Lajme Aktuale....

[Llapjani_HH]

Bizneset e Kosovës, lamtumirë CEFTA-s

Bizneset nga Kosova që nga shpallja e pavarësisë janë duke i humbur miliona euro për shkak se Serbia dhe Bosnja, nuk i lejojnë që në vendet e tyre të hynë produkte me logo të Republikës së Kosovës. Nënkryetari i Odës Ekonomike të Kosovës (OEK), Safet Gerxhaliu, ka deklaruar se Kosova duhet të përpiqet që ta fitojë betejën e CEFTA-s, në të kundërtën, humbja e kësaj beteje për shtetin më të ri do të thotë humbje e madhe.

Nënkryetari i Odës Ekonomike të Kosovës (OEK), Safet Gerxhaliu, ka ftuar institucionet e Kosovës që të mendojnë mirë se çfarë duhet të ndërmarrin për problemin me të cilat po ndeshet Kosova nga shpallja e pavarësisë me CEFTA-n.

“Është koha që të kemi nj qasje të re në rrafshin diplomatik dhe në atë të lobimit, sepse ky është një proces angazhimi dhe jo neglizhencë, CEFTA është një betejë e rëndësishme për neve si shtet”, ka theksuar ai për gazetën.

Gerxhaliu nuk e sheh të arsyeshme që Kosova të rrijë në CEFTA pa asnjë përfitim, “s’kemi nevojë që të jemi pjesë e një organizate dhe të rrimë aty, “falë”, ka porositur ai.

Kosova duhet të përpiqet që ta fitojë betejën e CEFTA-s, në të kundërtën, sipas ekspertit Gerxhaliu, humbja e kësaj beteje për shtetin më të ri do të thotë humbje madhe.

“Serbia me gjithë arsenalin e vet, do të përpiqet që Kosovën ta pengojë në proceset integruese dhe nëse ajo do të mund ta fitoj betejën për CEFTA, nuk do të ishte një gjë e mirë për neve”, ka vlerësuar ai.

Edhe drejtori i Klubit për Politikë të Jashtme (KPJ), Ylli Hoxha, ka deklaruar se problemet e Kosovës me CEFTA-n kanë bërë që të bien investimet e huaja direkte dhe rritet deficiti tregtar.

“Opstrukcionet që bëhen nga ana e Serbisë fillojnë po kanë efektin e vet ekonomik brenda Kosovës, gjendja është e paqëndrueshme Kosova po ngulfatet kurse Serbia po zë pozicion statik”, ka thënë ai.

Ndërsa redaktorja e buletinit të “Periskopisë” Besa Luci, është shprehur se investimet në Kosovë kanë pasur rënie, nga viti në vit, për shkak të cetfat dhe sipas saj, institucionet e Kosovës, duhet të marrin vendim që të bëjnë bllokadë për Serbinë.

Ndryshe që nga shpallja e pavarësisë para dy viteve, Kosova po përballet me probleme rreth pjesëmarrjes së saj në takimet e CEFTA-s , kryesisht me dy shtete Serbinë dhe Bosnje Hercegovinën. Këtë vit kryesuese e sekretariatit të CEFTA-s është Serbia.
Telegrafi

UNMIK-u jep shenja për lejimin e rindërtimit në Lagjen e Boshnjakëve

Administrata e UNMIK-ut që ende është përgjegjëse për pjesën veriore të Mitrovicës, ka treguar shenja të fleksibilitetit sa i përket procesit të rindërtimit të shtëpive që janë djegur e shkatërruar gjatë luftës në atë pjesë të qytetit, shkruan sot Koha Ditore.

Së paku, kështu pohojnë disa nga banorët shqiptarë të veriut, të cilët kanë takime të rregullta me zyrtarët e misionit të OKB-së në atë pjesë të lumit Ibër.
Adem Mripa, përfaqësues i Lagjes së Boshnjakëve, thotë se zyrtarët e administratës së UNMIK-ut në veri kanë kërkuar që të bëhet një listë e shtëpive të djegura dhe të shkatërruara në luftë, me qëllim të rindërtimit të tyre. Ai thotë se ka marrë vetë përsipër që të merret me këtë çështje dhe tashmë ka dorëzuar një regjistër prej 52 banorëve që kanë shtëpitë e djegura, por thekson se ende ka vështirësi në këtë proces.

Sipas tij, deri tani zyrtarët e UNMIK-ut nuk janë marrë shumë me rindërtimin e shtëpive shqiptare në këtë lagje të veriut.

Mripa thotë se ish-administratori i UNMIK-ut, Gerard Galluci, i njohur me qëndrime kontroverse, i kishte thënë një herë se në këtë lagje ekziston një vijë e kuqe, mbi të cilën shqiptarët nuk mund të rindërtojnë shtëpitë e tyre.

Sipas tij, moslejimi i shqiptarëve për të rindërtuar shtëpitë ka ndikuar që gjatë kësaj kohe ata të detyrohen t’i shesin pronat e tyre.

Në të njëjtën kohë, serbët janë lejuar që në pronat e blera nga shqiptarët të ndërtojnë objekte për banim kolektiv, ku janë vendosur edhe refugjatë serbë nga Bosnja dhe Kroacia.

Në anën tjetër, zyrtarët e UNMIK-ut e kanë lejuar deri tani në këtë lagje ndërtimin e së paku 9 objekteve të larta kolektive të ngritura nga serbët, ku janë vendosur shumë familje, duke u ndryshuar përbërja etnike e lagjes.

Mripa sqaron se qe dhjetë vjet për banorët aty nuk është bërë gjë sa i përket rindërtimit, duke përmendur si përjashtim, vitin e kaluar kur me ndihmën e komunës dhe qeverisë vendore është bërë e mundur që të rindërtohen pesë shtëpi.

Gazeta, me gjithë përpjekjet, nuk ka mundur të marrë deklaratë nga zyrtarët e UNMIK-ut që janë të përqendruar kryesisht në veri të Mitrovicës.

Në anën tjetër, zyrtarët komunalë në Mitrovicë thonë se procesi i rindërtimit do të vazhdojë në të gjitha pjesët ku ka shtëpi të djegura nga koha e luftës. Rasim Veseli, drejtor për Infrastrukturë dhe Shërbime Publike, thotë se komuna me ndihmën e qeverisë ashtu si në vitin e kaluar do të përkrahë procesin e rindërtimit në mënyrë që të gjithë të zhvendosurit të kenë mundësi që të kthehen në shtëpitë e tyre. Sipas tij, ku proces nuk ka të bëjë fare me politikën, por është një projekt për të krijuar kushte më të mira për të gjithë qytetarët pa dallim të përkatësisë së tyre etnike.
Koha.net

[Oqeani]

Ndeshen dy trena ne Bruksel

Sot ne ora 08h30 ne Bruksel u ndeshen dy trena ku jeten e humben 18 persona. Simbas informatave te fundit behet e ditur se rreth 20 persona jane me lendime te renda, dhe rreth 100 me te lehta.
Simbas eksperteve ende nuk dihen shkaqet e ngjarjes, por sypozohet se njeri nga drejtuesit e trenit nuk ka respektuar shenjat e komunikacionit!
Kryeministri i Belgjikes, Iv Leterm, anuloi sot viziten ne Prishtine, per shkak te aksidentit ne Bruksel.

[Llapjani_HH]

Dyqani patriotik i Frashërit, asnjë produkt nga Serbia

Endriti dhe e dashura e tij Blerina dolën nga dyqani duke u konsultuar mes vete këtë të hënë. Ata shfaqën habinë kur në njërin prej dyqaneve të lagjes “Dardania” në Prishtinë nuk gjetën asnjë produkt të prodhuar në shtetin serb. Por, ata gjetën atë që kërkuan.

Qeset e tyre ishin të mbushura me produkte të cilat ata i blenë, pa vërejtur asnjë mangësi në zgjedhje. Atyre nuk u mbeti në hak pronari i dyqanit “Arjeta” në “Dardani”, Frashër Krasniqi. Në mungesë të produkteve serbe këta dy konsumatorë u furnizuan pa pengesë me produkte të vendit dhe produkte të importuara nga vendet e tjera të rajonit të përdorura si alternativë dhe zëvendësim i produkteve me barkodin “860”.

Në dyqanin e Frashërit zënë vend mbi 2 mijë artikuj ushqimorë, por jo edhe ato nga Serbia. Të gjitha produktet që nisin me barkodin “860” në hyrje të dyqanit ndalohen me një mbishkrim në të cilin thuhet: “Nuk mbajmë produkte të Serbisë”.

Qëkur kishte hapur dyqanin tregtar, më 2008, Frashëri ishte i mendimit që t’ua kthejë hakun e bllokimit të produkteve nga Kosova shtetit serb dhe atij boshnjak. Për të nuk ka vështirësi gjetja dhe rivendosja e prodhimeve serbe me ato vendëse dhe nga vendet përreth. Për rreth 99 për qind të produkteve serbe ai ka gjetur zëvendësimin.

“Është lehtë me gjet zëvendësime nga Maqedonia, Turqia, Shqipëria, por edhe me prodhime vendore”, thekson Frashëri për Kohën Ditore.
Ai thotë se klientët e kanë pritur mirë nismën për bojkotimin e produkteve të Serbisë, dhe se mungesa e këtyre produkteve nëpër raftet e dyqanit ka ndikuar pozitivisht në numrin e klientëve.

“Ka raste kur konsumatorët vijnë nga qendrat më të largëta vetëm pasi kanë dëgjuar se nuk mbaj produkte serbe”, thotë ai.
Frashëri tregon se shpërndarësit e mëdhenj të mallrave shumicën e artikujve i kanë të importuara nga Serbia. Jo rrallëherë këto mallra i janë ofruar edhe atij, por Frashëri i ka kthyer mbrapsht.

Kjo nismë e Frashërit nuk po përkrahet edhe nga institucionet shtetërore. Nga Ministria e Tregtisë dhe Industrisë është thënë se problemi me bojkotimin e produkteve serbe është më shumë problem politik sesa tregtar.

Në kohën kur timonin e marrëveshjes CEFTA e mban në dorë Serbia, Republika e Kosovës e ka edhe më të vështirë eksportimin e prodhimeve të veta në vendet pjesëmarrëse të kësaj marrëveshjeje. Në këtë marrëveshje Kosova ende është e prezantuar si UNMIK, e jo si shtet në vete. Mallrat me vulë të Kosovës nuk lejohen të kalojnë as transit nëpër Serbi e Bosnjë-Hercegovinë, ndërsa prodhuesit kosovarë detyrohen që mallrave të tyre t’u shtojnë tiketa ekstra për t’i kaluar nëpër këto shtete apo edhe t’i kalojnë nëpër rrugë të reja duke rritur kështu koston e prodhimit të tyre.

Ekspertët e ekonomisë janë të mendimit se nismat për bojkotimin e produkteve serbe nuk mund të jenë shumë të efektshme të arritjen e kthimit të borxhit ndaj shtetit serb për bllokadën e bërë prodhimeve të Kosovës.

Berat Rukiqi, sekretar në Odën Ekonomike të Kosovës, thekson se furnizimi i tregut vendës me produkte të prodhuara në Serbi është vazhdimësi e relacioneve të gjata mes tregtarëve të vendit dhe prodhuesve serbë. Ai thekson se duhet të merren shembuj nga Kroacia e cila, sipas tij, për një kohë të gjatë kishte bllokuar të gjitha produktet e prodhuara në Serbi.

Por, konsumatorët gjithmonë kanë alternativë tregun e lirë. Sipas Rukiqit, furnizimi me gjërat elementare nuk shikohet shumë për nga prejardhja e produktit. Ai thekson se çmimi është indikatori kryesor, i cili përcakton se cilat lloje të produkteve kërkohen më shumë në treg.

“Vendi ynë ka relacione të gjata tregtare me Serbinë, mirëpo nëse institucionet do të ishin më të vendosura sidomos pas bllokadës serbe, ky do të ishte momenti i zvogëlimit të tregut të produkteve serbe në Kosovë dhe rritja e prodhimit vendor, si dhe furnizimi nga vendet e tjera alternative të rajonit”, thotë Rukiqi.

Ai shpjegon se për bllokimin e produkteve serbe, njësoj sikurse shteti serb që vazhdon të veprojë me produktet “Made in Kosova”, duhet të merren institucionet e vendit.

“Duhet një vendim institucional në këtë drejtim. Nuk mundemi t’ia imponojmë askujt të drejtën e furnizimit, por duhet një vendim institucional për bllokimin e mallrave në raport me CEFTA-n”, thotë ai.

Mbishkrimi në dyqanin e Frashërit: “Nuk mbajmë produkte të Serbisë”, nuk është vënë rastësisht.

“Këtë moto e kam vënë jo që të kem përparësi ndaj dyqaneve përreth, por që edhe ato të bashkëngjiten në këtë nismë”, ka thënë Frashëri.
Koha.net

Ministrisë së Transportit mund “t’i flenë në arkë” 6 milionë euro

Ministrisë së Transportit gjatë vitit 2010 do “t’i flenë” në arkë rreth 6 milionë euro, nëse dinamika e punimeve në projektin e autostradës shkon siç e kanë planifikuar drejtuesit e kësaj ministrie, shkruan Koha Ditore.

