Krijohet Keshilli i Sigurise per komunitetet ne Kosove.

[Kalt]

Këshilli i Sigurisë për komunitetet do të udhëhiqet nga kryeministri i Kosovës, Agim Çeku. Në përbërje të tij do të jetë KFOR-i, UNMIK-u, policia ndërkombëtare, policia e Kosovës dhe trupat Mbrojtëse të Kosovës

Kryeministri i Kosovës, Agim Çeku do të udhëheqë këshillin e sigurisë për komunitete, një mekanizëm ky i krijuar për të adresuar çështjet e sigurisë në mënyrë të veçantë shqetësimet që mund të kenë pjesëtarët e pakicave. Këshilli i sigurisë për komunitete do t'i paraprijë këshillit kombëtar të sigurisë, i cili qe formuar muaj më parë, mirëpo, edhe në këtë mekanizëm të ri do të përfshihen të gjitha strukturat udhëheqëse në Kosovë, qeveria, UNMIK-u, policia ndërkombëtare, policia e Kosovës dhe TMK-së.
Kryeministri i Kosovës, Agim Çeku, thotë se, pjesëtarët e komunitetit serb janë të sigurtë në Kosovë ndërsa, këshilli i sigurisë do të angazhohet maksimalisht që siguria e tyre të jetë e qëndrueshme.

"Problemi është se ata e kanë të garantuar lirinë e tyre dhe janë të sigurtë në Kosovë por është fakt se ata këtë të drejtë nuk e shfrytëzojnë dhe duke mos e shfrytëzuar këtë të drejtë kanë krijuar një bindje se nuk janë të lirë të lëvizin. Nuk është e vertetë dhe këshilli për siguri të komuniteteve do t'i adresojë këto çështje dhe do të punojë të merren masa konkrete që ata të binden se janë të sigurt në Kosovë", thotë kryeministri Çeku.
Shefi i UNMIK-ut, Soren Jessen-Petersen, pajtohet me vlerësimin e kryeministrit Agim Çeku, ndërsa ai shprehet se çdo qytetar i Kosovës duhet të jetë i përgjegjshëm dhe të mos bjerë në provokime që nxisin incidente ndëretnike. Petersen u shpreh se ka dëgjuar deklarata të ndryshme se serbët e Kosovës janë të rrezikuar dhe më arritjen e pavarësisë një pjesë e tyre do të largohen nga Kosova. Këto siç i quajti ai dezinformata i cilësoi të dëmshme për serbët e Kosovës, ndërsa u shpreh se incidentet ndëretnike në Kosovë kanë shënuar rënie, sipas tij, tregon se situata e sigurisë në Kosovë është përmirësuar dukshëm.
Ai u shpreh se frika në radhët e pakicave në Kosovë ka më shumë natyrë psikologjike. Sidoqoftë, shefi i UNMIK-ut, Soren Jessen-Petersen, tha se Kosova me nismat e vazhdueshme për mbrojtjen e të drejtave të pakicave po e siguron të ardhmen e saj në Evropë. Procesi i implementimit të standardeve sipas tij, ka për qëllim që të bëjë gjëra të cilat i nevojiten shoqërisë kosovare, qytetarëve të saj dhe integrimeve evropiane. Kosova sipas zotit Petersen, do të jetë pjesë e institucioneve evropiane dhe angazhimi rreth standardeve i garanton asaj që të jetë përpara shumë shteteve të rajonit të ballkanit.

Bekim Shehu

Deutsche Welle