektimi për Qeverinë Thaçi sa për të nxjerrë përfundimin se kush mund të jenë viktimat e para të infiltrimit të këtyre mediumeve n’Kosovë dhe për “klanizimin” e hapësirës mediale në Kosovë.

[niemand]

Po ku mund të jetë interesi i Hashim Thaçit për ta bërë këtë shkelje flagrante të interesit kombëtar të Kosovës dhe për ta kryer “klanizimin” e hapësirës mediale kosovare?


Me parallogari të gabuara, Hashim Thaçi parasheh se me ardhjen e këtyre mediumeve në Kosovë ai do përforconte pozicionin e tij mediatik dhe të qeverisë tij, dhe do amortizonte kanonadat e medias që kanë nisur qysh tash ta akuzojnë për mungesë programi dhe vizioni për Kosovën dhe për përpjekjet për të instaluar njerëzit e tij në postet kryesore në Kosovë.

Me ambicien për të kontrolluar gjithçka, dhe me centralizim informate ashtu siç e ka bërë në Qeveri, duke e mbyllur çdo informacion tek zëvendësi i tij dhe duke mos emëruar portparol të Qeverisë, Thaçi i percepton këto mediume si aleate dhe mike të tij, duke mos e parë elefantin në dhomë se, këto mediume vijnë jo për miqësi e për të sjellë para n’Kosovë, por - për të marrë para nga Kosova. Asnjë kompani mediale nuk hyn në një treg nga humanizmi e ambiciet për t’i iluminuar, andaj as media e Shqipërisë nuk vjen në Kosovë për t’i mësuar kosovarzijtë ta flasin Gjuhën Standarde, po për ta rritur fitimin.

Shembulli eklatant që dëshmon këtë logjikë të këtyre mediumeve është çmimi shpërblyes në Top Fest 5 prej 10000 eurosh, që sot televizionit Top Channel ia paguan një kompani nga Prishtina. Ky zhvleftësim dhe diskreditim i medias kosovare që bëhet nga Qeveria Thaçi e bënë biznisin kosovar që të investojë në televizionet e Shqipërisë, dhe kjo është e vetmja arsye e këtij infiltrimi e kurrëfar miqësie e ambicie iluministe. Me këtë qëndrim të Qeverisë Thaçi ndaj medias kosovare kjo qeveri nuk mund të konsiderohet e Kosovës sepse bën që parat të dalin nga Kosova e jo të hyjnë në Kosovë. Dhe, urgjentisht do duhej që të binte.

Duhet të jesh shumë naiv të besosh ne mediumet si KLAN, të besosh besnikërinë dhe miqësinë e tyre. Pyteni Salën e vitit 1995, dhe pyteni Nanon e vitit 2005 se a ka kuptim të flasësh për nocionet “miqësi” e “besnikëri” kur flitet për KLAN ose Top Channel.

[niemand]

Historia e penetrimeve mediale shqiptaro-shqiptare


Le ta kujtojmë shkurt historinë e njëkëso ambicieje të ngjajshme që kishte dikur një ekip i gazetës “Rilindja” dhe Televizionit të Prishtinës, që në vitet 90ta u instaluan në Tiranën postkomuniste me ambicien se do e iluminojnë hapësirën mediale atje. Tirana i heshti, i talli dhe i margjinalizoi në një mënyrë të merituar. Njësoj, media e shkruar e Tiranës si Shekulli, Korrieri, Klan, etj, u përfshi nga i njëjti kompleks iluminimi e inflitrimi duke ardhur në Prishtinë, pas NATOs, por dështoi dhe pësoi fijasko njësoj sikur Rilindja e TVP në Tiranë. Kjo histori e penetrimeve dhe ambicieve për të iluminuar e përfituar nga hapësirat reciproke është një histori e dështimit dhe përpjekjes për të përfituar nga një hallakamë e pështjellim i përgjithshëm i kësaj hapësire mediale shqiptare, që sot e kësaj dite nuk ka kritere të caktuara dhe të sanksionuara ligjore që do e regullonin këtë hapësirë si një hapësirë e veprimit të lirë konkurent mediatik.

Sot, po guxoi ndonjë medium i Kosovës vetëm t’i shkonte mendja se lëre më të kërkonte frekuenca televizive nacionale në Shqipëri, do talleshin me te si me ma të mbramin budall.

