Fjala e mjekëve

[Peja-Boy]

“Kemi bërë shtet, por a kemi vërtet shtet?” Këtë pyetje ua drejton me dhimbje, Sheremet Raci nga Siçeva e Klinës, të gjithëve në Kosovë. Sheremeti, të mërkurën e javës që kaloi, varrosi djalin e vet, Mensurin 21 vjeç, i cili dyshohet se u vra nga kushëriri i tij, Hasan Raci.





Një nga dëshmitë kryesore për lirim të Hasan Racit nga paraburgimi pas gjashtë muajsh, pas vrasjes së vajzës së tij 16 vjeçare, dhe shqiptimit prej dy vjetësh burg, por mbrojtje në liri, Gjykata e Qarkut në Pejë e ka marrë duke u bazuar edhe në mendimin e tre mjekëve të neuropsikiatrisë. Express sjell dokumentin e shkruar në origjinal.

Nga Jeton Musliu më 25.09.2009 në ora 8:16
Ekspertiza e mjekëve neuropsikiatër të Qendrës Klinike Universitare të Kosovës ka qenë njëra nga dëshmitë më të rëndësishme në procesin gjyqësor kundër Hasan Racit, 37 vjecarit, që ka vrarë vajzën e tij 16 vjeçare.

Trupi gjykues i Gjykatës së Qarkut në Pejë, si njërën ndër pikat bazë të marrjes së vendimit përfundimtar në lidhje me këtë rast, është mbështetur edhe në mendimin e mjekëve Dr. Fahri Drevinja, Dr. Nazife Sulejmani dhe Mr. Nada Morina.

Express ka siguruar këtë dokument të deponuar nga këta tre mjekë të Klinikës së Neuropsikiatrisë, të cilët gjatë procesit gjyqësor të kësaj çështjeje e kanë dorëzuar dhe nënshkruar pranë kësaj gjykate.

Në cilësinë e ekspertëve, tre mjekët, drejtues i të cilëve ka qenë Dr. Fahri Drevinja, gazeta është munduar t’i kontaktojë gjatë ditës së enjte thjesht për të shpjeguar ato që kanë shkruar në këtë dokument.

Kjo për faktin se mendimi i tyre i dhënë në lidhje me gjendjen psikike të Hasan Raci, është i mbushur me terminologji të cilat përveç rrethit mjekësor, vështirë se kuptohen nga njerëzit e thjeshtë.

Ky ekzaminim mjekësor, sipas këtij dokumenti, është hartuar pas rezultateve të mbajtjes në Klinikën e Neuropsikiatrisë në Prishtinë të Hasan Racit, nga data 24 mars deri më 3 prill 2009.

Derisa mjekët Fahri Drevinja dhe Nazife Sulejmani ndodhen jashtë Kosovës dhe kontakti me ta është i pamundur, gazeta ka biseduar me Mr.sci.Nada Morina.

“Unë nuk mund të them asgjë. Mjeku Fahri Drevinja ka qenë si kryesues i këtij ekipi të mjekëve dhe ju duhet të kontaktoni atë për sqarime”, thotë Nada Morina për Express.

Në të njëjtën kohë, gazeta ka provuar që “përkthimin” e këtij dokumenti ta bëjë ndonjë prej mjekëve të fushës përkatëse, por asnjë prej tyre nuk ishte i gatshëm ta bëjë këtë.

Për këtë arsye, Express sjell në vazhdim këtë dokument të shkruar në formën e vet origjinale, ndërkohë që në fund të dokumentit janë vulat dhe nënshkrimet e tre mjekëve dhe vula zyrtare e QKU-së.

Mendimi dhe konstatimi:
(Letra e mjekëve)

“Fjala është për një person i cili nuk ka histori të trajtimit psikiatrik. Ai manifeston karakteristika të presionit me reagime të shpejta impulsive, me prag të ulur të tolerancës në situatë frustrative me fleksibilitet të ulur, vetëkontroll.

Vërehen qëndrime rigjide, ngadalësim dhe kontroll më i dobët i vetvetes. Sa i përket sferës afektive dominon një disponim disforik, vështirësitë e kontrollit të afektit janë manifeste.

Nuk verifikohen çrregullime të përhershme ose të përkohshme mendore. Nuk vërehet ndonjë shkallë e retardimit mendor ose ndonjë sëmundje ose gjendje tjetër në shëndetin mendor ose fizik të tij.

Verbalisht është kritik për gjendjen në të cilën gjendet dhe manifeston pendim të thellë për veprën. Nuk pohon për ideacione suicidale. Tempore kriminis mendojmë që ngjarja është kryer në saje të reagimit të shpejta të tij, në saje të karakteristikave të tij, rigjiditetit të personalitetit të tij, në ato momente ai ka qenë mjaft i ngarkuar emocionalisht.

Ka reaguar me shpejtësi dhe pa i përpunuar mirë veprimet e tij. Do më thënë, vepra është kryer me shkaktar situacional të aty për atyshëm, pa u paramenduar më parë.

Mendojmë se vepra është kryer në afekt.

I njëjti gjatë qëndrimit në klinikë, përpos ekzaminimit psikiatrik, për nevoja të gjykatës është trajtuar me barna për qetësim, kështu që edhe nga përkrahja terapeutike tash është në gjendje më të mirë psikike.

Mund të ketë edhe momente që nga ngarkesa e lartë emocionale, dëshpërimi, humbja, mos të bashkëpunojë, por mendojmë se ajo mund të tejkalohet.

I njëjti duhet të jetë në kontroll të herëpashershëm te psikiatri për shkak të rrethanave të krijuara dhe rikujtimeve-ripërjetimeve emocionale nga ngjarja nga të cilat mund të dekompensohet.”