Lajme Aktuale....

Serbia nën presion; Kosova, kusht për BE!?


03-09-2011 11:11 CET


Shpërthimi i dhunës në veri të Kosovës në fund të korrikut ishte më i rëndi në disa vjet. Ai la një polic të vrarë dhe shumë civilë të plagosur. Kancelarja gjermane, Angela Merkel, u përgjigj ndaj përleshjeve duke thënë se Bashkimi Evropian besonte se ngjarje të tilla i përkisnin të kaluarës.
Disa javë më vonë, Merkel e shtoi edhe më shumë presionin, duke i bërë thirrje Beogradit të suprimojë institucionet e tij në veriun e Kosovës dhe të lejonte EULEX-in të vepronte lirisht atje. Ajo ia vuri këto si kushte Serbisë për anëtarësimin në Bashkimin Evropian.
Kjo ishte hera e parë që shumica e serbëve i dëgjonin këto kushte. Kjo deklaratë e Kancelares Merkel pas dhënës së kohëve të fundit dhe pasi Seribia transferoi në Hagë dy të dyshuar për krime lufte, mundësia e mosmiratimit të kandidaturës së Serbisë për në Bashkimin Evropian i kapi njerëzit në befazi.
Serbia ka punuar prej shumë vitesh që të hyjë në Bashkimin Evropian dhe Komisioni Evropian do të paraqesë rekomandimet e tij në muajin tetor. Maja Bobiq është kryetare e Lëvizjes Evropiane në Serbi, e cila promovon vlerat demokratike dhe integrimin në BE.
"Ndoshta ishte vetëm çështje kohe, pasi ne kishim dëgjuar në shumë raste gjatë gjithë vitit se pas plotësimit të kushteve më të rëndësishme, si bashkëpunimi me Gjykatën e Hagës dhe natyrisht vazhdimi i reformave të brendshme, statusi i kandidatit ishte diçka pothuajse e garantuar. Kjo ishte diçka që ne e kishim dëgjuar edhe nga zyrtarët evropianë. Ishte marrë si i mirëqenë statusi i kandidatit, si diçka që Serbia do ta kishte këtë vit”, ka thënë ajo për VOA.
Presidenti Boris Tadiq tha se Beogradi nuk do t’i suprimojë institucionet e tij në veriun e Kosovës. Ai tha se Serbia është e hapur ndaj misionit të Bashkimit Evropian në gjithë territorin dhe se ka mjaft vend për kompromis. Por ai pranoi gjithashtu për herë të parë se ekziston mundësia që Serbia të mos e fitojë statusin e kandidatit në Bashkimin Evropian këtë vit.
Udhëheqës të tjerë serbë bënë deklarata të ngjashme.
Ministri për Kosovën, Goran Bogdanoviq, i ka thënë medieve serbe se Serbia do t’i mbajë institucionet e saj në veriun e Kosovës, edhe në qoftë se kjo bëhet shkak për “bllokimin e rrugës së saj për në Bashkimin Evropian”.
Në Kombet e Bashkuara, ministri i Jashtëm i Serbisë, Vuk Jeremiq, i bëri thirrje komunitetit ndërkombëtar të dënonte Kosovën për shkallëzimin e dhunës. Ai iu përmbajt pretendimit nacionalist serb për Kosovën.
"Dua të theksoj edhe një herë qëndrimin e qeverisë time ndaj përpjekjes së Prishtinës për shkëputjen e njëanshme nga Serbia. Ne nuk e njohim dhe nuk do ta njohim atë as hapur dhe as tërthorazi. Ky është mandati i vullnetit demokratik të popullit tonë, i mishëruar në kushtetutën tonë”, kishte theksuar Jeremiq.
Udhëheqësit serbë e kanë të qartë se Beogradit nuk i kërkohet të njohë zyrtarisht pavarësinë e Kosovës, por të normalizojë marrëdhëniet me të. Por shumë i shikojnë këto kërkesa si njohje de-facto, diçka që politikanët serbë besojnë se zgjedhurit e tyre nuk do ta pranonin kurrë.
Boshko Jakshiq, analist i gazetës serbe “Politika”, thotë se Serbia e ka humbur tashmë Kosovën. Ai thotë se politikanët serbë kanë frikë se po të tradhtojnë bazën e tyre nacionaliste do t’u kushtojë në zgjedhjet e ardhshme.
“Shumica e serbëve po e kuptojnë se Kosova nuk është më Serbi dhe për mendimin tim politikanët nuk janë budallenj që të mos e kuptojnë këtë. Unë do t’u thosha atyre t’i drejtohen vendit, duke i thënë se ne kemi mbështetjen tuaj që Serbia të hyjë në Bashkimin Evropian dhe ne do ta bëjmë këtë. Çmimi për këtë është normalizimi i marrëdhënieve me Kosovën”, ka thënë Jakshiq, raporton VOA.
Kancelarja Merkel ishte të martën në Slloveni, ku gazetarët thanë se ajo e kishte zbutur qëndrimin e saj, duke thënë se në Kosovë mund të ndiqet një praktikë graduale.
Por anëtarja e Parlamentit Evropian, Doris Pack, i tha Zërit të Amerikës këtë javë se Bashkimi Evropian nuk mund të pranojë një vend në konflikt me fqinjin e tij.
Beogradi duhet patjetër të demonstrojë se është serioz rreth avancimit në negociatat me Kosovën. “Ne duam prova që ata janë të predispozuar”, tha ajo. /voa/

