Virusi E1U2L4E4X

[AlbaSoft]

intervist me Albin Kurti

EULEX-i është mutacion i UNMIK-ut. Virusi që dikur e patëm quajtur U1N2M4I4K, tash është bërë E1U2L4E4X. Protokolli i paraljamëruar me Serbinë mbetet dëshmi e një muatacioni të tillë. Për këtë, propozon ndërprerejen e bashkpunimit me misionin e BE-së. Një ditë pas rrotullimit të xhipave të EULEX-it, lideri i Vetëvendosjes, Albin Kurti në intervistë për Express paralajmëron edhe aksione të tjera. Meqë, thotë se ende asgjë s’ka përfunduar.

Express: Përse në protestën e djeshme ju nuk ishit prezentë? Jemi mësuar që juve t’ju shohim në krye të çdo aksioni?
[B]A. Kurti: Në mbledhjen para aksionit është vendosur që unë të mos marr pjesë. Mediat, sidomos ato televizive, po fokusohen së tepërmi në mua dhe jo në Lëvizjen dhe aksionin e saj.

Express: Çka nënkutpon për Vetëvendosjen Protokolli të cilin EULEX-i thotë se do ta nënshkruajë me Serbinë?
A. Kurti: Protokolli i paralajmëruar paraqet edhe një tjetër dëshmi se EULEX-i është mutacion i UNMIK-ut. Nga ky protokoll, Kosova nuk do të kishte kurrfarë dobie. Vetëm Serbia do të përfitonte. Dhe atë, së paku, në mënyrë të trefishtë. Do të fitonte informata të natyrës policore për Kosovën. Do ta trashte lidhjen me Kosovën, duke konfirmuar 6-Pikëshin dhe Rezolutën 1244. Dhe, do ta përmbushte kushtin e parë për liberalizimin e vizave.

Express: Çka duhet të bëjnë institucionet e Kosovës? Cili është propozimi juaj për liderët e Kosovës në këtë rast?
A. Kurti: Ta ndërprejnë komunikimin dhe bashkëpunimin me EULEX-in përderisa ai s’heq dorë nga Protokolli. Por, nuk duhet harruar që Protokolli nuk ishte kurrfarë aksidenti. Problem është vetë EULEX-i, i cili në vend se ta pranojë pavarësinë e Kosovës, e pranon 6-Pikëshin e Ban Ki-moonit, në vend se t’u japë llogari institucioneve të Kosovës, ka fuqi ekzekutive mbi to, në vend se të jetë ndihmë për sundimin e ligjit, përbëhet prej rreth 2.000 sundimtarëve të ligjit, të cilët bashkë me familjet e tyre janë imunë nga ligji, në vend se të sjellë profesorë, mjekë e ekspertë të ekonomisë për të na ndihmuar në zhvillim, na ka sjellë policë, prokurorë e gjykatës për ta ruajtur status quon, në vend se të ketë afat kur do t’i përfundojë misioni, e ka dhënë afatin e minimumit të qëndrimit – 2 vjet as që duhet të shpresojmë se do të shkojnë.

Express: A besoni se do të jetësohet kjo marrëveshje?
A. Kurti: Nëse reagimi i Kosovës kufizohet në llafet pa veprime të Fatmir Sejdiut e Hashim Thaçit, atëherë Protokolli do të nënshkruhet. Më pastaj, jetësimin e saj do ta bëjë Serbia me EULEX-in, i cili i është sipërvendosur Policisë së Kosovës.

Express: Në rast të jetësimit të tij, cilat do të jenë pasojat?
A. Kurti: Do të dëmtohet pozita ndërkombëtare e Kosovës meqë do të përforcohen Rezoluta 1244 dhe 6-Pikëshi, Serbia do të marrë shumë informata të vlefshme policore, të cilat do t’ia japë EULEX-i nga takimet e rregullta policore në nivel stacionesh, rajonesh dhe në atë qendror, do të trashet lidhja Serbi-Kosovë në rrafshin e sigurisë dhe, pas këtij Protokolli, Serbia përfundimisht do ta ketë rrugën e hapur për liberalizimin e vizave.

