Skandali, Berisha dhuratë Greqisë 225 km2 në Jon

[Llapjani_HH]

Skandali, Berisha dhuratë Greqisë 225 km2 në Jon

Publikuar më 29 prill, 2009 në orën 11:21

Specialistët e topografisë zbardhin zgjerimin e territorit grek pranë brigjeve shqiptare. Qeveria shqiptare i ka dhuruar Greqisë rreth 225 km2 sipërfaqe ujore dhe grekët afrohen 11 kilometra drejt Karaburunit. Faktet e reja që boton sot “Gazeta Shqiptare” rrëzojnë totalisht pretendimet e djeshme të Ministrisë së Jashtme dhe asaj të Mbrojtjes.

DOKUMENTI I MARREVESHJES



TIRANE, 29.04.2009

Shqipëria është trajtuar si një plaçkë lufte në marrëveshjen që qeveria Berisha nënshkroi me Greqinë dy ditë më parë. Shteti ynë, jo vetëm që është tkurrur në kufijtë e tij detarë në jug të vendit, por ka humbur edhe pozitat e tij të dikurshme në det, të cilat kanë qenë tepër strategjike në raport me Greqinë. Dëshmi e këtij pretendimi është pikërisht vija e re e kufirit detar e përcaktuar nga kjo marrëveshje, që rezulton totalisht në shkelje të hapur të parimit të baraslargësisë së këtij kufiri mes dy shteteve. Është pikërisht ky parim, të cilin kjo marrëveshje pretendon se respekton në nenin 1 të saj, ku shprehimisht thuhet se: “Kufiri detar ndërmjet Republikës së Shqipërisë dhe Republikës së Greqisë do të caktohet në përputhje me parimin e baraslargësisë. Në mënyrë më specifike, vija e delimitimit do të jetë vija e mesme, çdo pikë e së cilës është e baraslarguar nga pikat më të afërta të vijës bazë (si kontinentale ashtu edhe ishullore), nga e cila matet gjerësia e ujërave territoriale detare”. Por, në fakt, nuk rezulton kështu.

Me ndihmën e një eksperti topograf, “Gazeta Shqiptare” boton sot faktet që vërtetojnë këtë konkluzion. Në bazë të marrëveshjes, ndarja e ujërave territoriale Shqipëri-Greqi është përcaktuar tanimë në bazë të 150 koordinatave të reja, cka do të thotë se qeveria shqiptare i ka dhuruar Greqisë rreth 225 km2 sipërfaqe ujore . Me ndihmën e ekspertit, “Gazeta Shqiptare” ka kryer disa matje në hartë mbështetur mbi këto koordinata. Konkretisht, rezulton se pika 30 me koordinata (39° 42' 07.20" V / 19° 57' 33.70" L) është larg nga Kepi i Stillos (Shqipëri), në distancën 2.4 km dhe nga Korfuzi (Greqi), me distancën 9.6 km. Gjithashtu, pika 100 me koordinata (39° 54' 14.75" V / 19° 47' 07.07" L) është larg nga Kepi i Qefalit (Shqipëri) në distancën prej 11 km, kurse nga ishulli i Erikuzës (Greqi) në distancën prej 15.6 km. Kurse, pika 125 me koordinata (40° 01' 24.19" V / 19° 33' 53.35" L) është larg nga Dhërmiu (Shqipëri) në distancën 14.8 km, ndërsa nga ishulli i Otonit (Greqi) 22 km. Pra, shihet qartë se parimi i baraslargësisë së vijës së kufirit mes dy shteteve tona nuk respektohet. Dhe, ajo çka vlen të theksohet është se ky parim është shkelur në të gjithë vijën kufitare, nga pika 1 deri në atë me numër 150.

