KS vendos per fillimin e bisedimeve per statusin e Kosoves

[Arb]

Bërns përfaqëson SHBA-të në bisedimet për Kosovën

Nënsekretari amerikan i Shtetit, Nikolas Bërns do të përfaqësojë Shtetet e Bashkuara në bisedimet për të ardhmen e statusit të Kosovës, njofton BBC. Këtë e bëri të ditur zyra e shtypit e Departamentit amerikan të Shtetit në prag të takimit të Grupit të Kontaktit në Uashington.


Grupi i Kontaktit që përbëhet nga SHBA, Britania e Madhe, Franca, Italia, Gjermania dhe Rusia, takohet të mërkurën. Muajin e kaluar, Bërns vizitoi Prishtinën dhe pas takimeve me zyrtarë të lartë të Kosovës dhe me shefin e misionit të OKB-së, Soren Petersen deklaroi se qëndrimi i administratës amerikane është se në Kosovë nuk duhet të vazhdojë status quo-ja dhe se njerëzit ne Kosovë duhet të përcaktojnë të ardhmen e tyre.

RTK

[Arb]

Zyra e Presidentit të Kosovës mirëpret emërimin e Ahtisarit si emisar i Kombeve të Bashkuara për Kosovën

Prishtinë, 1 nëntor - Zëdhënësi i Presidentit të Kosovës tha se mirëpret emërimin e Marti Ahtisarit si emisar i OKB së për bisedat që duhet të përcaktojnë statusin politik të Kosovës.
"Besojmë se z. Ahtisari dhe emisarët nga SHBA të dhe Evropa, bashkë me të gjithë Grupin e Kontaktit, do të krijojnë kornizën për zgjidhje të statusit mbi bazën e vullnetit politik të popullit të Kosovës për pavarësi dhe respektim të plotë të të drejtave qytetare e minoritare për të gjithë", u shpreh zëdhënësi Muhamet Hamiti.
"Synimi i të gjithëve duhet të jetë një Kosovë demokratike, në paqe me veten dhe me të tjerët, vend që merr përsipër obligimet ndërkombëtare dhe integrohet plotësisht në strukturat euroatlantike", tha ai
Zëdhënësi Hamiti gjithashtu deklaroi se "beson fuqishëm se procesi i përcaktimit të statusit të Kosovës do të bëjë që Prishtina, kryeqyteti ynë, të aspirojë natyrshëm me kryeqytetet e vendeve fqinje, Tiranën, Shkupin, Beogradin e Podgoricën, për fqinjësi dhe bashkëpunim të mirë në rajon dhe anëtarësi të barabartë të të gjitha vendeve tona në bashkësinë e kombeve të lira".

QIK-u

[Arb]

Ollbrajt: Shpresoj që Kosova të marrë në dorë fatin e saj

Zëri i Amerikës (01.11.2005)

Ish sekretarja amerikane e shtetit Madeleine Ollbrajt, e cila njihet si njëra prej arkitekteve të ndërhyrjes së Natos në Kosovë tha se shpreson që shoqëria kosovare të bëhet një shoqëri shumetnike e cila të jetë e orientuar nga Brukseli.



Në komentet që bëri sot në Uashington për Zërin e Amerikës, ish sekretarja amerikane e shtetit tha se është shumë e kënaqur që bisedimet për statusin e Kosovës do të fillojnë.

Shpresoj, tha zonja Ollbrajt, se bisedimet për statusin do të bëjnë të mundur që populli i Kosovës të ketë në dorë fatin e tij dhe në të njëjtën kohë që në Kosovë të ndërtohet një shoqëri shumetnike.

Këtë verë, kur isha në Kosovë, tha ish sekretarja e shtetit, u takova me disa serbë të cilët tani ndjehen të izoluar dhe kjo është shqetësuese. Shpresa ime për Kosovën ka qenë gjithmonë që ajo të jetë një shoqëri e lulëzuar shumetnike, një shoqëri e cila të jetë shumë më tepër e interesuar për atë që ndodh në Bruksel se sa për atë që ndodh në Beograd.

Shpresoj, tha zonja Ollbrajt, se bisedimet për çështjen e statusit do të arrijnë të zgjidhin disa prej këtyre çështjeve.

Zonja Ollbrajt i bëri komentet në pushimin e një konference ku u diskutua mbi trafikun e qenieve njerëzore dhe mbi çështjen e refugjatëve në botë.

