Lajme

[Honesty^uk.]

Raporti për Kosovën i Institutit Amerikan të Paqes

Pse shpërthyen trazirat në Kosovë?

Hollësitë ende janë të paqarta, por pasojat e shpërthimit të dhunshëm janë më se evidente: ekstremizimi politik, rinia e pashpresë dhe lëvizja e ngadalshme drejt çështjes së statusit kanë dëshmuar një kombinim të fuqishëm. Ritheksimi i standardeve para statusit është i domosdoshëm, por nuk është reagim i mjaftueshëm

Trazirat e 17-19 marsit në Kosovë, që rezultuan në vdekje të civilëve shqiptarë e serbë, dëmtuan prona private, objekte fetare dhe larguan civilë minoritarë nga shtëpitë e tyre, kërkojnë reagimin adekuat të SHBA-ve dhe të bashkësisë ndërkombëtare.

Deri tash diskutimet janë polarizuar midis atyre që mbrojnë pavarësinë e menjëhershme të Kosovës dhe atyre që duan ta përjashtojnë këtë mundësi. Të parët arsyetohen se demonstratat dëshmojnë se Kosova nuk mund të mbahet në kafaz për një kohë të gjatë, ndërsa protektorati ndërkombëtar duhet t'i lëshojë rrugë vetëvendosjes. Të dytët pohojnë se sjellja e gabueshme nuk duhet shpërblyer dhe se multietniciteti ka dështuar në Kosovë.

Këto pozicione nuk janë të reja dhe nuk do të zgjidhin problemet që ngritën ngjarjet e 17-19 marsit të vitit 2004. Me qëllim të zhvillimit të përgjegjësive për këto trazira, duhet të marrim në konsiderim se çfarë ndodhi, pse ndodhi dhe parandalimin që të mos ndodhin akte të tilla në të ardhmen. Instituti i Paqes i Shteteve të Bashkuara konvokoi më 7 prill një grup të vogël të njerëzve që kanë njohuri për ngjarjet e marsit për t'i analizuar disa nga këto çështje.

Ekstremizmi, dekurajimi i të rinjve dhe shtyrja e statusit final, qenë përzierjet shpërthyese.

Ndërsa hetimet janë në vazhdim e sipër, shihet qartë se qe njoftimi i medies për vdekjen e tre fëmijëve shqiptarë që u atribuohej serbëve, ai që nxiti protestat e të dyja palëve, të serbëve dhe të shqiptarëve në Mitrovicë.

Organizatorë, të paidentifikuar ende, i shfrytëzuan demonstratat spontane për të mobilizuar mijëra të rinj shqiptarë për të protestuar, duke marshuar në shkatërrimin e shtëpive, veturave, dhe objekteve fetare të serbëve dhe të UNMIK-ut. Dhuna u përhap sakaq në dhjetëra vendbanime të Kosovës.

Këto ngjarje ndodhën në një kontekst më të gjerë. Në njërën anë, fitorja e radikalëve në zgjedhjet e dhjetorit në Serbi, krijimi i qeverisë nacionaliste në Beograd dhe deklaratat e zëshme në Serbi për ta mbajtur Kosovën nën sundimin e saj, ka ngjallur shpresat e serbëve dhe frikën në radhët e shqiptarëve të Kosovës për kthimin e sundimit serb në Kosovë.

Në anën tjetër, bashkëpunimi ndërmjet partive kryesore shqiptare për realizimin e "standardeve para statusit" shkaktoi padurimin e shumë shqiptarëve dhe krijoi hapësirë të madhe politike për ata të cilët angazhohen për pavarësi të menjëhershme dhe të pakushte dhe që janë të përgatitur për t'i përdorur mjetet e dhunshme për marrjen e kësaj pavarësie nëpërmjet spastrimit etnik të serbëve nga Kosova.

Krijohet përshtypja se trazirat i kanë zënë në befasi liderët e tri partive kryesore politike të Kosovës, mirëpo figurat e rangut më të ulët partiak mund të kenë pasur njohuri dhe mund t'u janë bashkuar organizatave të veteranëve dhe organizatave të tjera për ta nxitur dhe organizuar dhunën. Ata që i hodhën vaj zjarrit ishin të rinjtë shqiptarë, të cilët e ndiejnë veten të pashpresë.

Ekonomia e Kosovës kishte përfituar nga vendosja e pranisë dhe nga ndihmat ndërkombëtare, që tani është duke pësuar rënie të vazhdueshme. Puna me ndërkombëtarët dhe mundësitë e tyre për të udhëtuar jashtë janë limituar në mënyrë të skajshme.

Shumicës prej tyre u mungojnë dokumentet adekuate dhe disa vende nuk i pranojnë dokumentet e UNMIK-ut. Janë të paktë ata që janë në gjendje të marrin viza për SHBA apo Europë. Të papunësuar, të izoluar dhe të dekurajuar, siç janë, shumë të rinj iu bashkuan protestës kundër serbëve, të cilët ata i quajnë shtypës, dhe të cilët u inkurajuan nga disa liderë të cilët duket se ofronin zgjidhje të shpejtë për statusin final të Kosovës.

Përgjigjja ndërkombëtare ishte joadekuate.

Ndërkohë që publikisht KFOR-i dhe UNMIK-u pohojnë se kanë reaguar shpejt dhe me efikasitet, shumë prova flasin se këto konstatime nuk qëndrojnë në tërësi. Megjithatë KFOR-i mobilizoi efektivin e vet rezervë pa humbur kohë dhe ia doli të rikthente rendin dhe ligjin.

Pasi gjendja në Kosovë u qetësua, përgjigjja ndërkombëtare kryesisht u fokusua në planin e implementimit të "standardeve para statusit në Kosovë" dhe përcaktoi një afat kah mesi i vitit 2005 për vlerësimin e tyre. Politika "trazira para statusit" u hodh poshtë.

Vizita e zyrtarëve të lartë të ShBA-ve dhe të Europës në Prishtinë është përqendruar në ruajtjen e kursit të qëndrueshëm dhe në mosdorëzimin para ekstremistëve. Vizita e nënsekretarit amerikan të Shtetit, Mark Grosman në Prishtinë qe thelbësore për sinjalizimin dhe qartësimin e sërishëm të interesit të vazhdueshëm amerikan në Kosovë.

Në të njëjtën kohë në Uashington dhe në kryeqyetet e Europës po shtohet pranimi i së vërtetës se stili i punës së deritanishme nuk është i mjaftueshëm. Tani "standardet para statusit" janë vetëm parullë. Grupi i Kontaktit po planifikon të takohet në Prishtinë para përfundimit të prillit. Ai planifikon që takime të tilla të organizojë për çdo gjashtë javë.

Flitet edhe për hapjen e "bisedimeve" Prishtinë-Beograd në nivelin politik që do të përqendrohej në çështjet thelbësore. UNMIK-u ka themeluar një bord për shqyrtimin e krizës dhe gjetjen e gabimeve.

Ajo që komuniteti ndërkombëtar nuk e ka bërë ende është zhvillimi i një plani strategjik për kundërvënie ndaj ekstremizmit dhe shpërblimin e të moderuarve. Kryeministri i Kosovës Bajram Rexhepi ka marrë lëvdata ndërkombëtare për angazhimin dhe përpjekjet kurajoze për shpërndarjen e turmave dhe dhënien fund të dhunës. Mirëpo institucionet e vetëqeverisjes së përkohshme në krye të të cilave qëndron ai, kanë marrë barrën për rindërtimin.

Partitë politike shqiptare u bënë bashkë vetëm në një deklaratë të shkëlqyeshme kundër dhunës. Komuniteti ndërkombëtar ka kërkuar këtë gjë, por deri më tash nuk ka parë të jetë ndërmarrë ndonjë masë disiplinore kundër atyre që janë involvuar në këtë dhunë. Po ashtu edhe organizatat e shoqërisë civile kanë bërë një deklaratë të fuqishme pas ngjarjeve, por, për kthimin e deklaratës së tyre në veprim nuk mjaftojnë vetëm fjalët.

