Aktakuza kundër Limajt

[Zero Cool]

Limaj në arrest shtëpiak





20:52 / 22.09.2011

Gjykata e Qarkut në Prishtinë i ka shqiptuar deputetit Fatmir Limaj 30 ditë arrest shëpiak. Vendimi është marë të enjten në mbrëmje pas seancës së mbajtur për “rastin Kleçka”. EULEX-i nuk e ka lejuar Limajn të dalë nga Gjykata, por e ka dërguar drejtpërdrejt në arrest shtëpiak.
Për “rastin Kleçka”, EULEX-i kishte lëshuar fletëarrest, por Limaj nuk ishte arrestuar për shkak të paqartësisë nëse kjo do të mund të bëhej derisa ai gëzon imunitet si deputet i Kuvendit të Republikës së Kosovës.

Pas këtij konfuzioni, me kërkesë të Qeverisë, Gjykata Kushtetuese, ka analizuar imunitetin e deputetëve, dhe sipas saj, deputetët nuk gëzojnë imunitet nga ndjekja penale për veprimet dhe vendimet e ndërmarra jashtë fushëveprimit të përgjegjësive të tyre.

Por deputeti i Partisë Demokratike, sipas avokatit të tij, Tahir Rrecaj, nuk është dënuar me paraburgim për shkak të gatishmërisë së tij për të bashkëpunuar me gjykatën. Avokatët mbrojtës të Limajt deklaruan se nuk do të ushtrojnë ankesë ndaj këtij vendimi.

Ndaj deputetit Limaj dhe nëntë ish-pjesëtarëve të tjerë të UÇK-së, është ngritur aktakuza për krime lufte. I njohur me nofkën Komandant Çeliku, Limaj për të njëjtin rast është shpallur i pafajshëm nga Gjykata Ndërkombëtare e Drejtësisë në Hagë. Kohë më parë ai ka përsëritur se është i pafajshëm dhe i gatshëm për tu ballafaquar me drejtësisë. /Telegrafi/