[Arb]

Sot në Uashington do të zhvillohet një takim i Grupit të Kontaktit për Kosovën

Uashington, 2 nëntor - Sot në Uashington do të zhvillohet një takim i Grupit të Kontaktit, në të cilin do të përcaktohet gjithë korniza e veprimit gjatë procesit të zgjidhjes së statusit politik të Kosovës.

Takimin pritet ta drejtojë nënsekretari amerikan i Shtetit, Nikolas Bërns dhe në të pritet të marrë pjesë edhe i ish presidenti i Finlandës, Marti Ahtisari.

Grupi i Kontaktit përveç tri parimeve kryesore për Kosovën, të përcaktuara kohë më parë, do të përcaktojë edhe parime të tjera për bisedimet statusore.

[Arb]

Deklarate e Parlamentit Britanik: Te njihet Pavaresia e plote e Kosoves

"Kosova duhet te jete shtet i pavarur sa me shpejt qe te jete e mundur," ka thene ish Ministri i Europes, Denis MacShane

Ne mesazhin e tij te qarte pro-pavaresise se Kosoves ne tjerash ai po ashtu ishte shprehur se, "Ka ardhur koha te themi se Kosova mund te behet nje Shtet i Pavarur, duke pranuar pergjegjesite e nje Shteti te Pavarur."

Artikullin e plote e gjeni tek, www.balkanweb.com

[Arb]

Arben Xhaferri: Kosova te nderroj emer

Kreu i PDSH-se ka vleresuar se kerkesa e Kosoves per Pavaresi nuk eshte pjelle e retorikes nacionaliste, por nje realitet qe ne 100 vjet Serbet nuk arriten dot t'a zgjidhnin kete ceshtje. "Por tani eshte rradha e Shqiptareve qe t'a zgjedhin nje here e pergjithmone," shton ai.

Lideri i PDSH-se ka shprehur verejtje per emrin e Kosoves duke e quajtur kete emer nocion Sllav, nderkohe qe sipas tij, varianti origjinal duhet te ishte Dardani.

BW

[Arb]

Uesli Klark: Nuk duhet të ketë ndarje të Kosovës

03 nëntor 2005 /TN

Zëri i Amerikës (02.11.2005) Në komentet që bëri për Zërin e Amerikës, ish komandanti suprem i NATO-s, Uesli Klark tha se gjatë bisedimeve për statusin përfundimtar të Kosovës do të ketë vështirësi sepse çështje të tilla janë shumë emocionale. Gjenerali Klark i bëri komentet gjatë një konference të zhvilluar dje në Uashington për çështjen e parandalimit të genocidit dhe spastrimit etnik në botë.

Gjenerali Klark ka qenë ndër figurat kryesore të administratës së Presidentit Klinton që u angazhua në fushatën e NATO-s për të ndalur spastrimin etnik në Kosovë.

Tani, gjatë vjet pas përfundimit të konfliktit, gjenerali në pension e përshëndet faktin që komuniteti ndërkombëtar i ka hapur dritën e jeshile fillimit të bisedimeve.

“Bisedimet duhet të fillojnë këtë vit sepse koha nuk pret. Durimi i njerëzve ka kufi dhe pengesat apo zvarritjet e mëtejshme nxisin nervozizëm më të madh dhe inkurajojnë ata njerëz që dëshirojnë të pengojnë lëvizjen e mëtejshme përpara,” tha gjenerali Klark.



Si ushtarak me përvojë në zgjidhjen e konflikteve, gjenerali Klark ka besim tek arritja e paqes:

“Një ditë paqja do të arrihet por ne nuk e dimë se sa kohë do të duhet. Emocionet rreth çështjeve si kjo duan kohë të gjatë që të qetësohen. Prandaj gjatë procesit do të ketë shumë zemërim dhe shumë frikë midis mjaft njerëzve në Kosovë.”

Gjenerali Klark thotë se nuk duhet të ketë ndarje të Kosovës.

“Mendoj se duhen dhënë më tepër sigurime konkrete për mbrojtjen e pakicave dhe për pjesmarrjen e tyre në qeverisje. Gjithashtu duhet garantuar se forcat e sigurimit nuk do të mbizotërohen nga njëra palë e vetme dhe kjo kërkon veprime të forta ligjore për të ndjekur ata njerëz që bëjnë frikësime dhe kërcënime. Fjala është për një farë plani për mbrojtjen e pakicave.