Kosovës i është pamundësuar privatizimi i shumë aseteve shtetërore, për shkak të statusit të saj të padefinuar dhe të kundërshtimeve të vazhdueshme nga Beogradi.

Për dallim nga territoret e tjera në Ballkan, që janë të anëtarësuara në FMN dhe në Bankën Botërore, Kosova mund të marrë vetëm grante të vogla për shkak se statusi i saj i padefinuar e pengon të nënshkruajë garancione sovrane që kërkohen nga institucionet financiare ndërkombëtare, në rastet e tilla.

Ky është hendikap serioz në fushën e ekonomisë që limiton ndjeshëm krjimin e vendeve të reja të punës dhe progresin ekonomik, veçanërisht tani kur ndihma ndërkombëtare dhe format e tjera të përkrahjes po pakësohen gjithnjë e më shumë.

Përveç kësaj, deri tani Kosovës i është pamundësuar privatizimi i shumë aseteve shtetërore, përsëri për shkak të statusit të saj të padefinuar dhe të kundërshtimeve të vazhdueshme nga Beogradi. Ndërkohë që për shumë kompani në pronësi shoqërore, mendohet se janë të padobishme, ato mbajnë të bllokuar sasi të madhe të pasurisë së patundshme dhe resurse të tjera të nevojshme për zhvillimin ekonomik.

Gjërat që duhen bërë patjetër

Hollësitë ende janë të paqarta, por pasojat e shpërthimit të dhunshëm janë më së evidente: ekstremizmi politik, rinia e pashpresë dhe lëvizja e ngadalshme drejt çështjes së statusit kanë dëshmuar një kombinim të fuqishëm. Ritheksimi i standardeve para statusit është i domosdoshëm, por nuk është reagim i mjaftueshëm. Me qëllim të parandalimit të shfaqjes së rasteve të tilla në të ardhmen, strategjia efektive do të duhej të synonte arritjen e këtyre gjërave.

Dekurajimi i ekstremizmit dhe përkrahja e të moderuarve - Sigurimi i shpresës në radhët e të rinjve për një të ardhme më të mirë nëpërmjet punësimit dhe ofrimi i mundësive për shkollim dhe, ritheksimi i nevojës dhe rëndësisë së procesit për caktimin e statusit final.

Kjo nuk mund të bëhet brenda kontekstit "standardet para statusit" dhe kërkon më shumë se angazhimin aktual ndërkombëtar.

Më poshtë po japim një seri masash, shumica prej të cilave duhet incicuar nga UNMIK-u dhe të cilat së bashku do të kenë ndikim të rëndësishëm në arritjen e asaj që quhet "standardet para statusit".

- Të bëhet ndjekja këmbëngulëse e nxitësve të dhunës, duke u përqendruar edhe në figurat e lidershipit, në ata të cilët mbajnë pozita të rëndësishme politike në kuadër të partive politike dhe të institucioneve të Kosovës.

-Të vlerësohet dhe riparohet dëmi i shkaktuar dhe të inkurajohet kthimi i të gjithë të zhvendosurve nëpër shtëpitë e tyre, me shtimin e sigurisë nga ana e KFOR-it dhe UNMIK-ut.

-Të forcohen insitucionet vetëqeverisëse nëpërmjet krijimit të ministrive të brendshme dhe të drejtësisë, insitucione këto që janë të nevojshme pavarësisht nga statusi final që do të vendoset më vonë. Fillimisht ato të luajnë një rol këshillëdhënës dhe mbledhës të informatave për mbështjetjen e punës në lëmin e sigurisë që është përgjegjësi e UNMIK-ut, në përputhje me Rezolutën 1244 të Këshillit të Sigurimit.

-Të forcohet edhe më tej autoriteti institucioneve të përkohshme nëpërmjet krijimit të një zyre për punë të jashtme, në përputhje me Rezolutën 1244, nën autorizimin e kryeministrit për të themeluar zyra përfaqësuese për mbledhjen e informatave dhe për promovimin e tregtisë dhe bashkëpunimit ekonomik duke përfshirë Tiranën, Shkupin, Beogradin, Uashingtonin dhe Brukselin.

-Të vendoset pranimi definitiv i dokumenteve të UNMIK-ut nga të gjitha vendet anëtare të BE-së dhe nga vendet fqinje.

-Të fillojnë projektet pilot për testimin e decentralizimit në baza joetnike, por rajonale.

-Të shtohet në mënyrë të ndjeshme mbështetja për arsimimin dhe për organizatat e shoqërisë civile, të përkushtuara për zgjidhjen e problemeve të Kosovës në mënyrë paqësore.

-Të rishikohet raportimi i shtypit dhe të zbatohen masa legale kundër atyre që vlerësohet se e kanë nxitur dhunën.

-Të rishikohet dhe të reformohet planprogrami që përdoret nga serbët dhe shqiptarët në shklollat e Kosovës dhe të përpilohet një planprogram i ri për historinë e Kosovës.

-T'u mundësohet FMN-së dhe Bankës Botërore dhënia e huave Kosovës.

-Të vazhdohet privatizimi.

-Të përmirësohet komunikimi emergjent dhe reagimi i koordinuar ndërmjet UNMIK-ut, KOR-it dhe institucioneve vetëqeverisëse.

Përveç kësaj, kërkohet shtimi i përkushtimit të Qeverisë Amerikane për Kosovën, duke pasuar kështu vizititën e nënsekretarit Grosman dhe duke vënë në spikamë se ShBA-të synojnë ta vazhdojnë punën për përcaktimin e statusit final të Kosovës, sapo të jetë arritur progres i mjaftueshëm në trajtimin e serbëve dhe të minoriteteve të tjera. ShBA-të duhet të inicojnë angazhim energjik për definimin e procesit, të strategjisë dhe të agjendës negociuese për zgjidhjen e statusit final të Kosovës.

Kjo kërkon ose emërimin e një të dërguari të posaçëm për të punuar me Grupin e Kontaktit dhe me Kombet e Bashkuara në modalitetet që do të shërbenin për caktimin e statusit final, ose emërimin e një amerikani në postin e PSSP-së, pas skadimit të mandatit aktual.

Këshilli i Sigurimit nuk ka miratuar ndonjë rezolutë për Kosovën që nga përfundimi i luftës së NATO-s kundër Jugosllavisë. Ka ardhur koha që OKB-ja të caktojë parametrat për vendosjen e statusit final të Kosovës.

Çfarëdo rezolute e re duhet të përfshijë garanci të fuqishme ndërkombëtare për të drejtat dhe sigurinë e serbëve dhe të minoriteteve të tjera, si më poshtë:

-Nuk ka kthim të sundimit të Beogradit;

-Nuk ka ndarje të Bosnjës dhe të Maqedonisë;

-Nuk do të ketë tjetërsim të pasurisë dhe monumenteve serbe në Kosovë dhe

-Nuk do të ketë dhunë.

Washington, prill 2004



UNMIK-u bën publik raportin për incidentin në Çabër

Raporti: Mbytja e fëmijëve nuk ishte vrasje

Pas Beogradit, UNMIK-u bëri publik dje raportin rreth rastit të mbytjes në lumin Ibër të tre fëmijëve shqiptarë. Raporti paraprak i hetuesit ndërkombëtar, Peter Tinsley thekson se deri në këtë fazë, nuk ka fakte që mbështesin deklaratën e fëmijës së vetëm të mbijetuar në këtë tragjedi, Fitim Veselit, sipas të cilit, ai dhe tre fëmijët tjerë më 16 mars ishin ndjekur me një qen nga dy serbë lokalë. Fitimi, dëshmitari kryesor i incidentit, siç theksohet edhe në raport, u kishte deklaruar hetuesve se nga frika, fëmijët janë hedhur në ujërat e rrëmbyeshme të lumit Ibër, me ç'rast vetëm ai kishte shpëtuar.

