Të burgosurit e SHBA, azil në Tiranë

[Dilaver]

Një algjerian, një egjiptian dhe një uzbek etnik kanë mbërritur mesnatën e së premtes në Tiranë nga SHBA

Të burgosurit e SHBA, azil në Tiranë





Të liruarit nga burgu i Guantanamos plotësojnë dokumentet e azil-kërkuesit, pas intervistimit

Luan Kondi


TIRANË- Tre ish- të burgosur të tjerë në Guantanamo u strehuan ashtu si edhe tetë muaj më parë 5 ujgurët kinezë, në Qendrën Kombëtare për Azilkërkues në Babrru të Tiranës. Algjeriani Zakerian Hasan, uzbekistanasi Fet’hi Boucetta dhe një egjiptian, emri i të cilit nuk bëhet publik për shkaqe sigurie, mbërritën mbrëmjen e së premtes, në fshehtësi të plotë në ambientet e qendrës në periferi të Tiranës. Paraditen e djeshme, rreth orës 09.00 ata u intervistuan nga autoritetet shqiptare të Zyrës së Refugjatëve në Ministrinë e Brendshme, si aplikues për azil politik. Me mbërritjen e tre ish-të burgosurve të Guantanamos, Shqipëria bëhet shteti evropian që strehon 8 nga 38 të burgosurit e fundit që nuk konsiderohen më terroristë nga Departamenti Amerikan i Shtetit. Qeveria shqiptare realizoi kësisoj premtimin që u kishte bërë zyrtarëve të SHBA-së, pak kohë më parë se ishte e gatshme të pranonte si azilantë disa nga të burgosurit e liruar. Vendi ynë ishte angazhuar në këtë çështje përkrah vendeve si Britania e Madhe, Franca, Gjermania, Belgjika, Austria, Danimarka, Rusia, Turqia dhe Spanja.
***
Rreth orës 22.30, autoritetet kufitare shqiptare, përfaqësues të zyrës së refugjatëve dhe të UNHCR-së kanë marrë në dorëzim në aeroportin “Nënë Tereza” nga përfaqësuesi i CIA-s, tre shtetas të huaj, të cilët dikur kishin vuajtur dënimin në kampin e Guantanamos. Pasi janë kryer formalitetet në pikën e kalimit kufitar në Rinas, që nuk kanë zgjatur veçse disa minuta, të tre personat janë shoqëruar me një fuoristradë për në Qendrën Kombëtare të Azilkërkuesve në periferi të kryeqytetit. Menjehërë pas njoftimit për ardhjen e tyre, drejtuesit e kësaj qendre nxituan të rregullonin ambientet ku do të vendoseshin të sapoardhurit. Rreth orës 24.00 të së premtes, tre shtetasit e huaj kanë mbërritur në Babrru dhe pasi kanë darkuar, i janë drejtuar dhomës së përbashkët, për të pushuar. Në momentin e mbërritjes së tyre në qendrën e azilkërkuesve kryente shërbim turni i tretë i grupit policor, që ka në ruajtje këtë objekt, ndërsa turni pasardhës vetëm sa ka konstatuar ardhjen e tre personave të rinj në këtë qendër. Një pjesë e personelit të shërbimit si dhe drejtori i Qendrës së Azilkërkuesve, Ali Rasha, kanë qëndruar në punë gjatë gjithë natës për të plotësuar sipas ligjit kërkesat për azil. Madje, Rasha është parë të largohet nga zyra e tij vetëm mesditën e djeshme. Të gjithë punonjësit e qendrës janë porositur që të ruajnë fshehtësinë e gjithçkaje dhe në mënyrë të veçantë të mos kenë asnjë kontakt me mediat.
***
Banorët e tjerë të qendrës së azilkërkuesve e kanë mësuar nga njëri-tjetri bujtjen e tre ish-të burgosurve në burgun famëkeq të Guantanamos. Ata kishin dëgjuar për ta, por ende nuk i njihnin. “I kemi parë të rrinë përpara ndërtesës, por nga prezenca e personelit të shërbimit dhe përfaqësuesve të Zyrës së Refugjatëve në Ministrinë e Brendshme, kemi kuptuar se tre të sapoardhurve po iu merreshin deklaratat e aplikimit për azil”,-thanë “banorë” të tjerë të qendrës së Babrrusë. Burime të sigurta thanë për “Shekullin” se tre azilkërkuesit, pa praninë e një avokati kanë shpjeguar arsyet dhe faktet në të cilat ata mbështesnin persekutimet ose shkeljet e të drejtave të tyre në vendet e origjinës. Ata u janë përgjigjur për më shumë se një orë pyetjeve që iu adresuan nga punonjësi i Zyrës së Refugjatëve. Intervista e tyre është tërësisht koifidenciale dhe nuk bëhet publike, por sipas të dhënave, gjithçka ka qenë e përgatitur që nga momenti i nisjes së tyre, pasi u ishte sqaruar edhe qëndrimi që duhej të mbanin. Algjerianit Hasan, uzbekistanasit Boucetta dhe egjiptianit do t’u duhet të presin 30 ditë për të marrë azilin politik në Shqipëri.

