Populli i Kosovës beson në Zot dhe në Amerikë.

[Dilaver]

Ish-Kryetari i Kuvendit të Kosovës, Nexhat Daci, në vizitën e tij në SHBA, të enjten dhe të premten ka takuar kongresistë të këtij vendi, me të cilët ka diskutuar për proceset e fundit në Kosovës dhe statusin.
Kongresistit Eliot Engel, në takim, Daci i ka thënë se ka shkuar atje për të falënderuar SHBA'të, institucionet e saj dhe popullin amerikan - për ndihmën që i ka dhënë dhe po i jep Kosovës.
"Populli i Kosovës beson në Zot dhe në Amerikë. Kosova ka nevojë për mbështetjen amerikane edhe pas zgjidhjes së statusit të Kosovës. Unë ju ftoj që të vazhdoni ndihmën tuaj, veçanërisht në fushën e ekonomisë", ka thënë Daci.
Ai ka falënderuar Kongresistin Engel për angazhimin e tij në rrethet politike amerikane për çështjen e Kosovës.
"Jam i nderuar që kam rastin që këto falënderime po ua bëj juve, z. Engel, këtu në Washington, në Kongresin Amerikan, për angazhimin tuaj të pandalshëm për lobimin e çështjes së Kosovës në Kongresin Amerikan, për rezolutat që ka miratuar ky Kongres fal angazhimit tuaj", ka deklaruar Daci.
Nexhat Daci, i cili kohë më parë është shkarkuar nga posti i Kryetarit të Kuvendit të Kosovës, po ashtu ka deklaruar se procesi i definimit të statusit - është shumë afër dhe se ka shfaqur shpresat e tij se SHBA'të, të cilat e kanë filluar këtë proces, do ta përmbyllin me sukses.
Eliot Engel ka falënderuar Dacin për vizitën dhe ka theksuar se për 18 vjet angazhohet për çështjen e Kosovës. Ai, po ashtu, ka potencuar se pavarësia e Kosovës është zgjidhja më e mirë.
"Pavarësia e Kosovës është zgjidhja më e mirë për rajonin dhe unë në të gjitha takimet që kam në Kongres dhe në State Departamentin Amerikan ua shpjegoj miqve arsyet pse Kosova duhet të jetë e pavarur", ka thënë Engel.
James McGovern, Kongresist nga Massachusetts, në takim me Nexhat Dacin, ka thënë se Kongresi Amerikan duhet të bëjë më shumë për Kosovën, duke shtuar se ai do të jetë një nga ata që do të votojë për Pavarësinë e Kosovës në Kongresin Amerikan.
Steven Rothman, një tjetër kongresist amerikan ky, ndërkaq, ka pyetur Dacin se çka mund të bëjë shteti dhe Kongresi Amerikan për Kosovën, ndërsa ka marrë përgjigjen se SHBA'të duhet ta thonë fjalën përfundimtare për statusin.
"Amerika është shteti i parë që ka filluar të merret seriozisht me çështjen e Kosovës. SHBA'të kanë udhëhequr fushatën e sulmeve të NATO's kundër Serbisë për çlirimin e Kosovës. Qeveria Amerikane duhet ta thotë fjalën kryesore edhe për zgjidhjen e statusit përfundimtar të Kosovës. Kongresi Amerikan mund t'i sugjerojë Qeverisë Amerikane që ta njohë pavarësinë e Kosovës", ka thënë Daci.
Një ditë më parë, Akademik Nexhat Daci, në një intervistë për VOA, ka pranuar se do të jetë kandidat për Kryetar të LDK'së.
Daci gjatë vizitës në SHBA është takuar edhe me kryetarin e porsazgjedhur të Këshillit Shqiptaro- Amerikan, Avni Mustafa.

Express


Populli i Kosovës beson në Zot dhe në Amerikë.