AAK padit Kryeministrin

[BACALOKU]

AAK padit Kryeministrin
AAK do ta padisë Kryeministrin Thaçi për shpifje publike. Burim Ramadani, Sekretar i Përgjithshëm i AAK’së, thotë se Kryeministri ka ofenduar qytetarët e Deçanit. Po ashtu, ai thotë se Thaçi po synon të nxisë urrejtje mes rajoneve të Kosovës.



Aleanca për Ardhmërinë e Kosovës do ta padisë Kryeministrin Hashim Thaçi për shpifje publike. Subjekti më i zëshëm opozitar, ndjehet i fyer ndaj deklaratave që lëshoi të premten në Parlamentin e Kosovës kreu i Qeverisë. Burim Ramadani, Sekretar i Përgjithshëm i AAK’së, ka shpjeguar hapat që do të ndërmarrë ky subjekt politik. “Do ta padisim Kryeministrin për shpifje publike dhe ofendim ndaj qytetarëve të Deçanit dhe elitës udhëheqëse atje”, ka thënë Ramadani për Express, të shtunën.

Të premten, Kryeministri Thaçi ka deklaruar se Kryetari i Komunës së Deçanit nuk e njeh Qeverinë e Kosovës. “Kryetari i Deçanit i ka refuzuar investimet e Qeverisë për rrugë, për shkolla dhe për ujësjellës. Është fatkeqësi që për shkak të ngjyrimeve partiake më i marrë në qafë të gjithë qytetarët që jetojnë në këtë komunë”, ka deklaruar Thaçi në Parlament, duke iu përgjigjur kritikave të deputetit të AKR’së Shkumbin Demalijaj, i cili tha se Qeveria nuk ka bërë aq sa duhet për Komunën e Deçanit.

Madje, deputeti Demalijaj ka shtuar se po të ishte Kryetar i Deçanit do t’ia zinte derën Qeverisë me 60 mijë qytetarët e këtij rajoni. Kjo e ka nxitur Kryeministrin që të shpërthejë para deputetëve.

Sipas tij, Kryetari i Deçanit dhe ai i Pejës janë duke e penguar realizimin e projektit për ndërtimin e rrugës Deçan-Plavë-Gusi apo Pejë-Gusi. “Ky është ose primitivizëm krahinor, ose është veprim mbi baza të ulëta politike. Njëri kryetar komune thotë nuk bën nga Peja, e tjetri thotë nuk bën nga Deçani. Janë bllokuar investimet e Qeverisë së Kosovës”, ka thënë Thaçi.

Sekretari i Përgjithshëm i AAK’së, Burim Ramadani thotë se deklaratat e Kryeministrit janë skandaloze. “Pos shpifjes, Kryeministri ka përdorur edhe terma ofendues, siç është ai “primitivizëm krahinor”. Kjo është në vazhdën e synimeve të tij për të nxitur urrejtje rajonale në Kosovë”, ka thënë Ramadani.

Pikërisht për shkak të këtyre deklaratave, të dielën, AAK do të mbajë një konferencë për media. Kryetari i Komunës së Deçanit, Musa Berisha, nuk ka dashur të shpjegojë më tepër çështjet që do të ngritën në këtë konferencë.
“Unë mund të shpreh keqardhje nga një deklaratë aq e pamatur e Kryeministrit. Unë nesër do të ofroj të gjitha faktet që dëshmojnë të kundërtën”, ka thënë Berisha për Express, të shtunën.

Nga ana tjetër, Express nuk ka mundur të kontaktojë me Qeverinë e Kosovës, në lidhje me padinë që do të ngritët nga AAK për Kryeministrin Thaçi.

Zëdhënësi i Qeverisë, Memli Krasniqi, nuk ndodhet në Kosovës, derisa Zëvendëskryeministri Hajredin Kuçi nuk është përgjigjur në telefon, përkundër përpjekjeve të vazhdueshme të gazetës.

Gazeta express