Këtë shumë të mjeteve Ministria e Ekonomisë dhe e Financave në buxhetin e vitit 2010 ia ka alokuar Ministrisë së Transportit për t’i kompensuar shpronësimet që do të bëhen në trasenë e autostradës Vërmicë - Besi. Por, sivjet drejtuesit e ministrisë së rrugëve pritet t’i kryejnë punimet vetëm në segmentin e Prizrenit, për të cilin paratë për shpronësime janë të siguruara qysh në buxhetin e vitit 2009 – gjithsej 13 milionë euro.

Në vitin 2011 pritet të kryhen punimet në zonën Prizren - Arllat e tek më 2012 planifikohet të kryhet traseja e mbetur, e cila shkon deri në Besi të Komunës së Prishtinës.

Drejtuesit e Ministrisë së Transportit ende nuk kanë ide sesi do ta përdorin këtë shumë prej 6 milionë eurosh më 2010.

“Ndarja e buxhetit bëhet në bazë të kërkesave të ministrive. Nuk dihet se në cilin segment do të përdoren këto mjete”, ka theksuar Adem Grabovci, zv.ministër i Transportit.

Sipas tij, komisioni për shpronësimet, i cili është trup i përbashkët i Ministrisë së Transportit, Financave dhe komunave, të cilat përshkohen nga traseja e autostradës, ende nuk ka bërë vlerësimin final të pronave, të cilat pritet të shpronësohen.

Verifikimi i pronave, sipas Grabovcit, është kryer vetëm në segmentin e Prizrenit nga pritet të nisin punën buldozerët e konsorciumit amerikano-turk “Bechtel-Enka”. Ndërsa 13-milionëshi i ndarë në vitin 2009, sipas Grabovcit, do të nisë të shpenzohet për të bërë shpronësimin në segmentin e Prizrenit, ku edhe do të punohet në ndërtimin e autostradës Vërmicë - Besi. Grabovci nuk ka bërë të ditur nëse këto mjete prej 6 milionë eurosh do të përdoren si mjete shtesë për segmentin e Prizrenit apo edhe sa do të jetë shuma e mjeteve që do të kërkojë Ministria e Transportit për vitet 2011 dhe 2012.

“Nuk dihet se sa do të jetë kostoja totale për shpronësimet pasi këtë do ta vlerësojë komisioni i përbashkët për këtë punë”, ka thënë Grabovci, duke shtuar se interesimi i ministrisë është që të ecë mirë procesi i ndërtimit të projektit të autostradës dhe krahas saj do të lëvizin gjërat edhe për sa u përket shpronësimeve.

Në anën tjetër, zyrtarët e Ministrisë së Ekonomisë dhe të Financave nuk e kanë komentuar arsyen pse janë ndarë mjetet prej 6 milionë eurosh edhe pse Ministria e Transportit i ka paratë të gatshme për shpronësimet që do të kryhen gjatë vitit 2010 në segmentin e Prizrenit.

Ndërkaq, për sa u përket pagesave për shpronësime, Ministria e Ekonomisë dhe e Financave ka planifikuar që pronat të kompensohen në bazë të çmimit të tregut dhe për këtë do të krijohet një komision i përbashkët ndërmjet Ministrisë së Transportit, asaj të Financave, si dhe të komunave përkatëse në territorin e të cilave i bie traseja e autostradës.

Ministria e Financave, për të definuar shumën e kompensimit, do të marrë për bazë tri kontrata valide nga shitblerjet e fundit që janë bërë në një zonë kadastrale.

Më së shumti prona do të kompensohen në segmentin e Prizrenit ku për 22,5 kilometra autostradë në këtë komunë do të shpronësohen 239 hektarë tokë.
Në atë të Fushë Kosovës do të shpronësohen 4 zona kadastrale me 91 hektarë.

Në zonën e Prishtinës planifikohet të shpronësohen 9 zona kadastrale me gjithsej 177,9 hektarë. Kurse në atë të Obiliqit do të shpronësohen 3 zona kadastrale me 17,5 hektarë.

E vetmja pjesë e autostradës, për të cilën nuk dihet sa hektarë tokë do të shpronësohen, është segmenti Malishevë-Arllat. Kjo pasi traseja e autostradës ishte paraparë t’i binte nga Qafa e Duhles së Komunës së Suharekës, por është ndryshuar pasi konsorciumi “Bechtel-Enka” kishte bërë një propozim të tillë.
Ndërkaq, nga rreth 100 mijë hektarë tokë, sa planifikohen të kompensohen nga Buxheti i Kosovës, rreth 400 hektarë janë pronë shoqërore, ndërsa mbi 600 hektarë janë në pronësi private.

Për pronat shoqërore Qeveria e Kosovës ende nuk ka lidhur ndonjë marrëveshje me Agjencinë Kosovare të Privatizimit, por ka kërkuar që këto prona për interesa nacionale t’i falen Qeverisë.
Koha.net

[Llapjani_HH]

Dështimi me targa

Ka dështuar prodhimi i targave të reja me stemën e Kosovës, për shkak të tenderit. Qytetarët po presin me javë sërish për targat e vjetra. Por, as të tilla nuk ka. Procesi i pajisjes me targa është bllokuar. Tash, MPB-ja thotë se ka filluar furnizimi i qendrave të regjistrimit me targa të vjetra, pas disa problemeve teknike.

Qytetarët që kanë blerë vetura të reja, kanë mbetur pa targa. Radhët e gjata para qendrave të regjistrimit janë larguar përkohësisht. Të paktë janë ata njerëz që marrin targa KS. Ka qytetarë që presin tash e një muaj për të marrë një palë tabela për veturë. Ata që janë më pak të durueshëm kanë filluar të ngasin makinat edhe pa targa.

Krejt ky kaos i ka rrënjët në fund të vitit 2009. Asokohe ishte ndërprerë prodhimi i targave KS. Ishte paralajmëruar se do të dalin targat e reja me stemën e Republikës së Kosovës. Por, duket se Ministria e Punëve të Brendshme u bë pishman. Ajo ka autorizuar përsëri kompaninë për prodhimin e targave që të vazhdojë me targa të vjetra.

F.S. pothuajse çdo ditë pune vjen në Qendrën e Regjistrimeve në Prishtinë. Në 20 ditët e shkruara ai ka marrë gjithmonë të njëjtën përgjigje: “Hajde nesër se sot nuk ka tabela”.

Megjithëkëtë, ai shpreson se deri në fund të javës, më në fund do t’i ketë targat e veturës. “Deri në fund të javës na kanë thënë që nuk mund t’i merrni targat”, rrëfen F.S. nga Prishtina, i cili nuk pranon të flasë me emër, nga frika se dikush mund t’ia shtyjë deri në pafundësi marrjen e targave.

Por, sipas këshilltarit të ministrit të Punëve të Brendshme, Fisnik Rexhepi, për këtë nuk ka nevojë të shqetësohet askush. Sipas tij, periudha kur nuk janë prodhuar targat, ka kaluar. Rexhepi shpjegon se ka pasur vetëm reduktime të targave, po jo edhe vonesa

“Të gjitha qendrat e regjistrimit të automjeteve i kemi furnizuar me sasi të mjaftueshme me targa, derisa të fillojmë me targa të reja”, vlerëson ai.

Sipas tij, kompania që ka qenë e ngarkuar për prodhimin e targave nuk ka pasur mundësi të plotësojë kërkesat e shumta të qytetarëve për t’u pajisur me targa.

“Tash është tejkaluar ajo dhe të gjitha qendrat e regjistrimit të automjeteve i kemi furnizuar me sasi të mjaftueshme targash”, shton Rexhepi. Kompania do të vazhdojë të prodhojë targa të vjetra deri në fund të këtij viti, kur pritet të dalin targat e reja me stemën e Republikës së Kosovës.

Megjithëkëtë, ata që ende nuk kanë pasur fatin të marrin as targa të reja, e as të vjetra, po vazhdojnë t’i ngasin veturat e tyre pa targa, me rrezikun se mund të dënohen nga policia. E, policia është shumë rigoroze. Atyre nuk iu intereson nëse qendrat e regjistrimit kanë apo nuk kanë targa të mjaftueshme për qytetarët.

Zëdhënësi i Policisë së Kosovës, Baki Kelani thotë se edhe në raste të tilla nuk do të ketë përjashtime. Sipas tij, ligji do të zbatohet në të gjitha rastet. “Në momentin që një qytetar shihet pa targa, ai do të dënohet”, paralajmëron Kelani.

Sipas tij, mospajisja me targa të veturave nuk është problem i Policisë së Kosovës. “Çdo rast konkretisht në çdo veturë të çdo ngasës, i cili bën shkelje ligjore dhe nuk iu përmbahet rregullave të trafikut, edhe në këtë rast tek automjetet të cilat nuk posedojnë targa, është procedura ligjore që i sanksionon personat që nuk posedojnë targa”, vlerëson ai.

Gjatë dy viteve të shkuara, Ministria e Punëve të Brendshme kishte premtuar se do të dalin me targa të reja. Ato me vite ndërruan formë, ngjyrë dhe stema. Tash është hera e tretë që paralajmërohet një shtyrje e re. Deri më sot zyrtarët e kësaj ministrie nuk kanë pranuar që bëhet fjalë për probleme politike, por gjithmonë teknike.
Gazeta expres

[Llapjani_HH]

Ylli Pango, Berisha e rikthen ne shtet

(Dërguar më: 16/02/10)

Më në fund, pas gati një viti, ish ministri i Kulturës, Ylli Pango rikthehet në një detyrë të lartë në administratën shtetërore, madje brenda botës akademike, madje edhe asaj të fushës shkencore. Pango është emëruar drejtor i Komitetit të Shkencave në ministrinë e Arsimit.
Lajmi bëhet i ditur nga burime zyrtare të qeverisë, dhe vendimi për emërimin e Pangos është bërë pikërisht me vendim të Këshillit të Ministrave në datën 3 shkurt.
Por për çudi, ndryshe nga vendimet e tjera të qeverisë, ky vendim i emërimit të Pangos, nuk është publikuar në faqen zyrtare të qeverisë në internet.
Pango, menjëherë pas shkarkimit nga detyra e ministrit, u përjashtua edhe nga fakulteti i shkencave sociale, ku ai ishte dekan, por e përjashtuan edhe nga mësimdhënia në fakultet.
U desh të kalojë një vit që ish-ministri të kthehej në administratë. Kështu, sipas vendimit, ai është emëruar direkt nga kryeministri Berisha në detyrën e Drejtorit të Komitetit të Shkencave në Ministrinë e Arsimit, duke u marrë kështu pothuajse me të gjitha kurrikulat, madje edhe të proferorëve dhe pedagogëve të tjerë.
Gudar Beqiraj, kreu i Akademisë së Shkencave tha dje për “GSH” se nuk dinte gjë për këtë vendim, sepse institutet kanë kohë që në vitin 2007, që nuk janë pjesë më e këtij institucioni.
Por, nuk është e njëjta situatë në ministrinë e Arsimit. Aty, njerëzit thonë, se emërimi i Ylli Pangos vërtet është bërë në datën 3 shkurt, por që prej javësh, edhe pa një vendim qeverie që të kishte hyrë në fuqi, ai kishte filluar punën.
Puna e Ylli Pangos, si drejtor i Komitetit të Shkencave në Ministrinë e Arsimit, do t’i japë mundësinë ish-ministrit që të ketë tashmë kthimin pothuajse të të gjithë punës së tij pedagogjike, pse jo, edhe rikthimin në punë në fakultet.

SKANDALI SEKSUAL

Ish-ministri i Kulturës u përfshi 1 vit më parë në një skandal seksual pasi emisioni “Fiks Fare” e shfaqi atë duke i kërkuar një vajze që kërkonte punë, të zhvishej në shtëpinë e tij. Pak minuta pas transmetimit të pamjeve televizive, kryeministri Berisha e shkarkoi atë nga detyra. Në mes të marsit, parlamenti diskutoi dhe miratoi largimin e Pangos nga qeveria. Më e ashpra në reagimin e saj ka qenë kryetarja e Parlamentit, Jozefina Topalli. Sipas saj, ish-ministri Pango, të cilin ajo e cilësonte vazhdimisht si “zotëria në fjalë” dhe nuk preferoi t’ia zërë emrin në gojë, ka tradhtuar interesat dhe moralin e Partisë Demokratike, të qeverisë dhe të shqiptarëve që e kanë zgjedhur atë. Madje në cilësinë e nënës, ajo tha se ndiente frikë për fëmijët e saj nga tipat si Pango.
Gazeta Shqiptare Online
http://balkanweb.com/index.php?id=73443

[Llapjani_HH]

Më shumë kontroll ndaj Qeverisë së Kosovës

Përderisa Qeveria gjermane mundohet të ruajë mirësjelljen, ish-sekretari i shtetit gjerman për Evropën, Gernot Erler, kritikon Qeverinë e Kosovës. Ai kërkon më shumë kontroll ndaj aktiviteteve ekonomike të qeveritarëve.