Zëdhënësi për polici dhe drejtësi, Neeraj Singh tha dje se hetuesit kishin marrë në pyetje dy herë Fitim Veselin, më 17 dhe 22 mars, ndërsa më vonë, prindërit nuk kishin lejuar që fëmija i tyre sërish të intervistohej, meqenëse mjeku kishte konstatuar se ai ishte traumatizuar, duke qenë se njëri nga viktimat ishte vëllai i Fitimit, trupi i të cilit ende nuk është gjetur.

Zoti Singh tha se ishin intervistuar dëshmitarë dhe banorë të tjerë të fshatit shqiptar, Çabër dhe atij serb, Zupç. Ai tha se në bazë të hetimeve të deritanishme, rasti nuk mund të trajtohet si vepër kriminale ndaj një apo më shumë individëve.

Arsyet primare të këtij konkluzioni sipas tij, janë se asnjë i dyshuar sipas përshkrimeve të gjera që ka dhënë fëmija i mbijetuar, nuk është gjetur.

Nuk është gjetur asgjë që do të mbështeste ekzistencën e njerëzve të këtillë. Asnjë qen, siç është përshkruar nga fëmija e mbijetuar, nuk është gjetur në atë zonë.

Gjithashtu ka mospërputhje të konsiderueshme në deklaratën e fëmijës që i ka dhënë gjykatësit hetues në mëngjesin e 17 marsit dhe intervistës që është zhvilluar nga hetuesi i rastit më 22 mars.

Zëdhënësi për polici dhe drejtësi i UNMIK-ut theksoi se nëse do të ketë fakte të besueshme, hetimet do të rifillojnë në të ardhmen.

Neeraj Sighn nuk ishte në gjendje të shpjegonte se si raporti hetues paraprak rreth rastit të Çabrës kishte rënë në duart e autoriteteve të Beogradit para se të publikohej në Kosovë dhe para se të njoftoheshin familjarët.

Ai tha se po hetohet nëse raporti mund të ishte vjedhur.



KFOR dhe UNMIK arreston Sami Lushtakun

Njësitë speciale të forcave paqeruajtëse arrestuan dje në mëngjes në Skënderaj të Drenicës, Sami Lushtakun, ish-komandant i Zonës së Parë të Trupave të Mbrojtjes së Kosovës. Zoti Lushtaku është arrestuar nën dyshimin të jetë i përfshirë në trazirat e dhunshme të marsit, si dhe për, siç thuhet, keqtrajtim të civilëve shqiptarë pas përfundimit të luftës në Kosovë. Arrestimin e Sami Lushtakut e konfirmoi zëdhënësi i KFOR-it James Moran, i cili tha se zoti Lushtaku akuzohet të jetë i involvuar dhe njëri nga organizatorët e trazirave të marsit, por edhe për vepra të tjera jashtëligjore, keqtrajtim të civilëve shqiptarë pas periudhës së luftës. Për arrestimin e Sami Lushtakut ndërkaq ka reaguar deri tash vetëm Partia Demokratike e Kosovës. Zyrtarë nga shtabi i përgjithshëm i TMK-së thonë se akoma nuk janë njoftuar zyrtarisht për motivet e arrestimit të zotit Lushtaku. Ai njoftohet se po mbahet në arrest në kampin amerikan, Bondstill afër Ferizajt. Sami Lushtaku, ishte një nga eprorët e Ushtrisë Çlirimtare të Kosovës dhe po ashtu pas demilitarizimit të saj, komandant i zonës së parë të TMK-së. Ai më herët qe suspenduar nga radhët e kësaj trupe me një vendim të kryeadministratorit të Kosovës, për faktin që siç thuhet ishte pengesë për zhvillimin e kësaj trupe. Po ashtu Sami Lushtaku, ishte përfshirë edhe në listën e zezë të presidentit amerikan, Xhorxh Bush, i cili është cilësuar se paraqet rrezik për sigurinë në rajon.

[Honesty^uk.]

E ardhmja e Kosoves


Javën e kaluar qendra Woodrow Wilson në Washington zhvilloi një konferencë tre orëshe mbi të ardhmen e Kosovës gjatë së cilës ekspertë dhe analistë ranë dakort në përgjithësi se rajoni i Ballkanit mund të hyjë në një fazë më të vështirë paqendrueshmërie. Në konferencë u shpreh pak optimizëm se zgjidhja e statusit përfundimtar të Kosovës do të kontribojë për qëndrueshmërinë në rajon.
Ekspertët thanë pa hezituar se gjërat nuk po shkojnë mirë në Kosovë dhe në përgjithësi në Ballkan. Komentet më pesimiste i bëri analisti i çështjeve të sigurimit, David Kanin, i cili argumentoi se përpjekjet e mira të komunitetit ndërkombëtar nuk do të jenë të suksesshme po qe se fraksionet rivale eknike të rajonit nuk dëshirojnë një zgjidhje paqësore të konfliktit.

Zoti Kanin shprehu bindjen se nuk do të ketë zgjidhje afatgjatë në se njerëzit në rajon nuk vendosin të marrin përgjegjësinë për të ardhmen e tyre. E ardhmja e tyre është e ndërvarur. Edhe nëse ato do të hyjnë në Nato apo në Bashkimin Evropian siç po ndodh me disa, apo edhe në se bëjnë përparime në ekonomi dhe reforma, kjo nuk do të jetë zgjidhje. Në se trupat tona largohen, në se pushtimi de fakto merr fund, ashtu do të marrë fund edhe situata e tanishme. Nuk do të ketë më Bosnje. Do të ketë diçka tjetër dhe çdo gjë do të jetë e lakmueshme për tu rrëmbyer përsëri”.

Zoti Kanin tha se pavarësia e Kosovës do të zgjidhte pak probleme por mund të nxiste shpërbërje të entiteteve të tjera brenda ish Jugosllavisë.


Geert Ahrens, diplomat gjerman në pension me një eksperiencë 15 vjeçare në Ballkan tha se Sërbia është dobësuar ndjeshëm nga humbjet që ka pësuar gjatë shpërbërjes dhjetë vjeçare. Vendi tha ai është dobësuar kaq shumë psikologjikisht saqë situata atje është e ngjashme me atë të Gjermanisë pas luftës së parë botërore. Ai vuri theksin në lidhjet historike të Serbisë në Kosovë dhe realitin zhgënjues që Serbia nuk mund të riafirmojë sundimin e saj mbi rajonin e përbërë nga 90 përqind shqiptarë. Zoti Ahrens favorizoi pavarësinë e Kosovës por shprehu shqetësim se një zhvillim i tillë mund të përshpejtojë shpërbërjen e Maqedonisë, ku gati një e treta e popullësisë është shqiptare. Ai beson se marrëveshja e Ohrit për ndarjen e pushtetit në Maqedoni nuk po funksionon.

Analisti i zbulimit Kanin beson se shumë pak është arritur nga përfshirja prej një dekade e komunitetit ndërkombëtar në Ballkan. Ai ia atribuon një pjesë të madhe të paqëndrueshmërisë dhe trazirat e fundit në Kosovë, Serbi, Bosnje dhe Maqedoni, një iniciative diplomatike të Gjermanisë që njohu pavarësinë e Slovenisë dhe Kroacisë në vitin 1991.

Folës të tjerë në konferencë përshëndetën një propozim nga Instituti Amerikan i Paqes për të parandaluar dështime të tjera në rajon. Instituti po i bën thirrje Shteteve të Bashkuara dhe Bashkimit Evropian të shtojë përpjekjet për të nxitur paqen dhe qëndrueshmërinë në Ballkan.

[Honesty^uk.]

