Akuza pa fakte.

[pirro]

Akuza pa fakte
Një ditë pas shkrimeve të BBC-së, në të cilat thuhet se ushtarë të Ushtrisë Çlirimtare të Kosovës kanë pasur kamp-burgje ku janë torturuar, vrarë e rrëmbyer civilë, kanë reaguar krerët e institucioneve të Kosovës. Të gjitha i quajnë akuza të pabazuara në fakte

Nga Nebih Maxhuni më 11.04.2009 në ora 8:50
Më i ashpri ka qenë presidenti Fatmir Sejdiu, i cili ka reaguar duke thënë se lufta e UÇK-së ka qenë luftë e drejtë dhe luftë për ekzistencën e qenies sonë.
“Çdo gjë e paargumentuar duhet marrë jashtë reales. Unë e them më sill faktet, atëherë del drejtësia”, ka vlerësuar presidenti i vendit.

Ai madje ka kritikuar Qeverinë e Serbisë duke thënë se zyrtarët e saj ende mbajnë në gjirin e tyre kriminelët e luftës.

Duke pohuar se institucionet e Kosovës synojnë integrimin në NATO dhe në BE, ai ka thënë se Serbia ende nuk është liruar nga gjykimet e saj apo nga qasja e saj që është e tejkaluar, që është konfliktuoze dhe që ka ambicie për të mbajtur tensione dhe ambicie e çmendur për të qenë dirigjues i rrjedhave dhe zhvillimeve të përgjithshme në rajon.

“Qeveria serbe mban në gjirin e saj kriminelë të luftës dhe nuk i dorëzon. Dhe e them se s’ka qeveri serbe, si ajo e Milosheviqit, po ashtu edhe qeveritë e mëvonshme që nuk e dinë se ku janë kriminelët e luftës”, është kundërpërgjigjur ai .

Edhe Qeveria e Kosovës ka hedhur poshtë akuzat se UÇK-ja ka vrarë, rrëmbyer e maltretuar civilë serbë në kamp-burgjet e saj.

Përderisa zyrtarë të lartë të institucioneve të Kosovës kanë reaguar duke hedhur poshtë akuzat, shefi i ELUEX, Yves de Kermabo gjatë vizitës së tij në Tiranë ka thënë se misioni që ai drejton është shumë i interesuar të zbardhë të vërtetën për “shtëpinë e verdhë” dhe akuzat që ka bërë ish kryeprokurorja Carla del Ponte.
Gjatë një konference për shtyp në Tiranë me ministrin e Drejtësisë, Enkelejd Alibeaj, Kermabon i është përgjigjur interesimit të gazetarëve për këtë çështje.

“Jemi të gatshëm për të nxjerrë në dritë të vërtetën”, ka deklaruar Kermabon

Edhe shefi i drejtësisë në EULEX, Parduca, duke komentuar këtë çështje, që është riaktualizuar pas një dokumentari të transmetuar nga BBC-ja, ka thënë se do të bëhet hetim vetëm nëse ekspertët do të binden nga faktet.
Më herët edhe Prokuroria e Përgjithshme e Shqipërisë, në një deklaratë për media, ka hedhur poshtë si të pabaza akuzat e ish- kryeprokurores Carla del Ponte për një trafik organesh të ushtarëve dhe civilëve serbë në Kosovë dhe Shqipëri në vitin 1999.

Xhavit Haliti, anëtar i kryesisë së Kuvendit të Kosovës, të gjitha këto shkrime nga mediat e huaja i cilëson një propagandë e orkestruar nga Qeveria e Serbisë.

Sipas tij, Serbia ka kapacitet shumë të fuqishëm propagandistik jo vetëm në mediat e saj, por edhe ato botërore, synimi i të cilave është komprometimi i çështjes së Kosovës. Haliti thotë se këto media disa herë kanë shkruar se si njerëzit në Kosovë janë vrasës, kriminelë dhe që Kosova është transit i drogës dhe i krimit të organizuar e të tjera. Krimet e kryera në Kosovë mundohen t`i vishen luftës së pastër të UÇK-së.

“Të gjitha krimet që i kanë bërë serbët ia faturojnë UÇK-së. Mendoj se edhe nga ana jonë mund të ketë pasur gabime, por kapacitetet e përgjegjshmërisë në UÇK, në rrethanat kur zinxhiri komandues dhe kontrolli politik ka qenë i kufizuar dhe duhet të jetë parasysh se nuk ka mundur të kontrollohet gjithçka, mund të jetë bërë ndonjë gabim, por assesi nuk mund të krahasohen apo barazohen krimet, të cilat i kanë bërë ushtria dhe serbët kundër popullatës shqiptare”, thotë Haliti.
gazetaexpress.com