Duke e vlerësuar gjendjen në Kosovë, dy vjet pas shpalljes së pavarësisë – Erler, në një intervistë për radion Deutsche Welle, ka thënë se, “pozitiv është fakti që nuk ka pasur ndonjë ngjarje dramatike negative”,

Por në anën tjetër, Erler thotë: “Kemi 45 për qind papunësi, numri i investimeve nga jashtë është shumë i vogël, kultura e ndëshkimit të krimit mungon, gjë që e solli ambasadorin amerikan para disa kohësh të fliste për rrezikun e një ‘shteti të dështuar’”.

“Për fat të keq konstatojmë se ka qenë e gabuar pritja se shumë probleme do të zgjidheshin vetvetiu, pas zgjidhjes së statusin. Ne duhet të shikojmë me kujdes, se çfarë bën kjo qeveri dhe para së gjithash, cilat janë aktivitet e saj në jetën ekonomike. Këtu kemi disa shembuj që na e kanë ulur besimin ndaj Qeverisë dhe na detyrojmë të ushtrojmë më shumë kontroll ndaj saj”, ka thënë Erler.

Erler ka përmendur faktin se, “ka shumë gazeta që shkruajnë për aktivitetet ekonomike të anëtarëve të Qeverisë, disa prej të cilave nuk janë brenda kuadrit ligjor”.

“Ajo çka konstatoj unë është se shpresat e varura tek EULEX-i ishin shumë më të mëdha se sa është arritur tani dhe se në disa pjesë të Kosovës krime të tilla si dhuna, korrupsioni, mashtrimi, të cilat nuk ndëshkohen. Kjo është diçka vendimtare dhe parakusht për të krijuar besimin tek popullsia. Prandaj duhet rritur kontrolli ndaj Qeverisë”, ka thënë ai.
Telegrafi

(S’)Ka nevojë për strategji lobimi

Në Prishtinë ekzistojnë mendime të kundërta në lidhje me formën e lobimit për njohjen e shtetit të Kosovës. Autoritetet thonë se s’ka nevojë për një strategji të fiksuar lobimi, kurse forcat në opozitë pohojnë të kundërtën.

Lidershipi i Kosovës ka paralajmëruar këto ditë, në disa raste, shtimin e njohjeve ndërkombëtare të Kosovës pas procesit në Gjykatën Ndërkombëtare të Drejtësisë.

Opozita dhe shoqëria civile i bëjnë thirrje Ministrisë së Jashtme dhe Qeverisë që të hartojë një strategji për mënyrën e lobimit menjëherë pas procesit në Gjykatën Ndërkombëtare të Drejtësisë, pavarësisht nëse do të ketë një mendim pozitiv, neutral apo edhe në rastin më të keq, negativ për pavarësinë e Kosovës nga kjo instancë ndërkombëtare e drejtësisë.

Mirëpo, Albana Beqiri, zëdhënëse në Ministrinë e Punëve të Jashtme, thotë se nuk ka nevojë për një strategji të tillë, pasi që, sipas saj, nuk pritet më valë njohjesh në bllok nga një numër i shteteve përnjëherë, por njohje nga vendet që kanë vendosur që ta respektojnë GJND-në para se të marrin vendimin për të njohur shtetin më të ri.

“Nuk mund të kemi një strategji, sepse Ministria e Jashtme përditë ndeshet me lobim. Nuk mund të kemi një strategji uniforme lobuese pasi që vendet, të cilat e kanë pasur interes të tyre parësor Kosovën, tashmë e kanë kryer procesin e njohjes dhe ne, në asnjë rast nuk mundemi që edhe vendeve tjera t’ua ofrojmë të njëjtën strategji, do ta quaja, uniforme të lobimit”, thotë Albana Beqiri.

Një mendim të kundërt me zyrtaren e Ministrisë së Jashtme shpreh Ibrahim Gashi nga Aleanca Kosova e Re.

Sipas Gashit, diplomacia kosovare ka nevojë për një strategji, e cila do të përfshinte në vete edhe figura vendore e ndërkombëtare në shërbim të rritjes së numrit të njohjeve.

“Në radhë të parë duhet të ketë një strategji për ta rritur numrin e njohjeve. Strategji, e cila në vete do të duhej të përmbante angazhimin e gjithë resurseve, potencialit që ka, edhe vendor edhe ndërkombëtar,që do të mund të angazhohej në lobim. Kurse, Ministria e Punëve të Jashtme do të duhej të ishte një koordinatore që të mblidhte të gjithë ata faktorë relevantë që mund të ndikojnë në rritjen e numrit të njohjeve”, thekson Gashi.

Deputeti i AKR-së, Ibrahim Gashi, i sugjeron Ministrisë së Jashtme të jetë më shumë e pranishme edhe në tryeza e forume tjera rajonale, apo të karakterit më të gjerë ndërkombëtar, në mënyrë që në çdo forum të dëgjohet edhe zëri i shtetit të Kosovës.

Ndërkohë, Ylli Hoxha drejtor ekzekutiv i Klubit për Polikë të Jashtme, thotë se vendimi i GJND-së do të jetë një moment shumë i rëndësishëm për Kosovën dhe procesin e njohjeve.

Por, Hoxha shprehet skeptik se lidershipi i Kosovës është i përgatitur për fazën pas GJND-së, pavarësisht se premton njohje të reja.

“Dy vitet e kaluara kemi parë se kemi lidership, i cili është i paaftë t’i zbatojë premtimet e veta, është i paaftë që ta përmbyllë një proces ndërkombëtar i cili është i domosdoshëm jo vetëm për pozicionin tonë ndërkombëtar por edhe për funksionalitetin e brendshëm të Kosovës. Bukur shpesh ato paralajmërime të këtij lidershipi dalin të zbehta, pa ndonjë rezultat”, thotë Hoxha.

Opozita dhe shoqëria civile i kanë rekomanduar disa herë Qeverisë që të angazhojë personalitete ndërkombëtare që kanë ndihmuar në krijimin e shtetit të Kosovës, edhe në procesin e lobimit për njohje.

Por, nga Ministria e Jashtme thonë se tashmë ka një numër ndërkombëtarësh që lobojnë aktivisht për këtë qëllim, por ata nuk preferojnë që t’u përmenden publikisht emrat.

Në dyvjetorin e pavarësisë, Kosova numëron 65 njohje ndërkombëtare.

Kurse, një moment i rëndësishëm për shtimin e këtij numri, sipas zyrtarëve më të lartë vendorë, do të jetë përfundimi i procesit në GJND.
Radio Evropa e Lirë

“Elektrokosmet” dhe “Elektroprivreda Srbije” vjedhin KEK-un

Prishtinë, 18 shkurt - Korporata Energjetike e Kosovës u bëri thirrje qytetarëve të pjesës veriore të Mitrovicës të mos bëjnë asnjë pagesë për faturat e pranuara nga kompanitë “Elektrokosmet” dhe “Elektroprivreda Srbije” pasi që KEK-u është operatori i vetëm i licensuar i sistemit të shpërndarjes dhe furnizimit me energji elektrike për të gjithë territorin e Kosovës.

KEK-u përmes një njoftimi për media njoftoi se në muajt e fundit KEK-u ka mësuar se dy entitete të pa licencuara, që nuk janë kompani të regjistruara në Kosovë, përkatësisht “Elektrokosmet” dhe “Elektroprivreda Srbije (EPS)” janë duke operuar ilegalisht në pjesën veriore të Lumit Ibër.


Sipas KEK-ut, provat e mbledhura tregojnë qartë se “Elektrokosmet” dhe “Elektroprivreda Srbije (EPS)” me mbështetjen e “Elektromreža Srbije” janë së bashku duke kryer aktivitetet e një operatori të sistemit të shpërndarjes së energjisë dhe të furnizuesit të energjisë pa ndonjë bazë ligjore apo autoritet.

“Sipas kornizës ligjore dhe rregullative të vendosur në vitin 2004, KEK-u është operatori i vetëm i licensuar i sistemit të shpërndarjes dhe furnizues publik për të gjithë territorin e Kosovës. Asnjë entitet tjetër nuk është licencuar të kryej ndonjërin prej këtyre aktiviteteve”, thuhet në njoftim.

KEK-u në përputhje me këtë vlerësoi se asnjë pagesë nuk duhet të bëhet nga shfrytëzuesit e energjisë elektrike në Kosovë te “Elektrokosmet” apo “EPS”, dhe konsumatorët duhet të shpërfillin faturat e pranuara nga këto entitete.

Sipas KEK-ut, kjo është një çështje e “sundimit të ligjit” dhe presin që të gjitha organet për zbatimin e ligjit në Kosovë të marrin veprimet e duhura për të siguruar mbajtjen e sundimit të ligjit.
Koha.net

[Llapjani_HH]

Qeveria e dhuron edhe traktorin e dytë për serbët lipjanas

Dushan Jorgiqi, pjesëtar i komunitetit serb nga Lipjani, është përfituesi i dytë i një traktori të ri nga ekzekutivi i vendit.

Qeveria e Kosovës, të premten ka dhuruar edhe traktorin e dytë për serbët e kësaj komune, pas atij që kishte dhuruar dy vjet më parë në Rubovc, kur përfitues kishte qenë Slavisha Slavkoviq.

Për dallim prej herës së parë, të premten në dorëzimin e traktorit të ri nuk ishte prezent kryeministri, Hashim Thaçi, ndërsa dhuratën e dorëzoi këshilltari i kabinetit të tij për komunitete, Sergjan Sentiq. “Falemnderit për këtë traktor, kjo është një dhuratë e madhe për mua dhe tashti po bindem se Qeveria e Kosovës është e vërtetë”, ka thënë Jorgiq, pasi ka pranuar traktorin e ri.

Traktori për këtë kryefamiljar erdhi pas një kërkese që ai personalisht i kishte bërë shefit të Qeverisë, Thaçi, më 4 nëntor të viti të kaluar. Atëkohë, Thaçi bashkë me shefin e Ambasadës së SHBA-së në Kosovë, Christopher Dell, e kishin vizituar familjen Jorgiq, prej nga patën bërë thirrje për dalje në votime të komunitetit serb. Jorgiq, nga ana tjetër pati premtuar se do të votojë në zgjedhje, ndërsa me këtë rast pati kërkuar edhe diçka nga makineria bujqësore, e që aludonte në një traktor.

“Do ta kesh traktorin”, kishte qenë përgjigjja e shkurtë e Thaçit pas kësaj kërkese, ndërsa në ato momente edhe ishte ngritur dolli me raki shtëpie.

Rakinë “Vinjak”, që e kishte hapur më 4 nëntor Thaçi për dolli, deri të premten e kishte ruajtur Dushan Jorgiqi,për ta servuar prapë të njëjtën, pjesën e mbetur të shishes. “Vinjakun” që e ka hapur kryeministri para 4 muajsh e kam ruajtur me respekt dhe sot po e pimë për gëzim”, ka thënë Jorgiqi.

“Më mbetet merak pse nuk qëlloi sot kryeministri këtu që t’ia them disa fjalë.

Por, dëshiroj që t’ia përcillni porosinë se këtu po jetojmë pa probleme, është një bashkëjetesë e mirë dhe unë e pranoj Thaçin për kryeministër”, ka deklaruar Jorgiq.

Ndërkohë, Florent Hoxha, nënkryetar i Lipjanit ka deklaruar me këtë rast se traktori – dhuratë është një realizim i një premtimi që ka bërë kreu i ekzekutivit kosovar.

“Kryeministri e pati premtuar traktorin dhe kjo është një dëshmi që ai premtimet nuk i lë boshe, por i përmbush.

Unë siguroj familjen Jorgiq, por edhe të gjithë qytetarët e Lipjanit pa dallim, se edhe ne si komunë jemi të përkushtuar që t’u krijojmë atyre jetë të rehatshme”, ka thënë Hoxha.
Koha.net

Padit Gjeneralin

Gjeneral Sylejman Selimin e ka paditur ish-pjesëtari i FSK-së, Izet Aliu. Ky kapiten pretendon se është larguar nga puna pa të drejtë, me vendim të nënshkruar nga kreu i kësaj force. Drejtësinë thotë do ta kërkojë deri në Strasburg. Zyrtarët e FSK-ë dhe KFOR-i përgjegjës bëjnë njëri-tjetrin për këto përjashtime

Nëse pjesëtarët e tjerë të përjashtuar nga Forca e Sigurisë së Kosovës janë pajtuar të mos e veshin kurrë uniformën ushtarake, Izet Aliu nga Dragashi e ka ndarë mendjen të veprojë ndryshe.

Ai ka angazhuar një avokat nga Prizreni dhe të enjten, në Gjykatën Komunale në Prishtinë, ka dorëzuar një padi ndaj FSK-së dhe komandantit të përgjithshëm të saj, Gjeneral Sylejman Selimi.

Padia e Izetit, në këtë rast, ka të bëjë me vendimin e nënshkruar nga Gjeneral Selimi, për largimin e tij nga puna. Ish Kapiten Izeti thjesht kërkon rikthim në vendin e punës, ngase pretendon se përjashtimi i tij është bërë pa asnjë arsye.

Në fakt, ai beson se përjashtimi i tij nga detyra është bërë për shkak të raporteve që ka hartuar në lidhje me keqpërdorimet e mëdha që janë bërë në këtë forcë.