UNMIK-u dhe institucionet e Kosovës hedhin poshtë planin e qeverisë serbe -


Plani i Qeverisë së Serbisë për krijimin e pesë rajoneve në territorin e Kosovës të banuara kryesisht me komunitetin serb si dhe dhënia e një autonomie territoriale me kompetenca të njëjta si të organeve qendrore, është konsideruar nga zyrtarë të institucioneve të Kosovës si një hap i gabuar që nuk do t’i ndihmojë marrëdhënieve mes Kosovës dhe Serbisë, por as vetë pozitës së serbëve në Kosovë.
Ramush Tahiri, këshilltar politik i kryetarit të Kuvendit thotë se miratimi i këtij plani nga ana e qeverisë serbe është përzierje në punët e brendshme të Kosovës, pasi Serbia, sikurse asnjë shtet tjetër nuk ka juridiksion mbi Kosovën.
“Autonomia politiko-territoriale e dhënë vetëm nga fakti se ai territor është i banuar me një etni të caktuar është kontraproduktive, për atë arsye se në rend të parë autonomia politiko- territoriale ndërtohet për ta bartur pushtetin në nivelet lokale dhe nuk është ekskluzivitet përkatësia nacionale. Kjo neve do të na fuste në një konflikt apo në një politikë që dëshiron Serbia, që në Kosovë të ketë një konflikt ndëretnik, që deri tani ne nuk e kishim. Ne kishim konflikt me Serbinë dhe ta përsëritë gjendjen në Kroaci apo në Bosnje,” tha Tahiri.
Nga ana tjetër zyrtarë të administratës ndërkombëtare në Kosovë mohojnë ta kenë parë një plan të tillë, edhe pse kryeministri serb Vojisllav Koshtunica ka thënë se me këtë plan janë njoftuar të gjithë mekanizmat ndërkombëtarë në Kosovë.
Shefja për informim e kësaj administrate Hua Jiang thotë se për këtë plan kanë dëgjuar vetëm nga mediat serbe.
“Nuk mund të bëj komente të bazuara nga ato që kam parë në media. Kur ta marrim këtë plan, do ta studiojmë me kujdes dhe ndoshta mund t’ju japim një përgjigje më gjithëpërfshirëse,” thotë Hua Jiang.
Sidoqoftë, ajo nënvizon se qëndrimi i administratës ndërkombëtare në Kosovë është se çdo vendim duhet të merret në pajtueshmëri mes të gjitha komuniteteve.
“Megjithatë, qëndrimi ynë për këtë çështje është shumë i qartë, çkado që të vendoset, në fund duhet të jetë e pranueshme për të gjitha komunitetet në Kosovë. Kantonizimi dhe ndarja nuk kanë qenë kurrë objektiva tona dhe këtë e kemi thënë shumë qartë edhe në të kaluarën”, tha Hua Jiang .
Ndërkohë, këshilltari politik i kryeparlamentarit thotë se para se të mendojë për Kosovën, qeveria serbe do të ishte mirë që këtë lloj autonomie ta zbatojë në territorin e vet.
“Nëse Serbia mendon se ka aftësi menaxhuese demokratike mund t’i zbatojë në territorin e vet, ta zëmë në Luginën e Preshevës më të gjitha këto kompetenca, apo në Sanxhak e Vojvodinë”, tha Ramush Tahiri.
Ai thotë se ky plan do të shfrytëzohet për konsum nga opinioni i brendshëm serb, por nuk do të ketë reperkusione për institucionet e Kosovës, të cilat sipas Tahirit duhet të vazhdojnë punën në përputhje me dokumentet me të cilat qeverisin.

Evropa e Lire

[Honesty^uk.]

Miratohet nga Parlamenti evropian rezoluta për Kosovën -


Në emër të Komitetit Politik të Këshillit të Evropës, eurodeputeti britanik Toni Llojd kërkoi dënimin e atyre që organizuan dhunën. "Ne të gjithë duhet të jemi të shokuar nga ajo që ndodhi, ne duhet të dënojmë njëkohësisht ata që e nxitën dhunën, por edhe ata që dështuan ta ndalojnë dhunën", tha Llojd. Në fjalën e tij, kryeadministratori ndërkombëtar i Kosovës, Harri Holkeri paraqiti me shifra dëmet e shkaktuara nga trazirat në Kosovë. "Ne jemi megjithatë të ndërgjegjshëm se dhuna ishte kryesisht rezultat i synimeve të ekstremistëve, të cilët nuk përfaqësojnë popullin e Kosovës. Krimet do të dënohen", tha më tej Holkeri. Holkeri deklaroi se është arrestuar dje njëri nga liderët që qëndron pas trazirave dhe izolime të tilla kanë rëndësi, në mënyrë që organizatorët e trazirave të mos brohoriten si heronj nga popullata. Për këtë ekziston mbështetja e shumicës së popullatës së moderuar të Kosovës, tha ai. Deputetët serbë në KE thanë se në Kosovë ka spastrim etnik të pastër. Asambleja e miratoi pa ndryshime esenciale projekt-rezolutën për Kosovën. Çelësin për arritjen e stabilitetit dhe për ta sjellë Kosovën më pranë Evropës, Këshilli i Evropës e sheh tek zbatimi i plotë i „Standardeve. Nga udhëheqësit politikë shqiptarë të Kosovës ajo kërkon të demonstrojnë angazhimin e sinqertë për mbrojtjen e minoriteteve dhe të ndërpresin mbështetjen aktive apo pasive për grupet ekstremiste. Nga qeveria e Serbisë dhe e Malit të Zi ajo kërkon shkrirjen e të gjitha strukturave paralele që mbështet në Kosovë dhe bashkëpunim në planin e zbatimit të standardeve.

[fadil]

Holkeri pezullon suspendimin e 12 pjesëtarëve të TMK-së Kosovë

Me 3 dhjetorë 2003 kam suspenduar me pagesë 12 pjestarë të TMK-së për 6 muaj , Nuredin Lushtakun , Rrahman Ramën Avdullah Babalinë, Musli Gecin , Agron Spahiun , Bashkim Hamdiun, IZet Aliun , Ilir Berishën , Sedat Parduzin , Bedri Rexhepin , Fejzullah Mehmetin dhe Emrush Rexhepin. Ky vendim ka pasuar në bazë të informacioneve që më janë ofruar mua duke indikuar se këta persona mund të kenë qenë të përzier në aktivitete kriminale në jopërputhshmëri me kodin disciplinorë të TMK-së.


Akuzat për këta 12 persona i janë dorëzuar policisë së UNMIK- ut për hetime. Komisionieri i policisë së UNMIK –ut më ka këshilluar mua se nuk ka baza të qëndrueshme për ndjekje kriminale në ndonjërin nga rastet . Kështu që kam vendosur se suspendimi i imponuar në dhjetor të 2003 - të tërhiqet dhe personat në fjalë të kthehen si pjesëtarë të TMK-së dhe të ushtrojnë postet e mëparshme me të drejtat e plota të tyre dhe privilegjet që ju kanë takuar. Ky vendim hyn në fuqi menjëherë.

[fadil]

Kryeministri Rexhepi kërkon suspendimin e tenderimit të operatorit të telefonisë mobile Kosovë

Kreu i qeverisë Bajram Rexhepi, ka konfirmuar se i është drejtuar me një shkresë zëvëndës kryeadminstratorit Çarlls Brajshou përmes të cilës ka kërkuar që të suspendohet procesi i tenderimit të operatorit të telefonisë mobile, për të hulumtuar nëse bëhet fjalë për korrupsion dhe keqpërdorime.


Autoriteti Rregullativ i Telekomunikacionit thotë se Mobikosi nuk ka lidhje me Mobtelin e Serbisë. Mirëpo në një deklaratë dhënë muaj më parë drejtor të këtij operatori thanë se janë trashëgimtarë të Mobtelit serb.

