Plagoset rëndë Bardhyl Ajeti (Gazetar i “Botes Sot”)

[Arb]

Plagoset rëndë gazetari i të përditshmes “Bota Sot” Bardhyl Ajeti

Policia e Gjilanit ka njoftuar se mbrëmjen e së premtes, rreth orës 21:30 është plagosur rëndë gazetari Bardhyl Ajeti Mbrëmjen e së premtes, rreth orës 21:30, në magjistralen Gjilan - Prishtinë është plagosur me armë zjarri gazetari i të përditshmes “Bota Sot”, Bardhyl Ajeti, njoftoi policia në Gjilan. Ai menjëherë është dërguar në Spitalin Rajonal të Gjilanit ku i është dhënë ndihma e parë dhe pastaj është transferuar në Qendrën Emergjente në Prishtinë. Burimet në Spitalin e Gjilanit thanë se viktima është qëlluar me një plumb i cili i ka përshkuar tej për tej kokën e Ajetit dhe se ai ndodhet në rrezik jete.

Gazetari Bardhyl Ajeti pas plagosjes është dërguar menjëherë në Spitalin Rajonal të Gjilanit ku i është dhënë ndihma e parë dhe pastaj është transferuar në Qendrën emergjente në Prishtinë. Drejtori i Spitalit dr. Ukshin Ismajli tregon për Radio Kosovën & Radio Blue Sky se në çfarë gjendje është sjell viktima në spital.

“Ka ardhur në spital pas orës 21:00 në gjendje të pavetëdijshme, me bebëza të zgjeruara dhe është bërë intubimi, ka filluar reanimacioni dhe është dërguar në Prishtinë ku ka mbërri në gjendje të pandryshuar. Është plagë tej-shkuese e plumbit që ka kaluar përgjatë kokës”, ka sqaruar dr. Ismaili.

Nëse do të mbijetoj nga kjo plagë drejtori Ismajli thotë se këtë vlerësim mund ta japin mjekët e Qendrën Emergjente në Prishtinë. Ndërsa për rrethanat se si ka ndodhur ngjarja për radion tonë flet zëdhënësi i SHPK-së në Gjilan, Naser Ibrahimi :

“Mbrëmë rreth orës 21 e 30 minuta në rrugën Prishtinë – Gjilan, në afërsi të shkollës së Bresalcit, ka ndodhur një tentim vrasje, me ç’ rast një veturë, sipas dëshmitarëve e markës Mercedes e ka gjuajtur gazetarin Bardhyl Ajeti i cili në atë moment ishte duke ardhur në drejtim të Gjilanit, gjithashtu me veturë Mercedes të cilën e kishte në gjendje jo të rregullt dhe po e tërhiqte një veturë tjetër”, ka deklaruar zëdhënësi Ibrahimi.

Zëdhënësi Ibrahimi tha se policia ka dal menjëherë në vendngjarje, ka bllokuar rrugën, por për momentin nuk ka as të arrestuar e as të dyshuar për rastin ndërsa hetimet janë duke vazhduar.

/Xhevat Sopi/

RTK