Nuk do të dëshiroja të shikoja ndarjen e Kosovës, nuk do të dëshiroja që pjesa veriore e Kosovës të kishte parlamentin e saj të veçantë apo qeverisjen e saj sepse kjo do të ishte një zgjidhje e gabuar e çështjes. Kosova, për mendimin tim, duhet të jetë një e tërë dhe me një qeverisje të vetme.”

[Arb]

Hollbruk thotë se statusi përfundimtar i Kosovës do të jetë pavarësia

Uashington, 4 nëntor - Ish-diplomati amerikan Riçard Hollbruk, i ka deklaruar "Zërit të Amerikës" se statusi përfundimtar i Kosovës do të jetë pavarësia. Por, ai shtoi se duhet kuptuar mirë se kjo mund të ndodhë vetëm nëse jepen garanci të hekurta, siç u shpreh ai, për serbët e Kosovës, për sigurinë e tyre, monumentet e tyre fetare dhe kulturore dhe shkollat e tyre.

Shqiptarët po e bëjnë pavarësinë shumë më të vështirë me agresivitetin që po tregojnë ndaj serbëve, tha Hollbruk. Nëse nuk ka garanci të tilla, atëhere pavarësia do të vonohet shumë. Shqiptarët duhet ta kuptojnë se tokën duhet ta gëzojnë në paqe së bashku me serbët dhe nuk mund t'i dëbojnë ata.

Është e qartë për cilindo që ka qenë në Kosovë dhe që ka vizituar monumentet fetare se ashtu si në Jeruzalem, atje kanë bashkekzistuar dy kultura të lashta në të njëjtin vend dhe duhet të vazhdojnë të gjejnë mënyrën për të ekzistuar si të tilla, tha ish diplomati Riçard Hollbruk.

[Arb]

Statusi i Kosovës duhet të ndihmojë stabilizimin e rajonit dhe avancimin e tij drejtë integrimeve evro atlantike

Uashington, 4 nëntor - Grupi i Kontaktit riafirmon se do të luajë rol qëndror në bisedimet për statusin e Kosovës. Zëdhënësi i Departamentit amerikan të Shtetit, Shon Mekkormak tha se drejtorët politikë të Grupit u takuan të mërkurën në mbrëmje me të dërguarin e posaçëm të Kombeve të Bashkuara, Marti Ahtisari, për të diskutuar rreth procesit për fillimin e negociatave për statusin.

Mekkormak ritheksoi besimin e Uashingtonit se shqiptarët e Kosovës dhe Beogradi duhet të tregojnë vullnet për kompromis, për të arritur marrëveshje, njofton radioja "Evropa e lirë".

"Qëllimi ynë për të gjithë procesin është që palët të arrijnë marrëveshje përmes negociatave dhe kompromis që do të sigurojë njerëzit e Kosovës dhe fqinjët e tyre me një atë ardhme të sigurtë dhe demokratike. Statusi i ardhshëm i Kosovës duhet të ndihmojë stabilizimin e rajonit dhe avancimin e tij drejtë integrimeve evro atlantike" tha Mekkormak.

QIK-u

[Arb]

Kirk: Kosova duhet të jetë e pavarur por ajo duhet të respektojë të drejtat e pakicave

05 nëntor 2005 /TN

Zëri i Amerikës (04.11.2005) Vehbi Bajrami

Anëtari i Dhomës së Përfaqësuesve të Kongresit amerikan, Mark Kirk thotë se çështjet që kanë të bëjnë me statusin e Kosovës tani për tani janë lënë në hije në Kongres për shkak të problemeve të tilla si Iraku, Koreja e Veriut dhe Irani.

Republikani Mark Kirk është nënkryetar i grupit të çështjeve shqiptare në Kongresin amerikan. Ai thotë se interesimi për shqiptarët i lindi kur shërbente në marinën e Shteteve të Bashkuara.



"Na urdhëruan të shkonim në bazën e Avianos në Itali dhe prej andej kryem bombardime në Serbi dhe në Kosovë në mbështetje të Natos. Në atë kohë, në jetën civile punoja për Kongresin, megjithëse nuk isha kongresmen. Para luftës e kisha vizituar Kosovën disa herë. Jam takuar me një familje në fshatin Qirez pas një masakre që ndodhi atje. Isha gjithashtu amerikani i fundit që takohesha me gjeneralin serb Sreten Llukiç, pikërisht një natë para se ai të urdhëronte fillimin e operacionit Patkoi. Më kujtohet se në takimin që patëm në Prishtinë unë i bëra atij pyetjen e vështirë: çfarë do të ndodhte nëse NATO-ja fillon bombardimet kundër jush? Gjenerali u inatos shumë dhe neve na u desh të largoheshim nga takimi."

