Kriza e euros

[Zero Cool]

Kriza italiane dhe paketa e shpëtimit





Ministrat e Financave të 17 vendeve të eurozonës u takuan edhe një herë për të diskutuar krizën e borxheve. Në takim nuk ishte fjala vetëm për një paketë shpëtimi të dytë për mëkataren e borxheve Greqinë.





Në zonën e euros ranë edhe një herë mprehtë këmbanat alarmit: primet e rrezikut për obligacionet afat-gjatë të shtetit italian janë rritur në nivele rekord. Agjencitë e klasifikimit e kanë ulur besueshmërinë e Portugalisë për kredi megjithë ndihmën e konsiderueshme ndërkombëtare. Ka zëra se Banka Qendrore Evropiane mendon se është i nevojshëm një dyfishim i paketës së shpëtimit, në një vlerë prej 1,5 bilionë euro. Po ashtu vazhdojnë dyshimet nëse Greqia do t'ia dalë sërish mbanë me politikën e saj financiare. Ministri grek i Financave Evangelos Venizelos u shpreh në këtë mënyrë: "Ne kemi nevojë për një mesazh shumë të fortë dhe të qartë stabiliteti, jo vetëm në Greqi, por në të gjithë zonën e euros dhe më gjerë."

Lajmet e keqia për Italinë janë të një cilësie krejtësisht të re. Kjo për shkak se Italia është ekonomia e tretë më e madhe në zonën e euros pas Gjermanisë dhe Francës dhe për këtë arsye e një kalibri tjetër nga Greqia apo Portugalia. Mos vallë në fund duhet shpëtuar edhe Italia? Ministri i Financave i Gjermanisë Wolfgang Schäuble nuk dëshiron të dëgjojë për spekulime të tilla.

"Italia gjendet përpara vendimesh buxhetore jo të lehta, por projekti i paraqitur nga ministri italian i Financave, është me të vërtetë shumë bindës dhe unë nuk kam asnjë dyshim se Italia do të marrë vendime të drejta. Italia është në rrugën e duhur. " - tha Schäuble.

Fakti është se Italia me 120 përqind të prodhimit kombëtar ka një nga nivelet më të larta të borxhit në botën perëndimore. Por në radhët e BE-së është në rritje edhe kritika ndaj agjencive të vlerësimit. Komisioneri i BE-së për Tregun e Brendshëm Mishel Barnier sugjeron madje që agjencive të vlerësimit t'u ndalohet të vlerësojnë shtetet që marrin ndihma ndërkombëtare. Schäuble tha në Bruksel se vendet e zonës së euros nuk mund të vendosin vetëm asgjë në këtë drejtim.

Urgjente është në këtë moment para së gjithash çështja e një paketë të dytë ndihme për Greqinë. Gjermania, por dhe Holanda dhe Austria duan ta pranojnë atë, vetëm nëse kreditorët privatë, bankat p.sh., kompanitë e sigurimeve dhe fondet e pensioneve do të mbajnë një pjesë të barrës. Kjo, megjithatë, duhet të jetë vullnetare, thotë Maria Fekter ministërja e Financave të Austrisë: "Nuk do të ketë ndërhyrje nga ana e qeverisë ndaj sektorit privat. Kjo do të kishte pasoja fatale. "

Pyetja e vetme është nëse punët po ecin me shpejtësi të mjaftueshme. Në rast se besimi te tregjet do të kthehet shpejt, evropianët i heqin qafe shqetësimet e tyre. Për alternativa ministrat e Financave, nuk duan fare të flasin publikisht.