Faktet e reja që boton sot “Gazeta Shqiptare” rrëzojnë totalisht pretendimet e djeshme të Ministrisë sonë të Jashtme dhe asaj të Mbrojtjes. Në një njoftim të përbashkët të këtyre dy institucioneve, të shpërndarë dje për mediat thuhet shprehimisht se: “Në procesin e negocimit të kësaj marrëveshjeje të rëndësishme, matjet janë bërë me metodat shkencore më të avancuara dhe nga specialistët më të mirë të fushës. Siç është theksuar shprehimisht në tekstin e marrëveshjes, 150 koordinatat e përcaktuara, të cilat të bashkuara në një vijë të pandërprerë caktojnë kufirin detar mes dy vendeve, janë absolutisht të baraslarguara nga pikat më të dala të kufirit tokësor të secilit vend”.

http://www.albaniapress.com/lajme/87...2-ne-Jon-.html


Thellohet skandali, Deti iu fal Grekeve per naften

Dërguar më: 30/04/2009 - 10:42




Ministri i Jashtëm i viteve 2005-2007, Besnik Mustafaj, u shpreh dje se kërkesën e palës greke për përcaktimin e kufijve detarë e kishte gjetur në tryezë. Sipas tij, gjatë kohës së socialistëve, një kompani e huaj kishte publikuar një hartë për burimet detare të gazit dhe naftës. Mustafaj thekson në këtë intervistë, se në këtë moment Greqisë i lindi e drejta të kërkonte përcaktimin e kufijve për të parë nëse pikat që kishte përcaktuar kompania për të nxjerrë naftë e gaz binin mbi ujërat e saj. Ai nuk e konsideron si mungesë transparence hartimin dhe miratimin e marrëveshjes së nënshkruar mes Shqipërisë dhe Greqisë për përcaktimin e kufijve detarë.

Zoti Mustafaj, gjatë kohës që ishit ministër i Jashtëm, a keni pasur dijeni për realizimin e marrëveshjes mes Greqisë dhe Shqipërisë për përcaktimin e kufijve detarë?

Kur jam bërë ministër i Jashtëm, unë kam gjetur një kërkesë të qeverisë greke për përcaktimin e kufijve. Në fund të mandatit të socialistëve, një kompani e huaj për kërkimin e gazit kishte kërkuar të bënte këto kërkime në ujërat tona. Pasi realizoi studimin, ajo publikoi një hartë se ku do të kërkohej gazi dhe nafta. Në këtë moment, pala greke kërkoi që para se kompania të fillonte punën, të bëhej një marrëveshje për kufijtë detarë, në mënyrë që kompania e kërkimit e gazit dhe e naftës të respektojë kufijtë detarë të dy vendeve.

Pra, ju thoni se e gjetët aty kërkesë. Por, gjatë kohës që ishit ministër i Jashtëm, a filloi puna për këtë marrëveshje?

Unë e gjeta aty kërkesën. Mua më duket një kërkesë e natyrshme e palës greke, dhe ne s’ishim kundër marrëveshjes. Por, gjatë kohës që kam qenë unë ministër i Jashtëm, që nga 2005 e deri në prill të 2007, nuk u bë asgjë. Nuk u ngritën as grupet e punës, apo të fillonin negociatat për një marrëveshje të tillë.

Po, si e konsideroni ju këtë marrëveshje?

Më duhet ta studioj dhe të konsultohem për të dhënë një mendim në lidhje me marrëveshjen në fjalë. Por, unë mendoj se marrëveshje të tilla nuk duan shumë kohë të realizohen, ata mund të hartohen edhe brenda pak javëve. Por, unë nuk kam tendencë të besoj se janë bërë lëshime. Marrëveshja do të bëhet e njohur, por në periudhën që negociohet nuk bëhet në pazar ky proces, pasi fjalën e kanë teknicienët dhe ekspertët e marinës. Unë nuk kam ndonjë vërejtje të madhe për mungesë transparente. Do të vijë momenti që marrëveshja do t’i nënshtrohet diskutimit në Kuvend dhe do të shihet me kujdes. Tani nuk është radha ime që të flas si anëtar i Parlamentit. Unë nuk e kam kërkuar që ta kem tekstin e kësaj marrëveshjeje, se po ta kërkoja, do ta merrja. Duke pasur specifikat e mira si ish-ministër i Jashtëm, mund ta merrja këtë marrëveshje.

http://balkanweb.com/gazetav5/artikull.php?id=58379