[niemand]

2 mënyrat e qorrimit të publikut


Por, ajo që të bën me qesh në Shqipëri – një medium kosovar të kërkonte frekuenca nacionale – nuk ta vë buzën në gaz në Prishtinë. Në Prishtinë, një medium i Shqipërisë jo vetëm guxon, por edhe i premtohen frekuencat nacionale(sic!). Nëse ky spekulim për infiltrimin e dy televizioneve të Shqipërisë do na provohet vetëm pak i vërtetë, interesi kombëtar i Kosovës do jetë para një rreziku të madh, dhe ky do jetë fillimi i fundit i Qeverisë Thaçi. Sepse, tevona, këto frekuenca janë pasuri kombëtare e qytetarëve të Kosovës dhe vetëm në mënyrë ligjore mund të fitohen, e jo me darka hashim-batoniane.

Le ta marrim se ky spekulim ka baza për t’u besur i vërtetë.

Pse kjo çashtje do inicializonte fundin e Qeverisë Thaçi?

E para, vetëm ideja se një kryeministër flet dhe premton nëpër darka pasuri kombëtare të Kosovës demaskon deri n’fund se sa ky kryeministër respekton qytetarin, pozitën e vet dhe interesin kombëtar.

E dyta, të flasësh për pasurinë kombëtare të Kosovës nëpër darka dhe ta premtosh, kjo flet dhe zbulon një natyrë të fshehur dhe ambicie diktatoriale të kryeministrit Thaçi, që do e kompromitonte figurën e tij publike përfundimisht.

E treta dhe më e zeza, një këso darke dëshmon se sa kryeministri i këtij vendi respektoka qytetarët dhe intelegjencën e tyre. Kjo demaskon gjithë mosrespektin që kryeministri Thaçi e paskërka për qytetarin e Kosovës. Sa shumë po e nënçmoka.



Janë dy mënyra për ta mbajtur një vend në terr: duke e terratisur dhe ndaluar çdo medium; dhe duke e qorruar me dritë të madhe që jua lëshon në sy.

Metodën e parë e përdori Milosevici në Kosovë.

Metodën e dytë, nëse na provohet i vërtetë ky spekulim, e po kemi shumë shpresë se do jetë vetëm një prrallë me dy drenicakë, do që ta përdorë Hashim Thaçi dhe Baton Haxhiu.

Me e qorrue Kosovën me dritën e televizioneve të Shqipërisë!


© by Gazetajava

[jonuzi]

Shikoni kete.... Hashimi...

http://www.youtube.com/watch?v=chCB1...eature=related

[niemand]

Korrupsioni kancer i shoqërisë kosovare


Fehmi Ramadani


I
Korrupsioni, nepotizmi, krimi i organizuar, prostitucioni dhe droga janë këto dukuri që kanë marrë hov në zhvillimin e saj në shoqërinë kosovare, sidomos në dekadën e fundit të këtij shekulli. Kjo nuk nënkupton se këto dukuri nuk ishin të zhvilluara më herët dhe se gjithçka e keqe na paska filluar gjatë kësaj periudhe, por këto ishin të zhvilluara edhe më herët, sepse edhe vetë shoqëria njerëzore është një bashkësi, e cila për veç të vlerave të mira ka edhe anët saj negative.

Duke mos u futur thellë në analizën e gjenezën e tyre, por shikuar nga këndvështrim sociologjik mund të konkludohet se shoqëritë e robëruara, sidomos shoqëria kosovare, e cila me dekada ishte nën sundim të huaj, dhe se robëruesit e saj kanë investuar shumë që kjo shoqëri të devijojë nga vlerat e shëndosha kombëtare e njerëzore dhe të futet në një sokak pa rrugëdalje.

Robëruesit e saj kishin imponuar një gjendje të tillë në këtë vend, që të gjitha segmentet e jetës të ishin të korruptuara, kuptohet këtyre dukurive i kanë ndihmuar edhe ato shtresa të shoqërisë, të cilat si për shkak të vetëdijes së ultë, të interesit të tyre, por edhe për shkak të politikës që u kishte imponuar pushtuesi të merren me këto fenomene.

Duhet theksuar se, gjatë pushtimit serb në Kosovë shumica e punëve shtetërore kryheshin në formë korruptive. Të gjitha segmentet e saj ishin të korruptuar, duke filluar nga administrata e thjeshtë e deri në organet më të larta të shtetit. Nëpër këto organe për të kryer një punë duhej korruptuar ndonjë zyrtar të këtij shteti në mënyrë që të marrësh ndonjë dokument, apo të kryesh ndonjë punë tjetër. Duhej dhënë ryshfet në para, ose ndonjë gjësend tjetër. Kjo ishte modë e këtij shteti.

Përmasat e këtij korrupsioni kishte arritur sidomos në organet e rendit, me ç’rast kah sillesh duhet të korruptosh ndonjë polic serb, ndryshe, ose do të keqtrajtohesh,ose do të dënohesh rëndë.

