Lajme Aktuale....

[Lona]

Vrasje e rrallë gjatë tubimit politik në Kanada

Monreal, 05 shtator - Në Kanada, policia tha se një person është vrarë dhe një tjetër është plagosur, pasi që një person ka hapur zjarr brenda një salle ku kryeministrja e zgjedhur e provincës së Kuebekut po mbante fjalimin e fitores pas zgjedhjeve në vend.

Kryeministrja e ardhshme, Paulinë Marua, është larguar nga skena nga ana e truprojave të saj, dhe nuk është lënduar në incidentin që ndodhi rreth mesnatës të martën në Monreal.

Marua, lidere e partisë separatiste të Kuebekut(PQ) e cila kërkon pavarësi për provicnën kryesisht frengjishtfolëses, më vonë është kthyer ne skenë për ta mbaruar fjalimin.

Policia tha se e ka arrestuar një 50 vjeçar në lidhje me të shtënat.

Autoritetet thanë se i dyshuari ka ndezur një zjarr të vogël prapa ndërtesës para se të arrestohej.

Motivi i dhunës nuk u qartësua menjëherë.

Raportohet se i dyshuari ka brohoritur “ Anglezet po zgjohen!” në kohën e arrestimit.

Dhuna e motivuar politikisht është tepër e rrallë në Kanada, derisa një incident i tillë ka ndodhur në vitin 1970.


Klinton nominon Obamën

Uashington, 6 shtator - Në një fjalim mbajtur në konventën kombëtare të Partisë Demokratike, ish-presidenti Bill Klinton ka nominuar zyrtarisht Barak Obamën, duke iu apeluar miliona amerikanëve nën presion, që ta mbështesin presidentin për një mandat të dytë në Shtëpinë e Bardhë.

Në fjalimin e tij në natën e dytë të konventës në Sharllotë të Karolinës Veriore, Klinton mbrojti politikat e presidentit, duke thënë se "qasja e presidentit Obama mishëron vlerat, idealet dhe drejtimin që Amerika duhet ta marrë për të ndërtuar versionin e shekullit të 21-të të ëndrrës amerikane".

Obama, i cili do t'i drejtohet konventës të enjten, është duke u sfiduar nga Mit Romni, ish-guvernator i Masaçusetisti, në zgjedhjet presidenciale të 6 nëntorit. Sondazhet e opinionit tregojnë se Obama mban një epërsi të lehtë ndaj Romnit.


Vriten pesë persona në Francë

Grenobël, 5 shtator - Pesë persona janë vrarë në një sulm të atmatosur në pjesën lindore të Francës, njoftoi xhandarmëria. Tre persona janë gjetur të vdekur me plagë nga armë zjarri në një automobil, me targa angleze, rreth liqenit Anesi.

I vrari i katërt ka qenë çiklist i cili ka qenë i shtrirë në afërsi të automjetit. Në vendin e incidentit të përgjakur është gjetur edhe një vajzë e lënduar, e cila pasi që është dërguar në spital iu nënshtrua lëndimeve.

Tani për tani nuk ka informata se kush e ka kryer vrasjen dhe cilat janë arsyet për të njejtën.


BQE diskuton masat e reja kundër krizës

Bruksel, 06 shtatot - Banka Qendrore Evropiane pritet të njoftojë masat të reja për të tejkaluar thellimin e krizës së borxhit në eurozonë.

Presidenti i Bankës, Mario Dragi ka thënë se është i gatshëm të bëjë çfarëdo për ta ruajtur euron.

Në mbledhjen e rregullt mujore politike të bankës, Dragi pritet të njoftojë planet për të blerë bono qeveritare të ekonomive në vështirësi të eurozonës, sic është Spanja dhe Italia, me qëllim të uljes së kostove të tyre të huamarrjes.

Me normat aktuale, të dy vendet do ta kenë vështirë që të marrin hua në tregjet financiare dhe do të detyrohen që të kërkojnë pako shpëtimi nga partnerët e tyre të BE-së.

Por, programi për blerjen e bonove ka kundërshtarë të fuqishëm, përfshirë shumë politikanë në Gjermani.

Liga Arabe, Siria urgjentisht të ndërpresë me dhunën

Kajro, 6 shtator - Ministrat e punëve të jashtme të vendeve nga Liga arabe i bënë thirrje regjimit sirian urgjentisht ta ndërpresë dhunën dhe i dënuan vrasjet e civilëve, të kryera si nga forcat qeveritare, ashtu edhe nga opozita.

"Ne e dënojmë dhunën dhe vrasjen e civilëve nga të gjitha palët e konfliktit", theksojnë ministrat në deklaratën përfundimtare në takimin në Kajro.

