Lajme Sport

[Zero Cool]

Serbët ankohen në UEFA e FIFA për flamurin e Shaqirit







27.05.2013


Federata Serbe e Futbollit (FSS) do të ankohet në UEFA dhe FIFA për flamurin e Republikës së Kosovës, të cilin e shpalosi futbollisti kosovar Xherdan Shaqiri pas ndeshjes finale të Ligës së Kampionëve ndërmjet Bayern Munichut dhe Borussia Dortmundit, që përfundoi 2:1.

Kryetari i FSS-së, Tomislav Karadzic ka thënë se për serbët, ky veprim i futbollistit gjilanas është i papranueshëm, ndërsa kërkojnë dënimin e tij, siç kishte ndodhur edhe me notarin serb, Milorad Cavic, që ishte suspenduar pasi mbante një fanellë me mbishkrimin “Kosova është Serbi”.

“Çdokush mund të jetë befasuar kur e pamë Shaqirin duke e mbajtur flamurin. Unë nuk e di se si i është lejuar që ta prezantojë atë, por është e sigurt se nuk kishte të drejtë ta bënte, pasi që kjo është në kundërshtim me promocionin politik dhe statutin e UEFA-s. Kosova nuk është e pranuar në Kombet e Bashkuara, e as në FIFA e UEFA, kështu që ne e shohim këtë si një dështim të organizatorëve”, deklaroi kreu i futbollit serb për telegraf.rs.

“Do ta bëjmë një ankesë në UEFA e FIFA, si dhe në adresë të Bayernit, sepse besojmë se ata mund të na përgjigjen dhe se kanë mundur ta ndalojnë Shaqirin”, përfundoi Karadzic.

Shaqiri e shpalosi një flamur të ndarë në dysh, të Zvicrës dhe të Kosovës, duke i bërë të mburren shqiptarët, ndërsa ndërkohë i ‘kalli’ serbët me këtë veprim.

[Zero Cool]

GoalControl, teknologjia në ndihmë të arbitrave në futboll


Topi ishte brenda apo jashtë? Për të mos ekzistuar më kjo pyetje në Kupën e Konfederatave në Brazil do të përdoret për herë të parë sistemi elektronik i kontrollit të golit, GoalControl.








Kontolluesi elektronik i golit GoalControl është gati të bëjë debutimin në Kupën e Konfederatave që zhvillohet në Brazil nga data 15 deri më 30 qershor 2013. Për herë të parë FIFA do të testojë këtë pajisje të re përpara një publiku të gjerë. Të ashtuquatjturit „golat Uembli“ si ai i vitit 1966 në Kupën e Botës nuk do të ketë më.

Por Dirk Broichhausen, drejtuesi i kompanisë GoalControl, shpreson që të ketë sërish një tjetër rast tillë në botën e futbollit. „Ne shpresojmë që të vihet në punë sistemi ynë dhe të jetë ai që të vendosë më pas. Kjo do të ishte një arritje e madhe për të sqaruar një çështje të diskutueshme“, thotë Broichhausen.
GoalControl kërkon të jetë edhe në Brazil 2014.

Pas aprovimit për të qenë pjesë në Kupën e Konfederatave, kompania nga Vestaflia e Rinit Verior ka edhe një ëndërr tjetër të madhe: të marrë aprovimin për të qenë e pranishme në Kupën e Botës 2014 në Brazil. "Ne jemi të bindur se e bëjmë me sukses punën dhe kemi shanse për të qenë edhe në Botëror", thotë Broichhausen. Kolegu i tij Jürgen Philipps shton: "Ne kemi kaluar të gjitha testet dhe të gjitha janë kaluar në masën 100%.