Por, për veç korrupsionit edhe nepotizmi, krimi, prostitucioni dhe droga ishin përhapur mjaft. Këto dukuri, gjatë kësaj periudhe ishin shndërruar në sistem vlerash, bile ky sistem mbrohej edhe nga ligji, të cilin e kishte imponuar pushtuesi.

Shteti okupues serb ishte investuesi më i madh në zhvillimin e këtyre dukurive negative të shoqërisë, sepse ishte në interesin e këtij shteti, që kjo shoqëri të devijojë plotësisht nga vlerat mirëfillta kombëtare e njerëzore. Përkundër, investimit të madh në këto dukuri, pushtuesi nuk ia kishte arritur qëllimin e duhur, të shfrenojë një shoqëri të tërë, sepse këtë shoqëri e mbante urrejtja ndaj pushtuesit dhe lufta kundër tij.

II
Por, pas periudhës së vitit 1999 të gjithë dhe pas çlirimit të vendit kishim menduar se kjo shoqëri njëherë e përgjithmonë do të dal nga kriza e përgjithshme dhe do të rimëkëmbej shpejt në të gjitha sferat.

Nuk ka dyshim, se kjo shoqëri ka pësuar transformime të mëdha, por edhe ka rritje të dukshme të dukurive të lartcekura. Një shtytës i mirë i këtyre dukurive ishin disa pjesëtarë të misioneve të huaja ndërkombëtare, disa organizatat e ndryshme joqeveritare, të cilat në vend që të ndihmonin këtë shoqëri, kishin keqpërdorur misionin e tyre duke përhapur korrupsionin, prostitucionin dhe drogën.

UNMIK-u, një organizatë heterogjene botërore nuk kishte ndonjë politikë të qartë se si duhet ndalur këto fenomene retrograde, por përkundrazi ato u zhvilluan edhe më shumë. Faktor tjetër ishte kriza ekonomike e kësaj shoqërie, sepse pushtuesi kishte krijuar dëme të mëdha materiale në këtë vend dhe kështu kishte ndihmuar më shumë që një shtresë e saj të merret me punë të pista, se sa me ndonjë punë të ndershme.

Sondazhet e shumta që janë zhvilluar nga organizatat civile, si vendore, por edhe ndërkombëtare tregojnë për rezultate shqetësuese të rritjes së këtyre dukurive nëpër të gjitha poret e jetës së kësaj shoqërie.

Arsimi dhe shëndetësia janë dy segmente shumë të atakuar nga korrupsioni. Në Kosovë gjatë kësaj periudhe janë hapur shumë fakultete private, të cilat kanë kritere të ulëta të dijes dhe nuk kontrollohen nga askush. Mund të merren diploma me para pa u përgjigjur ndaj askujt. Gjithashtu, edhe Universiteti shtetëror i Kosovës është shndërruar në bastion të korrupsionit.

Lajmet të ndryshme vijnë nga fakultetet e tij për keqpërdorime dhe keqpërdorime të ndryshme financiare. Shumë profesorë që punojnë në këtë universitet, punojnë edhe privat. Qëllimi i tyre është vetëm profiti dhe asgjë më shumë. Ata nuk arrijnë t’i mbajnë dot ligjëratat me studentë për shkak të angazhimeve të tyre të mëdha. Dija më nuk është kriter për vlerësim, por antivlerat kanë marrë zhvillim.

Aspak, ma mirë nuk qëndron puna në shëndetësinë e këtij vendi. Shëndetësia kosovare është e sëmurë. Raportet e ndryshme nëpër media tregojnë një gjendje alarmante që kanë spitalet e Kosovës, edhe pse Kosova ka kuadro mjaft të aftë në këtë dhe që kanë dinjitet kombëtar, por tani për tani edhe këtu ka krizë.

Kjo shoqëri ende nuk është përgatitur që kjo sferë shumë e rëndësishme për popullin e saj të rimëkëmbet njëherë e përgjithmonë dhe të ecë mbarë.

III
Përsëri, sondazhet fundit të OJQ-së “Gallup International” tregojnë se kosovarët janë populli më optimist në Evropë. Kjo vetëdije e një optimizmi të tepruar tregon shkallën e ultë të vetëdijes së një shoqërie në krahasim me krizën që ka ajo. Për shembull, papunësia është mbi 60 për qind, varfëria rreth 40 për qind, ndërsa varfëria e skajshme rreth 15 për qind e tyre.