[fadil]

PRISHTINË
Kryesia e Lidhjes Demokratike të Kosovës sot ka kërkuar largimin e Adnan Merovcit nga posti i kryeshefit të sekretariatit të Komisionit Qendror të Zgjedhjeve. Kjo kërkesë i është paraqitur shefit të OSBE-s në Kosovë, Paskal Fieski. Në këtë kërkesë thuhet se zgjedhja dhe qëndrimi i zotit Merovci në këtë post e vë në dyshim objektivitetin dhe pa-anshmërinë e këtij mekanizmi zgjedhor. Zëdhënësi i OSBE-s, Sven Lindholm tha sot se "aktualisht nuk do të bëhen kurrfarë ndryshimesh" pasi posti i zotit Merovci më tepër është teknik dhe asgjë s'ka të bëj me partitë

[MemphiSx]

Prishtinë, 1 korrik - Presidenti i Kosovës, Dr. Ibrahim Rugova, u ka drejtuar qyetarëve të Kosovës një mesazh me rastin e 2 Korrikut, Ditës kur para 14 vitesh u shpall Deklarata e Pavarësisë. Më poshtë po e japim tekstin e mesazhit të Presidentit.
"Me rastin e 2 Korrikut, Ditës së shpalljes së Deklaratës së Pavarësisë, që është Ditë e Pavarësisë së vendit tonë, Ju shpreh urimet e mia të përzemërta.
Dita e 2 Korrikut të vitit 1990 ka hyrë në historinë moderne të Kosovës si Ditë e Pavarësisë, me të cilën iu hapën dyert ditëve të tjera madhore për lirinë, pavarësinë dhe demokracinë e Kosovës.
Në këtë ditë të shënuar festive, urime të ngrohta u shprehim UNMIK-ut, KFOR-it, OSBE-së dhe përfaqësive diplomatike në Prishtinë.
Njëherësh, në këtë ditë i kujtojmë të gjithë ata që ranë për lirinë dhe pavarësinë e Kosovës.
Dhashtë Zoti që 2 Korrikun e ardhshëm ta presim me njohjen formale të pavarësisë nga miqtë e vendit tonë të çmueshëm", thuhet në fund të mesazhit të Presidentit të Kosovës
Dr. Ibrahim Rugova drejtuar qytetarëve të Kosovës.

[MemphiSx]

Prishtinë, 1 korrik - Në një deklaratë të sotme për media znj. Melihate Tërmkolli, anëtare e Kryesisë së LDK, ka bërë të ditur kërkesën e Kryesisë së LDK-së për largimin e z. Adnan Merovci nga posti i kryeshefit të Sekretariatit të KQZ.
Znj. Tërmkolli thekson se Kryesia e LDK-së i ka paraqitur këtë kërkesë OSBE përkatësisht shefit të misionit të OSBE-së në Kosovë z. Paskal Fieski.
Në shkresën e Kryesisë së LDK-së drejtuar z. Fieski theksohet se zgjedhja dhe qëndrimi i z. Merovci në këtë post e vë në dyshim objektivitetin dhe paanshmërinë e këtij mekanizmi zgjedhor për shkak të qëndrimit dhe paraqitjeve shumë të hapura e publike në media të z. Merovci kundër LDK-së dhe Presidentit Ibrahim Rugova. Arsye tjetër në shkresë theksohet shkelja dhe mospërfillja e procedurës zgjedhore me rastin e zgjedhjes së z. Merovci në këtë post.
Znj. Tërmkolli thekson se sjelljet e kontestueshme të z. Merovci, paraqitja e tij publike në media në mënyrë sistematike kundër LDK-së dhe Presidentit Ibrahim Rugova është arsye e plotë për largimin e menjëhershëm të tij nga ky post. Në fakt këto kanë qenë arsye të mjaftueshme që z. Merovci nuk ka mundur të zgjedhet fare në këtë post ngase vetë zgjedhja e tij prejudikon paanshmërinë dhe objektivitetin e punës së tij në këtë sekretariat.
Është kundër rregullave më elementare të demokracisë që në një post të tillë të zgjedhet personi i cili hapur vihet kundër cilitdo subjekt politik që konkurron në zgjedhje, në veçanti kur subjekti politik, siç është LDK, është partia më e madhe në vend. Znj. Tërmkolli potencon se kërkesa e Kryesisë së LDK-së për largimin e z. Merovci nga posti i kryeshefit të Sekretariatit të KQZ-së është qëndrim i palëkundur i LDK-së, ngase LDK është e interesuar thellësisht për zgjedhje të lira, demokratike dhe në të cilat do të jetë e çmuar dhe e vlerësuar drejt vota e qytetarëve të Kosovës.

[fadil]

Enver Hasani, shef i Zyrës për Koordinim dhe Bashkëpunim ndërkombëtar


RADIO EVROPA E LIRË
Zoti Hasani. Këto ditë ju keni marrë postin e shefit të Zyrës për Koordinim dhe Bashkëpunim me Jashtë. Fillimisht a mund të na i përshkruani cilat do të jenë funksionet e kësaj zyre të cilën ju do e drejtoni?

ENVER HASANI
Kjo zyrë është pjesë e shërbimit civil të Kosovës, do të thotë zyrë e cila ka për qëllim, siç e thotë dhe titulli, të kryejë punët e bashkëpunimit me jashtë të Kosovës, përfshirë këtu dhe dialogun rajonal, kryesisht në nivel të koordinimit të punëve me jashtë, do të thotë prej zyrës së kryeministrit, ministrive dhe institucioneve tjera. Pra do të jetë një lloj servisi për të lehtësuar komunikimin me jashtë dhe dialogun e strukturave dhe institucioneve të Kosovës.

RADIO EVROPA E LIRË
Sa kjo zyrë ndihmon në plotësimin e kërkesës së vazhdueshme të kryeministrit të Kosovës, që zyra e tij dhe qeveria e Kosovës të kenë qasje në raporte me jashtë?

ENVER HASANI
Kërkesat për politikë të jashtme dhe për bashkëpunim me jashtë të një popullsie 2 milionëshe sigurisht që nuk i plotëson. Por, ajo që sigurisht se plotëson kjo zyre është shërbimi si një pikë fokale e koordinimit të punëve me jashtë të strukturave të Kosovës, në atë nivel që politika e Kosovës e sheh të arsyeshme. Kjo zyrë nuk është zyrë që bën ose ekzekuton politikën me jashtë, por është një zyrë, e cila shërben si një lloj servisi i strukturave të Kosovës për bashkëpunim me jashtë. Ajo, sigurisht është larg asaj që mendojnë kosovarët dhe sigurisht që është larg të qenit një institucion politik, ministerial për politikë të jashtme, së paku për këtë fazë.

RADION EVROPA E LIRË
Ishte dhe një kërkesë tjetër e kryeministrit Rexhepi dhe qeverisë së Kosovës që përmes zgjerimit të kapaciteteve në përfaqësimin me jashtë të mund të hapen dhe disa zyra përfaqësuese të Kosovës jashtë vendit. Sa krijohet kjo mundësi me këtë zyrë?

ENVER HASANI
Hapja e zyrave jashtë është një çështje tjetër. Ajo është një çështje politike, e cila duhet të jetë pjesë e një dialogu politik në mes të UNMIK-ut dhe strukturave vendore dhe nuk është në kompetencë dhe në mandatin e kësaj zyreje.

RADIO EVROPA E LIRË
Sa janë nevojat që Kosova të ketë një përfaqësim politik, një përfaqësim diplomatik në arenën ndërkombëtare?