Në dokument i bëhet thirrje Këshillit të Sigurimit të Kombeve të Bashkuara që t'i ndërmarrë të gjitha masat e domosdoshme për nxjerrjen para Gjykatës ndërkombëtare të të gjithë atyre që kanë kryer krime kundër njerëzimit.

Ministrat shprehën shqetësim të thellë edhe nga keqësimi i gjendjes humanitare në Siri. Kryeministri i Katarit, Hamid bin Jasem, i cili e kryeson komisionin ministror për krizën siriane do të bisedojë me përfaëqsuesin e ri ndërkombëtar për Sirinë, Lahdar Brahimi rreth mënyrave të reja për ndërprerje të vuajtjeve të popullit sirian.

Zgjidhja ushtarake e konfliktit në Siri është e dënuar me mossukses, deklaroi sekretari i përgjithshëm i Ligës arabe, Nabil al Arabi në fund të takimit.

"Skenari ushtarak nuk do ta zgjidhë krizën siriane. Është e domosdoshme të kërkojmë zgjidhje politike, të cilën do ta përgatisin të gjitha palët", theksoi Arabi.


Klinton: Prania në Rajonin aziatik-paqësor nuk është kundër askujt

Dili, 6 shtator - Prania e SHBA-së në Rajonin aziatik-paqësor nuk është e kahëzuar "kundër cilit do shtet tjetër", deklaroi sot sekretarja amerikane e shtetit, Hilari Klinton. Ajo dha deklaratë gjatë vizitës në atë pjesëm të botës.

Udhëtimi dhjetëditor nëpër gjashtë shtete të rajonit dërgon "porosi të qartë dhe të hapur se SHBA ishte dhe do të jetë fuqi paqësore", deklaroi Klinton në Timorin Lindor.

"Nuk jemi këtu kundër asnjë shteti. Konsiderojmë se Azia dhe Rajoni paqësor janë mjaft të mëdhenj për të lejuar shumë shtete të marrin pjesë në aksione të asaj pjese të botës", shtoi ajo. Lidhur me marrëdhëniet me Kinën për Sirinë, Klinton shfaqi bindje se të dy fuqitë po përpiqen të "gjejnë fushë më të gjerë për mirëkuptim", por pa evituar "dialogun e hapur".

Ajo theksoi se dëshiron të "sjellë ndihmë më të madhe" në Timorin Lindor, shtet i cili është i pavarur që prej vitit 2002. Si edhe e tërë vizita e Klintonit, vizita në Timor konsiderohet si hap me të cilin Uashingtoni dëshiron ta zbusë fuqinë e rritur të Kinës, njëherit Pekini është ndër investuesit dhe donatorët kryesorë për shtetin e vogël.

SHBA-ja tashmë po e përforcon praninë ushtarake në Darvin, port në Australinë veriore, saktë përballë Timorrit ku për momentin ka 2.500 marinca. Nga Dili ajo niset për në Brunei, e më pas do të marrë pjesë në Vlladivostok më 8 dhe 9 shtatir në takim të kreut të Bashkëpunimit ekonomik aziatik-paqësor.


Debat i gjatë dhe i nxehtë për propozim-ligjin e ish forcave të sigurisë maqedonase

Shkup, 6 shtator - Duke i lexuar dhe komentuar nen për neni ligjet e Kushtetutës së Maqedonisë, deputeti i BDI-së, Talat Xhaferri e ka vazhduar debatin për propozim-ligjin për të drejtat e veçanta të forcave të sigurisë që kanë marrë pjesë në konflitkin e vitit 2001.

Në ditën e dytë të diksutimit në kuadër të komisionit të kuvendit për punë dhe politikë sociale, Talat Xhaferri tha se partia e tij do t’i shfrytëzojë të gjitha format dhe mekanizmat për të mos e lejuar që ky ligj të miratohet në këtë mënyrë siç është propozuar.

Ai ka kërkuar që në këtë ligj të inkoroporohen të gjithë të dëmtuarit e konfliktit të armatosur, ose ai të largohet nga procedura parlamentare. Ai ka porositur që nuk mund të votojnë një ligj që është në interes të kundërt të atyre që ne i përfaqësojmë.

“Këtu nuk ka ndikim subjekti politik të cilin këtu e përfaqësojmë, por vendimtare është besimi jonë se ligji është në kundërshtim me interesin e atyre që na kanë votuar”, tha Xhaferri. Në fjalimin e tij Xhaferri tha se do ta përsëritë qëndrimin e deklaruar më parë nga BDI dhe PDSH, se ligji është në kundërshtim me Kushtetutën, me Marrëveshjen e Ohrit dhe me shumë ligje të tjera.