Top 2013

[Zero Cool]

Top këngët e vitit 2013


Shumë këngë, shumë videoklipe dhe po ashtu këngëtarë të shumtë. Kështu mund të përkufizohet viti 2013 në skenën muzikore shqiptare, por nëse ka pasur shumë kualitet, këtu mbetet një dyshim i madh, marrë parasysh vitet e kaluara po ashtu shumë të suksesshme.

Telegrafi sjell disa prej projekteve më kualitative të vitit 2013 si më poshtë:

(Vërejtje: Shumë këngëtarë mund të mos jenë të përfshirë, pasi janë përfshirë vetëm këngët që kanë pasur më së shumti klikime, janë pëlqyer më së shumti nga publiku dhe kanë përmbushur kritere të caktuara muzikore. Artistët e rinj zënë vend të veçantë. Radhitja më poshtë nuk është klasifikim).

Elvana Gjata ft. 2po2 – Beso
Nëse është ndonjë këngë e realizuar gjatë vitit 2013 që do të dëgjohet edhe pas disa vitesh, atëherë ajo është kënga “Beso”. Interpretimi i Elvanës në baladë në një performancë me tekst të fuqishëm të reperit legjendar, 2po2, shoqëruan një videoklip fenomenal, i cili rezultoi si një prej top hiteve të këtij viti.

Tuna ft. Cozman – Fenix
Kush do të kishte imagjinuar se projekti i punuar nga Zzap n’Chriss, Getoar Selimi, nën interpretim të Tunës do të arrinte plot 15 milionë klikime në YouTube, e do të iniconte një turne të jashtëzakonshëm të këngëtares, e cila fluturoi si zog anembanë Evropës për të performuar. Sipas shumëkujt, “Fenix” konsiderohet kënga e vitit, e Tuna këngëtarja e vitit dhe kjo falë suksesit të jashtëzakonshëm të këngës “Fenix” me të dashurin e saj Cozman. Me plot meritë gjendet në listën tonë të top këngëve për këtë vit.


Ghetto Geasy – E Nxonme
Sërish një top këngë e realizuar në muzikë të Zzap n’Chris, që është shndërruar në një prej hiteve më të mëdha në pjesën e dytë të vitit 2013. Ndonëse Getoar Selimi ka edhe hite tjera si “N’Prishtinë” dhe “Po t’shoh përmas”, të cilat i realizoi në vitin 2013, kënga që kemi zgjedhur si një prej top këngëve të këtij viti i plotëson të gjitha kriteret për të qenë në këtë listë, ndonëse për vet reperin mund të jenë të pandashme. Viti 2014 pritet të jetë i madh për liderin e Babastars dhe ‘labelin’ e tij.

Lyrical Son ft. Mc Kresha – Me Ta Pyl
Albumet nuk kanë qenë trend gjatë këtij viti, por kjo nuk ka shkaktuar problem për Lyrical Son. “Me Ta Pyl” është një prej hiteve të top albumit të vitit 2013, “ZimaSamShevy”. Ky videoklip u xhirua në Dubai, teksa muzika u punua nga K-Master në RedBox. Ka arritur miliona klikime dhe ka nxitur turneun e reperëve që njihen edhe për hitin “Çele Çadrën”.

Nora Istrefi ft. Gena – Le Mama
Një këngë verore shumë e suksesshme e publikuar nga Nora në bashkëpunim me Genën. Si do që të jetë, Nora pas këngës realizoi edhe turneun e saj veror dhe ishte shumë e angazhuar, në një paraqitje seksi në videoklip, që shfaqi edhe një herë linjën e saj trupore.

Blero ft. Maria – Një moment
Kotori ishte destinacioni i shumë këngëtarëve për të realizuar videoklipe. Por, atë më mirë se askush tjetër e nxehu pop ylli shqiptar, Blero. Në një bashkëpunim me Marian, ai realizoi një videoklip atraktiv, i cili fundin e verës e freskoi me një prej hiteve të tij.

Flori – Pa jetë
Një baladë shumë e suksesshme ka qenë ajo e Florit. Viti shumë i suksesshëm i artistit u mbyll me disa probleme për llogarinë e tij në YouTube, ku zyrtarisht nuk janë të postuara asnjë prej këngëve të tij. Si do që të jetë, fundviti ka qenë pushim për Florin, i cili përkundër titullit të këngës që prezantojmë, ka qenë mjaft i gjallë.