Express A do të ketë aksione sërish Vetëvendosja dhe cilat do të jenë natyrat e tyre: sikur kjo e djeshmja, apo thjesht performanca artistike?
A. Kurti: Sigurisht që do të ketë edhe aksione të tjera, meqë ende asgjë s’ka përfunduar. Sigurisht se nuk do të kufizohemi, po ua huazoj shprehjen - “thjesht, në performanca artistike”. Ndonëse, secili aksion yni e ka një dimension artistik, apo jo?

Express: Si e komenton Lëvizja Vetëvendosje arrestimin e djeshëm të aktivistëve të saj nga Policia e Kosovës?
A. Kurti: Ka shumë policë të Kosovës që shpirtërisht janë me neve. Por, ka edhe asish që s’e kanë vendin aty. Më së shumti të tillë ka lart nëpër hierarkinë e Policisë së Kosovës, ndokush prej të cilëve edhe e dha urdhërin për intervenimin brutal ndaj protestuesve. E, kur kombinohet urdhëri i tillë me ndonjë zagar të njësisë speciale, atëherë kemi pasoja sikurse ato të së martës, kur Skënder Blakaj u dërgua në Klinikën Emergjente të QKUK-së, kurse disa protestues të tjerë u rrahën gjatë arrestimit, rrugës për në stacion dhe mandej edhe në stacion si p.sh. Fatmir Haziri nga polici me numër 8062, Kujtim Kosumi nga ai me numër 8676, si dhe Salih Mehmeti nga polici me numër 8272. Ndërkaq, Dardan Molliqaj, Naser Shatri dhe disa të tjerë janë kërcënuar edhe me pasoja pasi të dalin nga arresti, me fjali të llojit “Kur të dilni, keni punë me ne…”

Express: A do të ketë protestë masive në rrugët e Prishtinës kundër Protokollit si psh. protesta kundër Planin 6-Pikësh të Ban Ki-moonit?
A. Kurti: Natyrisht se protestat masive do të ishin të mira. Mbase edhe më masive se para 6-Pikëshit. Kundërshtimi i Vetëvendosjes do të vazhdojë. Për format dhe kohën nuk mund të flas tani.

Express: Për dallim nga UNMIK-u që është dashur të presim dhjetë vjet dhe që njerëzit të ngrihen në protesta, Vetëvendosja ka nisur të kundërshtojë misionin e EULEX-it ende pa e mbushur ai një vit të plotë funskionimi. Si e komentoni këtë.
A. Kurti: Ne e kemi kundërshtuar EULEX-in shumë më herët para se ai të zbarkojë në Kosovë. Sepse, i kemi lexuar me kujdes dokumentet ku bazohet ai: Rezolutën 1244, Veprimin e Përbashkët të Këshillit të BE-së të datës 4 shkurt 2008 dhe, në fund, edhe 6-Pikëshin e Ban Ki-moonit. Mbi të gjitha, EULEX-i është mision i Politikës Evropiane të Sigurisë dhe Mbrojtjes, është mishërim i Konceptit për Menaxhim të Krizave të Javier Solanës, partia e së cilit PSOE (Partido Socialista Obrero Español) është në pushtet në Spanjën që nuk na njeh. Pra, Solana na ka definuar si krizë që duhet të menaxhohet, e jo si një vend i pavarur që duhet të zhvillohet. Ky është qëndrimi politik i Solanës për Kosovën që prodhon pasoja gjithnjë e më të rënda. Në anën tjetër, le të mos harrojmë që kundër UNMIK-ut qe protestuar në mars të vitit 2004. Mandej nga KAN-i në qershor të vitit 2004 dhe nga Lëvizja Vetëvendosje shumë herë përgjatë veprimtarisë së saj që prej 12 qershorit 2005. Reagimi ndaj EULEX-it është më i shpejtë tash, sepse duket qartë që bëhet fjalë për një UNMIK të ri. EULEX-i është mutacion i UNMIK-ut. Virusi që dikur e patëm quajtur U1N2M4I4K, tash është bërë E1U2L4E4X.