Vdiq Papa Gjon Pali II

[MemphiSx]

VATIKAN


Mbrëmë në orën 21:37 në Vatikan vdiq Papa Gjon Pali i Dytë. Lajmi për vdekjen e tij u kumtua para mijëra njerëzve të tubuar në sheshin e Shën Pjetrit. Karol Vojtyla, i lindur në Poloni, u bë Papë në vitin 1978. Ai ishte Ati i Shenjtë që më së shumit kishte udhëtuar. Gjatë këtyre vjetëve të shërbimit të tij ai kishte vizituar 120 vende. Ai ishte Papa i parë, jo Italian, në afro 5 shekuj. Në vitin 1981 Papa e mbijetoi një atentat.



Trupi i Papa Gjon Palit të Dytë do të ekspozohet në Bazilikën e Shën Pjetrit të hënën pasdite, ka kumtuar Selia e Shenjtë. Prej atij momenti besimtarët mund ti bëjnë nderimet e fundit për Papën Gjon Palin e Dytë. Nuk është e qartë se kur do të bëhet ceremonia e varrimit. Procesi i zgjedhjes së Papës së ri do të filloj brenda 15 - 20 ditë. Në këtë process do të marrin pjesë 117 kardinalë nmga mbarë bota.

PRISHTINË
Vdekja e Papa Gjon Palit të Dytë është pritur me dhembje dhe pikëllim edhe në Kosovë. Mbrëmë, menjëherë pas lajmit për vdekjen e Atit të Shenjtë, presidenti Ibrahim Rugova tha se "Papa ka merita të mëdha për lirinë e Kosovës" Mëtutje zoti Rugova u shprehë se "gjithë jetën ai ia kushtoi paqes, lirisë dhe mirëkuptimit të njerëzimit". Zoti Rugova tha se ndjehej krenar që në cilësinë e presidentit të Kosovës, me Atin e Shenjtë ishte takuar pesë herë. Presidenti Rugova ka urdhëruar që flamujt në rezidencën e tij të ulen në gjysmë shtize.

PRISHTINË
Ipeshkvi i Kosovës, Mark Sopi tha se Papa Gjon Pali i Dytë "ka treguar interesim të madh për çdo popull dhe është angazhuar jo vetëm në çështje fetare por edhe në ato politike e sociale". Në intervistën për Radion Evropa e Lirë, imzot Sopi tha se Papa me "veprimet e veta ka dëshiruar që të japë kontributin e tij, që ishte shumë i çmuar dhe i vlefshëm". Mark Sopi mëtutje tha se "Papa ka bërë shumë edhe për Kosovën", ndërsa, sipas tij, "kontributi më i madh për popullin shqiptar është lumturimi i Nënes Tereze".

NJU JORK
Sekretari i përgjithshëm i Kombeve të Bashkuara, Kofi Annan tha se shpesh, me kënaqësi, i përkujton takimet e tij me Papa Gjon Palin e Dytë. Në këtë aspekt ai theksoi veçanërisht "takimin në selinë e tij private duke diskutuar çështjen e paqes dhe të Luftës kur ne mendonim se çka të bëjmë në Kosovë". Mëtutje zoti Annan tha se "ai ishte ekstremisht i shqetësuar për botën në të cilën jetojmë, dhe sikur unë, Papa kishte ndjerë se në Luftë, të gjithë janë humbës".

UASHINGTON
Presidenti i Shteteve të Bashkuara, George Bush tha mbrëmë se i falënderohemi zotit që na e dërgoi Papa Gjon Palin e Dytë, që u bë hero i kohës.
- Papa Gjon Pali i dytë ishte një inspirim për miliona amerikanë dhe për shumë të tjerë në mbarë botën. Ne gjithnjë do ta mbajmë mend priftin modest, të mençur dhe të patrembur që u bë njëri nga liderët moral të historisë, tha presidenti amerikan, George Bush Bush.

ROMË
Kryeministri Italian, Silvio Berluskoni tha se i falënderohemi Papës për punën e tij të vështirë dhe të palodhshme kundër të gjitha formave të totalitarizmit, dhunës, shtypjes dhe degradimit moral. Shprehje të dhembjes dhe të pikëllimit të thellë shfaqën edhe shumë liderë dhe njerëz të zakonshëm nga e gjithë bota.