[Zero Cool]

Tensione në shkollën “Vëllazërimi”





Në shkollën fillore “Vëllazërimi”, në komunën Karposh të Shkupit, po vazhdojnë mosmarrëveshjet midis prindërve shqiptarë dhe drejtorisë së shkollës e cila është e vendosur të mos hap paralele shtesë për nxënësit shqiptarë.


Problemit i janë shtuar edhe prindërit maqedonas të cilët dje kanë protestuar para shkollës me kërkesat që të mos hapen paralelet e tilla, me arsyetim të “mungesës së kushteve për më shumë fëmijë”.

Komuna e Karposhit, që drejtohet nga Stevce Jakimovski i partisë opozitare LSDM, është kundër hapjes së paraleles, meqë “nxënësit shqiptarë vijnë nga komunat tjera”.

Pavarësisht këtij vendimi, prindërit shqiptarë theksojnë se do të realizojnë të drejtën e tyre. Ata kanë nisur protestat para shkollës, të përkrahur edhe nga prindërit dhe nxënësit shqiptarë që i takojnë komunës Karposh.

Ministri i Arsimit, Pance Kralev dhe zëvendësministri Safet Neziri, janë përfshirë në gjetjen e zgjidhjes duke kërkuar rekomandimet e Inspektoratit Shtetëror të Arsimit, transmeton “Ina”.

Neziri ka biseduar me kreun e komunës dhe drejtoren e shkollës, duke kërkuar që të zgjidhin problemin pa krijuar tensione të panevojshme.

Vatikani: Nuk e njohim Kosovën

Përgënjështrohen mediat kosovare; Vatikani nuk ka ndërmend ta njohë pavarësinë e Kosovës.

E marte 6 Shtator 2011 10:13

Drejtori i Qendrës për Informim të Vatikanit, Ati Frederiko Lombardi, në një bisedë telefonike me agjencinë serbe të lajmeve Tanjug, ka theksuar shprehimisht se Vatikani nuk ka ndryshuar qëndrim rreth pavarësisë së Kosovës.
“Nuk ka asnjë ndryshim në qëndrimin e Selisë së Shenjtë për Kosovën”, ka deklaruar Lombardi, duke përgënjeshtruar një pjesë të mediave kosovare që transmetuan deklaratën e apostullit për Kosovën dhe Slloveninë në Selinë e Shenjtë, Julius Janis.
Ky i fundit gjatë disa meshave në Kosovë, paralajmëroi se Vatikani së shpejti do ta njohë pavarësinë e Kosovës dhe se lajmet e mira do të vijnë nga Vatikani. /Start/

[Kercovari]

Flamuri Kombetare te ngrehet ne maje te shtizes mbase kjo ishte nje loje e Telegatit te papas..Nuk prishet Vatikani per 50 mij te krishter katolike me "djepin e serbizmit"hahahaahahah!

[Zero Cool]

Marrëveshjet e arritura konfirmojnë perspektivën evropiane





Marrëveshjet e arritura në Bruksel, të premten në mbrëmje, ndërmjet Kosovës dhe Serbisë, do t’u mundësojnë dy shteteve të vazhdojnë rrugën kah integrimet evropiane, ka deklaruar shefja e delegacionit kosovar në bisedimet teknike në mes të Prishtinës dhe Beogradit, Edita Tahiri.


“Marrëveshja me anë të cilës Serbia njeh vulat doganore të Kosovës, do të kontribuojnë për fqinjësi të mirë në mes të dy shteteve dhe për stabilitetin rajonal; dy prej shumë kushteve të parashtruara nga Bashkimi Evropian, për një anëtarësim të ardhshëm”, tha zëvendëskryeministrja Tahiri për agjencinë e lajmeve belge, Belga Press.

