Zgjerimi Evropjan

[murrizi]

Bashkëpunimi i suksesshëm ndihmon zgjerimin ( Stefan Fule e Nicolai Wammen).


Në gjashtë muajt e fundit kemi pasur progres të madh në dosjen e zgjerimit për shkak të bashkëpunimit ndërmjet Komisionit Evropian dhe Presidencës daneze. Në fillim ne ishim shumë të vetëdijshëm rreth nevojës për mbajtjen e impulsit të zgjerimit në mes të krizës financiare. Tani, kur zgjerimi është prioritet në agjendat tona, është e drejtë të themi se ne jo vetëm që e kemi mbajtur impulsin por ne në të vërtetë e kemi rritur atë. Ky progres dhe interesimi i rritur i shteteve fqinje e edhe shteteve të tjera për t’u anëtarësuar në BE janë zëri më i fuqishëm i besimit në projektin evropian

Dhënia e statusit të kandidatit Serbisë nga ana e Këshillit Evropian më 1 mars 2012 ka ardhur në masë të madhe si rrjedhojë e vendosmërisë dhe e vizionit të lidershipit serb, prioritetit të të gjitha institucioneve shtetërore të Serbisë për agjendën e BE-së për reforma dhe efikasitet të rritur të Serbisë në adaptimin dhe implementimin e reformave kyç, veçanërisht nënkriteret politike. Marrëdhëniet tona me Serbinë tani janë bartur në një nivel më të lartë me fokus në progresin që e ka arritur Serbia në normalizimin e mëtejmë të marrëdhënieve ndërmjet Beogradit dhe Prishtinës dhe në kontinuitetin dhe implementimin e reformave, sidomos në lëmenj kyç, sikurse në gjyqësor dhe luftën kundër korrupsionit. Ne jemi të bindur se Serbia do të luajë një rol të rëndësishëm në bashkëpunimin rajonal, duke e mbështetur dhe rritur pajtimin në regjionin i cili është ballafaquar me konflikte të mëdha në të kaluarën e afërt.

Negociatat për anëtarësim me Malin e Zi kanë filluar më 29 qershor. Fillimi i negociatave është sukses për Malin e Zi, autoritetet e vendit, politikanët dhe shoqërinë e Malit të Zi. Konsensusi i gjerë nacional dhe përpjekjet për reforma janë shpaguar. Ato gjithashtu konfirmojnë se ne i gjykojmë kandidatët në bazë të meritës së tyre. Mali i Zi tanimë ka arritur shumë. Mirëpo ende duhet të punohet. Kjo fazë e ardhshme e procesit të anëtarësimit do të thotë më tepër punë në shumë më tepër lëmenj me fokus të vazhdueshëm në lirinë fondamentale, gjyqësor, në luftë kundër korrupsionit dhe krimit të organizuar.

I tërë regjioni i Ballkanit Perëndimor po shkon përpara. Ne kemi nisur dialogun e nivelit të lartë për anëtarësim me ish-Republikën Jugosllave të Maqedonisë. Kjo siguron platformën për një diskutim intensiv, substancial për modernizim të reformave që janë të lidhura me BE-në. Diskutimi fokusohet në caqet dhe veprimet konkrete për të bartur procesin e reformave më tej në pesë lëmenj kyç: lirinë e të shprehurit në media, sundimin e ligjit, reformat e administrimit publik, reformat elektorale, përforcimin e ekonomisë së tregut.

Në qershor, ne gjithashtu kemi nisur dialogun e nivelit të lartë për procesin e anëtarësimit me Bosnjë-Hercegovinën për të ndihmuar që ky dialog të shkojë më tej drejt BE-së, duke shpjeguar kërkesat dhe metodologjinë e negociatave për anëtarësim dhe në mënyrë konkrete çka pritet prej Bosnjë-Hercegovinës në procesin e anëtarësimit në BE. Ne shpresojmë që, sa më parë të jetë e mundur, Bosnjë-Hercegovina të jetë e gatshme t’i plotësojë kërkesat që Marrëveshja e stabilizim-asocimit të hyjë në fuqi dhe që shteti së shpejti të jetë në gjendje t’i plotësojë kushtet e mbetura për aplikim kredibil për anëtarësim në BE.