“Janë shitur veturat e TMK-së për hekur dhe kjo ka ndodhur gjatë epopesë së UCK-së në vitin 2009”, thotë Izeti për Express.

Përveç kësaj, sipas tij, rasti më i tmerrshëm që ka ndodhur në FSK është ajo çfarë kanë bërë me veturën e ruajtur si relikt të luftës, për të cilën për dhjetë vjet janë kujdesur ish Trupat Mbrojtëse të Kosovës (TMK).

“Vetura të cilën dëshmori Tahir Sinani ua kishte marrë forcave serbe, për dhjet vjet ka qëndruar në Zonën e Dytë Mbrojtëse në Prizren për t’u vendosur në muze. Por, në mars 2009, bashkë me të tjerat, ajo është shitur për hekur”, shpjegon Izeti.

Edhe këtë rast ai pretendon se e ka paraqitur në raportet e tij dhe mendon se ky është edhe një shkak më shumë pse e kanë larguar nga FSK-ja.

“Në gjykatë do të tregoj emrat e atyre personave, të gjithëve, çfarë kanë bërë e si kanë vjedhur”, deklaron ish Kapiteni i FSK-së, i bindur se një ditë gjykata do ta shqyrtojë rastin e tij.

Edhe pse në vendimin për largim nga puna i shkruan qartë se nuk ka të drejtë ankese, para se të shkojë në gjykatë, Izeti është ankuar në zyrën e Avokatit të Popullit dhe Këshillin për Mbrojtjen e të Drejtave të Njeriut (KMDLNJ).

“E kanë regjistruar rastin, por më kanë thënë se fillimisht duhet t’i drejtohem gjykatës. Këtë e kam bërë. E nëse këtu nuk gjej drejtësi, do të shkoj deri në Strasburg”, thotë Izet Aliu. Ai thotë se për këtë është i vendosur deri në fund.

“Dua që drejtësia të dalë në shesh e të mos luhet me dinjitetin tonë”, shprehet Izet Aliu, duke sqaruar se tërë veprimi i tij ka vetëm një qëllim.

“Drejtësia të dalë në shesh sepse e ndiej vetën se nuk jam fajtor dhe dua të kthehem në vendin tim të punës”, thotë Izet Aliu.

Por, vetë zyrtarë të Ministrisë së FSK-së kanë deklaruar se kjo çështje nuk është kompetencë e tyre, edhe pse në fund të vendimit për largim të Izetit dhe 13 ish pjesëtarëve të tjerë të kësaj force qëndron nënshkrimi i kreut të FSK-së.
“Kjo është kompetencë e KFOR-it dhe ne nuk dimë asgjë as për largim të këtyre personave”, është shprehur ditë më parë Ibrahim Shala për Express.

Por, zyrtarë të KFOR-it thonë se me këtë çështje merret vetë FSK-ja duke mos pranuar se kanë gisht në përjashtimin e këtyre pjesëtarëve, të cilëve në vendim u shkruan se rezultatet e verifikimeve të të kaluarës së tyre për ta kanë dalë të jenë negative.

Në lidhje me këto largime nga FSK-ja, ka reaguar edhe Behxhet Shala, kryetar i KMDLNJ-së. Me një letër të hapur drejtuar Gjeneral Selimit, Shala ka deklaruar se vendimi për ndërprerjen e punësimit, që u është dhënë këtyre ish pjesëtarëve, është shumë i paqartë dhe aspak arsyetues. “Nuk i tregoni arsyet e vërteta pse shkarkohen pjesëtarët e FSK-së, apo nuk ju lejohet nga ata që e bëjnë procedurën e verifikimit” ta bëni këtë?!”, ka thënë Shala.

Sipas tij, meqë verifikimi i aftësive psikofizike të kandidatët bëhet në fillim dhe ky është kusht i domosdoshëm për rekrutim të suksesshëm, pse është e nevojshme që procedura e verifikimit të zgjasë më shumë se një vit, e pastaj rekrutët të hidhen në rrugë.
Gazeta expres

[Llapjani_HH]

Fadil Sulejmanit i ndalohet hyrja në Universitetin e Tetovës

Themeluesi dhe ish-rektori i Universitetit të Tetovës, Fadil Sulejmani, bëri të ditur të martën se i ishte ndaluar hyrja në objektet e Universitetit Shtetëror të Tetovës nga ana e të punësuarve në sigurimin e objektit.

Ai më tej shtoi se rojet i kishin thënë se urdhri për ndalesën e hyrjes së tij në USHT kishte ardhur nga rektori aktual, Agron Reka, duke e akuzuar këtë të fundit se nuk ka guxim që vetë ta bëjë këtë, por përmes rojeve.

“Sot kur kam ardhur të hyj në ndërtesën e Universitetit, rroja më ka ndaluar që të futem brenda duke më thënë se kanë urdhër të drejtpërdrejtë prej rektorit Agron Reka. Kjo më ka habitur mjaft, meqë këta njerëz nuk kanë zemër që këto punë vet t’i bëjnë, por mundohen nëpërmjet rojeve, këtyre djelmoshave, të cilët i kanë kërcënuar me bukën e gojës, që të më ndalojnë që të futem brenda”, deklaroi ish rektori Sulejmani.

Arsye për këtë, sipas ish rektorit Fadil Sulejmani, është themelimi i Këshillit të pavarur për ndryshime jopolitike në USHT, që siç shprehet ai, ka për qëllim largimin e politikës nga ky institucion i lartë arsimor dhe formimin e organeve të reja drejtuese të pavarura nga politika, partitë dhe qeveria.

Themeluesi dhe rektori i parë i Universitetit Shtetëror të Tetovës, Fadil Sulejmani, shprehet i shqetësuar nga kjo sjellje e organeve udhëheqëse të USHT-së dhe të njëjtën e quan më të egër se ajo e pushtetit të vitit 1995.

“Jam i shqetësuar sepse atë që nuk arritën ta bëjnë forcat speciale policore në themelimin e UT-së, e bëjnë sot përmes shqiptarëve. Unë atë kohë kam kaluar kordonët e policisë duke rrezikuar edhe jetën, ndërsa sot nuk arrij ti kalojë dy rroje shqiptare”, deklaroi Fadil Sulejmani, i cili më tej shtoi se shpreh keqardhje për këto veprime ndaj tij.

Rektori aktual i Universitetit Shtetëror të Tetovës, Agron Reka, nuk komentoi aspak akuzat e Sulejmanit.
Koha.net

Sejdiu mund të takohet me Tadicin

Presidenti i Kosovës, Fatmir Sejdiu dhe presidenti i Serbisë, Boris Tadic, ka mundësi të takohen në Slloveni, gjatë muajit mars, në konferencën e përbashkët që do të mbahet mes krerëve të Bashkimit Evropian dhe liderëve të shteteve të Ballkanit Perëndimor.

Mundësia e takimit të presidentit kosovar dhe atij serb është bërë e ditur nga shefi i diplomacisë sllovene, Samuel Zhbogar, gjatë takimeve të tij në Bruksel.

Sipas tij, Boris Tadic ka premtuar se do të marrë pjesë në këtë takim, ndërsa nikoqiri, Sllovenia, por edhe zyrtarët nga Brukseli, synojnë që aty të jetë i pranishëm edhe presidenti kosovar, Sejdiu.
Telegrafi

[Llapjani_HH]

Riemërimet e paligjshme

Tahir Rrecaj, gjyqtar në Gjykatën Supreme, e quan të paligjshëm vendimin e KGJK-së që atij dhe disa kolegëve t’iu vazhdohet mandati pa kaluar testet si gjithë të tjerët. Procesin e riemërimeve të larta në sistemin e drejtësisë e cilëson të mbushur me parregullsi.

Pesë gjyqtarë të Gjykatës Supreme të Kosovës nuk kanë qenë fare prezent më 19 shkurt, në ceremoninë e dekretimit nga ana e Presidentit të Republikës.
Ata nuk kanë pasur fare nevojë, ngase mandatin e tyre, përmes një vendimi, ua ka vazhduar Këshilli Gjyqësor i Kosovës (KGJK).

Disa prej tyre janë gjyqtarët Meleqe Behxheti, Avdi Dinaj, Tahir Rreci dhe njësoj sikurse këta, në atë ceremoni ka munguar edhe prokurori i shtetit, Vesel Jashari.

Në fakt, këta janë zyrtarët të cilët nuk kanë pasur fare nevojë të lodhen as për të kaluar testet e organizuara nga Komisioni i Pavarur Gjyqësor dhe Prokurorial i Kosovës (KPGJP).

Por me këtë vendim të KGJK-së duket se nuk ka mundur të pajtohet Tahir Rrecaj, i cili sapo ka kuptuar se çfarë ka ndodhur, ka dhënë dorëheqje nga pozita e gjyqtarit të Gjykatës Supreme.

Sipas tij, mënyra e zgjedhjes së kryetarit të Gjykatës Supreme dhe vazhdimi i mandateve të disa prej tyre pa hyrë as në testin e etikës, ka qenë e papranueshme dhe e paligjshme.
Bazuar në ligj, të gjithë është dashur të hyjnë në këtë test, ashtu siç kanë vepruar edhe gjyqtarë dhe prokurorë të të gjitha niveleve të sistemit të drejtësisë, edhe pse kjo nga shumë gjyqtarë është parë si gjë banale.

Pas tridhjetë vjet përvojë pune, atyre u është dashur t’iu përgjigjen pyetjeve për etikën profesionale dhe personale, duke bërë që shumë nga ta të mos arrijnë ta kalojnë.

Por Tahir Rrecaj, edhe pse i është vazhduar mandati si gjyqtar në Gjykatën Supreme të Kosovës, nuk ka pranuar të punojë në këtë mënyrë, kur tërë kolegët e tij është dashur të kalojnë në shumë teste.

Rrecaj të mërkurën nuk ka dashur të japë asnjë sqarim shtesë, duke deklaruar se krejt çfarë ka pasur të thotë, u është shpërndarë medieve përmes një deklarate.

Kjo letër e shpërndarë nga Rrecaj, bën përgjegjës, përveç të tjerëve, edhe kreun e shtetit, Fatmir Sejdiun, për të cilin thotë se ka dekretuar zyrtarë të drejtësisë që kanë kaluar në një proces me plotë parregullsi edhe ligjore.

Në këtë deklaratë, ai ka sqaruar se ka konkurruar si të gjithë të tjerët për dy pozita, edhe pse ajo për kryetar të Gjykatës Supreme të Kosovës, ka qenë në kundërshtim me Kushtetutën e vendit.

Sipas tij, kryetarin e Gjykatës Supreme të Kosovës e emëron dhe e shkarkon Presidenti, e ai duhet të jetë njëri nga anëtarët e Gjykatës dhe i cili ka mandat shtatëvjeçar.

Duke përmendur edhe ligjet dhe nenet përkatëse, Rrecaj ka deklaruar se nuk ka dashur të punojë si gjyqtar në Gjykatën Supreme të Kosovës duke u bazuar edhe për një arsye tjetër.

Rrecaj sqaron se duke u bazuar në ligj, të gjithë pa përjashtim, është dashur të hyjnë në testin e etikës, edhe pse një provim i tillë nuk do të thotë se me përgjigje të mësuara përmendësh, gjyqtari apo prokurori ka etikë profesionale apo personale.

“Pastaj, mund të gjendesh në ndonjë situatë kur ndonjë palë, me qëllim apo pa të do të thotë se nuk mund ta gjykosh kur nuk e ke të kaluar as provimin etikës”, ka sqaruar ndër të tjera në letrën e tij, Tahir Rrecaj, tash ish-gjyqtar në Gjykatën Supreme të Kosovës.

Derisa Rrecaj duket se është i qetësuar me vendimin e tij, ky proces i mbajtur jashtëzakonisht sekret nga KPGJP, duket se ka nisur të shkaktojë tensione.

Burime të Expressit brenda Gjykatës Supreme tregojnë se tetë të dekretuarit e tjerë ndjehen të fyer me tërë ato procedura që është dashur t’i ndjekin për të mbërritur aty, ndërkohë që gjyqtarët e tjerë, thjesht kanë shikuar.

“Kur është kuptuar se jo të gjithë gjyqtarët në Gjykatën Supreme kanë qenë të trajtuar njësoj nga KPGJP-ja dhe Këshilli Gjyqësor i Kosovës, atëherë situata është tensionuar”, thotë ky burim për Express.

Përveç Gjykatës Supreme, as në Prokurorinë e Shtetit, situata nuk është më mirë.

Sherri aty ka plasur edhe për faktin kur është parë se kush është emëruar si prokuror.

Sipas këtij zyrtari, kur është parë se prokurorë janë edhe të atillë që kanë shërbyer deri në vitin 1999 ose që kanë marrë pjesë në tubimin e Milosevicit në Gazimestan, në vitin 1989, atëherë ka nisur të tensionohet situata.

“Aty janë vendosur edhe prokurorë që kurrë nuk kanë punuar në këtë punë, por vetëm si bashkëpunëtorë”, thotë ky burim i gazetës.