“Kjo marrëveshje e negociuar me ndërmjetësimin e Bashkimit Evropian, gjithashtu i ka dhënë fund tri viteve të embargos së Serbisë, ndaj prodhimeve kosovare, si dhe dy muajve të embargos së Kosovës, ndaj prodhimeve të Serbisë. Po ashtu, kjo marrëveshje hap perspektivën për zhvillimin e tregtisë në mes të Prishtinës dhe Beogradit, perspektivë kjo që do të ketë efekte pozitive për ekonominë e dy shteteve, si dhe për bashkëpunimin rajonal në tërësi”, ka theksuar ajo.

[Zero Cool]

Suedi, aktakuzë kundër një serbi për krime në Kosovë






Prokurorët e Suedisë e kanë ngritur aktakuzën kundër serbit 34 vjeçar, Milic Martinovic, për krime lufte lidhur me rolin e tij në masakrën në fshatin Qyshk në Kosovë, në vitin 1999, me ç’rast u vranë 40 civilë.
I pandehuri, që ishte arrestuar në Stokholm, në prill të vitit 2010, sipas prokurorisë akuzohet për “krime të rënda kundër njerëzimit, vrasje, përpjekje për vrasje, vjedhje të rëndë dhe zjarrvënie të rëndë”, lidhur me masakrën në Qyshk.

“Jam i sigurt se ai do të dënohet lidhur me këtë rast”, tha prokurori Lars Hedvall në Radion Publike të Suedisë. Procesi gjyqësor kundër tij do të filloj të hënën e ardhshme.

Milic Martinovic ishte anëtar i forcave speciale policore të Serbisë, që kishin hyrë në Qyshk më 14 maj të vitit 1999. I armatosur dhe me uniformë, ai ishte në mesin e ushtarëve, që e kishin zënë një numër të madh të njerëzve, i kishin vrarë 31 prej 40 civilëve shqiptarë, të vrarë atë ditë atje, ishte përpjekur për t’i vrarë tre të tjerë, kishte djegur shtëpi, vjedhur dhe keqtrajtuar civilët.

Sigurimi serb, ruan edhe ministrat shqiptarë


06-09-2011 23:57 CET



Aleksandar Avramov (36), i quajtur Avram, nga Beogradi është kryesues i grupit “Kobra” nga Serbia që dyshohet se ruajnë edhe sigurinë e dy ministrave të Qeverisë Shqiptare.
Ky grup i sigurimeve private thuhet se kanë edhe shumë sigurime në vende të ndryshme të rajonit dhe nëpër botë të cilët punojnë nën kontrollin e “Kobrave”. Gazetat serbe nuk kanë mundur të zbulojnë emrin e ministrave shqiptar, por sipas tyre, ekzistojnë disa grupe të sigurimeve private që bashkëpunojnë dhe punojnë në mënyrë të drejtpërdrejt për kompaninë “Kobra”.
Avramov ka qenë i njohur si një nga truprojat e Lubisha Buha i njohur me emrin Cume, një dëshmitar i mbrojtur i rastit të vrasjes së kryeministrit serb Zoran Gjingjic, i cili kishte dëshmuar rreth vrasjes së tij.
Gazeta beogradase “Alo”, ka shkruar në disa vazhdime lidhur me këtë grup duke thënë se grupi është themeluar gjatë një takimi të mbajtur në një hotel të Shkupit ku kanë marrë pjesë rreth 40 shefa të ndryshëm të sigurimeve private të rajonit nga Serbia, Maqedonia, Mali i Zi, Greqia, Italia, Bullgaria, Hungaria, Kroacia, Bosnja, Sllovenia dhe Shqipëria. Avramov është zgjedhur si udhëheqësi i tyre.
Qëllimi i tyre është të monopolizojnë tregun dhe në të gjitha vendet të mundësojnë lëvizjen dhe sigurimin e personaliteteve të ndryshme duke u lidhur me sigurimet tjera nën to. Ndërkaq ideja ka ardhur nga një biznesmen nga Sicilia.
Avramov njihet edhe si njeriu që jep sugjerime dhe leje për ruajtjen e lokaleve me rëndësi të natës dhe diskotekave të ndryshme nëpër Beograd dhe njihet si person që merret edhe me kontrollimin e tregut të informatave dhe kur ai jep leje për sigurimin e një objekti të rrallë janë ata që mund të krijojnë problem.
Cume i njohur si një nga njerëzit e fortë të viteve ’90 ka pasur shumë truproja, disa nga të cilët janë vrarë më pas, ndërkaq një prej tyre ka qenë po ashtu dëshmitar i mbrojtur në procesin gjyqësor të vrasjes së Gjingjiq.
Kobrat tashmë janë të regjistruara si rrjet evropian i sigurimit. Ndërkaq, sipas gazetës “Alo”, ata tashmë ruajnë mjaft personalitete edhe nëpër botë dhe në lëvizje në vende të ndryshme te Evropës.
Pjesëtarët e kësaj kompanie thuhet se ruajnë edhe Daniel Radklif, aktorin kryesor të filmit “Harry Poter”, dhe regjisorin e “Titanikut” dhe “Avatarit”, James Cameron, por edhe një nga udhëheqësit e Dubait, sheikun Mohamed bin Rashid, që është një nga njerëzit më të pasur të botës.
Ky grup ruan edhe klubin futbollistik Manchester City, kurse një nga klientët e tyre është edhe i biri i princit të Kuvajtit që kontrollon naftën. /bw/

