Kërset alltia në Kuvendin Komunal të Skenderajit, tre të plagosur

[panta_rhei]

Plagosen tre veta në ndërtesën e Komunës



Më tej sqarohet se për arsye të ekzaminimit të pa penguar të vendit të ngjarjes, zyrtarët e kuvendit komunal të Skenderajt, janë detyruar që të lëshojnë ndërtesën deri në përfundim të mbledhjes së provave dhe ekzaminimit të detajuar të vendit të ngjarjes.

Nga Jeton Musliu më 24.06.2010 në ora 12:33

Tre persona janë plagosur rëndë me armë zjarri në orët e mëngjesit të sotëm në Skenderaj. Rasti ka ndodhur rreth orës 8:55 minuta, në rrugën “18 qershori” brenda objektit të ndërtesës së Kuvendit Komunal të Skenderajt.

Zëdhënësi i Policisë, Besim Hoti thotë se viktimat janë nga fshati Polac i komunës së Skënderajt. Të plagosurit janë Isuf Hoti, Adnan Koca dhe Fadil Xani.

Sipas policisë, tre personat e plagosur, janë banorë të fshatit Polac të Skenderajt, dhe janë dërguar në shtëpinë e shëndetit të qytetit, për tu transferuar me urgjencë në repartin e emergjencës në QKUK në Prishtinë.

"Në bazë të informatave të para nga mjekët kujdestar, mësohet se dy nga tre të plagosurit janë në gjendje të rëndë", sqaron Policia e rajonit të Mitrovicës.

Më tej sqarohet se për arsye të ekzaminimit të pa penguar të vendit të ngjarjes, zyrtarët e kuvendit komunal të Skenderajt, janë detyruar që të lëshojnë ndërtesën deri në përfundim të mbledhjes së provave dhe ekzaminimit të detajuar të vendit të ngjarjes.

"Në bazë të hetimeve preliminare të policisë në këtë rast, besohet se së paku dy persona të dyshuar, të armatosur, kanë shtënë drejt viktimave të tyre pas një përleshjeje fizike brenda ndërtesës së kuvendit komunal", thuhet në njoftimin e policisë.

Besohet se palët e përfshira në rast, ishin ngatërruar pas një mosmarrëveshje të tyre rreth kontraktimit të shitblerjes së një prone private.

Policia e Kosovës ka bërë bastisjen e dy lokacioneve, shtëpive private, në fshatin Klinë të Skenderajt, në kërkim të dyshuarve të këtij rasti.

Identiteti i dy të dyshuarve është i njohur për policinë ndërsa policia po bën përpjekje të identifikojë vendndodhjen e tyre.

Hetuesit rajonal të sektorit për krime serioze nga drejtoria rajonale e Policisë në Mitrovicë, janë duke u marrë me rastin.