spotet

[lirik]

Dokumenti: Në kulmin e krizës, 1 miliard për spotet e '8 dhjetorit'


Shekulli Online | 26/12/2009 | Kuriozitete | 172 KOMENTE | SHARE | - +



Festat e fundit po i gjejnë pensionistët shqiptarë pa marrë shpërblimet e tyre dhe shumë punonjës të administratës me rroga të shtyra për vitin tjetër. Ndërkohë që qeveria është në krizë të dukshme financiare për shkak të shpenzimeve marramendëse, ajo nuk i ka kursyer paratë për propagandë dhe spote televizive. Një dokument zyrtar i Këshillit të Ministrave, autorizon shpenzimin e mbi një miliard lekëve për mitingun e 8 dhjetorit, duke i harxhuar këto para nga buxheti i shtetit. (SHIKO NË 'FOTO GALERI' DHE POSHTE ARTIKULLIT NË PDF, DOKUMENTIN E FIRMOSUR NGA KM BERISHA)
Skandali, i transmetuar sot bashke me disa dokumenta te tjere edhe ne Faktori Plus është se mbi gjysmë miliard lekë nga këto, janë harxhuar për spote televizive dhe reklama për këtë miting, të cilat tradicionalisht i faturohen agjencisë së reklamave të TV Klanit.
Qeveria vazhdon t'i fshehë publikut me arrogancë të gjitha vendimet e saj që kanë të bëjnë me përdorimin e parave të buxhetit të shtetit për propagandë elektorale dhe qëllime politike.

Eshte e njëjta qeveri që është në krizë për të paguar shpërblimet e pensionistëve dhe pagat e buxhetorëve. VKM-të më të rëndësishme të qeverisë, në të cilat fshehin abuzime flagrante me paratë e qytetarëve shqiptarë, mbahen të fshehura dhe nuk gjenden jo më në faqen e qeverisë, por as në Fletoren Zyrtare.
Kjo e bën shumë të rëndë situatën, pasi ato VKM që nuk botohen në Fletoren Zyrtare, janë praktikisht të pavlefshme dhe do të vijë një ditë që këta klientë të kryeministrit Berisha që po marrin pa i merituar paratë e qytetarëve shqiptarë do të ballafaqohen me ligjin.
I tillë është për shembull vendimi i qeverisë që mban numrin 1191, datë 13 nëntor 2009. Nuk gjendet as në faqen zyrtare të qeverisë dhe as në fletoren zyrtare. Kjo mungesë e thellë transparence, ka shoqëruar të gjitha vendimet e rëndësishme të qeverisë ku ka qëllim abuzimi. Në asnjë faqe zyrtare dhe asnjë dokument zyrtar, nuk gjenden dot vendimet e qeverisë për prokurimin e rrugës Durrës-Kukës, vendimet e qeverisë për Gërdecin, vendimet e qeverisë për prokurimet direkte për studion e reklamave të z.Frangaj për spotet e qeverisë në TV Klan.
Qeveria fsheh me vetëdije vendime, të cilat janë korruptive.
Po t'i shtosh kësaj dhe mospublikimin në fletore zyrtare, këto vendime bëhen njëkohësisht edhe të pavlefshme nga ana juridike, pasi në fund të çdo vendimi thuhet se "ky vendim hyn në fuqi me botimin në fletore zyrtare".
Hetimi i këtyre vendimeve prej prokurorisë shqiptare duhet të forcohet me akuzën për fshehje të qëllimshme të fakteve korruptive pasi në një kohë kur pensionistët shqiptarë dhe qytetarët e këtij vendi po festojnë Krishtlindje pa dhurata, kryeministri Berisha jep një miliard lekë si dhurata për klientë të tij, që i përdor për të gënjyer shqiptarët me spotet e Shqipërisë që nuk egziston.