Përmbytjet në Shqiperi, Topi u kërkon ndihmë aleatëve

[Dilaver]

Topi u kërkon ndihmë aleatëve

(E plotësuar) Presidenti i Shqipërisë, Bamir Topi, ka thënë se i është kërkuar ndihmë NATO-s në lidhje me përmbytjet që kanë përfshi një pjesë të veriut të vendit.
“I kemi kërkuar ndihmë NATO-s dhe ndihma do të vijë”, ka thënë presidenti Topi, i cili ka qëndruar në Shkodër për të parë nga afër situatën e përmbytjeve.
Presidenti Topi duke e lënë mënjanë politikën ka kërkuar bashkëpunim të banorëve me ushtrinë.
“Jemi në një momet kritik dhe akut, por kjo situatë po përballohet. Shqipëria po vuan reshjet e shiut. Nuk është momenti për debate”, ka thënë Topi.
Kryetari i Partisë Socialiste, Edi Rama ka kritikuar sot qeverinë për situatën e krijuar në veri.
"Vështirësitë e veriut janë një ferr i krijuar nga dështimi i qeverisë", ka thënë Rama në Pogradec.
Më herët kryeministri i Shqipërisë, Sali Berisha gjatë nje vizite ne Shkoder, urdhëroi evakuimin e banorëve të Torovicës, e cila ndan Shkodrën me qytetin e Lezhës.
Raportohet se në Torovicë niveli i ujit ka arritur në pikën kritike, ndërsa forcat e shumta të policisë, ushtrisë dhe banorë të fshatit po ndihmojnë për të forcuar argjinaturën.
* * * * * *
Burime nga Ministria e Brendshme në Tiranë konfirmuan se kërkesa ka ardhur nga fakti se në 24 orët e fundit është zgjeruar harta e përmbytjeve në Shqipëri.
Tokë dhe banesa nën ujë tani nuk ka vetëm në qarkun e Shkodrës, por dhe në Lezhë e Durrës. Për rreth 5 orë të premten ka qenë i bllokuar edhe një segment në autostradën Tiranë-Durrës nga vërshimi i ujit.
Ndihma që kërkohet nga Aleanca përfshin nevojën e ngutshme për helikopterë, që nevojiten për evakuim banorësh dhe shpërndarje të ndihmave nga ajri, si dhe automjete të tonazhit të rëndë për të lëvizur në rrugët e mbuluara nga uji.
Krahas forcave policore dhe atyre të ushtrisë shqiptare në zonat e prekura ka ardhur për mbështetje dhe një njësi e Forcave Speciale nga Kosova me rreth 25 vetë dhe mjete motorike. Presidenti i Republikës Bamir Topi pritet të thërrasë një mbledhje urgjente të Këshillit të Sigurisë Kombëtare në lidhje me situatën e krijuar nga përmbytjet.
Federata Shqiptare e Futbollit pezulloi pa afat zhvillimin e ndeshjeve sipas kalendarit. Deri tani përllogratiten si nën ujë mbi 13 mijë hektarë tokë, janë të rrethuara nga uji rreth 2.500 shtëpi dhe rreth 2.000 banesa janë të përmbytura.