[Zero Cool]

PE përshëndet kthimin e opozitës shqiptare në parlament







Vendimi i opozitës shqiptare për t’u rikthyer dhe marrë pjesë tërësisht në punimet e Kuvendit për të votuar ligjet më të rëndësishme që kërkojnë 3/5 e votave është përshëndetur nga të gjitha grupimet politike në Parlamentin Europian, madje kjo gjë do të diskutohet edhe midis komisionerit Füle dhe eurodeputetëve javën e ardhshme në Strasburg.


Eurodeputetja Doris Pack tha se opozita socialiste ka qenë në parlament, por tani ka premtuar që do të punojë për integrimin europian të vendit. "Ky është një lajm i mirë dhe shpresoj se ata do të mbajnë premtimin e dhënë. Integrimi i shërben interesit të qytetarëve shqiptarë, ndaj ne kemi thënë dhe vitin e shkuar që qeveria dhe opozita të punojnë seriozisht për këtë", tha ajo.

Zonja Pack shtoi se nëse opozita fillon të bashkëpunojë tani, kjo tregon reflektim dhe është gjë e mirë. "Nëse ata nuk do të fillonin tani, atëherë do të ishte një marrëzi, por ata nuk janë të marrë. Ata e kanë kuptuar që nëse duan të mbështeten nga Bashkimi Europian dhe Komuniteti Ndërkombëtar, ata duhet të kryejnë detyrën për të cilën janë zgjedhur nga votuesit shqiptarë. Për mua është një fillim i ri, ndoshta një epokë e re dhe të dyja palët duhet të fillojnë tani të zbatojnë agjendën europiane", theksoi ajo.

Ndërsa eurodeputetja Tanja Fajon tha sefakti që opozita shqiptare është në parlament është një nga lajmet më të mira që kai marrë nga Shqipëria gjatë muajve të fundit. "Është një hap shumë pozitiv për rivendosjen e dialogut në Parlamentin shqiptar.Të gjitha palët duhet të angazhohen për një dialog konstruktiv për të ardhmen e Shqipërisë. Është shumë e nevojshme që Shqipëria të vazhdojë përafrimin në Bashkimin Europian përmes një dialogu të shëndoshë dhe të vazhdueshëm. Ky është një hap shumë pozitiv. E mirëpres dhe është i rëndësishëm për të gjithë qytetarët shqiptarë", theksoi Fajon, cituar nga Klan.

[Zero Cool]

Maqedonia 20 vjet shtet: Partitë shqiptare bojkotojnë festën?





Më 8 shtator 1991, maqedonasit votuan me referendum për pavarësinë, por njohja nga shtetet perëndimore zgjati me vite. Rruga e shtetit të ri drejt integrimit evropian nuk është e lehtë. Ndërsa, konflikti me Greqinë për emrin e pengon ende këtë shtet.
Në vitin 1993, Maqedonia u bë anëtare me të drejta të plota në Kombet e Bashkuara, por nën emrin FYROM (IRJM - ish-Republika Jugosllave e Maqedonisë) për shkak të pretendimit të Greqisë ndaj emrit zyrtar të Republikës së Maqedonisë.
Maqedonia vuajti pasojat ekonomike të luftës në pjesë të tëra të ish-Jugosllavisë, embargon kundër Serbisë, por edhe atë që vendosi Greqia kundër saj.