Derisa të mërkurën ka qenë e pamundur të kontaktohet Lirie Osmani, kryetare e KGJK-së, një ditë më herët, në deklarimin për media, ka pranuar se ekzistojnë tensionet ndërmjet këtij këshilli dhe KPGJP-së të drejtuar nga ndërkombëtarët.
Gazeta expres

[Llapjani_HH]

EULEX-i përgatit akuza të reja për krimet e luftës, kërkon shpërbërjen e strukturave paralele

Përfaqësuesi civil ndërkombëtar në Kosovë Pieter Feith ka hedhur poshtë akuzat se ka standarde të dyfishta ndaj krimeve në Kosovë.

“Kjo nuk është e vërtetë, pyetni Ive de Kermabonin sa njerëz do t’i akuzojë EULEX-i për krime të luftës në një ë ardhme të afërt.

Kjo do të jetë një ndërmarrje e madhe", ka thënë Feith, duke shtuar se dëshiron të shohë “të përgjigjen për veprimet e këqija madje sa më parë edhe kriminelët nga UÇK-ja”.

Feith ka thënë se është i bindur se të gjithëve që kanë bërë krime ndaj serbëve pas ardhjes së KFOR-it do të gjykohen para gjykatave kosovare.

“Askush nuk është mbi ligjin dhe këtë ia përsëris autoriteteve çdo ditë. Do të dëshiroja të shoh, e jam i sigurt se edhe Iv de Kermabon e dëshiron të njëjtën. Kjo është e vështirë, nevojitet shumë kohë për hetime dhe ngritje të akuzës. Të jem i sinqertë, në shoqërinë shqiptare, e cila është mjaft e mistershme, është e vështirë të gjenden dëshmitarët, ka thënë ai.

Përfaqësuesi ndërkombëtar tha se integrimi i veriut të Kosovë në institucione nën kontrollin e Prishtinës do ta varet nga ajo se a e pranojnë këtë serbët e Kosovës apo jo. Në një intervistë dhënë RTS-së, Feith shtoi se plani (strategjia për veriun) nuk e ka mbështetjen formale të Brukselit dhe hodhi poshtë akuzat se me zbatimin e tij rrezikohet stabiliteti i rajonit.

Qëllimi është të depërtojmë deri te qytetarët, të përpiqemi të gjejmë njerëz të cilët do të jenë përfaqësues të popullit nga veriu, dhe të kuptojmë se çka ata në të vërtetë dëshirojnë. Për këtë është i nevojshëm një debat publik, pasi deri tash nuk është dëgjuar zëri i popullit, por vetëm i kujdestarëve të dyshimtë”, tha ai duke menduar në Milan Ivanoviqin dhe Marko Jakshiqin. “Unë dua që populli në pjesën veriore të shprehet për ardhmërinë e vet, dhe kjo është e tëra”. .

"Është e vërtetë se edhe presidenti Tadiq ka folur për planin, por unë edhe më tutje shpresoj se ai do të pajtohet se është e domosdoshme që me disa probleme e gjëra në veriun e Kosovës të ballafaqohemi përfundimisht, sidomos me ato probleme që ekzistojnë tash e 10 vjet”.

Feithi theksoi se status quoja nuk është e qëndrueshme, se sundimi i ligjit duhet të vendoset, se duhet të ekzistojë bashkëpunimi më i madh i të gjitha palëve me EULEX-in, dhe se gjykata në veriun e Mitrovicës duhet sërish të punojë.

"Duam që sërish të punojnë doganat. Këto janë kërkesa për të cilat mendoj se janë fare të matura dhe se i mbështesin të gjitha anëtaret e BE-së”.
Në këtë intervistë, përfaqësuesi special i BE-së organet e pushtetit serb në veriun e Mitrovicës i ka quajtur paralele dhe ka kërkuar shpërbërjen e tyre.
Feith tha se është e pamundur të përmirësohet qeverisja me vendin nëse ekzistojnë strukturat paralele dhe ku komunitetet nuk jetojnë në mënyrën si do të duhej.

"Andaj unë i shpërbëj strukturat paralele, por dëshiroj që ato t’i zëvendësojnë lidhjet e qarta dhe të besueshme me Beogradin”, shoti ai.
Sipas Feithit, edhe Serbia edhe Kosova kanë perspektivë evropiane.
Koha.net

Serbia, në veri, vëzhgon edhe KFOR-in amerikan

“Koha Ditore” ka mësuar se në një takim të mbajtur të martën, në pjesën veriore të Mitrovicës, krerët e MPB-së së Serbisë për veriun e Kosovës u kanë dhënë një varg urdhrash komandantëve serbë të Policisë së Kosovës, përfshirë ato për vëzhgimin dhe përcjelljen e KFOR-it amerikan, monitorimin e aktiviteteve të ekipit përgatitor për komunën e re të Mitrovicës veriore, mosbindjen ndaj zinxhirit komandues me seli në Prishtinë, si dhe shmangien nga përdorimi zyrtar i shenjave të Republikës së Kosovës. Gjerësisht në numrin e sotëm të gazetës.
Koha.net

Serbia shet pronën e Kosovës, zyrtarët vendorë nuk dinë asgjë

Kush është pronar i objektit të OSBE-së?

Objektit të njohur nga qytetarët si ndërtesa e OSBE-së, më parë Banka Lubjanës e shfrytëzuar nga OSBE-ja që nga paslufta, nuk i dihet akoma zyrtarisht titullari i pronësisë. Që nga paslufta pronarët “legjitimë” ish-banka e Lubjanës (Banka Kreditore) si dhe OPPB Investmetali Prishtinë, Marketingu, Inzhnjeringu dhe Banka Interne janë ankuar në të gjitha institucionet përkatëse vendëse e ndërkombëtare (gjykata, AKM, AKP, Avokati i Popullit, OSBE Kosovë e Vjenë e etj) për lirimin e objektit të tyre dhe pagesën e qirasë për shfrytëzim, por asnjëherë kërkesat nuk janë marr parasysh. Në ndërkohë Institucionet e Kosovës nuk janë marr me zgjedhjen e statusit të këtij objekti, ndërsa OSBE-ja ka vazhduar me shfrytëzimin e objektit mbi pesë mijë metra në katrorë. Disa burime tona thonë se OSBE-ja i ka paguar edhe qira edhe një kohë pas lufte Serbisë, por zyrtarët e OSBE-së e mohojnë këtë.

(Tekstin e plotë mund ta lexoni në numrin e nesërm të gazetës, “Bota sot”)
Bota Sot

EULEX-i do të dështojë! Nuk mund ta bëjë politikën e jashtme të Kosovës

Ekspertë dhe analistë nuk i japin asnjë të drejtë EULEX-it që ta bëjë politikën e jashtme të Kosovës dhe aq më pak, që të vendos vetë për çështje të ndjeshme si veriu apo drejtësia.

Çështja e protokolleve apo marrëveshjeve me Serbinë po rihapet sërish. Së shpejti do të shkojë në Beograd kreu i EULEX-it të diskutojë me zyrtarët serb. Edhe pse nuk është qartësuar shumë kjo vizitë, të paktën zyrtarët e EULEX-it, kanë deklaruar se në top agjendë do të jetë, çështja e drejtësisë.

Mundësinë e nënshkrimit të një protokolli për drejtësinë e ka mohuar në vazhdimësi Ministria e Drejtësisë, por të premten nuk kanë pranuar të flasin se për se do të ndodhet në Beograd Iv de Kermabo.

Misioni i EULEX-it, i deklaruar si neutral ndaj statusit, përkatësisht pavarësisë së Kosovës, po vazhdon ta trazojë dhe ta vë në mëdyshje ekzistencën e shtetit dhe të pavarësisë së vendit...

(Tekstin e plotë mund ta lexoni në numrin e nesërm të gazetës, “Bota sot”)
Bota Sot

[Llapjani_HH]

Dell: Manastiri i Graçanicës "dëshmi e gjallë e pranisë së Serbisë në tokën e Kosovës"

Ambasadori amerikan në Prishtinë, Christopher Dell, dhe zëvendësndihmëssekretari i Shteteve të Bashkuara të Amerikës, Stewart Jones, e kanë vizituar të premten Manastirin e Graçanicës dhe kanë premtuar vazhdimin dhe intensifikimin e përpjekjeve që UNESKO-ja përsëri të angazhohet në renovimin e manastireve, në mënyrë edhe më të fuqishme.

"E kemi vizituar manastirin, sepse është dëshmi e gjallë e pranisë së Serbisë në tokën e Kosovës.

Natyrisht, jemi thellësisht të përkushtuar në mbrojtjen e manastireve të këtilla, të religjionit dhe të kulturës. Kolegu im ka ardhur nga Washingtoni që t'i vizitojë këto vende", ka thënë Dell.

Me rastin e takimit në manastir me ministrin për religjion në Qeverinë e Serbisë, Bogoljub Shijakoviq, ambasadori amerikan në Prishtinë ka thënë për "Zërin e Amerikës" se kjo është "rastësi absolute".

"Nuk e kemi ditur se është këtu, derisa jemi takuar", ka thënë Dell.
Zëvendësndihmësi i sekretarit amerikan të shtetit, Stewart Jones, ka biseduar në Prishtinë edhe me zyrtarët më të lartë të Kosovës, megjithatë shumica e mediave që raportojnë në gjuhën serbe nuk kanë qenë të njoftuara për vizitën e zyrtarit amerikan në Kosovë, ka konstatuar "Zëri i Amerikës".
Koha.net

Presidenti negociator

Presidenti Fatmir Sejdiu sërish e ka shkrirë postin e tij të ngrirë si kryetar i LDK’së. Ai ka zhvilluar katër herë takime me Teuta Sahatqinë për shkrirjen e ORA’s në LDK. Po ashtu, Sejdiu akuzohet nga LDD’ja se ka bërë përpjekje për ‘trafikimin’ e deputetëve dardanë dhe aktivistëve tjerë të LDD’së.

Presidenti Fatmir Sejdiu, të cilit Kushtetuta ia ndalon të ushtrojë poste tjera, herë pas here po e shkrinë postin e ngrirë të kryetarit të LDK’së dhe po merret me çështje të partisë së tij.

Kreu i shtetit ka zhvilluar disa takime me liderë të partive, deputetë dhe aktivistë partiak, për t’i bindur ata që të aderojnë në Lidhjen Demokratike të Kosovës.
Disa ditë pas shkrirjes së Partisë ORA në LDK, zyrtarë të partisë së shuar tashmë konfirmojnë negociatat mes Fatmir Sejdiut dhe Teuta Sahatqisë, ish- kryetare e ORA’s.
Nazim Jashari, ish deputet i Partisë ORA ka deklaruar se Sahatqija është takuar katër herë me Sejdiun për të negociuar kushtet e shkrirjes së ORA’s në LDK.
Sipas Jasharit, mbajtjen e këtyre takimeve Sahatqija i ka konfirmuar në mbledhjen e Këshillit të Përgjithshëm të ORA’s.

“Sipas atyre që ka deklaruar Sahatqija në Këshillin e Përgjithshëm të ORA’s ajo është takuar katër herë me presidentin Fatmir Sejdiu së bashku edhe me Isa Mustafën për të negociuar shkrirjen e ORA’s në LDK”, tha Jashari për Express.

Përveç këtij rasti, edhe zyrtarë të Lidhjes Demokratike të Dardanisë deklarojnë se presidenti Sejdiu ka kontaktuar deputetë dhe zyrtarë tjerë të kësaj partie për t’i joshur ata të kalojnë në LDK.

“Presidenti Sejdiu është shkelësi i parë dhe më i madh i Kushtetutës. Krejt ai tregimi i vjetër që ka qenë për ngrirje e shkrirje të postit të tij, ka qenë manipulim i opinionit. Ai po shihet se vazhdimisht vazhdon ta shkel Kushtetutën duke bërë negociata për LDK’në”, tha të shtunën për Express Lulzim Zeneli, sekretar i përgjithshëm i LDD’së.

Ai tha se partia e tij e ka denoncuar edhe më herët Presidentin kur bënte takime në Presidencë me deputetë dhe aktivistë të LDD’së për t’i joshur të kalojnë në LDD.

“Veprimet e tij janë skandaloze. Zyra e Presidentit të vendit shndërrohet në zyrë ku trafikohen njerëzit prej një subjekti në subjekt tjetër. Apo në atë zyrë shantazhohen njerëzit dhe bëhen pazare politike”.

Sipas Zenelit, realiteti në Kosovë tregon se jo që nuk respektohet asnjë normë etike kushtetuese por mungon edhe morali politik i institucioneve të vendit.
“Në këtë drejtim shoqëria kosovare duket se është e pafuqishme për ta ndryshuar këtë kurs që është aktualisht”, tha Zeneli për.

Por, zëdhënësi i Presidencës Xhavit Beqiri mohon se Presidenti në kabinetin e tij pret lider të partive për të biseduar për koalicione dhe përforcim të LDK’së.
Sipas tij, Sejdiu të gjithë i takon si President i Kosovës, e jo si kryetar partie.

“Përfaqësuesit e AAK’së që ishin tash së fundi, kanë bërë kërkesë për takim dhe presidenti i ka takuar si President i vendit. Për të gjitha temat që ngritën për subjekte politike, Presidenti i orienton në Kryesinë e LDK’së. Edhe kërkesa e Haradinajt ka qenë e qartësuar se dëshiron të takohet me Presidentin e Republikës”.