ENVER HASANI
Më lejoni ta them një çështje. Këtu ngatërrohen gabimisht, do të thotë shërbimi i jashtëm, ministria e jashtme dhe statusi i Kosovës. Unë mund t’i numëroj me dhjetra vende të cilat janë entitete siç themi ne parashtetërore e që kanë Ministri të Jashtme, duke filluar nga këtu afër me Malin e Zi e deri te entitetet siç janë Kebeku, ose Ishujt e Hollandës ose Tiroli, që kanë një komunikim shumë të dendur me jashtë, por që nuk janë shtete, që do të thotë se nuk lidhen me statusin që quhet shtet. Prandaj, mendoj se statusi i Kosovës në gjendjen që është tani nuk e pengon dhe nuk ka asnjë argument të bindshëm që do ta pengonte që Kosova me një popullësi prej 2 milionësh, një territor me 11 mijë kilometra katror, të ketë ministri të jashtme për të kontaktuar me botën. Ajo çka do të thotë është pjesë e statusit aktual të Kosovës, është se natyre e asaj ministrie mund të mos jetë, dhe në këtë fazë nuk do të mund të ishte, sikur janë ministritë e vendeve sovrane. Pra do të kishte pasur kompetenca vetëm në fusha dhe lëmi të caktuara dhe për problemet e caktuara. Këto dy çështje duhet të ndahen fuqishëm, sepse Kosova nuk do të thotë se është në komunikim me botën nëse bota është këtu. Kosova sigurisht ka pasur dhe do të ketë nevojë të jetë prezente dhe të ketë një zë pak më origjinal për atë se çfarë ndodh këtu, në çështje të ndryshme, për shembull arsimi, kultura, sporti, por pse jo edhe në çështjet politike në një fazë të më vonshme.

RADIO EVROPA E LIRË
Nëse do të përqëndroheshim në këtë fazë të më vonshme, sa atëherë konsideroni se kjo zyrë, mund të jetë celulë e një ministrie të jashtme në mandatin e ardhshëm të qeverisë së Kosovës?

ENVER HASANI
Mendoj se me ndihmën e institucioneve të Kosovës, por edhe liderëve politikë, të ekspertizës ndërkombëtare dhe ndihmën e faktorit të jashtëm, unë besoj se kjo zyrë mund të vendosë në mënyrë graduale themelet e asaj pjese që quhet profesionale e jo politike, të shërbimit të jashtëm të Kosovës. Në këtë drejtim mendoj që mund të luajë një rol mjaft pozitiv, por po përsëris, ato janë probleme politike, kurse kjo zyrë në stadin që është tani ka nevojë më shumë për ndihmën e ekspertizës nga jashtë, sepse Kosova nuk ka, siç dihet një përvojë të madhe në këtë fushë. Ka ekzistuar përpara, shërbimi i jashtëm i Kosovës në kuadër të ish-Jugosllavisë, por megjithatë ata njerëz ose janë shumë të moshuar ose nuk jetojnë në Kosovë dhe ajo ka nevojë për një ekspertizë dhe ndihmë nga jashtë, ndihmë profesionale në ngritjen e kësaj zyre.

RADIO EVROPA E LIRË
Ndërkohë zoti Hasani, nëse mund të përqëndrohemi dhe në një çështje tjetër. Pas trazirave të marsit bashkësia ndërkombëtare adresoi disa kritika të ashpra ndaj Prishtinës. Sa konsideroni se me punën që është bërë pas marsit është arritur të përmirësohet ky imazh i prishur nga këto trazira?

ENVER HASANI
Mendoj se imazhi i marsit ka mbetur, si të thuash i njëjtë, përjashtim që rindërtimi i shtëpive dhe iniciativa e zotit Rexhepi për dialog të brendshëm, në njëfarë mënyre e ndajnë disa hapa nga ky imazh. Megjithatë struktura e atij imazhi që është krijuar në mars mbetet e njëjtë dhe ajo çka është më e keqja ngjarjet e marsit kanë filluar të qëndrojnë mbi kokën e ne të gjithëve si një shenjë e shëmtuar e asaj çfarë mund të ndodhë në të ardhmen, nëse nuk ndërmerren hapa shumë më radikalë të rindërtimit dhe ridefinimit të raporteve ndërmjet UNMIK-ut dhe institucioneve vendore në njërën anë dhe në anën tjetër institucione vendore dhe UNMIK bashkarisht me popullësinë lokale. Kështu që po që se diçka nuk bëhet në këtë drejtim, mendoj që viti tjetër na pret jo me shenja të mira dhe jo me përspektivë për të gjithë ne.

Intervistoi: Zijadin Gashi

[fadil]

Thaçi takoi sot në Bruksel Havier Solanën Aktuale

Kryetari i PDK-së, Hashim Thaçi, është takuar sot në Bruksel me Përfaqësuesin e Lartë të Bashkimit Evropian për Politikë të Jashtme dhe Siguri, Havier Solanen.


Kryetari i Partisë Demokratike të Kosovës Hashim Thaçi, është takuar me Përfaqësuesin e Lartë për Poltikë të Jashtme dhe Siguri të Bashkimit Evropian, Havier Solanën. Ky takim është konform premtimit që ka dhënë Solana gjatë vizitës së fundit të tij në Prishtinë, se do të thërret kreun e PDK-së, në Bruksel, për të diskutuar idenë e Thaçit rreth zbatimit të formulës rreth Marrëveshjes së Ohrit edhe në Kosovë. Ndonëse ka pohuar se marrëveshja identike e një vendi nuk mund të zbatohet në një vend tjetër, Solana nuk e ka përjashtuar apriori idenë e Thaçit, sepse ka vlerësuar se disa elemente të Marrëveshjes së Ohrit, mund të aplikohen edhe në rastin e Kosovës. Lideri i partisë së dytë në Kosovë, pas takimit deklaroi se gjithashtu është diskutuar mundësia që BE-ja, të merr më shumë përgjegjësi në vend apo siç u shprehë Thaçi, të evropianizohet Kosova. Temë e pashmangshme e këtij takimi ishin ngjarjet e marsit, të cilat u kualifikuan sërish si të dëmshme mirëpo, ata të dy, përkatësisht Solana dhe Thaçi, janë pajtuar se nuk bën të ndëshkohet i tërë populli i Kosovës për shkak të kësaj episode.

[fadil]

Politika amerikane ndaj Evropës Juglindore: Puna e papërfunduar në Ballkan
Astrit Lulushi
15 korrik 2004


Komisioni i Senatit për Marrëdhënie me Jashtë, organizoi dje nje seance dëshmishë me temën "Politika amerikane ndaj Evropës Juglindore: Puna e papërfunduar në Ballkan". Senatori Xhorxh Vojnoviç që drejtoi seancën tha se ndërkohë që Shteteve të Bashkuara u duhet te përmbushin zotimet e tyre në Irak, Afganistan e në pjesë të tjera të botë, ato nuk duhet të harrojnë sfidat ende të pakapërcyera në Ballkan. Para Komisionit te Senatit ishin thirrur për të dëshmuar zyrtarë të lartë te administratës, si dhe ekspertë amerikanë, nga Kosova e Serbia.
Zëvendës nën sekretarja e Departamentit të Shtetit, Kathlin Stivens tha synimi i politikës së Shteteve të Bashkuara në Ballkan është integrimi i këtij rajoni në bashkësinë e vlerave euro-atlantike të demokracise, shtetit ligjor dhe lirive individuale. Në këtë rrugë hasen edhe pengesa, tha ajo, perfshi një dekadë konflikti që la pas ndarje etnike dhe rrënim ekonomik; kriminelet e luftës që vazhdojnë të enden të lirë; çështja e afro 1 milionë refugjatëve dhe të shpërngulurve ende e pazgjidhur; kufijtë e pakontrolluar dhe shteti i dobët ligjor që paraqesin shqetësime të mëdha në fushën e të drejtave të njeriut dhe të sigurisë.

Megjithatë, tha zonja Stivens, Shtetet e Bashkuara kanë bërë përparime të qëndrueshme në ketë drejtim. Me ndihmen amerikane, tha ajo, në Maqedoni, zbatimi i marreveshjes së Ohrit ka larguar rrezikun e përsëritjes se konfliktit të armatosur ndëretnik dhe e ka shtyrë vendin drejt rrjedhave te integrimeve euro-atlantike.