Gjatë luftës së Kosovës në vitin 1999, viset shqiptare të vendit u bënë strehë për gati 300.000 të deportuar nga Kosova. Ndërsa, në vitin 2001, vetë Maqedonia ishte në pragun e një lufte civile.

Pas zgjidhjes së konfliktit, u shënuan hapa në drejtim të integrimit. Në vitin 2005, Maqedonia mori statusin e vendit kandidat për në Bashkimin Evropian, por ende nuk është përcaktuar data për fillimin e negociatave të anëtarësimit. Nga viti 2008 Maqedonia konsiderohet e aftë për t'u anëtarësuar në NATO, megjithatë kjo aspiratë ende nuk është bërë realitet, raporton “DW”.

Dy probleme themelore ka përballur Maqedonia në këto vite: konflikti i emrit me Greqinë dhe marrëdhëniet ndëretnike në një shtet multietnik. Pas konfliktit të armatosur në vitin 2001, Marrëveshja e Ohrit krijoi një bazë për bashkëjetesë të pranueshme jo vetëm me shqiptarët. Ndërsa, konflikti me Greqinë përbën ende një problem të pazgjidhur. Greqia trembet se me emrin Republika e Maqedonisë, mund të ngrihen pretendime territoriale për provincën me të njëjtin emër në Veriun grek.

Maqedonia sot feston 20 vjetorin e pavarësisë. Por, manifestimet kanë humbur karakterin multietnik të vendit. Manifestimi qendror fillon në Parlamentin e Maqedonisë me një mbledhje solemne dhe më pas pason transferimi i Deklaratës së Pavarësisë në Muzeun e ri - i ashtuquajtur “Muzeu i luftës maqedonase për shtetësi dhe pavarësi” - i ndërtuar në pjesën qendrore në kuadër të projektit “Shkupi 2014”, ku do të bëhet edhe promovimi i përmendores së “Aleksandrit të Madh”.
Shqiptarët, si populli i dytë për nga numri në Maqedoni, kanë bojkotuar referendumin e 8 shtatorit. Ndërsa, 20 vite pas, partitë shqiptare do ta bojkotojnë prapë festën e pavarësisë.

Deputeti i Partisë Demokratike Shqiptare, Bekim Fazliu, thotë se pas 20 viteve të pavarësisë, shqiptarët - si element kryesor shtet-formues në Maqedoni - ngelin të përjashtuar nga hisja që u takon.

“Nuk shohim element shqiptar në këtë manifestim dhe për këtë arsye RDK do ta bojkotojë atë”, ka thënë për “Ina” zëdhënësi i Rilindjes Demokratike Kombëtare, Armir Ramadani.

Paralajmërime të sigurta për bojkot vijnë edhe nga Bashkimi Demokratik Kombëtar.

“Nuk do të marr pjesë në këto manifestime”, deklaroi kreu i BDK-së, Hysni Shaqiri. “Që të ketë kuptim festimi i përbashkët, pala maqedonase do të duhet të heq dorë nga diskriminimi i shqiptarëve”.

Edhe partitë tjera joparlamentare, si BDSH, PDK dhe PPD, kanë paralajmëruar bojkotin. Ndërkohë, përfaqësuesit shqiptarë në Qeveri kanë shfaqur dilema lidhur me pjesëmarrjen në ceremoninë për shënimin e 20 vjetorit të pavarësisë së Maqedonisë.

Zëvendëskryeministri për implementimin e Marrëveshjes së Ohrit, Musa Xhaferi, ka deklaruar se shqiptarët do të shënojnë 20 vjetorin e pavarësisë së Maqedonisë, aq sa maqedonasit festojnë dhe ndjejnë Marrëveshjen e Ohrit.

[Zero Cool]

WikiLeaks: Berisha, lider i shqiptarëve në rajon


Komentet publike të kryeministrit Sali Berisha për bashkimin e Shqipërisë me Kosovën kanë shkaktuar shqetësim në rajon, ndërsa ambasada amerikane ka kërkuar që këto qëndrime të sqarohen në mënyrë të kujdesshme gjatë vizitës së kryeministrit në Prishtinë. Kështu theksohet në një kabllogram të dërguar më 15 tetor 2009 në Departamentin e Shtetit nga ambasadori amerikan në Tiranë, John Withers.






08 shtator 2011
“Qeveria shqiptare e ka siguruar ambasadën amerikane se nuk ka asnjë qëllim të kërkojë bashkimin territorial të Shqipërisë dhe Kosovës. Sidoqoftë, një editorial i botuar në tetor nga një komentator pranë Berishës e që bën thirrje pikërisht për këtë, i ka shtuar benzinë zjarrit”, thekson kabllogrami.

