Godet LDK-n

[pirro]

Foto: Fisnik Dobreci
Godet LDK’në
AAK’ja priti me entuziazëm Blerim Kuqin dhe Burim Ramadanin. Kuqi u zgjodh Sekretar Organizativ, e Ramadani, Sekretar i Përgjithshëm. Duke sjellë në ekipin e tij dy anëtarë të LDK’së, Ramush Haradinaj goditi partnerin e tij më strategjik. Lutfi Haziri tha se koha do ta vlerësojë nëse LDK’ja u dëmtua të premten

Nga Leonard Kerquki më 21.03.2009 në ora 9:59
Me votim unanim të Këshillit Drejtues, gati emocional, u prit të premten aderimi i Blerim Kuqit dhe Burim Ramadanit në subjektin e Ramush Haradinajt, Aleancën për Ardhmërinë e Kosovës.

AAK’ja u rezervoi atyre poste të larta dhe pritje të ngrohtë.

Blerim Kuqi, Ish Kryeshef Ekzekutiv i LDK’së, u zgjodh Sekretar Organizativ i AAK’së, e këshilltari i tij i dikurshëm, Ramadani, u zgjodh Sekretar i Përgjithshëm.

Dikush vrapoi ta mbushte me dru oxhakun e sallës së konferencave, duke çuar kështu në vend një nga porositë e Kanunit: “Miku do dru”.

Megjithatë, oxhaku lëshoi shumë nxehtësi, duke detyruar dy anëtarët e rinj që të largoheshin vazhdimisht nga foltorja.

Ramush Haradinaj e ka komentuar me humor situatën.

“Ne jemi të gëzuar dhe e kemi pritur me shumë gëzim, e për këtë edhe e kemi ndezur zjarrin më shumë se ç’duhet”, tha ai.

Në fjalën e tij, Lideri i AAK’së nuk e ka fshehur kënaqësinë që në ekipin e tij të ngushtë tash e tutje do të ketë Ish Kryeshefin Ekzekutiv të LDK’së.

“Në Kosovë kemi shumë punë që na presin dhe aktualisht punët nuk janë duke shkuar në drejtimin e duhur. Roli i subjekteve politike është me sjellë opsion për ta përmirësuar gjendjen në vend”, tha Haradinaj.

“Duke njohur z. Blerim Kuqi, duke njohur kontributin e tij kombëtar, duke njohur kontributin e tij në demokraci dhe shtetndërtim, po ashtu duke njohur z.

Burim Ramadani, njohjet profesionale që ka, ne kemi vlerësuar si veprim të drejtë që t’i sjellim në radhët tona”, shtoi ai.

Ngjashëm u shpreh edhe Nënkryetari i Parë i AAK’së, Blerim Shala, i cili duket të jetë meritor për inkuadrimin në AAK të Kuqit dhe Ramadanit.

“Është një ngjarje shumë me rëndësi për AAK’në”, tha ai.

“Në këtë mënyrë ne bëjmë një hap shumë të rëndësishëm në drejtim të përmirësimit të kualitetit të AAK’së. Aleanca, sipas vetë fjalës, është bashkim, tash e tutje do të jetë bashkim edhe më i madh i dijes, pragmatizmit dhe gatishmërisë për një qeverisje shumë më të mirë të Kosovës”, u shpreh Shala.

Më pas, fjala iu është dhënë anëtarëve më të rinj të AAK’së.

Blerim Kuqi shpjegoi se nuk i kishte mbetur më vend në LDK.

“Duhet ta pranoj para jush se ka qenë shumë vendim i vështirë për mua”, tha ai.

“Unë dua të them vetëm dy fjalë: Sot LDK’ja nuk ka zot shtëpie dhe është futur në një gjumë të thellë. Duke pasur parasysh këtë fakt dhe profilizimin e djathtë të AAK’së, atëherë ka qenë i natyrshëm kalimi im në AAK”, shtoi ai.

Burim Ramadani tha se në AAK ka gjetur hapësirën e duhur për t’i shërbyer vendit.