Gjithashtu, gjatë muajve të pranverës ne kemi nisur studimin e fizibilitetit për Kosovën. Objektiva e studimit të fizibilitetit është të sigurohet një analizë gjithëpërfshirëse dhe e thellë e gatishmërisë së Kosovës për të negociuar dhe eventualisht të implementojë Marrëveshjen e stabilizim-asociimit që formon bazën ligjore të marrëdhënieve të Bashkimit Evropian me shtetet e Ballkanit Perëndimor dhe një hap më afër anëtarësimit. Studimi do të fokusohet në aspektet politike, ekonomike dhe ligjore të gatishmërisë së Kosovës për Marrëveshjen e stabilizim-asociimit. Pas nisjes së dialogut me Kosovën për liberalizim të vizave, në janar, Komisioni ia ka dorëzuar udhërrëfyesin Qeverisë së Kosovës në qershor, duke e sjellë udhëtimin pa viza një hap më afër qytetarëve të Kosovës.

Në Shqipëri, pas arritjes së marrëveshjes politike ndërmjet qeverisë dhe opozitës, në nëntor të 2011, përpjekje të mëdha janë bërë në 2012-n nga të dyja palët politike për të zhvilluar reformat më tej. Progresi i mëtejmë do të varet në masë të madhe prej stabilitetit dhe qëndrueshmërisë së dialogut ndërmjet forcave politike dhe gjithashtu Shqipëria duhet të arrijë rezultate konkrete dhe të prekshme në adresimin e reformave që janë të lidhura me Bashkimin Evropian, të njohura si 12 prioritetet ky¬ç.

Nëse e shikojmë Islandën, progres i mirë është arritur në negociatat për anëtarësim me pjesëmarrje aktive dhe mbështetje të presidencës daneze. Qasja jonë ka marrë parasysh karakteristikat e Islandës përderisa në të njëjtën kohë është respektuar korniza e cila e mbështet procesin e negociatave. Për sa i përket konferencës ndërqeveritare të 22 qershorit, janë hapur 18 kapituj, 10 prej të cilëve janë mbyllur kushtimisht.

Krijimi i agjendës pozitive me Turqinë, duke mbuluar një gamë të gjerë të interesit të përbashkët dhe puna që është bërë në këtë kontekst ka qenë një hap i rëndësishëm më tej. Kjo iniciativë është urë jo mbi apo rreth negociatave të anëtarësimit, por drejt tyre. Komisioni, Presidenca daneze dhe kolegët tanë turq kanë punuar shumë për të kthyer atë që dukej si koncept para disa muajsh në një kornizë të re të qasjes pozitive në marrëdhëniet tona pozitive. Miratimi i konkludimeve të Këshillit në fund të qershorit që përmend qartë – për herë të parë - perspektivën e liberalizimit të vizave për Turqinë demonstron përpjekjet e fuqishme të Bashkimit Evropian për të ecur përpara për një çështje që është aq e rëndësishme për Turqinë dhe për qytetarët e saj.

Si konkludim, gjatë gjashtë muajve të fundit Komisioni dhe Presidenca daneze kanë punuar së bashku duke identifikuar zgjidhjet më praktike dhe mënyrat fleksibile për t'i afruar BE-së ato shtete të tjera fqinje që dëshirojnë të ndajnë me ne demokracinë, prosperitetin dhe stabilitetin. Themelet janë vënë ashtu që BE-ja të mund të vazhdojë të zgjerohet dhe duke e thelluar integrimin e vet të brendshëm ajo do të jetë më e fortë për të.