Këshillat

Në një takim privat me kryeministrin Berisha, ambasadori paralajmëroi se rreziqet e deklaratave të tilla dhe kërkoi që kryeministri ta përdorë udhëtimin e tij në Prishtinë më 6 dhe 7 tetor për të sqaruar pozitën e Shqipërisë.

Pas kësaj, në deklaratat e tij gjatë udhëtimit në Prishtinë, theksoi se Shqipëria e respekton sovranitetin territorial të Kosovë dhe se Shqipëria dhe Kosova janë një komb por dy shtete.

Ndërsa disa kritikë shohin plane të tjera pas komenteve të Berishës, më shumë besojnë se këto reflektojnë dëshirën e tij për të qenë një burrë shteti i komunitetit shqiptar në rajon.

Sidoqoftë, takimet në Kosovë ne liderët e LDK-së dhe AAK-së, nxitën disa reagime nga analistët, që e kritikuan kryeministrin duke thënë se po tregonte preferenca politike para zgjedhjeve në Kosovë.

Të dy partitë me liderët e të cilëve Berisha u takua janë rivale të forta të Partisë Demokratike të Hashim Thaçit. Ndërkohë, këshilltarët e kryeministrit thanë se Berisha e konsideron veten si një “udhëheqës shpirtëror” për politikanët shqiptarë në rajon, Kosovë dhe Maqedoni.

Këshilltari i kryeministrit Glori Husi vuri në dukje dëshirën e madhe të Berishës për të përdorur lidhjet e tij me shqiptarët etnike si një katalizator për integrimin rajonal me Kosovën, Maqedoninë dhe Malin e Zi.

Garancitë

Ministria e Jashtme shqiptare siguroi se nuk ka ndryshuar qëndrimin e Tiranës lidhur me çështjen në fjalë. Por, para vizitës së Berishës në Kosovë, Blendi Fevziu, një komentator i njohur proqeveritar, që thuhet se është shumë i afërt me Berishën, publikoi një editorial që kritikonte tabunë e krijuar lidhur me ‘Shqipërinë e Madhe’ dhe theksonte se bashkimi ishte i paevitueshëm dhe se shqiptarë nuk duhet të kishin frikë prej tij.

Një editorial i tillë para vizitës shkaktoi shqetësim dhe ambasadori i paraqiti ato në një takim me kryeministrin. Berisha tha se komentet e tij ishin keqkuptuar dhe se ai kurrë nuk kishte bërë thirrje për bashkim.

Në një intervistë me një gazetë gjermane, ai tha se ideja e ‘Shqipërisë së Madhe’ ishte e vjetër dhe arkaike.

Disa mendojnë se deklaratat e tij ishin për të testuar ndërkombëtarët, ndërsa të tjerë si deputeti socialist Kastriot Islami, për shembull, thonë se Berisha po konkurron me Skënderbeun për titullin e heroit kombëtar.

[Zero Cool]

Kosovarja keqtrajton rëndë foshnjën sepse ajo "qante shumë"

Para gjyqit kishte thënë se foshnja "qante gjatë gjithë kohës" dhe kjo ishte "arsyeja" për keqtrajtimin e saj






08 shtator 2011
Një nënë e re kosovare, me qëndrim në Austri qe dënuar në muajin shkurt të këtij viti për keqtrajtimin e rëndë të foshnjës së saj, njërës nga dy binaket disamuajshe. Dënimi që i kishte shqiptuar atë kohë ghjykata e landit e Salzburgut të Austrisë ishte 5 muaj me kusht. Por, këtë të hënë asaj iu reduktua ky dënim, në tre muaj me kusht.
Përmes hedhjes, shtrëngimit dhe tundjeve të shumta nga e ëma, Lea e vogël kishte pësuar trandje të shumëfishtë të trurit, thyerje të krahëve dhe të këmbëve si dhe një frakturë të brinjve.
Me gjithë lëndimet serioze të shkaktuara të bijës, gjykata ia ka zbutur dënimin nënës së re, shkruan "Salzburger Nachrichten". Si arsye për zbutjen ajo ka paraqitur faktin se duke qenë në moshën e re, 24 vjeçare që rriste dy binjake të vogla ka pasur mbingarkesë të cilës nuk ka pasur mundësi t`i përballonte.
Kosovarja në gjykimin e parë kishte pranuar se sidomos Lea atëbotë "qante e klithte gjatë gjithë kohës" dhe këtë e kishte paraqitur si "arsye". Ndërkohë, nëna e re, e cila ka edhe një djalë më të madh, i ishte nënshtruar një psikoterapie ndërsa binjaket prej kohësh jetojnë në një familje tjetër.
Gjatë procesit të parë të gjykimit, lidhur me arsyet e keqtrajtimit të foshnjës ishin marrë në pyetje edhe prindërit e nënës dhe babai i fëmijëve. Ata kishin mohuar të kishi keqtrajtuar Lean dhe, në mungesë faktesh qenë shpallur të pafajshëm.

