Lajme nga ekonomia vendore dhe e jashtme !

[Zero Cool]

Shqipëri, 3 milionë turistë gjysma kosovarë





16:20 / 17.09.2011

Pavarësisht se Shqipëria ka shënuar rritje të numrit të turistëve që vizitojnë këtë vend, për këtë vit sërish janë shfaqur problematikat në këtë drejtim.
Në mbyllje të sezonit turistik veror, ministri i Turizmit Kulturës, Rinisë dhe sporteve Aldo Bumçi ka dalë në konferencë për media, ku deklaroi se problematika e sezonit turistik për këtë vit qëndron në informalitetin e të dhënave të vendqëndrimit të turistëve, në ekzistencën e disa plazheve të ndotura, çështje për të cilën qeveria ka ngritur një task-forcë të posaçme.

Të dhënat e turizmit flasin për një rritje të ndjeshme të numrit të atyre që kanë vizituar Shqipërinë këtë vit. Ministri i Turizmit tha se vetëm gjatë këtij viti kanë hyrë në këtë vend më shumë se 300 mijë shtetas, më shumë se në të njëjtën periudhë të vitit të shkuar.

Po ashtu Bumçi tha se vetëm gjatë këtij viti kanë hyrë rreth tre milionë turistë të huaj apo edhe shqiptarë rezidentë në vendet e BE, sipas tij rreth gjysma e tyre janë turist nga Kosova.

Prioritet i Ministrisë së Turizmit, sipas Bumçit do të mbetet zhvillimi i kësaj fushe, sa i përket turizmit malor, me gjithë shifrat në rritje, turizmit kulturor dhe i ruajtjes e zhvillimit të trashëgimisë kulturore.

[Zero Cool]

Bosnja konfirmon pranimin e vulave doganore të Kosovës





13:45 / 17.09.2011

Ministria e Tregtisë dhe Industrisë, ka njoftuar zyrtarisht se edhe Bosnjë e Hercegovina kanë pranuar vulat doganore të Kosovës.
MTI konfirmon se të premten presidenca e Bosnjë e Hercegovinës ka aprovuar propozimin e qeverisë së saj për pranimin e vulave doganore të Kosovës. “Pranimi i vulave nga ana e Bosnjë e Hercegovinës vjen pas takimeve të zhvilluara ndërmjet zyrtarëve të MTI-së dhe zyrtarëve përgjegjës nga Ministria e Tregtisë së Jashtme dhe Marrëdhënieve Ekonomike të BeH dhe javën e kaluar në kuadër të takimit të CEFTA-s në Bruksel”, thuhet në komunikatë.

Bosnja e Hercegovina deri më tani ka aplikuar taksën doganore prej 10 për qind për produktet kosovare, ndërkaq me aplikimin e vendimit të Qeverisë së Kosovës për masat e reciprocitetit edhe me këtë vend, ka ndikuar që institucionet e BeH të marrin vendim për njohjen e vulave doganore të Kosovës.

Duke pasuar këtë vendim shumë shpejt MTI-ja do të lëshojë vendimin për heqjen e masës së reciprocitetit edhe me shtetin e Bosnjë e Hercegovinës.

[Zero Cool]

IPKO shpërblen konsumatorët





Nga Express më 19 shtator 2011 në ora 08:15
Përveç ofrimit të shërbimeve më të përshtatshme të komunikimit mobil në Kosovë, telefonia mobile IPKO tani synon që t’i shpërblejë konsumatorët e saj dhe miqtë e tyre më të afërt.

Përmes një komunikate për media, IPKO-ja njofton se tash me programin e ri të shpërblimit, konsumatorët ekzistues të telefonisë mobile IPKO, të cilët sjellin miqtë e tyre për të blerë një numër 049, fitojnë 3 euro kredi në telefonin e tyre mobil.

Në anën tjetër, edhe konsumatorët e rinj, të ftuar nga miqtë e tyre, do të fitojnë nga 1 euro kredi falas, për çdo mbushje në vlerë të 3 € e më shumë që ata bëjnë, për 6 muajt e ardhshëm. Për të pranuar 3 euro kredi falas nga operatori i tyre mobil, konsumatorët e telefonisë mobile IPKO duhet ta ftojnë shoqërinë e tyre që t’i marrin benefitet, duke blerë një numër në njërin nga 17 dyqanet zyrtare të kompanisë.

“Komunikimi i shpeshtë me miqtë dhe familjen është i domosdoshëm dhe ne synojmë që t’i shpërblejmë të gjithë konsumatorët tanë, të cilët i duan më të afërmit e tyre rreth vetes”, ka thënë Robert Erzin, drejtor ekzekutiv në IPKO. Gjatë blerjes, konsumatori duhet të tregojë numrin, emrin dhe mbiemrin e personit të cilin e referon dhe më pas ta pranojë bonusin e dhënë nga IPKO-ja.