Në këtë përpilim përmendim edhe disa këngë të tjera që janë pëlqyer pa masë:

Unikkatil – U qova pi vorri
Capital T – Good Life
Duda ft. Noizy – Skuadra jonë
Genta – E kam provuar
Era Istrefi – Mani për Money
Besa Kokëdhima - Folie
Yll Limani – A e din ti
Alban Skënderaj ft. Dr. Mic – Mrekullia e 8

Megjithëse ka edhe shumë këngë të tjera shumë të mira e të suksesshme që nuk i kemi futur në listë, ju lexues të nderuar, cila mendoni se ishte kënga e vitit 2013? Tuna apo Elvana? Lyrical Son apo Ghetto Geasy? Blero apo Flori? Unikkatili apo Noizy?

[Zero Cool]

Top ngjarjet e vitit 2013 nga skena vendore


Videofesti 2013

Me një organizim që natyrisht lë shumë për të dëshiruar edhe nga ky vit, u mbajt edhe ceremonia e ndarjes së çmimeve për videoklipet më të mira, Videofest 2013. Për dallim nga edicionet e kaluara, këtë vit realizimi u provua të përmirsohej, pasi organizatorët mblodhën në skenë pesë bukuroshe dhe Benet Kaçin për prezantim.

Por, skenën e okupuan në fund artistët. Ata që shkëlqyen me më së shumti çmime janë artitët nga Shqipëria, përkatësisht produksioni ThreeDots. Bashkëpunimi “Beso” i Elvana Gjatës dhe 2po2 rrëmbeu disa çmime, por fituese u shpall kënga e Florit, “Pa Jetë”. Dafina Zeqiri rrëmbeu çmimin Best Pop, kurse çmimin për këngën më të mirë hip hop e fitoi MC Kresha me këngën “Cok Guzel”.




Top Fest 2013

Festivali pa asnjë dyshim më mirë i organizuar shqiptar, kishte një rënie të shikueshmërisë gjatë këtij viti. Më pak emra të mëdhenj, me më shumë artistë të rinj në përbërje, Top Fest synoi që skenës t’i japë prurje të reja.

Në këtë festival karrierën e saj e pa të zgjatur e të respektuar Albërie Hadërgjonaj që fitoi çmimin për baladën më të mirë, teksa nga ana tjetër Andos me këngën “Luftë e Humbur” arriti të fitojë çmimim e artistit më të mirë mashkull. Çmimin e parë e fitoi bukuroshja nga Shqipëria, Samanta Karavello me këngën “Loti i Fundit”.




Eurovision Song Contest 2013

Pas një suksesi të paprecedentë të Rona Nishliut në vitin 2012, kur ajo arriti të zë vendin e pestë me këngën “Suus”, në vitin 2013 për Shqipërinë u shënua dështim total. Kënga “Identitet” nga Bledar Seiko dhe Adrian Lulgjuraj, nuk arriti që të hynte as në finale.

Në përgjithësi u shënua dështim i madh për të gjitha vendet e rajonit pasi që asnjëra nuk arriti të kualifikohej në finale.




Kënga Magjike 2013

Festivali i Ardit Gjebreas pësoi një ngritje spektakolare në krahasim me konkurrentin tjetër Top Fest, pasi shumica e këngëtarëve më në formë të momentit zgjodhën skenën e festivalit që mbahet në pjesën e dytë të vitit.

Këtë edicion ajo që fitoi pa asnjë dilemë me këngën më të mirë, ishte Besa Kokëdhima dhe projektin e saj “Tatuazh në Zemër”.

Si fituese mund të ketë marrë shumë vëmendje në fund Besa, por jo më shumë se sa Nora Istrefi. Këngëtarja e cila shkoi me këngën “I Jemi Je” arriti të zë vend në zemrat e femrave për këngën dhe në zemrat e meshkujve për trupin fenomenal, për të cilin u përfol nëse kishte të brendshme apo jo. ‘Enigma e madhe’ nuk u zbulua kurrë, dhe jo vetëm… Festivali ishte një sukses i madh e ndoshta i papritur për Arditin.

[Zero Cool]

Hip-hopi në vitin 2013


Bota e hip-hopit në vitin 2013 ka qenë më voluminoze se kurrë me krijime të ndryshme, hite dhe albume të cilat do të lënë gjurmë përjetësisht në historinë e këtij zhanri.