[Zero Cool]

Vlore, vdes gjyqtari pas shperthimit ne makine





Ne oret e mengjesit ne qytetin e Vlores nje automjet ka shperthyer me force duke shkaktuar vdekjen e nje gjyqtari te Gjykates se Vlores.

Ngjarja ka ndodhur rreth ores 09:20 minuta ne qender te Vlores pergjate rruges Vlore-Skele, ne nje zone shume te populluar, ndersa viktime ka mbetur shtetasi Skerdilajd Konomi, gjyqtar.

Policia dyshon se vdekja dhe shkaterrimi i makines nje benz 250 me targa VL 6383 B ka ndodhur nga nje sasi eksplozivi qe mund te kete qene i komanduar, pasi makina para se te shperthente ka qene ne levizje ne drejtimin Vlore-Skele.

Hetimet do te zbardhin nese eksplozivi ishte vendosur ne automjet apo ne celularin e gjyqtarit.

Celulari eshte gjetur jashte automjetit dhe po hetohet nese shperthimi ishte komanduar nepermjet tij. Policia ka nisur dhe lidhur me dosjet me te fundti qe gjyqtari kishte ne duar.

Ngjarja e rende shokoi shume kalimtare dhe drejtues automjetesh qe ndodheshin ne vendgjarje. Skerdilajd Konomi punonte ne Vlore si gjyqtar prej vitit 2006.

[Zero Cool]

Krimi në Vlorë, Topi mbledh krerët e sigurisë


Vetëm pak orë pas ngjarjes tragjike në Vlorë, Presidenti i Republikës, Bamir Topi, njëkohosisht kryetar i Këshillit të Lartë të Drejtësisë, priti sot në mesditë Prokuroren e Përgjithshme Ina Rama, Drejtorin e Shërbimit Informativ Shtetëror Bahri Shaqiri dhe Drejtorin e Përgjithshëm të Policisë së Shtetit, Hysni Burgaj.







Sic njofton presidenca, në këtë takim Presidenti kërkoi një informacion të detajuar mbi zhvillimet e deritanishme, që i përkasin ngjarjes tragjike të vrasjes në Vlorë, ku mbeti viktimë e një atentati me bombë gjyqtari Skerdilajd Konomi. Pasi dëgjoi me vëmendje Prokuroren e Përgjithshme, Drejtorin e SHISH dhe Drejtorin e Përgjithshëm të Policisë së Shtetit, Presidenti i Republikës kërkoi angazhimin maksimal të këtyre institucioneve dhe strukturave të tjera vartëse për zbardhjen e ngjarjes, identifikimin dhe arrestimin e autorëve si dhe vënien e tyre sa më parë përpara drejtësisë.

Edhe një herë në këtë takim, Kryetari i Shtetit vuri në dukje se një ngjarje e tillë, që ka tronditur sot gjithë opinionin publik, është një goditje tepër e rëndë ndaj figurës dhe profesionit të gjyqtarit si garant i vendosjes së drejtësisë në vend, ndaj dhe për këtë duhet një bashkëpunim shumë profesional dhe i efektshëm mes institucioneve përkatëse për të zbuluar shkaqet dhe gjetur autorët e këtij akti makabër. Presidenti i Republikës inkurajon të gjithë punonjësit e zbatimit të ligjit, thuhet në njoftimin e Presidencës, që të kryejnë me guxim e profesionalizëm detyrën e tyre fisnike në mbrojtje të jetës dhe sigurisë së qytetarëve.

Skerdilajd Konomi, 33 vjec, gjyqtar i Vlores u vra sot ne qytetin e bregdetar, pas nje shperthimi ne makinen e tij. Gjyqtari ishte duke shkuar ne pune me mjetin e tij kur eksplozivi, i cili dyshohet se u shperthye me telekomandim, u aktivizua poshte sejdiljes se tij. Te paret qe munden ta nxjerin trupin e demtuar rende nga eksplozivi ishin kalimtaret e rastit. Ne vendin e ngjarjes nuk mberriti asnje ndihme mjeksore urgjente dhe gjykatesi nderroi jete ndersa transportohej per ne spital ne bagazhin e nje furgoni policie.