Ai tregon se pas luftës shkoi përsëri në Kosovë dhe i kërkoi shoferit të taksisë ta çonte në vendin ku kishte patur zyrën gjenerali Lukiç. E gjetëm me vështirësi vendin, kujton ai, sepse aty nuk kishte mbetur gjë tjetër veçse një gropë e madhe nga një bombardim i NATO-s.

Si rezervist, në vitin 2000, Mark Kirk ka kryer fluturime edhe në Irak me skuadriljen e tij. Ai kujton se si në Irak ai ndeshi në të njëjtët njerëz kundër të cilëve kishte luftuar në Kosovë.

"Këta ishin disa nga oficerët serbë por që shërbenin tani në sistemin e mbrojtjes ajrore të Saddam Husseinit, të cilët më parë kishin shërbyer në ushtrinë jugosllave."

Ligjvënësi mendon se Kosova është qysh tani vend i pavarur dhe sipas tij ajo duhet të jetë e tillë. Ai e argumenton kështu pikpamjen e tij.

"Natyrisht, kjo është një çështje delikate prandaj ne duhet të arrijmë një farë marrëveshje rreth Kosovës që ajo të jetë pak a shumë si Tajvani – me një ushtri të pavarur, me parlament të pavarur dhe me një farë konfederate të lirë me pjesën tjetër të ish Jugosllavisë. Por mendoj se dita e sundimit të plotë të Serbisë mbi Kosovën ka marrë fund dhe kjo për shkak të luftës. Ushtria serbe u kthye kundër popullit kosovar dhe kujtimi i këtij fakti nuk e lejon kurfarë integrimi të plotë me Serbinë. Por zoti Kirk paralajmëron se të drejtat e pakicave duhet të respektohen sepse nëse Kosova kthehet në një diktaturë shqiptare, thotë ai, ajo nuk mund të bëhet pjesë e Evropës."

Tani për tani, thotë zoti Kirk, Kosova ka mbetur disi në hije në Kongresin amerikan.

"Ajo ka mbetur në hije për shkak të Irakut, Iranit, Koresë së Veriut, forcimit të Kinës. Por sa herë që anëtarët e Kongresit mendojnë për Kosovën, ata mendojnë për të si një fitore e madhe, një fitore e madhe për të drejtat e njeriut. Ekspertët që e ndjekin Kosovën nga afër, vlerësojnë faktin se me 17 mijë trupat që ne kemi atje, ne po stabilizojmë krejt rajonin. Ne e vlerësojmë shumë kontributin me trupa të vendeve evropiane, por boshnjakët dhe kosovarët e dinë se Shtetet e Bashkuara janë i vetmi vend që mundi të ishte vërtet i efektshëm në ruajtjen e paqes kur serbët u përpoqën ta prishin atë."

Mark Kirk përfaqëson një zonë të shtetit Ilinoi ku jetojnë shumë shqiptarë dhe ai ka një vlerësim të lartë për ta.

"Ne themi ndonjëherë me shaka se nga të 10 mijë restorantet që ka në Ilinoi, 5 mijë janë të shqiptarëve. Ne e shikojmë se shqiptarët janë të pasur, kudo në botë përveç në Shqipëri. Shqiptaro-amerikanët që jetojnë në rajonin e Çikagos janë në një masë të madhe biznesmenë shumë të suksesshëm, janë gjithashtu qytetarë mjaft të angazhuar në politikë."

Mark Kirk thotë se shqiptarët e kanë mbështetur shumë në fushatën e tij për t’u zgjedhur në Kongres.

Ligjvënësi Kirk ka marrë pjesë në operacionet e bombardimeve të NATO-s kundër ish-Jugosllavisë në vitin 1999 dhe thotë se Kosova duhet të jetë e pavarur por ajo duhet të respektojë të drejtat e pakicave.