Ky operator mobil, me rrjetin e vet mbulon 98.5 për qind të territorit, duke u bërë kështu transmetuesi me shtrirjen dhe stabilitetin më të madh të sinjalit të telefonisë mobile në Kosovë.

[Zero Cool]

Holanda e shqetësuar për investimet në Kosovë


Abasadori i Holandës në Kosovë, Robert Bosch sot ka vizituar AKR-në, me c`rast është takuar me zyrtarin e lartë të partisë Rrahim Pacolli.





19 shtator 2011
Ekonomisti
Në takim është diskutuar kryesisht për situatën aktuale në Kosove si dhe për marrëdhëniet ndërshtetërore mes të Mbretërisë së Holandës dhe Republikës së Kosovës.
Fillimisht Rrahim Pacolli e falënderoi Bosch për angazhimin e Mbretërisë së Holandës, gjatë bombardimeve të NATO-s kundër Serbisë në vitin 1999, kontributin e tyre në kuadër forcave paqëruajtëse të KFOR-it, pastaj si pjesë e UNMIK-ut dhe më vonë e EULEX-it.
Në këtë takim është diskutuar edhe prania e diasporës kosovare në Holandë, ku një numer i madh i këtyre individëve, tashmë janë janë integruar dhe ngritur në mënyrë profesionale në Mbretërinë e Holandës.
Një çështje tjetër shumë e rëndësishme që u diskutua në takim, është edhe qështja e investimeve holndeze në Prizren, që iknoropron një investim të plotë prej prodhimit e deri në fazën e exportimit, të produktit. Ambasadori shprehu shqetësimin e tij të madh lidhur me këtë investim, i cili po bllokohet nga Komuna e Prizrenit dhe sipas tij bllokadat e këtij lloji paraqesin rrezik tek tërheqja e investitorëve jo vetëm Holandezë por edhe të tjerë.
Zyrtari i AKR-së, Rrahim Pacolli, i premtoi ambasadorit Bosch që do të angazhohet plotësisht dhe do të përdor influencën e tij për ti tejkaluar bllokadat e këtij lloji ndaj ivestimeve të huaja në Republikën e Kosovës.
Gjithashtu në takim është diskutuar qështja e koalicionit ku Pacolli edhe njëherë e konfirmoi harmoninë e bashkëqeverisjes me PDK-në.
Ndërkaq Pacolli përmendi edhe çështjen e të drejtave të minoritetit shqiptar në luginën e Preshevës. Ai tha se në qoftë se Serbia vazhdon me mos repektimin e të drejtave të minoritetve sikur që respektohen në Kosovë, shkelja e të drejtave të shqiptarëve në Preshevë e ka potencialin e destabilizimit të stabilitetit në Ballkan dhe më gjerë.
Takimi u përmbyll me vlerësimin e madh të ambasadorit Bosch per shtetin e Kosoves, duke cekur se duhet të akceptohet realiteti i Republikës së Kosovës duke shkuar drejt BE-së, me hapjen e kufijve dhe lëvizjen e lirë të njerëzve dhe të mallërave në të dyja anët e kufirit.

[Zero Cool]

Për 3 ditë, 183 maune hyjnë nga Serbia në Kosovë







Nga Express më 19 shtator 2011 në ora 16:42
Që nga heqja e masave të reciprocitetit të ndaj Serbisë deri më tash kanë hyrë 183 maune nga Serbia në Kosovë, prej tyre 24 vetë gjatë ditës së sotme. Përveç ditës së parë, bizneset nga Kosova as që ka tentuar të eksportojnë në drejtim të Serbisë, pasi qysh në fillim ishin kthyer prapa. Për shkeljen e marrëveshjes drejtuesit e institucioneve të Kosovës do t’i drejtohen ndërmjetësit të bisedimeve Robert Cooper dhe mandej edhe mund të marrin një vendim për të fuqizuar sërish reciprocitetin.

Zëdhënës i Doganave të Kosovës, Adriatik Stavileci ka thënë për Kosovapress përmes telefonit se nga e premtja e deri më sot nga Serbia kanë hyrë 183 maune në Kosovë, ndërsa asnjë nuk ka mundur të shkoj në drejtim të Serbisë.

“Janë 183 maune të cilat kanë hyrë nga e premtja në Kosovë, ndërsa veç sot kanë hyrë 24 maune dhe kryesisht këto kanë hyrë në pikën kufitare në Merdare, ndërsa në pikën kufitare Dheu i Bardhë kanë hyrë shumë pak”, ka deklaruar Stavileci.

Bëhet e ditur se nga Kosova në drejtim të Serbisë nuk ka pas asnjë tentim për të dërguar maune, pasi qysh në fillim ishin kthyer prapa.