“Mendoj se këtë hapësirë për energji e kam parë te Kryetari Haradinaj, tek ekipi i tij, tek AAK’ja. Jam i bindur se kjo derë e hapur për mua në këtë rast, është derë e hapur edhe për gjithë rininë e Kosovës”, tha ai.

Lajmi për kalimin e Blerim Kuqit në AAK, nuk është pritur aspak mirë në LDK, e cila i dha një shtysë të madhe karrierës së tij politike.

Nënkryetari i LDK’së, Lutfi Haziri tentoi ta minimizonte rolin e Kuqit në LDK.

“Sa ka qenë në LDK, ka qenë në dy faza, jo gjithë kohën, ka qenë në fazën e paraluftës dhe në kohën e vonshme të pasluftës. Rikthimi i tij është vlerësuar me kohë, shkuarja e tij është vendim personal, ne nuk jemi marrë me asnjë lloj motivi për lëvizjen e tillë, por Presidenti i Republikës nuk ka ndërhyrë në politikat e LDK’së”, ka thënë ai.

Sipas tij, vendimi i Kuqit ishte pritur.

“Kanë qenë lëvizje të pritura, për motive të caktuara”.

Megjithëkëtë, Haziri ka thënë se koha do ta dëshmojë nëse të premten iu shkarkua apo ju humbje LDK’së.

“Koha do ta dëshmojë, absolutisht”, tha ai, duke kujtuar se Blerim Kuqi dikur ishte anëtar i Partisë Qendra Liberale e Kosovës, parti kjo që në zgjedhjet e para nacionale nuk arriti të hynte në Parlament.

Vendimi i Kuqit për t’u larguar nga LDK’ja erdhi pasi që Presidenti Sejdiu i kërkoi atij dorëheqjen nga posti i Kryeshefit Ekzekutiv.

Lutfi Haziri ka mbrojtur sërish vendimin e Presidentit.

“Tejkalimi i përgjegjësive dhe kompetencave të tij ka bërë mandej që LDK’ja ta aktivizojë stopin. Kështu ne nuk kemi lejuar që të irritohet masa dhe autoriteti i LDK’së”, ka thënë ai.

Vendimi i Ramush Haradinajt për të sjellë në ekipin e tij Blerim Kuqin dhe Burim Ramadanin konsiderohet një hap tejet i ndjeshëm për të, pasi që kështu ai goditi partnerin e tij strategjik, LDK’në.

Nënkryetari i LDK’së, Lutfi Haziri, në një mënyrë, e pranoi se raportet mund të vështirësohen.

“Nuk besoj se prishen marrëdhëniet. Ne do të vazhdojmë bashkëpunimin me të gjitha partitë politike. Tash, a mund të fërkohen interesat, mund të them që po, pak a shumë. Mirëpo në këtë rast unë nuk e shoh rolin e AAK’së, por të individit që kalon atje”, tha Haziri.

Nga ana e tyre, Ramush Haradinaj dhe Blerim Shala janë përkujdesur të jenë politikisht korrekt me LDK’në, përmes së cilës projektojnë kthimin në ndërtesën e Qeverisë së Kosovës.

“Unë kam komunikim të rregullt me LDK’në, me strukturat udhëheqëse dhe vazhdoj ta vizitoj rregullisht Familjen Rugova. Ardhja e Kuqit është shërbim për vendin dhe njëkohësisht mund të jetë një ndihmesë në krijimin e urave të reja me LDK’në”, tha Haradinaj.
Blerim Shala tha se bazë e bashkëpunimit mes AAK’së dhe LDK’së janë botëkuptimet e njëjta.

“Unë do të shtoja se partneriteti mes AAK’së dhe LDK’së bazohet në afërsi botëkuptimesh politike, në afërsi koncepcionesh politike, e jo në personalitet e individë”, tha ai.

“Ne jemi të bindur se LDK’ja do ta gjejë veten në konceptin e vet bazik, që është rugovizmi, koncept ky që ka qenë udhërrëfyes që LDK’ja t’i fitojë gjithmonë zgjedhjet”, shtoi Shala.