Pavarësia në pyetje

[Kalt]

Statusi i Kosovës pas zgjedhjeve serbe

Ahtisaari e bëri deklaratën pas mbledhjes me Grupin e KontaktitMinistri për Evropën në qeverinë e Britanisë së Madhe, Geoff Hoon, ka mirëpritur vendimin e të dërguarit të posaçëm, Martti Ahtisaari, për ta shtyrë paraqitjen e propozimit të tij për statusin e Kosovës deri pas zgjedhjeve parlamentare ne Serbi, nga fundi i muajit janar të vitit të ardhshëm.
Në një deklaratë të tij, zoti Hoon, ka thënë se procesi i statusit është ende në binarë dhe se vendimi i zotit Ahtisaari reflekton realitetin se do të ishte vështirë të përfundohej ky proces i zgjidhjes së statusit gjatë periudhës para zgjedhore.
"Mbretëria e Bashkuar mbetet e përkushtuar që ta shohë procesin e statusit të përfunduar sa më shpejt të jetë e mundur... Ne besojmë se propozimi i të dërguarit të posaçëm do të mbrojë të drejtat e të gjithë qytetarëve të Kosovës dhe do të ofrojë bazat realiste dhe të qëndrueshme për të ardhmen e Kosovës dhe për qëndrueshmërinë në rajon", thuhet mes tjerash në deklaratën e ministrit britanik Geoff Hoon.
Reagimi shqiptar
Udhëheqja më e lartë e Kosovës, anëtarë të Ekipit të Unitetit, kanë shprehur keqardhjen e tyre të thellë me vendimin e ndërmjetësit të OKB-së për statusin, Martti Ahtisaari, për shtyrjen e propozimit për statusin e Kosovës deri pas 21 janarit të vitit 2007.
Në një komunikatë të këtij Grupi, që e lexoi presidenti i vendit, Fatmir Sejdiu, thuhet:
"Jemi të shqetësuar që kjo shtyrje ndërlidhet me kalendarin e zgjedhjeve të paralajmëruara parlamentare në Serbi."
"Ekipi i Unitetit ka bindje të fuqishme që procesi i zgjidhjes së statusit të Kosovës, i udhëhequr nga presidenti Ahtisaari dhe Grupi i Kontaktit do të çojë në krijimin e shtetit të pavaruar dhe sovran të Kosovës".
"Jemi të përcaktuar që në koordinim me Grupin e Kontaktit, me UNMIK-un e në veçanti me Shtetet e Bashkuara të Amerikës dhe Unionin Evropian, kohën e mbetur deri në marrjen e vendimit për statusin e Kosovës ta shfrytëzojmë për përgatitjen e tranzicionit në periudhën e passtatusit, gjegjësisht të pavarësisë së Kosovës", tha presidenti Fatmir Sejdiu.
Reagimi Ndërkombëtar
I dërguari i Kombeve të Bashkuara për statusin e Kosovës, Martti Ahtisaari, tha në Vjenë se propozimi për statusin e Kosovës do ta japë pas zgjedhjeve në Serbi, të cilat janë përcaktuar të mbahen më 21 janar 2007.
Kjo u deklarua pas mbledhjes së tij me Grupin e Kontaktit që është mbajtur në nivel të drejtorëve politikë të shteteve anëtare të Kombeve të Bashkuara.
Burime diplomatike kanë thënë se shtyrja e propozimit për statusin nuk do të ndikojë në rezultatin përfundimtar.
Ndërkohë, shefi i UNMIK-ut, Joachim Ruecker në deklaratën e tij ka thënë se ekzistojnë shumë arsye për qartësimin sa më parë të statusit të Kosovës.
Ai ka shtuar se gjatë kohës së pritjes së vendimit të Martti Ahtisaarit për statusin, UNMIK-u dhe Institucionet e Kosovës do të vazhdojnë të punojnë sipas axhendës, fillimisht në mbajtjen e një mjedisi te qetë dhe të sigurt, në bashkëpunim edhe me KFOR-in dhe të shtyjën përpara përmbushjen e standardeve.




BBC
11 nentor 2006