Por, presidenti Sejdiu ditëve ka negociuar jashtë funksionit shtetëror me përfaqësuesit më të lartë të Partisë ORA.

Zëdhënësi Beqiri nuk e konfirmon as këtë duke thënë se negociatat për koalicione i bëjnë anëtarët e Kryesisë e pastaj ata e informojnë Presidentin.
“Nuk dua t’i komentojë deklaratat e atyre që kanë thënë se kanë biseduar me presidentin për koalicione. Por mund të them se presidenti i takon përfaqësuesit politik në kuadër të përgjegjësive të veta shtetërore. Unë nuk po e përjashtoj mundësinë që tek presidenti drejtohen letra politike për koalicione të ndryshme, sepse ato tashmë dihet se diskutohen në LDK jo, në Presidencë”, tha Beqiri.

Presidenti Sejdiu ka përvojë të gjatë në negociata. Gjatë bisedimeve për zgjidhjen e statusit politik të Kosovës ai ka qenë shef i Ekipit të Unitetit.
Gazeta expres

Pazari politik

Shkrirja e ORA’s në LDK është ambicie e Teuta Sahatqisë dhe Gazmend Muhaxhirit. Nuk i përjashtoj edhe pazaret tjera. Veton Surroi ka sugjeruar afrimin me AAK’në. Negociator i LDK’së ka qenë Isa Mustafa, por është përfshirë edhe Fatmir Sejdiu. Përmes Sahatqisë synohet edhe mënjanimi i Melihate Tërmkollit nga kreu i Forumit të Gruas. Ish-deputeti i ORA’s, Nazim Jashari, flet për Express

Ish-Deputeti i Partisë Reformiste Ora, Nazim Jashari, është i dëshpëruar që partia e tij u shua pa u përfillur as kriteret demokratike nga dy bashkëpartiakët e tij, kryetarja Teuta Sahatqija dhe nënkryetari Gazmend Muhaxhiri, të cilët, sipas tij, e bënë këtë për të realizuar ambiciet e tyre ndoshta jo krejtësisht politike.
“Ma mirë të kishte vdekur vetë, se me vra me dorën tonë”, shprehet Jashari, i cili ka qenë edhe sekretar i ORA’s.

Javën e kaluar, partia e themeluar nga Veton Surroi është shkrirë në Lidhjen Demokratike të Kosovës pas dështimit të dytë në zgjedhje. Projekti Ora ka filluar me ambicie të mëdha në vitin 2004, kur arriti të marrë 43 mijë vota dhe të futet në Parlament me shtatë deputetë. Tatëpjeta filloi në zgjedhjet e radhës nacionale, më 2007, kur dështoi të kalojë pragun zgjedhor, sepse tuboi 20 mijë vota më pak se tri vjet më herët.

Kulmi i mossuksesit ishin zgjedhjet e fundit lokale. Nën drejtimin e Teuta Sahatqisë, ORA humbi edhe 13 mijë votues tjerë.

Këtu nisë koketimi i Sahatqisë dhe Muhaxherit me përfaqësues të partive tjera, megjithëse edhe me herët ka pasur ide për ndryshime.
Tri parti ju turrën Orës. LDK, AAK por edhe PSD’ja e Agim Çekut.

Nazim Jashari beson se vendimi për shkrirje në LDK është marrë para mbajtjes së zgjedhjeve lokale në nëntor të vitit të kaluar, sepse dështimi në zgjedhje, sipas tij, ka qenë i parashikuar për shkak të mungesës së energjisë, reformave, etj, në ORA. “Për këtë arsye AAK kurrë nuk ka qenë opsion”, thotë Jashari.
Sipas tij, jo vetëm Sahatqija, por edhe Gazmend Muhaxhiri ka qenë promotor i procesit të lëvizjes së ORA’s drejt LDK’së, pavarësisht se ai ka deklaruar se ka qenë i interesuar për shkrirje në një subjekt tjetër politik. “Ka qenë jetësisht i angazhuar për bashkëngjitje me LDK’në”.
Jashari jep versionin e vet se përse ata u përcaktuan për LDK’në e jo për AAK’në.

“Që të dy kanë qenë me origjinë nga LDK-ja ose së paku votues të LDK’së nëse nuk kanë qenë të strukturuar”.

Në partinë e re, për Sahatqinë parashikohet një karrige në kryesinë e LDK’së, kurse për Muhaxhirin, posti i kryetarit të degës së LDK’së në Pejë. “Nuk i përjashtoj edhe pazaret tjera. Ka spekulime edhe për poste ambasadorësh’, thotë ai.

Jashari tregon se negociatori kryesor në emër të LDK’së gjatë tërë kohës ka qenë Isa Mustafa, kryetar i Prishtinës. Por, ai thotë se në katër raste, në negociata me Teuta Sahatqinë është përfshirë edhe presidenti Fatmir Sejdiu.

“Kanë qenë të motivuar shumë nga LDK sepse Partisë së Sejdiut i është nevojitur shumë mesazhi që do të dërgonte bashkimi me ORA’n për t’u prezantuar në opinion si një parti atraktive”, ka thënë Jashari.

Ai mendon se ata që kanë ofruar Sahatqinë në LDK synojnë edhe mënjanimin e Melihate Tërmkollit nga posti i kryetares së Forumit të Gruas së LDK’së
Jashari vlerëson se pavarësisht marrëveshjes, elektorati i ORA’s nuk kalon me automatizëm në LDK. “Edhe LDK ka qenë opsion për votuesit, por ata e kanë votuar ORA’n”.

Edhe AAK’ja ka bërë çmos të shtie në dorë ORA’në. Një zyrtar i Aleancës ka thënë për Express se në negociata kanë qenë të angazhuar kryetari Ramush Haradinaj dhe nënkryetari Blerim Shala.

Opsioni që ORA të bashkohet me AAK’në, thotë Jashari, është përkrahur nga Veton Surroi, por nuk është marrë seriozisht nga Sahatqija dhe Muhaxhiri. “Surroi deri në momentin e fundit ka qenë ithtar i afrimit me AAK’në”, thotë ai.
Kur u bë e qartë tendenca që ORA po shkon drejt LDK’së, Nazim Jashari thotë se AAK rriti pazarin duke i ofruar Sahatqisë edhe postin e nënkryetares, por gjithçka ishte e kotë.

Ish-deputeti Jashari nuk është i sigurt nëse Surroi, në fund, ia dha bekimin ORA’s që megjithatë të shkrihet në LDK. “Nuk e di nëse në këtë projeksionin më të ri a është llogaritur edhe Vetoni. Mbetet të shihet se çfarë do të sjellë e ardhmja. Megjithëse unë dyshoj shumë”.
Megjithëse i mbetur pa parti, Nazim Jashari thotë se nuk do të largohet nga politike.
Gazeta expres

[Llapjani_HH]

Raportet KFOR-FSK, të paqarta

Ministria e Forcës së Sigurisë së Kosovës bën të ditur se mosmarrëveshja me KFOR-in, në lidhje me pjesëmarrjen e Gardës së FSK-së në manifestimin e Epopesë së UÇK-së, është tejkaluar. Në anën tjetër, KFOR-i nuk komenton deklaratën e FSK-së. Ky mision thotë se është duke zhvilluar bisedime për të gjetur zgjidhje.

Raportet mes KFOR-it dhe FSK-së nuk janë qartësuar plotësisht. Ndërsa Forca e Sigurisë së Kosovës thotë se mosmarrëveshja me KFOR-in është tejkaluar, misioni ndërkombëtar ushtarak nuk e pohon këtë, por thotë se janë duke zhvilluar diskutime në nivele të ndryshme për të kapërcyer situatën.

Dy ditë më parë, komandanti i KFOR-it, Markus Bentler, ngriu raportet me FSK-në, për shkak se Garda e armatosur e FSK-së mori pjesë në manifestimin Epopeja e UÇK-së. Sipas KFOR-it, kjo nuk ka përkuar me statusin joushtarak të FSK-së.

“KFOR-i nuk e komenton deklaratën që është lëshuar sot nga FSK-ja. Ne jemi duke zhvilluar bisedime në nivele të ndryshme, në përpjekje për të zgjidhur çështjen. Jemi optimistë se do të kemi zgjidhje të mirë në të ardhmen”, i tha Radios Evropa e Lirë, zëdhënësi i KFOR-it, Hans Peter Buh.

Në anën tjetër, në një komunikatë për media, Ministria e Forcës së Sigurisë së Kosovës thotë se e "çmon bashkëpunimin me KFOR-in dhe NATO-n si të domosdoshëm për paqen dhe stabilitetin në Kosovë dhe rajon".

Në komunikatë thuhet se bashkëpunimi me KFOR-in e NATO-n në ngritjen e kapaciteteve të FSK-së, është i shkëlqyeshëm.

"Çështjen e diskutuar në lidhje me pjesëmarrjen legjitime të Gardës së FSK-së në manifestimin e Epopesë së UÇK-së, tanimë e vlerësojmë të tejkaluar", thuhet në komunikatë.

Por, zëdhënësi i KFOR-it, Hans Peter Buh, pohoi se gjërat nuk janë siç kanë qenë para 5 marsit, kur edhe u paraqit Garda e FSK-së në ceremoninë për Epopenë e UÇK-së.

“Kjo është e vërtetë. Por, ne jemi duke biseduar dhe duke u përpjekur që ta zgjidhim çështjen”, tha Buh.

KFOR-i është në pritje të sqarimit nga ana e autoriteteve të Kosovës të, siç e ka quajtur, incidentit të së premtes. KFOR-i ka kërkuar veprime korrigjuese, si dhe garanci se veprime të tilla nuk do përsëriten.

Në prononcimet e mëhershme të ditës së sotme, zyrtarët e FSK-së kanë thënë se kjo forcë nuk ka shkaktuar asnjë incident. Zëdhënësi i FSK-së, Ibrahim Shala, u shpreh:

“Paraqitja e Gardës Ceremoniale në ceremoninë e Epopesë së UÇK-së nuk ishte incident, sepse pjesëmarrja e FSK-së ka qenë që në këshillin organizativ të ceremonisë. Kjo ceremoni kishte karakter shtetëror, sepse mbahej nën patronatin e kryeministrit dhe Qeverisë”.

“FSK-ja i është përmbajtur një agjende qeveritare. Kudo, në pritje të saj, Garda Ceremoniale shkon edhe me armët e veta. Në formacion të tillë ajo ka pritur shumë ministra, ka pritur presidentë dhe personalitete të larta ushtarake”, tha Shala.

Por, KFOR-i ka pohuar të kundërtën, ndërkaq ka kritikuar edhe praninë e flamurit të NATO-s gjatë ceremonisë, duke thënë se “kjo nuk është e pranueshme për atë se KFOR-i është neutral ndaj statusit”.

Vendimi për pezullimin e përkrahjes, mentorimit dhe trajnimit të Forcës së Sigurisë së Kosovës është marrë nga komandanti i KFOR-it. Nuk është saktësuar ndonjë afat pezullimi.

Partia opozitare, Aleanca për Ardhmërinë e Kosovës, i ka sugjeruar kryeministrit të Kosovës dhe ministrit të Forcës së Sigurisë së Kosovës të adresojnë kërkim-falje ndaj NATO-s për keqkuptimet e krijuara ditëve të fundit.

“AAK-ja kërkon nga liderët e institucioneve të vendit që të punojnë seriozisht në ruajtjen dhe zhvillimin e besimit me NATO-n, në ndërtimin dhe zhvillimin e vendit dhe popullit të Kosovës”, thuhet në një komunikatë për media të kësaj partie.

Në anën tjetër, eksperti për çështje ushtarake, Ramadan Qehaja, tha se udhëheqësit e vendit duhet sa më parë të ulen dhe të bisedojnë me komandantin e KFOR-it, apo edhe me vetë sekretarin e përgjithshëm të NATO-s për daljen nga kjo situatë.

“Ne, këtë situatë duhet ta tejkalojmë, duhet urgjentisht të ulemi me komandantin e KFOR-it - udhëheqja jonë, presidenti, kryeministri... Nëse ka nevojë, edhe me zotin Rasmusen të bëhet një bisedë dhe t’i shpjegojnë gjërat se si kanë ecur”.

“Ne nuk jemi të interesuar që t’i prishim marrëdhëniet me NATO-n assesi, sepse jemi të varur prej tyre dhe duhet të jemi falënderues për kontributin që kanë dhënë për formësimin e FSK-së”, theksoi Qehaja.

Plani i Ahtisarit, në bazë të të cilit është shpallur pavarësia e Kosovës, parasheh që NATO-ja të ketë autoritet ekzekutiv ndaj FSK-së, derisa ajo të arrijë kapacitetin e plotë operacional.
Radio Evropa e Lirë

ICO përkrah vendimin e KFOR-it për pezullimin e bashkëpunimit me FSK-në

Zyra Civile Ndërkombëtare në Prishtinë ka mbështetur vendimin e misionit paqëruajtës të NATO-s për pezullimin e përkohshëm të bashkëpunimit me Forcën e Sigurisë së Kosovës.