ALGJERIANI

Quhet Zakerian Hasan dhe ka qëndruar prej vitesh në burgun e Guantanamos në Kubë, pasi është arrestuar nga autoritetet e SHBA si i dyshuar për terrorizëm. Ai ka kërkuar të mos kthehet në vendin e tij, ndaj u soll në Shqipëri

EGJIPTIANI

Departamenti amerikan i Shtetit nuk ka pranuar të publikojë emrin e egjiptianit të strehuar në Shqipëri, pasi ky i fundit ka pohuar se në vendin e tij i kërcënohet jeta. Kjo dëshmi i ka shtyrë autoritetet amerikane të gjejnë një strehë për të

Uzbekistanasi

Fet’hi Boucetta quhet uzbeku etnik, i mbërritur mbrëmjen e së premtes në Tiranë. Ai është strehuar në të njëjtën dhomë me bashkëvuajtësit e tij në Guantanamo dhe ka plotësuar kërkesën për të përfituar azil politik në Tiranë


LIGJI
“Për azilin në Republikën e Shqipërisë”

Neni 10
Kërkesa dhe aplikimi për azil

1. Kërkesë për azil quhet çdo deklaratë nga një i huaj pranë organeve kompetente në kufi apo brenda vendit, me anë të së cilës kërkon mbrojtje dhe sipas konventave ndërkombëtare dhe legjislacionit shqiptar.
2. Aplikimi për azil quhet kërkesa zyrtare drejtuar zyrës për refugjatët, në përputhje me procedurat e parashikuar anë nenin 23 të këtij ligji
Neni 23

Aplikimi për azil

1. Aplikimi për azil i paraqitet me shkrim në gjuhën shqipe ose në një nga gjuhët zyrtare të Kombeve të Bashkuara, zyrës për refugjatët. Aplikimi përveç identitetit duhet të përmbajë edhe shkaqet dhe arsyet për të cilat azilkërkuesi kërkon mbrojtje në territorin e Republikës së Shqipërisë.

Neni 26


Procedurat në zyrën për refugjatët

4. Zyra për refugjatët merr vendim brenda 30 ditëve nga dita e dëgjimit të azilkërkuesit dhe i jep pa vonesë si azil kërkuesit dhe UNHCR-së një kopje të vendimit, por në çdo rast jo më vonë se 5 ditë nga dita e marrjes së vendimit. Vendimi i zyrës së refugjatëve jepet me shkrim dhe duhet të jetë i arsyetuar.
5. Në rast se aplikimi për azil mohohet, zyra për refugjatët informon azilkërkuesit me vendimin e saj të shkruar, individual e të arsyetuar, ku do të shprehet e drejta e tij për apelim dhe për periudhën brenda të cilës ai mund të përfitojë nga kjo e drejtë. Nëse zyra për refugjatët nuk jep vendimin e saj brenda afatit kohor prej 51 ditësh nga data e dëgjimit të azilkërkuesit, heshtja e zyrës për refugjatët do të kuptohet si mospranim i nënkuptuar i aplikimit.


Shekulli
19/11/2006