[Arb]

Bërns: SHBA-të do ta bllokojnë Serbinë që t'i bashkohet NATO-s nëse nuk e zgjidh kontestin territorial me Kosovën

QIK-u

Uashington, 9 nëntor – Shtetet e Bashkuara do të bllokojnë Serbinë që t'i bashkohet NATO-s nëse nuk e zgjidh kontestin territorial me Kosovën, ka thënë një zyrtar i lartë amerikan, duke vënë kështu një kërkesë të re amerikane ndaj Beogradit, njofton Rojter. Zyrtari numër tre i Departmentit të Shtetit, Nikolas Bërns, përvijon kushtin amerikan për të bindur Serbinë për të kërkuar zgjidhjen, edhe nëse Beogradi mund të humbë autoritetin mbi Kosovën nëse arrin marrëveshjen.

Më herët, Shtetet e Bashkuara kanë thënë se Serbia duhet të kapë dy kriminelët e luftës të rangut të lartë para se të mund të hyjë në negociata, si hap të parë drejt anëtarësimit në Aleancën Veriatlantike. Por dje (të martën), Bërns tha se edhe nëse Serbia e përmbush këtë kërkesë, Shtetet e Bashkuara do të bllokojnë hyrjen e saj në këtë organizatë, nëse Beogradi nuk lëviz në Kosovë.

[Arb]

Bërns: Kosova mund ta arrijë pavarësinë vetëm nëse shqiptarët shumicë tregojnë se mund të qeverisin drejt

Uashington, 9 nëntor - Nënsekretari amerikan i Shtetit Nikolas Bërns tha se Kosova mund ta arrijë pavarësinë vetëm në qoftë se shqiptarët shumicë në Kosovë tregojnë se mund të qeverisin drejt dhe me efikasitet. Bërns u shpreh para Komitetit të Senatit për Marrëdhënie të Jashtme se nuk është detyra e tij të rekomandojë nëse Kosova duhet të bëhet e pavarur, apo të mbetet pjesë e Serbisë.

Por, megjithatë Bërns porositi se nëse shqiptarët e Kosovës duan ta arrijnë pavarësinë, atëherë fillimisht dhe para së gjithash duhet të demonstrojnë qeverisje të mirë.

Nënsekretari Bërns u bëri thirrje udhëheqësve shqiptarë të Kosovës që të lënë mënjanë mosmarrëveshjet politike dhe personale tani që bisedimet për statusin përfundimtar do të fillojnë

Ai paralajmëroi se NATO ja do të përdorë forcën kundër çdo përpjekjeje, e cila përmes dhunës do të ndikonte në procesin.

Bërns, i cili ka drejtuar deri tani përpjekjet diplomatike të SHBA-ve për të vënë në lëvizje procesin e përcaktimit të statusit, tha se ka rëndësi që Uashingtoni dhe aleatët e tij të mbeten neutralë në qendrimin e tyre për çështjen e statusit sepse e ardhmja e Kosovës tha ai, është përgjegjësi vetëm e shqiptarëve dhe serbëve që jetojnë atje si dhe e qeverisë se Sërbisë e Malit të Zi.

Por, rezultati përfundimtar i bisedimeve që pritet të fillojnë pas disa javësh, tha zoti Bërns, duhet të respektojë faktin bazë se 90 përqind e popullsisë së Kosovës përbëhet nga shqiptarë, të cilët u trajtuan mizorisht nga qeveria e Sllobodan Millosheviçit.

Gjithashtu, tha numri tre i Departamentit të Shtetit, popullsisë serbe të Kosovës duhet t'i jepen siguri se ajo do të ketë një të ardhme dhe se kishat dhe objektet e saj kulturore do të respektohen.
Siç ndodh në çdo proces negociatash, tha nënsekretari Bërns, asnjëra palë nuk merr çdo gjë që dëshiron. Për të arritur një rezultat të qendrueshëm, tha ai, palëve do t'u kërkohet ndonjëherë që të bëjnë kompromise.

Bërns tha se Shtetet e Bashkuara dhe aleatët e tyre kanë vendosur rreth disa parimeve të cilat duhet të përcaktojnë procesin e negociatave: se kthimi në situatën para vitit 1999 është i paprtanueshëm; se nuk do të ketë ndryshim të kufijve ekzistues të Kosovës dhe se nuk do të ketë ndarje të saj.

