Stavileci: AAK do ta shoh humbjen "Live".

[pirro]

Stavileci: AAK do ta shohë humbjen “live””
“Për Ramushin dhe ramushistët e vegjël, PDK do të kujdeset që t’iu ofrojë kënaqësi, duke i siguruar që humbjen e thellë ta përcjellin dhe përjetojnë me kamera live”, ka thënë zëdhënësi i PDK’së, Blerand Stavileci. AAK sërish ka kërkuar nga PDK që të bëjë kërkesë për vendosje të kamerave.

Nga Express më 31.08.2009 në ora 19:40

Partia me e madhe parlamentare e Kosovës, PDK rikonfirmoi të hënën qëndrimin e saj për vendosjen e kamerave në zgjedhjet e 15 nëntorit, duke deklaruar se ky qëndrim nuk është demagogjik, por objektiv përmes të cilit, PDK dëshiron drejtpërdrejtë para gjithë botës ta mund AAK-në, ka shkruar agjencia e lajmeve KosovaLive.

Këto komente, në emër të Partisë Demokratike të Kosovës i bëri zëdhënës i këtij subjekti, Blerand Stavileci. Reagimi i tij pason akuzat e partisë rivale, Aleancës për Ardhmërinë e Kosovës (AAK), e cila qëndrimin e PDK-së për vendosjen e kamerave në vendvotime, e cilësoi si “metaforë demagogjike”. “PDK është në favor të instalimit të kamerave në çdo vendvotim dhe në çdo vendnumërim në tërë territorin e Republikës së Kosovës. Ndërsa sa i përket disa zërave të zhurmshëm dhe dëshpërues të partisë së tretë opozitare, ato janë fryt i paragjykimeve që kanë për qëllim përgatitjen e elektoratit të saj për humbjen e sigurt”, tha Stavileci në një konferencë për media.

Edhe në këtë konferencë, zëdhënësi i PDK-së iu drejtua në pezhurativ kryetarit të AAK-së, duke iu drejtuar si “Ramushi”, ndërsa anëtarët e partisë së tij “ramushistët”. “Për Ramushin dhe ramushistët e vegjël, PDK do të kujdeset që t’iu ofrojë kënaqësi, duke i siguruar që humbjen e thellë ta përcjellin dhe përjetojnë me kamera live”, tha ai. Ndërkaq në pyetjen e gazetarëve se si do ta riktheni këtë çështje, pasi që KQZ ka marrë vendim kundër kamerave, madje në këtë institucion edhe anëtari i PDK-së ka votuar kundër, Stavileci tha se vendimi i partisë së tij është politik, ndërsa për çështjet tjera vendos vetë KQZ.

PDK, sipas Stavilecit, ka qenë për instalimin e kamerave. “Atë po e përsërisim edhe sot, ndërsa çështjet tjera që kanë të bëjnë me KQZ-në, çështjet teknike, financiare, profesionale dhe organizative, janë çështje që iu përkasin atyre dhe ata vendosin për ato”, tha zëdhënësi i PDK-së. Stavileci në këtë konferencë foli më bindje të thellë se partia e tij në zgjedhjet e nëntorit do të del fituese. Ai këtë garanci e mbështeti në sondazhet e fundit, për të cilat tha se PDK ka marrë mbështetjen më të madhe të votuesve kosovarë. Ndërsa sa i përket kandidatëve nëpër komuna, ai tha se shumë shpejt do të dihen emrat.

“Për neve të gjitha komunat janë të rëndësishme”, tha Stavileci, sipas të cilit, Këshilli Drejtues i PDK-së shumë shpejt do të del me kriteret për përzgjedhjen e kandidatëve. Ndërkaq, përmes një njoftimi për media, Aleanca për Ardhmërinë e Kosovës (AAK),
edhe njëherë i ka bërë thirrje Partisë Demokratike të Kosovës (PDK) që të parashtrojë kërkesë zyrtare në Komisionin Qendror Zgjedhor (KQZ) për vendosjen e kamerave. “PDK-ja nuk duhet të përdorë retorikë boshe dhe nuk duhet të zhvillojë fushatë parazgjedhore me çështjen e kamerave në zgjedhje. Njoftojmë opinionin publik se PDK-ja as në mbledhjen e sotme të KQZ-së nuk parashtroi kërkesë për kamera”, thuhet në njoftimin e AAK’së