Nga këto shifra lehtë mund të konkludohet se në një shoqëri të varfër, krejt normal është që dukuritë negative, si korrupsioni, nepotizmi, krimi, droga dhe prostitucioni do të jenë në agjendën e saj të përhershme. Kur, këtyre i shtohen edhe faktorët tjerë, siç thamë më lartë, disa pjesëtarë të misioneve të ndryshme ndërkombëtare, të disa shoqatave të huaja, pasojat e së kaluarës, atëherë del qartë se problemet janë të rënda dhe duhet kushtuar një kujdes i veçantë në rehabilitimin e saj.

Për dhjetë vite pushtetet vendore, edhe përkundër deklarimeve të tyre se do të luftojnë këto dukuri, deri më tani nuk kanë pasur sukses dhe asnjë qeveri nuk ka arritur që së paku të frenojë për një përqindje këto fenomene të dëmshme shoqërore.

Këto qeveri, jo që nuk kishin plan, por as nuk kanë vizion se si duhet luftuar dhe frenuar këto dukuri negative që dita e ditës po e shkatërrojnë këtë shoqëri, mu ashtu sikur kanceri që e shkatërron një organizmin e njeriut. Një shoqëri e tillë nuk do të mund të inkuadrohet në shoqëritë e zhvilluara, të mos flasim në projektin e BE-së, ku për kriter për inkoorporim kanë punën dhe zhvillimin.

Nëse ishim në të kaluarën gjenerata më sfiduese, po ashtu do ta kemi obligim kombëtar e njerëzor që të sfidohemi edhe në luftën e këtyre dukurive të shëmtuara shoqërore. Në radhë të parë u takon organeve të shtetit, e më pastaj qytetarët, duke përfshirë edhe qytetarin e zakonshëm të këtij vendi.

Nëse vëren se ndonjë person, apo organ i shtetit po keqpërdor detyrën e vet, ose është i përfshirë në këto dukurive negative nuk duhet hezituar, duhet lajmëruar në organet kompetente, por edhe për mes mediumeve të ndryshme që tani në Kosovë janë të shumta të sensibilizohen këto dukuri, në mënyrë që të ndalen hovi i zhvillimit të tyre të mëtutjeshëm.

Mosveprimi në këtë drejtim do të ketë pasoja të mëdha për ardhmërinë e kësaj shoqërie, për këtë arsye të gjithë duhet të rreshtohemi në luftë kundër këtyre dukurive retrograde të shoqërisë.

[niemand]

Haradinaj akuzon Thaçin për përfshirje në afera korruptive


Kryetari i Aleancës për Ardhmërinë e Kosovës, Ramush Haradinaj ka akuzuar kreun e qeverisë Hashim Thaçi për përfshirje në afera korruptive.

Disa ditë pasi kryeministri ka urdhëruar largimin nga puna të tre zyrtarëve të dyshuar për përfshirje në korrupsion, shefi i opozitës në Kosovë është shprehur se ky fenomen ka është prezent në nivelin më të lartë politik të institucioneve.

“Mendoj se korrupsioni nuk është sëmundje që i ka përfshirë sektorin civil. Korrupsioni ka përfshirë lidershipin politik në qeverisje. E vetmja mënyrë që të ndalet korrupsioni është që kryeministri dhe ministrat të mos përfshihen në korrupsion. Këto janë praktika kryesisht të qeverive të lindjes që të viktimizohet dikush, por kjo nuk është luftë kundër korrupsionit”, tha Haradinaj.

Sipas Haradinajt PDK dhe LDK po përpiqen të kontrollojnë Komisionin Qendror të Zgjedhjeve, por zëdhënësi i PDK-së, Blerand Stavileci e ka kundërshtuar këtë fakt.

“Është hetuar një qasje deri më tani. Ju e shihni një ndërhyrje në emërime, një pengesë, një vonesë, një bllokim i këtyre mekanizmave, i KQZ-së dhe i Sekretariatit andaj kjo në logjikën tonë është një agjendë e institucioneve të Kosovës për të ulur aftësitë, kapacitetin dhe kredibilitetin tonë për mbajtje të zgjedhjeve të lira dhe të rregullta”, tha Haradinaj.

“Komisioni Qendror Zgjedhor është një komision i pavarur dhe rrjedhimisht si i tillë në bazë të roleve dhe funksioneve që ka i ushtron edhe detyrat e përgjegjësitë. Konsiderojmë që këto deklarata janë një tendencë për ta zhvendosur vëmendjen e opinionit publik drejt gjërave të parëndësishme”, tha ndërkaq Stavileci.

Javë më parë Haradinaj iu ka bërë thirrje organizatave ndërkombëtare OSBE dhe Këshilli i Evropës që të jenë më të angazhuara se kurrë më parë në monitorimin e procesit zgjedhor në Kosovë. /alsat/