Gjatë tërë ditës Kosovapress ka bërë përpjekje të kontaktoj zyrtarët e Ministrisë së Tregtisë dhe Industrisë, për të marrë një deklaratë lidhur me situatën, por ka qenë e pamundur, pasi ata nuk kanë shprehur gatishmërinë që të flasin.

Por dihet se ministrja e Tregtisë dhe Industrisë, Mimoza Kusari-Lila qysh në mëngjes ka pohuar se njëherë nuk do vendosen masat e reciprocitetit, sepse për këto shkelje i janë drejtuar ndërmjetësve të BE-së.

Nga ana tjetër zëvendësministri i Zhvillimit Ekonomik, Ramadan Hasani ka thënë se Kosova edhe njëherë ka treguar se respekton marrëveshjet, përkundër që të njëjtën gjë nuk e bënë edhe Serbia. Por sipas tij, kjo situatë nuk do të shkojë edhe shumë gjatë.

“Serbia edhe njëherë po dëshmon që nuk është ajo që nuk ka respektuar marrëveshjen dhe tani nuk po e respekton dhe unë mendoj që këtij durimi që po e tregojmë këto ditë do t’i vij fundi dhe po qe se ndodh që shumë shpejt që nuk respektohen edhe Qeveria e Kosovës do të bie vendim prapë për të aktivizuar embargon ndaj Serbisë”, ka theksuar Hasani.

Nga ana tjetër kryetari i Aleancës Kosovare të Biznesit (AKB), Agim Shahini ka thënë se heqja e reciprocitetit dhe moslejimi i daljes së mallrave të Kosovës, ka nisur t’u shkaktoj humbje bizneseve vendore.

“Ne e kemi paralajmëruar edhe më herët, se fondet të cilat janë ndarë për rikthim të këtij tregu janë shumë të mëdha dhe kjo do të jetë pabarazi e madhe ndaj prodhuesve vendor. Por edhe një sfidë e madhe ndaj konsumatorit, i cili do të qet në një pozicion jo të mirë, për arsye se çmimet e produkteve që mund të jenë në treg do të jenë shumë më të lira për shkak të subvencioneve që do të jepen eksportit serb nga qeveria serbe për Kosovën. Kemi informata që ka me dhjetëra mallra të ndryshme që kanë hy, kemi informata që sot dhe nesër do të hyjnë edhe dhjetëra të tjerë”, ka theksuar Shahini.

Ndryshe edhe pse është arritur marrëveshje mes Kosovës dhe Serbisë për pranimin e vulave doganore, një gjë të tillë nuk është duke e respektuar shteti serb. Kjo ka bërë që maunet nga Kosova të kthehen në kufi, ndërsa ato nga Serbia vazhdojnë të hyjnë pa ndonjë problem në Kosovë. (KP)

[Zero Cool]

Thaçi hap bursën e New York-ut






Kryeministri Hashim Thaçi e ka hapur të enjten bursën e NASDAQ-ut në New York, duke i rënë kambanës simbolike që nënkupton fillimin e një dite të re në treg.
Paraprakisht, Thaçi u prezantua nga zyrtarë të kësaj burse si Kryeministri i parë i Republikës së Kosovës, dhe një nga themeluesit e Ushtrisë Çlirimtare të Kosovës (UÇK).

Kryeministri falënderoi NASDAQ-un për mundësinë dhe theksoi se Kosova si shtet i ri është i hapur për investimet e huaja.

Një ditë më parë, bursa u hap simbolikisht nga Kryeministri i Shqipërisë, Sali Berisha. /Telegrafi/

[Zero Cool]

“Shell”, gërmime për naftë në Shqipëri


Kompania e dytë më e madhe në botë në fushën e energjisë, kompania “Shell”, është përfshirë me 50% të aksioneve në kompanine kanadeze “Petronamas” për të nisur në mars shpimin për kërkimin e naftës në tre zona në Shqipëri.

Planin e veprimit përfaqësuesit e dy kompanive ia kanë prezantuar kryeministrit Sali Berisha, duke e njohur atë me eksplorimet që do të kryejnë me shpimin e puseve në Juban të Shkodres, në Shpirag të Beratit dhe në Paper të Elbasanit.

Në fazën e parë të eksplorimit, kompania “Shell” do të mobilizojë rreth gjysmën e investimit prej 51 milionë dollarësh, që parashikohet të ndërmerret gjatë këtij viti.

Vendimin për t’u përfshirë në këtë projekt, kompania “Shell” e mori pas një studimi nga i cili ka rezultuar se rezervat e naftës në Shqipëri janë të konsiderueshme dhe në thellësi jo shumë të mëdha.

Kompania “Shell” informoi kryeministrin Berisha se është përgatitur për një fazë të dytë kërkimesh deri në 8 mijë metra nën tokë, si dhe për nisjen e një studimi sizmik të zonës dhe dixhitalizimin e të dhënave, në kuadrin e një studimi rajonal që po zhvillon kjo kompani.