Ky vendim u mor pas paraqitjes së gardës së nderit të kësaj FSK-së, me pjesëtarë të armatosur, në një parakalim në qendër të Prishtinës në kuadër të manifestimit të 12 vjetorit të fillimit të luftës në Kosovë.

Zyra Civile Ndërkombëtare, autoriteti që mbikqyr zbatimin e marrëveshjes së statusit të Kosovës, nuk e ka komentuar paraqitjen e pjesëtarëve të armatosur të FSK-së në shënimin e asaj që njihet si “Epopeja e Ushtrisë Çlirimtare të Kosovës”.

Po ajo ka mbështetur hapat e ndërmarrë nga KFOR-i në raport me këtë forcë.

Ndërkaq, komandanti i forcave paqeruajtëse të NATO-s në Kosovë, Gjenerali Markus Bentler, e ka cilësuar paraqitjen me armë të FSK-së 'në shpërputhje' me statusin jo-ushtarak të saj.

KFOR-i ka reaguar edhe ndaj shpalosjes së flamurit të NATO-s në këtë ceremoni, për shkak të 'qëndrimit neutral' të Aleancës ndaj statusit të Kosovës.

Por qeveria e Kosovës, nën organizimin e së cilës është mbajtur ceremonia, ka thënë se pret t’i sqarojë sa më shpejt 'keqkuptimet' me ndërkombëtarët si dhe të normalizojë marrëdhëniet me KFOR-in.

Zëvendëskryeministri Hajredin Kuçi tha se nga Kosova nuk duhet të kërkohet që ajo të mos sillet si shtet sovran dhe demokratik.
Bota Sot

[Llapjani_HH]

Daçiq konteston, kurse Pajaziti dëshmon pjesëmarrjen e Kosovës në Konferencën e Tiranës

Ministri i Brendshëm i Kosovës ka mohuar fjalët e homologut të tij serb, i cili ka thënë se në konferencën në Tiranë Kosova ka marrë pjesë vetëm si mysafire.

Ministri i Brendshëm i Serbisë, Ivica Daçiq, ka theksuar të shtunën në Beograd se në Konferencën VII Ministrore mbi Bashkëpunimin në Fushën e Sigurisë së Kufijve në Evropën Juglindore ka qenë e përmbushur kërkesa e Beogradit që në konferencë të marrë pjesë përfaqësuesi i UNMIK-ut.

Sipas tij, në konkluzat e fundit të konferencës, Kosova nuk është nënshkruese fare, pasi që ka qenë vetëm mysafire.

"Kosova dhe Metohija nuk është pjesë e procesit që ka të bëjë me sigurinë kufitare në Evropën Juglindore dhe deri tash nuk ka marrë pjesë në asnjë konferencë në organizim të Qendrës zvicerane për kontroll demokratik të forcave të armatosura (DCAF).

Deri tash janë mbajtur shtatë konferenca të tilla dhe të gjitha në fushën e bashkëpunimit ndërkufitar në Evropën Juglindore”, ka theksuar në një njoftim të Ministrisë së Brendshme të Serbisë, transmeton agjencia e lajmeve Beta.

Ministri i Brendshëm i Kosovës, Zenun Pajaziti, ndërkaq, siç shkruan sot “Koha Ditore”, thotë se në konferencë Kosova ka marrë pjesë si shtet dhe pjesëmarrës i barabartë me shtetet e tjera.

“Kosova ka qenë e ftuar si shtet. Ne kemi qenë pjesëmarrës të barabartë në konferencën që ka pasur të bëjë me menaxhimin të integruar të kufijve”, ka theksuar të dielën Zenun Pajaziti.

“Unë e kam pasur minutazhin e njëjtë sikurse edhe pjesëmarrësit e tjerë. Ne kemi prezantuar si shtet qëndrimin tonë, ndërkaq aty ka qenë edhe flamuri i Kosovës, si shtet pjesëmarrës i konferencës. Këtë e dëshmon edhe fotoja e përbashkët e pjesëmarrësve, të cilës fatkeqësisht zoti Daçiq i iku.

Kjo nuk është konferencë e parë rajonale ku Kosova merr pjesë si shtet. Kanë qenë edhe disa të tilla e që organizohen nga BE-ja. Ne nuk do të merrnim pjesë as në këtë konferencë e as në ndonjë tjetër në rast se nuk do të ishim të ftuar si shtet”.

Në datat 4 dhe 5 mars është mbajtur në Tiranë, në hotelin “Sheraton”, Konferenca e shtatë Ministrore mbi Bashkëpunimin në Fushën e Sigurisë së Kufijve në Evropën Juglindore, e cila duhet të vazhdojë edhe sot. Kjo konferencë kryesohej nga ministri i Brendshëm i Shqipërisë, Lulzim Basha, si dhe nga bashkëkryetarët Ivica Daçiq, ministër i Brendshëm i Republikës së Serbisë dhe ambasadori dr.Theodhor H. Winkler, drejtor i DCAF-it (Qendra e Gjenevës për Kontroll Demokratik të Forcave të Armatosura).

Në Konferencë merrnin pjesë ministrat e brendshëm të Ballkanit Perëndimor, përfshirë edhe ministrin e Brendshëm të Republikës Kosovës, Zenun Pajaziti, si dhe përfaqësues të vendeve të Bashkimit Evropian.

Kjo konferencë kishte si synim rikonfirmimin e vullnetit të vendeve të rajonit, për të bashkëpunuar me njëri-tjetrin, në rritjen e sigurisë së kufijve të përbashkët, si edhe angazhimin maksimal të këtyre vendeve në përpjekjet për garantimin e lëvizjes së lirë dhe të sigurt të mallrave dhe njerëzve në këta kufij.

Ministri nga Serbia, Ivica Daçiq, i cili njëherësh ka qenë edhe bashkëkryesues i Konferencës, ka pranuar të ulej në të njëjtën tryezë me ministrin kosovar, por nuk ka pranuar që në fund të takimit të dalë në fotografinë e përbashkët të të gjithë ministrave e ku do të ishte edhe ministri kosovar, Zenun Pajaziti.

Serbi, njëherësh, ka lëshuar sallën, kur ka marrë fjalën ministri kosovar.

Organizatorët e takimit kanë bërë një kompromis, duke mos lejuar vënien e flamujve të shteteve pjesëmarrëse në tryezë.

Po ashtu, Daçiq ka dalë nga salla, në momentin kur ka mbajtur fjalën e tij ministri i Kosovës.

Në agjencinë e lajmeve Beta, Daçiq ka theksuar se deklaratën përfundimtare të konferencës në fushën e sigurisë kufitare e kanë nënshkruar vetëm Serbia, Bosnjë-Hercegovina, Maqedonia, Mali i Zi dhe Shqipëria, por jo edhe Kosova.

Ministri kosovar, Pajaziti, e konfirmon këtë, por thotë se kjo ka qenë deklaratë e punimeve të mëhershme.

“Ka pasur një deklaratë të përbashkët, e cila ka qenë e përgatitur në konferencën paraprake. Konferenca në Tiranë ka qenë e para pjesëmarrje e Kosovës, andaj nuk ka qenë e përfshirë në deklaratë, pasi që siç thashë deklarata ka qenë e përgatitur në konferencën paraprake.

Megjithatë, unë në fjalimin tim i kam dhënë mbështetje deklaratës. Ne do të jemi pjesëmarrës edhe në konferencën e radhës të karakterit të njëjtë”, ka theksuar të dielën ministri Pajaziti.

Daçiq për opinionin serb ka deklaruar se Kosova në konferencë ka marrë pjesë vetëm si mysafire.

“Shqipëria e ka respektuar kërkesën e Serbisë, sepse kusht për praninë tonë ka qenë prania e përfaqësuesit të UNMIK-ut, i cili në konferencën e Tiranës është ulur pranë ambasadorit të DCAF-së, Theodore Winkler”, thuhet në kumtesën e Ministrisë së Brendshme të Serbisë.

Si përfaqësues i UNMIK-ut në Tiranë ka qenë Anto Laho.

Kjo është konfirmuar edhe nga Zyra e OKB-së në Kosovë.

Zëdhënësi i misionit të OKB-së në Kosovë, Russell Geekie, ka thënë se UNMIK-u ka marrë pjesë me ftesë të organizatorit.

“Ne kemi qenë të ftuar nga organizatori dhe përfaqësuesi ynë ka qenë prezent atje”, ka thënë Geekie.

Pjesëmarrja e Kosovës në konferencat ndërkombëtare është diskutuar shumë nga Serbia. Sipas qëndrimit serb, Kosova mund të paraqitet në konferencat rajonale vetëm në “përputhje me Rezolutën 1244 të Këshillit të Sigurimit të OKB-së” dhe jo si shtet i pavarur.

Kosova, ndërkaq, refuzon të marrë pjesë në konferenca rajonale pa qenë e barabartë me shtetet e tjera.

Një çështje e tillë është shfaqur në konferencën rajonale që do të mbahet në Bërdo të Sllovenisë, më 20 mars. Presidenti i Serbisë është takuar gjatë javës me organizatorët e konferencës, kryeministrat e Sllovenisë dhe të Kroacisë për ta shqyrtuar pjesëmarrjen e Serbisë dhe të Kosovës.

Ministri i Jashtëm i Sllovenisë ka deklaruar se kompromisi i ofruar është që shtetet të paraqiten pa flamur dhe emrat e shteteve të veta, por vetëm me emrat e përfaqësuesve të tyre. Presidenti i Serbisë ka theksuar se ky kompromis nuk është i pranueshëm.
Koha.net

Shkarkohet pse arrestoi policin vrasës të shqiptarit?

Kryeshefi i Drejtporisë së policisë në Vrajë, Stole Filipoviq është shkarkuar sot nga detyra, transmetoi sonte edicioni on line i gazetës “Blic”, komunikatën e MPB-së së Serbisë. Sipas kësaj komunikate, shkarkimi i kryepolicit të Vrajës është bërë pas konstatimeve të kontrollit inspektues të MPB-së. “Mbi bazë të konstatimeve të kontrollit është vlerësuar se rezultatet nuk kanë qenë në nivelin e pritur”.

Filipoviqi në detyrën e kryeshefit ka qenë nga viti 2005.
Mediet beogradase më herët kanë shkruar se Filipoviqi është shkarkuar 24 orë pas arrestimit të policit të kësaj drejtorie Zoran Memaroviq nga Presheva, i dyshuar për vrasjen e shtetasit të Maqedonisë, Mahir Jakupit nga Gostivari.
Jakupi është vrarë mç 3 mars, në shiritin ndalës të rrugës magjistrale Nish – Shkup te fshati Zhunicë.
Koha.net

[Llapjani_HH]

NATO: Veprimet e FSK-së, sinjale të gabuara

KFOR-i ka marrë mbështetjen e diplomatëve të NATO-s në Bruksel lidhur me mosmarrëveshjen me FSK-në. Vendimi i komandantit të KFOR-it për pezullimin e raporteve me FSK-në ka qenë plotësisht i bazuar, pasi “veprime të tilla si të FSK-së dërgojnë sinjale të gabuara”, tha zëdhënësi i Aleancës, James Appathurai.

Edhe diplomatë të Aleancës e kanë cilësuar të gabuar parakalimin e trupave të Forcës së Sigurisë së Kosovës me armë dhe me flamur të NATO-s në manifestimin “Epopeja e UÇK-së”.

Të njëjtat burime pohojnë se FSK-ja nuk duhet të shihet si ushtri, pasi ajo është menduar si forcë civile e sigurisë, me përbërje shumetnike dhe e trajnuar nga vendet anëtare të NATO-s.

Edhe Zyra Civile Ndërkombëtare në Prishtinë ka mbështetur vendimin e misionit paqeruajtës të NATO-s për pezullimin e përkohshëm të bashkëpunimit me Forcën e Sigurisë së Kosovës.

Por qeveria e Kosovës, nën organizimin e së cilës është mbajtur ceremonia, ka thënë se pret t’i sqarojë sa më shpejt “keqkuptimet” me ndërkombëtarët si dhe të normalizojë marrëdhëniet me KFOR-in.

Ndërkaq, Ministria e Forcës së Sigurisë së Kosovës, nëpërmjet një komunikate për media, të hënën ka bërë të ditur se çmon bashkëpunimin me KFOR-in dhe NATO-n si të domosdoshëm për paqen dhe stabilitetin në Kosovë dhe rajon – ndërsa çështjen e diskutuar në lidhje me pjesëmarrjen legjitime të Gardës së FSK-së në manifestimin e Epopesë së UÇK-së, MFSK e vlerëson ”të tejkaluar”. Telegrafi

Feith flet për pushtetarët e korruptuar, reagojnë Kuçi e Krasniqi

“Z.Feith është udhëheqës zyrtar më i larët ndërkombëtar me përgjegjësi më të shumta politike se në fushën e drejtësisë, prandaj ndoshta ka informacione që ne nuk i kemi”, tha kreykuvendari Krasniqi

Deklarata e shefit të ICO-së Pieter Feith, se Kosova nuk mund t’i afrohet Bashkimit Evropian pa luftuar dhe pa zhdukur të keqen e krimit të organizuar dhe korrupsionit dhe se njerëzit e apostrofuar apo që janë nën hetime për korrupsion, të mos jenë pjesë e strukturave të pushtetit, i ka “trazuar” pushtetarët në Kosovë. Ndaj kësaj deklarate kanë reaguar kryetari i kuvendit Jakup Krasniqi dhe zëvendëskryeministri Hajredin Kuqi.