Edhe, Shqipëria, tha zonja Stivens, vazhdon të bëjë përparim drejt integrimit më të gjërë euro atlantik. Ndihmës nën sekretarja e Shtetit tha se politika e Jashtme e Shqipërisë ndaj vendeve të rajonit, përfshi Kosovën, vazhdon të mbetet e moderuar dhe konstruktive. Marrëdhëniet amerikano-shqiptare në fushën e sigurimit, zonja Stivens i cilësoi si te shkëlqyera.

Në Kosovë, zonja Stivens, që pas trazirave të marsit palët kanë filluar të krijojnë urat e nevojëshme të dialogut dhe të trajtojnë çështjen kryesore, atë të ecjes përpara drejt përmbushjes së standartave. Pjesë e këtij përparimi, tha zyrtarja e Departamentit të Shtetit është edhe takimi i djeshëm organizuar nga zyra amerikane në Prishtinë mes përfaqësuesve të lartë të shqiptarëve e serbëve të Kosovës.


Ndërsa ndihmes nën sekretarja e Mbrojtjes, Mira Rekardel, i tha komisionit të Senatit se vështirësitë kryesore më të cilat ndeshet Kosova sot janë ato në fushën lirisë së lëvizjes dhe kthimit të pakicave. Prandaj, tha ajo, qëllimi ështe krijimi i shtetit ligjor dhe rindertimi i institucioneve të afta për krijimin e një mjedisi të sigurt për te gjithë banorët, dhe ndërkohë të sigurohet që t'i pritet rruga ekstremizmit, terrorizmit dhe elementëve kriminalë. Zonja Rekardel tha se kërcënimi kryesor vazhdon të vijë nga grupe të brendëshme ekstremiste e kriminale, disa prej të cilëve me lidhje nderkombëtare.

Ndihmës nën sekretarja e Mbrojtjes, Mira Rekardel, tha se pas trazirave të marsit, u bë e qartë se prania e KFOR-t është thelbësore për nxitjen e një zgjidhjeje politike, dhe njëkohësisht këto trazira nxorren në sipërfaqe disa dobësi të UNMIKUT dhe Shërbimit Policor të Kosovës. Zyrtarja e lartë e Pentagonit shprehu shpresë se administratori i ardhshëm Soren Jessen Petersen dhe ndihmësi i tij amerikan do të ndikojnë dukshëm në përmirësimin e punës së UNMIK-ut.

Në dëshminë e tij, ish këshilltari i Shtëpisë së Bardhë për Ballkanin, James Dobins, tani drejtor i qendrës për çështje të sigurimit ndërkombëtar pranë korporatës Rand, tha se arsyeja përse edhe pas 5 vjet paqeje, procesi i ripajtimi midis shqiptarëve dhe serbëve në Kosovë nuk ka përparuar, duhet kërkuar në faktin se satusi i këtij rajoni mbetet ende i papërcaktuar. Zoti Dobins është i mendimit se politika e tanishme që kërkon plotësimin e standarteve përpara statusit, në mënyrën sesi është formuluar, shërben vetëm si mekanizëm vonese për përcaktimin e ketij statusi. Zoti Dobins thotë se nëqoftëse shqiptarëve do t'u thuhej qartë së çfarë statusi do të mund të fitonin, kjo do të nxiste së tepërmi edhe angazhimin e tyre për plotësimin e standarteve, të cilat gjithashtu është e nevojëshme të bëhen më të qarta. Zyrtari i lartë i korporatës Rand thotë se zvarritja e mëtejshme e përcaktimit të statusit ushqen tensionet etnike, duke i bere serbët e Kosovës më pak të prirur për t'a parë vetën si pakicë, dhe shqiptarët më të prirur për t'i konsideruar serbet si instrumentë të mundeshëm të aspiratave te revanzhizmit serb.

Analisti nga Beogradi, Ivan Vejdoda, tha se gjate këtyre viteve Ballkani ka bere shume përparime, por megjithatë Kosova vazhdon te mbetet çeshtja më e veshtirë per t'u zgjidhur. Zoti Vejvoda tha se në Kosovë e Serbi ka nga ata që e kuptojnë se e vetmja rruge drejt zgjidhjes është nëpërmejt bashkepunimit e dialogut, por ka edhe nga ata, si mes shqiptarëve dhe sërbëve, që vazhdojnë të ëndërojnë për zgjidhje maksimaliste. Analisti serb tha se gjallërimi i dialogut dhe gjetja e pikave të përbashkëta është sot detyrë e ngutshme e reformatorëve në Beograd dhe e politikanëve të moderuar në Prishtinë, të cilët duhet të mbështeten e ndihmohen edhe nga zyrtarët e zgjedhur, nga shoqeritë civile dhe institucionet ndërkombëtare.

Ndërsa ish zyrtari i departamentit të Shtetit, James O'Brian, tani analist pranë Grupit Albright, i tha komisionit të Senatit se megjithëse sfidat në Ballkan nuk janë pasoja të politikes amerikane, një politikë efektive amerikane mund të ndihmonte në përmirësimin e gjendjes. Serbia, Mali i Zi dhe Kosova, tha ai kanë nevojë për rolin udhëhëqës të Shteteve të Bashkuara dhe aleatëve. Në se ngurohet në këtë drejtim, qëllimi për të parë një Evropë të integruar e të lirë mund të mos arrihet, dhe ata që dëshirojnë të jetojnë në paqe e demokraci do të ndjeheshin të braktisur.

Analisti nga Kosova, Veton Surroi gjatë dëshmisë së tij vlerësoi nismën e nën sekretarit të Shtetit Mark Grossman për rishikimin e datës për cështjen e standarteve, por kritikoi mungesën e një qëndrimi të përbashkët amerikano-evropian mbi këte cështje. Kjo mungesë e politikës së përbashkët, në gjendjen që është Kosova, thjesht thellon edhe më tej dëshpërimin edhe kështu të thellë të popullsisë kosovare, tha analisti Surroi. Ai shprehu shpresën se zgjedhjet parlamentare te 23 tetorit dhe nisma për rivlerësimin e misionit te OKB-se në Kosovë, mund të krijojne hapësira për nisma të tjera dhe vendosjen e politikave të tanishme të komunitetit ndërkombëtar nën një këndvështrim të ri.

//

[fadil]

Sot u bë tërheqja e shortit për renditjen e subjekteve politike për zgjedhjet e 23 tetorit

