Stuhitë më pyesin: E mbollët pemën?

[Rezart Palluqi]

Shqiptarë, vëllazërohuni!
Pemën stuhishkulur qindra herë,
lëreni të zërë rrënjë thellë.

Shqiptarë, flakni tutje gjilpërat syshpuse!
Rrëmbeni lopatat e kazmat!
Pemën kombëtare mbilleni,
para se të zgjohen orkanët nacionalistë.

Shqiptarë! Lërini lopatat e kazmat të flasin shqip!
Rrënjët e kombit të pijnë ujë në pusin më të thellë.
Stuhitë nuk po flejnë.
Stuhitë shtegtuan përkohësisht nën qiejt e tjerë.

Stuhitë nuk do vonojnë.
Drejt qiellit tonë do fryjnë!
Midis degëve të pemës tonë,
si shtrigë do të fishkëllejnë.

Nëse stuhitë e përmbysin pemën tonë mishtake,
si një dorë gishtthyer,
le të mos mallkojmë fatin tonë të zi!

E mbollët pemën... më pyesin stuhitë?


Rezart Palluqi


Holandë