Për dallim nga viti 2012, në vitin 2013 u arrit kalimi nga tranzicioni i madh prej ‘old school’ në ‘new school’ dhe reperët arritën që të publikojnë shumë projekte duke konkurruar me njëri-tjetrin, pasi që vet hip-hopi nuk ka kuptim pa e pasur shpirtin e garës. Ritme më moderne, tekste artistike e herë-herë me rima të fuqishme, ishin ato që karakterizuan një vit që do të mbahet mend gjatë.


Authentic Entertainment

Grupi me në krye Besnik Canollin, apo 2po2, ka arritur që të lë gjurmë mjaft të madhe në vitin që lamë pas. Vet reperi realizoi një prej bashkëpunimeve më të mira viteve të fundit me Elvana Gjatën, teksa arriti të realizojë edhe disa projekte solo. Kënga “Prej rrugës” dhe “Kom ra n’dashni” janë ato që u shndërruan në këngë shumë të dëgjuara nga publiku, teksa besohet se vet reperi është duke punuar në albumin e tij të ri.

Në këtë grup bën pjesë edhe Capital T. As ky nuk ka preferuar të lansojë një album, por ka vazhduar të punojë në heshtje për projektet e reja. Kënga më e suksesshme e Kapos për vitin e kaluar padyshim ka qenë “Good Life”, e cila u dallua me një videoklip interesant brenda përbrenda produksionit Authentic Entertainment dhe me një ‘flow’ të paparë nga reperi. Pritet një album nga Capital T në vitin 2014.

P.I.N.T

Pas sukseseve në vitin 2012 me dy albumet “PINT 1” dhe “PINT 2”, hip-hop grupi me në krye Lyrical Son dhe MC Kreshën përjetuan një tjetër vit me plot projekte dhe hite. E filluan vitin me një projekt të përbashkët, këngën karakteristike “Çele çadrën”, për të vazhduar më pas solo.

Lyrical Son lansoi në gusht albumin “ZimaSamShevy”, i cili për vitin 2013 ka qenë më i shituri në vendin tonë, teksa pos tjerash ka arritur të dëgjohet miliona herë në rrjetin social YouTube, një rrjet ku nuk preferon të krahasohet Festimi. Këngët “Ekstravaganca”, “Me ta pyl”, “Special”, “Mes neve” dhe “In Luv” janë ato që hynë në zemrat e publikut. 25 këngë nga Lyrical Son dhe një album, mjaft mbresëlënës ky vit për Lyricalin.

MC Kresha nuk e la të vetmuar Festimin në albumin e tij. Janë tri-katër bashkëpunime që ata i kanë realizuar gjatë vitit, që të gjitha projekte shumë të suksesshme. Vlen të përmendet kënga “Me ta pyl”, teksa suksesin më të madh Mc Kresha e shënoi me këngën “1990", e cila u dallua me një videoklip mjaft interesant. Telegrafi ka informacione se MC Kresha është në përgatitje të albumit të tij të ri, i cili do të publikohet në vitin 2014.

BabaStars

Nëse dikush mund të krenohen për klikime dhe për himne të cilat i këndoi publiku gjatë gjithë verës, janë pikërisht pjesëtarët e ‘labelit’ Babastars. Me në krye Getoar Selimin, ata publikuan një seri këngësh që u shndërruan hite. Ghetto Geasy publikoi projektet “n’Prishtinë” dhe “Pot shoh përmas”, që të dy këto këngë hite, para se të publikonte kundërpërgjigjen ndaj kritikëve, këngën “Ma i madhi n’ven 2” ku u tregua shumë i ashpër. Vitin e tij shumë të suksesshëm me shumë singla, Geti e kompletoi me superhitin “E nxonme”, e cila zuri vend në top këngët e vitit 2013 të zgjedhur nga Telegrafi.

Nga Babastars pa projekte nuk ka mbetur i riu Cozman, i cili ishte i pakapshëm këtë verë, pasi fluturoi drejt sukseseve me të dashurën e tij Tunën dhe hitin e tyre “Fenix”. Pos Cozman ai që nuk pushoi ishte edhe Skivi. Së pari Skivi publikoi këngën “E di që mu m’don”, e cila kishte sukses mjaft të madh, teksa së fundmi e përmbylli vitin me këngën “Welcome to Prishtina” në bashkëpunim me Adrian Gaxhën dhe Florianin.

