Debati lidhur me Kombin politik

[beku]

Kombi Kosovar pa thonjëza
Dërguar më 21/03/2007 - 16:51
Tema: Kosova
Nga: Nexhmedin Spahiu

-Nga kanë dalë termet "kombi etnik" apo "kombi kulturor" dhe "kombi shtet" apo "kombi politik"?
-Zanafilla e cdo kombi është një etni.
-Më kanë lodhur artikullshkruesit që kanë lexuar vetëm një libër.


Kohëve të fundit u bë e modës që shumë nga ata që kanë lexuar një libër të vetëm të mbajnë ligjërata për kombin me prepotencën më të madhe ku nuk mungojnë as mohimi i ekzistencës së kombit amerikan (kombit më të zhvilluar në botë) as ofendimet ndaj meje se nuk shoh as përtej Urës së Ibrit. Këto ofendime nuk më bëjnë përshtypje. Le t’u shërbejnë për nder atyre që ofendojnë. Qëllimi i reagimeve të mia është thjeshtë të sqaroj dhe të mos lejoj konfuzion që mund të sjellin këto shkrime thjeshtë mendjemadhësie. Unë dua të sqaroj për ata që janë të interesuar të mësojnë në këtë drejtim. Ata që nuk duan të kuptojnë dhe që duan të shesin mend le të vazhdojnë të tyren.
Së pari po elaboroj termat "kombi etnik" apo "kombi kulturor" dhe "kombi shtet" apo "kombi politik". Për ata që e dijnë se kombi është një projekt dhe një process, këto terma nuk i habisin dhe e kuptojnë se nuk janë përjashtues me njëri tjetrin. Cdo komb në zanafillën e vet ka karakterin kulturor dhe etnik. Sepse cfarëdo projekti (qoftë ai më vonë i përqafuar nga mbarë bota) niset nga një njeri, një organizatë, një etni, një komb etj e më pas përqafohet nga të tjerë.
Kështu edhe zanafilla e cdo kombi është një etni. Zanafilla e cdo kombi nisë me poetët, vazhdon me ideologët politikë, me revolucionarët, me ndërtuesit e shtetit, burrështetasit e në fund me qytetarët. Kur të arrihet te kjo fazë ku qyetetari është njësi e kombit atëherë themi se kombi është konsoliduar. Kombet perëndimore kanë arritur që moti këtë fazë. Kombet e tjera janë në faza të ndryshme. Varet se për cilin bëhet fjalë.
Zakonisht në fazën e parë një komunitet e quan vetën komb, por nuk pranohet nga të tjerët si i tillë sic është rasti me kurdët që e quajnë vetën komb po që nuk njihen nga të tjerët. Ky është rasti edhe me shqiptarët e Kosovës të cilët vetën e quajnë komb shqiptar, por që nga të tjerët, qoftë edhe nga shqiptarët e Shqipërisë, nuk njihen si komb, por vetëm si komunitet etnik. (Nëse ndokush ka dëgjuar ndonjë ndërkombëtar të ketë përmendur "Albanian Nation in Kosova" le ta thotë. Por të tillë nuk ka").
Po nga kanë dalë termet "kombi etnik" apo "kombi kulturor" dhe "kombi shtet" apo "kombi politik"? Këto janë terme të gjuhës diplomatike më tepër se asaj shkencore akademike. A e keni vërejtur ta zëmë ndonjë anglez që i thotë ndokujt se është i pashkollë apo analfabet. Jo. Ai i thotë: "kur keni mbaruar filloren" apo kur "keni mbaruar gjimnazin" etj, sepse nuk do të kacafytet pa nevojë me injorant rruge. Fakti se je në fillore nuk është perjashtues me gjimnazin. Nëse je fillorist kjo nuk do të thotë se nuk do të shkosh kurr në gjimnaz dhe, nëse je gjimnazist, kjo nuk do të thotë se ti nuk ke qenë kurrë në fillore e aq më pak të crrënjosësh ato që ke mësuar në fillore sic sugjeron B.Latifi ("që të bëhet kombi politik duhet fillimisht të rrënohet kombi etnik"). Kjo është ide destruktive që con në konfuzion dhe mund t’i kushtojë shumë Kosovës.
Nëse kombet ballkanike ndokush i quan kombe kulturore apo kombe etnike, kjo d.m.th. se ai nuk na konsideron kombe të mirëfillta. Unë e besoj se kosovarët do të bëhen një komb i mirëfilltë.
Edhe një herë po e përseris. Nëse flasim për kosovarët si komb, kjo nënkupton shqiptarët e Kosoves ne radhë të parë si shumicë absolute e banorëve te Kosoves, si promotorë të këtij procesi. Në momentin, kur boshnjakët, turqit apo shkalinjtë integrohen në shoqërinë kosovare ata bëhën kosovarë në kuptimin kombëtar. Në momentin që sërbet integrohen në shoqërinë kosovare ata bëhen kosovarë në kuptimin kombëtar.Po them integrim dhe jo asimilim. Po nëse dikush do të asimilohet atëherë është e drejtë e tij. Deri në cfarë faze do të zhvillohet kombi kosovar mbetet të shihet.
Unë besoj se kosovarët do të arrijnë të bëhen komb deri në stadin ku qytetari I cfarëdo origjine etnike do të jetë njësi e këtij kombi. Madje më mirë e më fuqishëm se sa e ka projektuar Ahtisari në dokumentin e tij.
Po përkujtoj lexuesin se Ahtisaari flet për simbolet kombëtare kosovare. Nuk flet për shtetin e Kosovës, flet për simbolet kombëtare kosovare. Kjo është fjalia e vetme nga mund ta nënkuptojmë se Ahtisaari po flet për Kosovën shtet dhe jo për një krahinë të Serbisë. Krahina e kantoni mund të kenë flamur por ai flamur nuk quhet kombëtar nëse nuk përfaqëson një vend sovran.
Pra mos u thirrni në Ahtisaarin nëse nuk e keni lexuar dokumentin e tij. Mos gjurmoni ferkemet e arushës kur keni arushën përpara. Lexoni dokumentin e Ahtisaarit. Nëse nuk besoni se do të bëhet kombi kosovar, ju nuk besoni se do të funksionojë shteti i Kosovës. Nëse nuk besoni se do të funksionojë shteti i Kosovës atëherë thuane këtë publikisht. Nuk do të thuani asgjë të re. Pikërisht këtë Koshtunica po e thotë.
(Reagim ndaj shkrimit të B.Latifit "Mbi tradhtinë gjenetike dhe kombin kosovar", "Express" 19.03.2007)
[email protected]