Të tjerët për Dr. Rugovën.

[Psikologu]

Flamuri amerikan ulet në gjysmë shtizë në Prishtinë


Prishtinë, 23 janar - Në një ceremoni të shkurtër të mbajtur sot në Zyrën e SHBA-ve në Prishtinë, shefi i misionit Philip Goldberg udhëhoqi uljen e flamurit amerikan në gjysmështizë për të nderuar Presidentin e ndjerë të Kosovës Ibrahim Rugova. "Të shtunën, kur dëgjova për vdekjen e Presidenti Rugova, thashë se Kosova ka humbur një udhëheqës të madh. Por, ne në SHBA humbëm një mik të madh dhe të përkushtuar", u shpreh Golberg.
"Në botë nuk ka shumë udhëheqës apo popuj të cilët kanë aq shumë dashuri dhe respekt për Shtetet e Bashkuara sikur që pati Presidenti Rugova dhe ka populli i Kosovës. Dhe si rrjedhojë e respektit për të, respektit për miqësinë e tij me Shtetet e Bashkuara dhe respektit për popullin e Kosovës, unë e ndjej se është shumë e qëlluar që edhe ne të lëshojmë flamurin amerikan në gjysmështizë gjatë kësaj periudhe të zisë. Kjo ka një domethënie të madhe për ne dhe jam i sigurtë se do të ketë edhe për popullin e Kosovës gjithashtu", theksoi z.Goldberg, ndërsa ulej flamuri i SHBA-së në gjsymështizë nga komandanti i njësisë së Marinës së SHBA-ve.
"Presidentin Rugova e njoha shumë mirë gjatë këtij një viti e gjysmë të fundit. Për herë të parë e takova para njëmbëdhjetë viteve në Uashington, dhe përveç asaj që ai bëri si udhëheqës – dhe me të vërtetë si një simbol i Kosovës për botën – unë e njoha atë edhe si një njeri shumë të këndshëm dhe të përzemërt. Dhe mendoj se tani do të ishte e drejtë që, gjersa dëshirojmë dhe lutemi që shpirti i tij të pushojë në paqë, të ndalemi për një çast – para se të largohemi nga kjo kohë shumë e ftohtë - dhe të mbajmë një minutë heshtjeje në përkujtim të tij, dhe për një të ardhme të ndritur këtu, dhe për të mbajtur në mend këtë mik të madh tonin", theksoi z.Goldberg, duke nderuar së bashku me punonjësit e Zyrës së SHBA-ve po mbanin një minutë heshtje.