Vend të veçantë në këtë përmbledhje tonën për botën e hip-hopit shqiptar e zë grupi TDS, që tani janë nën petkun e Babastars. Përkundër sulmeve të rivalëve nëpër këngë të ndryshme për një tradhti dhe mosmirënjohje, djemtë vazhduan qetësisht me në krye Dr. Mic drejt krijimit të albumit “Hello”. E pikërisht “Hello” ishte një prej hiteve të albumit me të njëjtin emër, teksa shumë të suksesshme kanë qenë edhe këngët “Killah”, “Veç un edhe ti” dhe “S’nalna”.

Babastars do të publikojnë në vitin 2014 shumë projekte, e ajo që vlen të përmendet është albumi i përbashkët me të gjitha këngët e fundit të anëtarëve të këtij hip-hop ‘labeli’.

Unikkatil

Reperi legjendar punoi shumë në prapaskenë gjatë këtij viti në projektet e reja, por publikoi vetëm një prej tyre. Ishte kënga “U qova prej vorri” ajo që theu rekord të shikimeve në YouTube brenda 24 orëve të para. Me tekst të thellë e në një botë të errët tipike për Viktorin, kënga arriti të inspirojë fansat e tij.

Telegrafi ka informacione se Viktor Palokaj gjatë vitit 2014 do të lansojë albumin e tij të ri, ashtu sikurse edhe disa ‘single’ para tij.

Noizy

Reperi i jashtëzakonshëm nga Shqipëria, lansoi një album të jashtëzakonshëm në vitin 2013. Me mbi 20 këngë, secila më e mirë se tjetra, Noizy arriti që të shtrijë autoritetin e tij mbi botën e hip-hopit shqiptar, duke e ringjallur në të njëjtën kohë edhe mikun e tij Dudën.

Top hiti i Noizyt ka qenë “Skuadra jonë”, dueti i suksesshëm me Dudën, teksa edhe kënga “Çunat thojnë” është një bashkëpunim që do mbetet në zemrat e fansave. Pos këtyre këngëve, janë edhe ato “Ole” dhe “Gunz Up” që arritën miliona klikime, e që të gjitha projektet më lartë ishin pjesë e albumit shumë të suksesshëm, “The Leader”.

Kaos

Ndër të paktë artistë që publikuan album gjatë vitit 2013 kanë qenë edhe anëtarët e grupit Kaos. Albumi “X” ishte prej më të klikuarve në YouTube. Ky album ka përmbajtur hitet më të mëdha të fundit të reperëve, si “Lule lule”, “Gëzuar, përhajr” dhe shumë të tjera. Dallohen paroditë në disa këngë dhe mesazhet e fuqishme që ata kanë transmetuar. Kaos vazhdon të qëndrojë lart si një prej hip-hop grupeve më të respektuara dhe më në formë në trojet shqiptare.

2Ton

Reperi dhe producenti nga Ferizaj ishte i pandalshëm gjatë vitit 2013. Ai lansoi shumë bashkëpunime me disa këngëtare të reja, të cilat ishin relativisht të suksesshme, teksa si një prej sukseseve më të mëdha të tij vlen të përmendet përpunimi i këngës “Missing Me”, që u shndërrua në hit. Reperi vazhdon të jetë shumë në formë dhe mesazhet që ka transmetuar deri tani kanë inspiruar fansat e tij.

Gjiko

Një reper i ri nga Peja, por me shumë perspektivë në botën e hip-hopit është Asdren Gjikolli, apo Gjiko. Lirikisht i pakapshëm e në interpretim me shumë vend për përmirësim, Gjiko ka qenë një prej të rinjve më aktivë gjatë këtij viti. Ai u bë i njohur me këngën “Psikopat” në bashkëpunim me Gjirën. Telegrafi ka informacione të sigurta se reperi do të bashkohet me një reper tjetër në një tandem që pritet të shkaktojë tërmet të madh në botën e hip-hopit shqiptar. Bëhet fjalë për një prej ikonave të hip-hopit.

Elinel

Një prej reperëve më të talentuar të skenës që shkëlqeu gjatë vitit 2013 ishte pa asnjë dyshim Elineli. Ai publikoi albumin “O” që përmban disa prej këngëve të tij kryesore të lansuara gjatë vitit, teksa i famshëm u bë me ‘dissin’ e madh kundër Babastars gjatë festivalit Beerfest. Pa dyshim një prej reperëve më me perspektivë në skenën e muzikës tonë me shumë kapacitet për të shkëlqyer edhe gjatë vitit 2014.