[Zero Cool]

Kabllogramet e SHBA paralajmërojnë Berishën për largim nga pushteti





Kabllogramet skandaloze kanë nxjerrë aferat qeveritare, por duket se publikimi i tyre e ka pasur një qëllim. Agjensia e lajmeve AMA ka zbuluar se në Tiranë janë kryer disa vizita të fshehta, jozyrtare, të përfaqësuesve të lartë të BE-së dhe SHBA-ve. Përmenden vizitat në muajin korrik të një grupi “qytetarësh” gjermanë përgjatë Ballkanit dhe veçanërisht në Shqipëri.

Sipas agjencisë,në të vërtetë nuk ishin “qytetarë”, por zyrtarë tepër të lartë në Gjermani, që vendosin për mendimin final të vendit të tyre dhe për raportet që kancelaria Merkel do të mbajë me vendin tonë. Dhe gjëma nuk vonoi, Merkel nuk e shkeli Shqipërinë, siç ishte premtuar nga Berisha. “Qytetarët” erdhën të kamufluar me furgona e makina rasti, shëtitën vendin, takuan dhe Berishën, morën esencën e situatës dhe u larguan.

Po në muajin korrik dhe në vazhdim, bën në Tiranë një vizitë sekrete, të paktën dy herë, një prej drejtuesve të lartë të Shërbimit Inteligjent Amerikan. Nuk jepet asnjë informacion, edhe pse kryeministri e takon personalisht. Diskutime në ambasadë, direktiva, analizë e situatës dhe informacioneve dhe më tej kthim në atdhe.

Përshtypja ishte shumë negative. Për më tepër që gjatë vizitës së fundit, kreu i CIA-s ka mësuar që qeveria dhe vetë Berisha po finalizonte transaksionet e dyshimta dhe kalimin e aksioneve nga Telekom tek kompania e rrezikshme kineze, e përfshirë me rreth të kuq nga CIA. AMA mëson nga burime të sigurta se kryeministri nuk ka ndër mend të largohet pa një garanci të paktën familjare.

Lëvizjet e fundit që po kryhen në institucione të varura dhe të pavarura, por edhe në udhëtimet e personave të dyshimtë jashtë shtetit, tregojnë qartë se “kriza” qeveritare, por edhe familjare është më shumë prezente.

[Zero Cool]

Diskriminohen nxënësit shqiptarë në Manastir






Me urdhër të autoriteteve komunale në Manastir, drejtoria e shkollës fillore “Goce Delcev” nuk lejon që të rritet numri i klasave me mësim në gjuhën shqipe.
Në këtë shkollë nuk lejohet që klasa e gjashtë që numëron mbi 38 nxënës të ndahet në dy klasë. Drejtori i kësaj shkolle ka urdhëruar që të mos zgjerohet numri i klasave me mësim në gjuhën shqipe, me arsyetimin se nuk ka kushte në shkollë dhe se nuk mund të paguaj orët shtesë të mësimdhënësve shqiptarë.

“A e meritojmë barabarësinë dhe trajtimin e njëjtë si gjithë qytetarët”, thotë një prind i revoltuar për agjencinë INA.

Pas pajtimit të prindërve dhe mësimdhënësve që të formohen dy klasë e të mos paguhet fondi shtesë i orëve të mësimdhënësve shqiptarë, ka dal prapë kundër sektori për arsim i komunës. Ndërsa, problem tjetër janë edhe lëndët që zhvillohen akoma nga mësimdhënës maqedonas, për të mos hapur konkurse për mësimdhënës shqiptarë.

Historia e arsimit fillor në Manastir është një problematikë e trashëguar. Deri në vitin 1980 në këtë qytet ka funksionuar shkolla fillore “Nikola Tesla” me mësim në gjuhën shqipe dhe turke, por edhe me drejtori shqiptare. Me urdhër të aparatit shtetëror të asaj periudhe, kjo shkollë i`u bashkëngjit shkollës aktuale “Goce Delcçev”, e cila dominon me nxënës maqedonas.

Shoqatat qytetare të shqiptarëve dhe iniciativat e prindërve kërkojnë që shkollat me mësim në gjuhën shqipe të fitojë autonominë dhe pavarësinë që kishin deri në 1980.