Parime të tjera për arritjen e zgjidhjes, tha ai, janë respektimi i plotë i të drejtave të njeriut dhe mbrojtja e trashëgimisë kulturore të pakicave. Grupi i Kontaktit, tha ai, ka rënë dakord që të përjashtojë nga procesi ata elementë që predikojnë dhunën. Pasi të ketë filluar, tha nënsekretari i shtetit, procesi i statusit duhet të vazhdojë pa ndërprerje.

Ndërkaq arkitekti i Marrëveshjeve të Dejtonit, Riçard Hollbruk, i cili gjithashtu dëshmoi në këtë seancë, tha se nuk mund të shikojë një status tjetër për Kosovën përveç pavarësisë, por kjo, theksoi ai, nuk mund të arrihet pa garanci të hekurta për sigurinë dhe mbrojtjen e të drejtave të pakicës serbe. Pavarësia, tha Hollbruk, nuk mund të vijë për të zëvendësuar njërën formë të shtypjes me një tjetër.

Çfarëdo që të ndodhënë Kosovë do të jetë e nevojshme të qendrojë një forcë sigurie dhe kjo forcë duhet të përfshijë patjetër trupa amerikane, tha Hollbruk, duke shtuar se synimi afatgjatë duhet të jetë intergrimi i plotë në një Evropë të unifikuar i krejt Ballkanit, përfshirë Serbinë, Bosnjen, Shqipërinë, Malin e Zi, Maqedoninë dhe Kroacinë.

Riçard Lugar, kryetar i Komisionit të Senatit për Marrëdhëniet me Jashtë, tha se ngushtimi i distancës diplomatike midis shqiptarëve dhe serbëve të cilët kanë qëndrime të ndryshme për çështjen e statusit, do të kërkojë kompromis midis palëve si dhe një angazhim të vazhdueshëm nga ana e komunitetit ndërkombëtar dhe e Shteteve të Bashkuara.

Nënkryetari i komisionit, senatori Xhozef Bajden, tha se një formë pavarësie për Kosovën është e vetmja zgjidhje që do të lejojë qytetarët e Kosovës dhe të Serbisë të realizojnë një të ardhme qendrueshmërie dhe moderniteti.

Senatorët Xhorxh Voinoviç dhe Pol Sarbejns shprehën shqetësim për gjendjen e pakicës serbe dhe bënë pyetje të hollësishme lidhur me garancitë që duhet të ketë pakica serbe në Kosovë. (RFE,VOA)

[Arb]

Klinton kërkon respektim të ligjit dhe të drejtave të njeriut në Kosovë

Në një pronocim rreth zhvillimeve në Kosovë për programin shqip të radios "Evropa e Lirë" ish presidenti amerikan Bill Klinton tha: "Unë e mbështeta lirinë tuaj dhe ende vazhdoj ta bëj një gjë të tillë. Tani është shumë e rëndësishme që ne në Kosovë të mbajmë rendin dhe njëherësh të respektojmë të drejtat e ligjshme të gjithë njerëzve, përfshirë pakicat."

"Ajo çfarë serbët bënë ndaj shqiptarëve të Kosovës ishte e tmerrshme, por shqiptarët e Kosovë nuk duhet të përgjigjen në të njëjtën mënyrë. Ne duhet të gjejmë rrugën për të jetuar të gjithë së bashku, për të punuar së bashku dhe të ecim përpara së bashku", tha presidenti Klinton.

[Arb]

Ish Presidenti Amerikan, Bill Klinton, ne nje editorial te botuar ne te perditshmen Amerikane, "Wall Street Journal," ka shprehur qendrimin e tij per nje perfshirje me te madhe te Shteteve te Bashkuara te Amerikes ne bisedimet per statusin perfundimtar te Kosoves.

Ballkan Web

[Arb]

Kalmi Rej:Zvicra mbështet pavarësinë formale të Kosovës

"Zvicra mbështet pavarësinë formale të Kosovës" tha në Lubjanë, Ministrja e Jashtme Mishel Kalmi Rej. Sipas saj, mungesa e statusit shkakton vështirësi të shumta politike dhe ekonomike. "Andaj Zvicra angazhohet për parimin, standardet pas statusit" tha Kalmi Rej, pas takimit me Ministrin e Jashtëm të Sllovenisë, Dimitrij Rupel.

Ai tha se "statusi i pazgjidhur i Kosovës paraqet burim potencial të destabilitetit në Evropën Juglindore, prandaj bashkësia ndërkombëtare duhet të mbështes procesin e bisedimeve për statusin e Kosovës".

RTK