FATMIR LIMAJ BRAKTIS PDK'ne

[Batoja]

Kundërshtimi i Fatmir Limajt për të qenë kandidat i PDK’së për prefekt të Prishtinës duket se ka pasur një kontekst shumë më të gjerë. Heroi i rrugëve gjendet në një konflikt të zgjeruar me Kryeministrin Hashim Thaçi. Ai me kolegët po shqyrton ndarjen ose kalimin në Aleancën për Ardhmërinë e Kosovës.

Nga Express më 01.04.2009 në ora 8:04
Kur gjithçka dukej se po shkonte më së miri për Kryeministrin Hashim Thaçi në rrugëtimin e tij politik, ai gjendet përball një rreziku të menjëhershëm dhe serioz - ndarjen e Partisë Demokratike të Kosovës.

Thaçi gjendet në një konflikt gjigantësh dhe të eskaluar me politikanin e dytë më të votuar në Kosovë, Ministrin e Transportit dhe Telekomunikacionit Fatmir Limaj.

Përderisa skena e partive politike kosovare gjendet në një kaos të vërtetë me plot transfere dhe paqartësi orientimi, PDK’ja shihej si subjekti më kompakt dhe me një popullaritet konsistent që i garantonte siguri përpara zgjedhjeve të ardhshme.

Konflikti është vetëm i rishfaqur, mesa duket.
Të dy liderët e PDK’së kishin qenë në marrëdhënie të acaruara në kohën kur Fatmir Limaj gjendej në Tribunalin e Hagës duke u përballur me akuzat për aktivitetin e tij në UÇK. Limajt i ishte dashur kohë për të bindur vetën të vazhdojë të mbetej krah Thaçit.

Marrëdhëniet ishin përmirësuar me kohë përderisa Limaj kishte pranuar të konkurrojë për prefekt të Prishtinës si opsioni më serioz i PDK’së. Kohës së fundit Limaj, madje, në paraqitjet e tij televizive, duke folur me tepër pozitivitet për Thaçin, dukej sikur kishte aplikuar modelin e zyrtarëve të LDK’së kur dikur flisin me adhurim për Ibrahim Rugovën.

Zyrtarë të afërt me Fatmir Limajn thonë se tensioni mes dy liderëve ka ardhur pas insistimit të Thaçit që Ministri aktual i Transportit të konkurrojë për Prefekt të Prishtinës. Kryeministri, po ashtu, e ka paralajmëruar se kushdoqoftë Ministri i radhës strategjia e investimit në rrugë do të ndryshojë dhe se nuk do të punohet vetëm me kesh.

Zëdhënësi i Qeverisë, Memli Krasniqi, ka mohuar se Kryeministri gjendet në konflikt me Limajn.
“Vlerësimi i punës së ministrave është paralajmëruar me kohë. Ky vlerësim do të jetë profesional dhe prej tij nuk përjashtohet askush. Kryeministri ka idenë e qartë tashmë se ku duhet të ndërhyjë për të forcuar efikasitetin qeverisës”, ka thënë Krasniqi për Express.

Ministri Fatmir Limaj ka konfirmuar për Express se nuk e ka ndërmend të konkurrojë për Prishtinën. Ai po ashtu ka thënë se për secilin është e qartë se punët në ndërtimin e rrugëve kanë qenë impresive.
“Tentimet për të ndryshuar diçka nga kjo qasje do të kenë pasoja zinxhirore”, ka thënë Limaj.

Një këshilltar i tij i ka thënë Express’it se askush në PDK nuk dëshiron që gjërat të shkojnë në pakthim dhe të rrezikojnë të ardhmen e kësaj partie. Sidoqoftë, ai ka insistuar se një numër deputetësh të partisë do t’i bashkoheshin Limajt. “Mund të konfirmoj se ka pasur edhe mesazhe nga zyrtarë të AAK’së për një takim të mundshëm”, ka thënë ai.

Fatmir Limaj pritet të mbajë një konferencë për gazetarë për të sqaruar vendimet e tij, në ditën e parë të muajit prill, të mërkurën, në Ministrinë e Transportit dhe Telekomunikacionit.