Shtetet e Bashkuara të Amerikës

[uliksi31]

Fried: Nuk do të lejojmë ndarjen e Kosovës


Shtetet e Bashkuara e kundërshtojnë ndarjen e Kosovës, tha për Radion Evropa e Lirë ndihmës-sekretari i Shtetit, Daniel Fried. "Ky nuk është vetëm mendim i Shteteve të Bashkuara, por edhe i partnerëve tanë evropianë. Madje, edhe Rusia formalisht e ka hedhur poshtë ndarjen e Kosovës", tha ai.
“Ne e hedhim poshtë ndarjen e Kosovës. Ne e kemi njohur pavarësinë e Kosovës dhe atë tërë Kosovën; dhe, në të njëjtën kohë, kemi insistuar, ndërsa Qeveria e Kosovës është dakorduar se duhet të respektohen të drejtat e komunitetit serb”, ka shtuar Fried.
“Ka pasur dhunë që nga shpallja e pavarësisë së Kosovës, më vjen keq të them, nga radikalët brenda komunitetit serb në Kosovë dhe e cila, druaj se është nxitur edhe nga disa radikalë në Beograd, i cili për fat të keq është mjaft i papërgjegjshëm”.
Fried ka shprehur keqardhje për incidentin, siç e quajti ai, të madh, që ka ndodhur ditë më parë në Mitrovicë. “Paqeruajtësit e Kombeve të Bashkuara, forcat e Kombeve të Bashkuara dhe KFOR-i, forcat e NATO-s, u sulmuan me granata dhe armë automatike. Kjo erdhi nga radikalët serbë. Kjo ishte gjë e keqe”, u shpreh ai.
Megjithatë ai thotë se Serbia duhet të shohë përpara drejt të ardhmes evropiane të saj. “Unë shpresoj se do të shohë. Serbia ka të drejtë për një të ardhme evropiane. Populli i Serbisë nuk do të duhej të shtyhet në izolim. Barriera të vetme ndërmjet Serbisë dhe Evropës tash janë ato, të cilat serbët do t'i vënë në rrugën e tyre”, përfundoi Fried. /rel/telegrafi/