Prishtinë, 12 gusht - Sot në Prishtinë u bë tërheqja me short për renditjen e subjekteve politike në fletëvotimet për zgjedhjet e përgjithshme parlamentare të 23 tetorit.
Në një ceremoni që u transmetua drejtpërdrejt në TV, përfaqësuesit e 32 subjekteve politike dhe kandidatët e pavarur, në bazë të renditjes alfabetike, tërhoqën numrin që përcakton renditjen e tyre në fletëvotime, prej 31 deri më 62.
Fillimisht shefi i misionit të OSBE-së në Kosovë, Paskal Fieski, vlerësoi se zgjedhjet janë element bazë zhvillimin demokratik të shoqërisë dhe se bojkoti kurrë nuk prodhon rezultate pozitive.
"Eshtë zhgënjyese që disa subjekte nuk marrin pjesë. Unë i ftoj përsëri serbët që të marrin pjesë në zgjedhje", tha shefi i OSBE-së, duke shtuar se të gjithë faktorët duhet të punojnë që këto zgjedhje t'i bëjnë një sukses të madh për Kosovën.
Kështu duket renditja e subjekteve politike dhe e kandidatëve të pavarur për zgjedhjet e 23 tetorit, pas tërheqjes së shortit:
31 UNIKOMB - Partia e Unitetit Kombëtar Shqiptar, 32 Partia Nacionale Demokratike Shqiptare - PNDSH, 33 Koalicija Vakat, 34 Behlul Beqaj, 35 Partia Shqiptare Demokristiane e Kosovës - PSHDK, 36 Fuad Ramiqi, 37 Gragjanska Inicijativa Srbija,38 BSDAK - Boshnjaçka Stranka Demokratske Akcije Kosova, 39 Partia e Re e Kosovës - PreK, 40 IRDK, 41 Riza Lluka, 42 ADK - Alternativa Demokratike e Kosovës, 43 ORA, 44 AAK - Aleanca për Ardhmërinë e Kosovës, 45 Partia Socialdemokrate e Kosovës - PSDK, 46 Partia Rome e Bashkuar e Kosovës, 47 Ramë Dreshaj, 48 GIG - Gragjanska Inicijativa Gore, 49 Balli Kombëtar, 50 PDK - Partia Demokratike e Kosovës, 51 Unioni Demokratik, 52 LDK - Lidhja Demokratike e Kosovës, 53 KDTP - Kosova Demokratik Turk Partisi, 54 Iniciativa Qytetare Balli Kombëtar Demokrat, 55 Partia e Drejtësisë - PD, 56 PLK - Partia Liberale e Kosovës, 57 Dr. Xhevdet Rexhaj, 58 Partia Demokratike Ashkanli Shqiptare e Kosovës - PDASHK, 59 Lëvizja Popullore e Kosovës - LPK, 60 PDAK - Partia Demokratike e Ashkanlive të Kosovës, 61 SDA - Stranka Demokratske Akcije, 62 Prizrensko - Dragashka Inicijativa.

[fadil]

Pershendetje:


Thaçi, edhe njëherë kundër planit të Serbisë për decentralizimin Kosovë

Kryetari i Partisë Demokratike të Kosovës, Hashim Thaçi, tha në një intervistë për agjencinë austriake të lajmeve APA, se ai hedh poshtë planin e Qeverisë së Serbisë për decentralizimin e pushtetit në Kosovë.


Thaçi ka pohuar se propozimi i Qeverisë serbe është i rrezikshëm dhe plotësisht i papranueshëm. Ai ka thënë se çdo zgjidhje tjetër pos pavarësisë, do të thoshte vetëm probleme për Kosovën. "Dialogu me Qeverinë e Serbisë dhe kryetarit serb Boris Tadiq është shumë i rëndësishëm, por dyshoj se Tadiqi për shkak të konstelacionit politik në Serbi do të mund të fillonte kursin e pajtimit me pushtetin në Kosovë," ka theksuar kreu i PDK-së.

[MemphiSx]

Prishtinë, 1 shtator - Me një solemnitet të organizuar sot në lagjen "Dardania" në Prishtinë, u bë përurimi i ndërtesës së re të shkollës fillore dhe u bë zbulimi i bustit të Xhemajl Mustafës, emrin e të cilit prej sot e mban kjo shkollë re në kryeqytetin tonë. Morën pjesë Presidenti Ibrahim Rugova Kryeadministratori Soren Petersen, ministri Rexhep Osmani, familjarë dhe miq të shumtë të Xhemajl Mustafës, si dhe nxënës, arsimtarë e qytetarë të shumtë.
Presidenti i Kosovës Ibrahim Rugova duke përshëndetur përurimin e këtij objekti të ri shkollor, tha se sot ka një gëzim të veçantë që po merr pjesë në përurimin e ndërtesës së re shkollore. Presidenti u shpreh se me një ndjenjë të veçantë nderimi gëzohet që shkolla e re do të mbajë emrin e gazetarit, shkrimtarit dhe veprimtarit për liri, pavarësi e demokraci të Kosovës, Xhemajl Mustafa, i cili për shumë vite ishte këshilltar në zyrën e Presidentit të Kosovës.
Poashtu ai u shpreh se është moment solemn që përurimi i shkollës bëhet më 1 shtator, në ditën e fillimit të vitit të ri shkollor 2004 -2005. Përurimi i kësaj shkolle, tha Presidenti Rugova, "tregon progresin e vendit dhe përkushtimin tonë për edukimin e brezave të rinj të shoqërsië dhe të shtetit tonë, se ne dimë të ndërtojmë lirinë, pavarësinë dhe demokracinë e Kosovës". Njëherit ai theksoi se sot dhe këto ditë do të përurohen me dhjetra objekte shkollore dhe do të renovohen për të gjithë nxënësit e Kosovës, për të gjithë ata që janë ardhmënia e Kosovës, duke premtuar se institucionet e Kosovës do t'i bëjnë të gjitha përpjekjet që nxënësve dhe arsimtarëve t'u krijohen kushte sa më të mira për mësim dhe edukim dhe ua uroi vitin e ri shkollor të gjithë arsimtarëve dhe nxënësve të Kosovës.
"Një vend që hap dyer të shkollave të reja, i hap dyert e ardhmënisë dhe lumturisë për të gjithë qytetarët e vet", nënvizoi Presidenti Rugova në fund të fjalës së tij përshëndetëse me urimet më të mira që shkolla mban emrin e Xhemajl Mustafës.
Duke përshëndetur në përurimin e këtij objekti të ri shkollor, shefi i UNMIK-ut Soren Jesen-Petersen tha se dita e parë shkollore është dita më e bukur në jetën e çdo fëmije dhe se fëmijët janë ardhmënia e Kosovës.
Petersen tha se falë Presidenti Rugova dhe liderëve të tjerë si dhe Xhemajl Mustafës, Kosova po ecën drejt Evropës deh se ako ka një të ardhme të ndritur.
"Falë Presidentit, falë liderëve politikë, përfshirë këtu edhe Xhemail Mustafën, emrin e të cilit e mban kjo shkollë, Kosova e ka filluar udhëtimin e saj drejtë Evropës. Kosova ka një të ardhme të ndritur, si pjesë e Evropës dhe është detyrë edhe e brezave të rinj që ta vazhdojnë këtë rrugë".
Duke folur në këtë përurim, ministri i Arsimit Rexhep Osmani, pasi theksoi se ndërtimi i kësaj shkolle është bërë nga donatorët e huaj, ai tha se bashkësia ndërkombëtar ka kontribuar shumë në përmirësimin dhe zgjerimin e hapësirës shkollore dhe ajo ka ndërtuar 217 shkolla të reja dhe me ndihmën e saj më shumë se 400 shkolla janë renovuar. Ai tha se Ministria e Arsimit po i kushton rëndësi të madhe zgjerimit të kapaciteteve shkollore në funksion të zhvillimit të reformës në arsim. Ministria, tha ai, ka ndërtuar 19 shkolla të reja dhe po i renovon 35 të tjera.
Ministri Osmani tha se sot po shpalohet edhe busti i Xhemajl Mustafës, emrin e të cilit do ta mbajë kjo shkollë e re. "Vetëm disa metra nga ky objekt jetoi dhe punoi kritiku dhe publicisti e veprimtari politik Xhemajl Mustafa. Kur vendosëm ta emërojmë këtë shkollë nuk kishim dilema, sepse kishim parasysh veprën e tij". Nxënësit që do të mësojnë në këtë shkollë, tha Osmani, emrin e Xhemajl Mustafës do ta kenë mburrje. "Shpalimi i bustit të Xhemajl Mustafës sot është pjesë e shpalimit të qenies sonë shpirtrore dhe arsimore", tha mes tjerash ministri Osmani.
Poashtu përshendeti edhe kryetari i komunës së Pishtinës Ismet Beqiri.
Pastaj Presidenti Rugova, Kryeadministratori Petersen dhe ministri Osmani dhe anëtarët e familjes Mustafa në obrorine e shkollës bënë zbulimin e bustit të Xhemajl Mustafës, vepër e artistit nga Prishtina, Veli Blakqorri, si dhe prenë shiritin e ndërtesës së shkollës dhe bënë një vizitë nëpër lokalet e shkollës.