Kryetari i Kuvendit Jakup Krasniqi, tha se ndoshta shefi i ICO-së ka informacione që institucionet e Kosovës nuk i kanë. Ndërsa sa i përket nivelit të përgjithshëm të korrupsionit në institucione, ai tha se këtë e përcakton sistemi i drejtësisë. “Ai sigurisht ka informacion me shumë sepse ai është udhëheqës zyrtar gati më i lartë ndërkombëtar me përgjegjësi ndoshta më shumë politike se në fushën e drejtësisë. Megjithatë ndoshta ka informacione që ne nuk i kemi. Unë nuk jam ai që përcaktoj të korruptuarit, është sistemi i drejtësisë dhe sistemi gjyqësor që përcaktojnë nivelin e korrupsionit”, tha Krasniqi.

Ndërsa, zëvendëskryeministri Hajredin Kuqi, tha se nuk merret me deklaratat e të tjerëve por, sipas tij çdo deklaratë merret seriozisht nga Qeveria e Kosovës dhe se Qeveria është e interesuar që t’i luftojë të gjitha dukuritë negative në vend. “Unë zakonisht nuk i komentoj deklarata e tjerëve, por ajo çka dua të them është se Qeveria është e interesuar për të luftuar korrupsionin, krimin e organizuar dhe dukuritë tjera negative. Ne i marrim seriozisht çdo deklaratë për këto çështje”, tha Kuqi. I pyetur se kush janë emrat e personave të korruptuar brenda qeverisë, ai tha se për këtë duhet pyetur atë që kanë deklaruar, duke aluduar në shefin e ICO-së. “Unë nuk e di një përgjigje të tillë, ndoshta ai që e ka thënë mund ta jap, atëherë mund ta pyetni atë”, u shpreh Kuqi.

Ndërsa, sa i përket shkuarjes se kryeministrit Thaçi në konferencën që do të mbahet në Brdo të Sllovenisë, ai tha se kjo çështje është duke u shqyrtuar dhe akoma nuk ka një vendim, sepse duhet që të qartësohen edhe disa gjera. Këto deklarata Kuqi i bëri pas takimit me disa studentë të vendeve që nuk e kanë njohur pavarësinë e Kosovës. Ai tha se i ka njoftuar këta studentë me zhvillimet në Kosovë para dhe pas pavarësisë. “Në emër të Qeverisë së Kosovës i shpreha qëndrimet tona për zhvillimet tona që kanë qenë më herët dhe pas pavarësimit të vendit dhe synimet e vendit që të jemi pjesë e botës së moderuar.

Unë besoj se me qëndrimin e tyre në Kosovë do të fitojnë pasqyrën e tyre të drejtë për zhvillimet në Kosovë dhe për nevojën që Kosova të fitojë njohje edhe nga vendet nga vijnë këta persona edhe pse nuk janë përfaqësues të qeverive të tyre por me siguri e kanë ndikimin në shtete e tyre”, theksoi Kuqi.
Bota Sot

Pjesëmarrja e Kosovës në Samitin e Bërdos ende problem i pazgjidhur

Kryeministri i Sllovenisë, Borut Pahor, ka vizituar pasditen e së hënës Prishtinën, për të takuar homologun e tij kosovar, Hashim Thaçi. Por, dy kryeministrat nuk kanë mundur që të konfirmojnë se a është zgjidhur problemi i mënyrës së pjesëmarrjes së Kosovës në samitin e krerëve të shteteve të Evropës Juglindore, që do të mbahet më 20 mars.

Përderisa autoritetet e Republikës së Serbisë kanë kushtëzuar pjesëmarrjen e tyre edhe në këtë samit, me mosprezantimin e Kosovës si shtet të dy kryeministrat, Pahor e Thaçi, kanë ritheksuar rëndësinë e samitit, ndërkaq kanë thënë se “problemet teknike” të pjesëmarrjes janë duke u shqyrtuar.

Pahor, i cili ka qëndruar në Prishtinë pas takimit që javën e kaluar ka zhvilluar me presidentin e Serbisë, Boris Tadiq, dhe me kryeministren e Kroacisë, Jadranka Kosor, ka lënë të kuptohet se problemi është tek mënyra e paraqitjes së Kosovës në një deklaratë të përbashkët, që shtetet pjesëmarrëse të samitit duhet ta bëjnë në fund të konferencës.

“Ne po mundohemi ta zgjidhim këtë problem. Unë dua të kem atje presidentin Tadiq dhe kryeministrin Thaçi. Nuk është ky problemi i vetëm që e kemi. Ne në fund të ditës duam që të miratojmë një deklaratë të përbashkët për perspektivën evropiane të Ballkanit Perëndimor, andaj duhet ta mendoni se çfarë pune duhet ta bëjnë këshilltarët tanë dhe ne si liderë që të arrijmë suksesin e kësaj konference”, ka thënë Pahor.

Sipas tij, përpjekjet e Sllovenisë dhe të Kroacisë si bashkorganizatore të kësaj konference kanë të bëjnë me pjesëmarrjen e të gjithë liderëve të rajonit.
“Të jem i sinqertë me ju. Nuk mund të them në këtë moment se të gjitha problemet për suksesin e konferencës janë zgjidhur. Por ne po mundohemi dhe jemi në një pozitë të mirë që t`i zgjidhim problemet në javët e ardhshme.

E rëndësishme është se ne si liderë duhet të kemi besim të ndërsjellë se po veprojmë për të mirën e popujve tanë. Ne jemi liderë të përgjegjshëm. Jam shumë i lumtur se i kemi zgjidhur gati të gjitha problemet. Por problemi i simboleve dhe i emrave dhe i gjërave të tilla, nuk është i vetmi që e kemi. Problemi tjetër është se ne sapo kemi filluar të diskutojmë përmbajtjen e deklaratës”, ka shpjeguar Pahor.

Edhe kryeministri Thaçi, në prononcimin e tij, është përkujdesur që në pjesën ku ka folur për marrëdhëniet ndërfqinjësore, të përmendë rëndësinë e lidershipit të mirë dhe orientimit kah e ardhmja. Pasi ka vlerësuar se Kosova ka “ndërtuar raporte të shkëlqyeshme” me Maqedoninë, Shqipërinë, dhe me Malin e Zi, Thaçi ka thënë se Kosova ka vullnet për raporte të mira edhe me Serbinë.

“Duam dhe kemi vullnet si Kosovë që të punojmë për fqinjësi të mirë edhe me Serbinë, që të kemi bashkëpunim rajonal dhe të interesave të përbashkëta për popujt tanë. Në të njëjtën kohë ne si liderë të vendit duhet që para së gjithash të shikojmë nga e ardhmja, dhe nga vlerat që na ofrojnë, na bashkojnë dhe na krijojnë mundësi për zhvillimin ekonomik dhe perspektivë evropiane. Andaj edhe përkushtimi i kryeministrit Pahor ka qenë gjithmonë për paqe dhe stabilitet”, ka thënë Thaçi.

Megjithatë, kryeministri kosovar nuk e ka sqaruar nëse ka paraqitur ndonjë pozicion të prerë të Kosovës lidhur me pjesëmarrjen e Kosovës në Bërdo si shtet i barabartë.

“Qeveria e institucionet e Kosovës do të jenë në krye të përgjegjësive që dalin edhe me Kushtetutën, ligjet dhe dokumentin e presidentit Ahtisaari dhe angazhimet tona të mëtutjeshme. Pra, ne do të jemi prezentë në angazhimet tona për bashkëpunim rajonal, por edhe për perspektivë evropiane e euroatlantike”, ka thënë Thaçi, duke shtuar se e çmon rëndësinë e konferencës në Kranj, ndaj së cilës, siç ka thënë Thaçi, Kosova do të jetë e përgjegjshme.

Të dy kryeministrat janë përkujdesur që gjatë paraqitjes për media të përdorin terma miqësorë, t`i drejtohen me emër njëri-tjetrit dhe ritheksojnë rëndësinë e lidershipit, mirëpo asnjëri nga ta nuk ka pranuar pyetje nga gazetarët, me arsyetimin e “mungesës së kohës”.

Të dy kryeministrat kanë vlerësuar se marrëdhëniet mes Kosovës dhe Sllovenisë janë shumë të mira, ndërkaq kanë ritheksuar përkushtimin për bashkëpunim edhe më të ngushtë.

Për shkak të kushtëzimit nga Serbia që Kosova të mos paraqitet si shtet, organizatorët e samitit, që do të mbahet në Bërdo afër Kranjit në Slloveni, kanë vendosur para disa ditësh që të mos ketë simbole dhe shtetet pjesëmarrëse të prezantohen vetëm me emrat e kryeministrave.
Koha.net

[Llapjani_HH]

Në Slloveni, vetëm si shtet

Kosova, ose do të përfaqësohet si shtet, ose nuk do të shkojë fare në konferencën rajonale të liderëve të Ballkanit Perëndimor, thonë zyrtarët në Prishtinë. Sipas tyre, i takon Sllovenisë që t’i tejkalojë mosmarrëveshjet me Serbinë.

Kosova duhet dhe do të përfaqësohet si shtet në konferencën e liderëve të rajonit, që pritet të mbahet më 20 mars, në Bërdo afër Kranjit, thonë zyrtarët në Prishtinë.

Sipas tyre, i takon organizatorit, në këtë rast Sllovenisë, që t’i tejkalojë mosmarrëveshjet me Serbinë, pas kundërshtimeve të këtij vendi lidhur me praninë e Kosovës si shtet i barabartë i rajonit në këtë konferencë.

Zëdhënësi i Qeverisë, Memli Krasniqi, thotë se nuk mund t’u shtojë shumë deklaratave që një ditë më herët i ka paraqitur kryeministri i Kosovës dhe ai i Sllovenisë, se diplomacia vazhdon në zgjidhjen e problemeve rreth organizimit të konferencës rajonale.

Por, sidoqoftë, ai thotë se Kosova do të jetë atje vetëm si shtet i barabartë me vendet tjera.

“Qeveria e Kosovës ka qenë shumë e qartë në deklarimet e mëhershme, si edhe kryeministri personalisht, dhe në çdo rast Kosova do të përfaqësohet si shtet”, thekson Krasniqi.

Ndërkohë, opozita dhe analistët inkurajojnë institucionet, në këtë rast Qeverinë, që përfaqësimi i Kosovës jashtë të jetë i karakterit dhe nivelit të barabartë me të gjitha vendet tjera.

Avni Arifi, anëtar i Kryesisë së Aleancës për Ardhmërinë e Kosovës, thotë se që nga shpallja e pavarësisë e këndej, Kosova nuk ka pse të hezitojë lidhur me përfaqësimin e saj.

Ajo është shtet i pavarur dhe si e tillë duhet të përfaqësohet në çdo takim, thekson Arifi.

“Kosova e ka shpallur pavarësinë e saj. Kosova nuk ka vetëm liderë politikë, por ka institucione. Shtetet që e ftojnë Kosovën, duhet ta dinë se duhet të ftojnë kryetarin e shtetit apo kryeministrin e Kosovës”.

“Të gjitha teknikat që janë përdorur për ta evituar këtë titull, duhet të perëndojnë, apo, në të kundërtën, Kosova duhet të mos marrë pjesë fare në konferenca të tilla”, thotë Arifi.

Arifi thotë se, pavarësisht kundërshtimeve të Serbisë, Kosova nuk duhet të shërbejë për ndryshimin e agjendave të konferencave rajonale.

Ndërkaq, analisti Ramush Tahiri thotë se i takon Sllovenisë që t’i zgjidhë problemet organizative. Në të kundërtën, nëse Kosova do të prezantohej ndryshe nga vendet tjera, Tahiri beson se ndoshta kjo do t’ia pamundësonte asaj pjesëmarrjen në këtë konferencë.

“Kosova do të përfaqësohet si shtet. Serbia dëshiron që Kosova të jetë në kuadër të delegacionit të UNMIK-ut, mirëpo UNMIK-u nuk ka ingerenca. Kosova mund të mos shkojë fare dhe Bashkimi Evropian, apo në këtë rast Sllovenia, do të ishte e interesuar për Serbinë dhe mundet që në këtë fazë të shkojë vetëm Serbia”, thekson Tahiri.

Gjatë një vizite të shkurtër në Kosovë, kryeministri slloven, Borut Pahor, ka deklaruar se ende nuk janë tejkaluar problemet në lidhje me këtë konferencë, ku ai ka veçuar si problematike çështjen e përdorimit të emrave të shteteve, sidomos të Kosovës, pas kundërshtimeve të Serbisë, përdorimit të simboleve shtetërore dhe miratimit të një deklarate të përbashkët, e cila do të tregonte orientimin pro-evropian të Ballkanit Perëndimor.

Konferenca në Bërdo afër Kranjit, sipas organizatorit, ka për qëllim të tregojë perspektivën evropiane të këtij rajoni dhe zotimin e liderëve se do të bashkëpunojnë në të mirën dhe mbarëvajtjen e këtij procesi.
Radio Evropa e Lirë