14 kamera të shpejtësisë së lartë ndjekin në çdo moment topin



Për kompaninë GoalControl ishte një surprizë, kur në fillim të prillit mësoi se ishte ajo fituesja e kontratës. Konkurentë të tjerë ishin Sistemet Cairos, Goalref, që punon me çipe në top dhe Hawk-Eye që përdoret në tenis dhe është zhvilluar nga sponsori i FIFA-s, Sony. Sipas FIFA-s një nga arsyet kryesore që u zgjodh GoalControl ishte „përshtatja e sistemit të saj elektronik me kushtet e fushave në Brazil“.

Më pak se një sekondë

Broichhausen thekos se „fleksibilteti dhe saktësia“ e sistemit GoalControl ishin gjithashtu mjaft të rëndësishme. Sistemi mund të funksionojë me çdo lloj topi dhe nuk është i dukshëm tek porta. 14 kamera të shpejtësisë së lartë të vendosura në çatinë e stadiumit kontrollojnë pozicionin e topit në tre dimensione gjatë gjithë lojës dhe nëse topi kalon vijën e portës në më pak se një sekondë shkon një sinjal në orën e arbitrit kryesor.


FIFA lejoi përdorimin e këtij lloj sistemi për të shmangur rastet e diskutueshme. “Sistemi jep sinjal edhe për pesë milimetra“, thotë me krenari Broichhausen. GoalControl mund të japë pozicionin e topit edhe nëse ai mbulohet me trup nga lojtarët. Në Kupën e Botës për Klube të vitit 2012 FIFA testoi Goalref dhe Hawk-Eye e tani është radha e GoalControl të provojë veten. "Arbitrat janë të gëzuar që kanë një ndihmë të tillë. Unë jam shumë kurioz për të parë se si do të funksionoje dhe shpresoj që do të përdoret“, tha një ditë më parë presidenti i FIFA-s Joseph Blatter gjatë një konferencë për shtyp në Rio de Janeiro.

Në Kupën e Konfederatave marrin pjesë kampionët e çdo kontinenti. Europa do të ketë dy përfaqësues sepse Spanja merr pjesë si kampione në fuqi e Botës dhe i lejon pjesmarrjen Italisë si nën-kampione e Europës. E njëjta gjë ndodh edhe me Amerikën Latine, që do të ketë gjithashtu dy përfaqesuese, Brazilin si vend organizator dhe Uruguajin si kampion në fuqi. Tetë ekipet e përfaqësuesve që do të marrin pjesë janë te ndara në dy grupe. Grupi A: Brazil, Itali, Meksikë dhe Japoni, ndërsa në Grupin B bëjnë pjesë Uruguaji, Spanja, Tahiti dhe Nigeria.

[LaCoStA]

JO Spanja, PO Brazili



Kombëtarja e Brazilit e ka nëpërkëmbur Spanjën në finalen e Kupës së Konfederatave duke e mposhtur me rezultat 3-0.

Kampioni i Evropës dhe botës ishte skuadër inferiore përballë lojtarëve të Selecaos që luftonin me të gjitha forcat për ta nënshtruar kundërshtarin. Një ndihmesë të madhe bashkëkombësve të tyre në fushë ua jepnin edhe tifozët me atmosferën e jashtëzakonshme në stadiumin Maracana.



Pas një harkimi të Hulk, Fred u rrëzua para portës, por nga pozita e shtrirë e mposhti Casillasin (2’).

Brazilianët kanë mundur ta ngrenë edhe më shumë epërsinë me anë të Oscar, Paulinho e sidomos Fred, goditjen e të cilit e mbrojti portieri spanjoll.
Rastin e vetëm për të shënuar për La Roja e pati Pedro, mirëpo David Luiz nuk lejoi që topi ta kalonte vijën fatale.

Dhe për ‘eksplodimin’ e Maracanas në fund të pjesës së parë u përkujdes Neymar, i cili pranoi një asistim nga Oscar, për ta lënë të pashpresë Casillasin me të majtën (44’).



Si në fillim të pjesës së parë, ashtu edhe në dy minutat e para të pjesës së dytë, Fred pranoi asistimin e Hulk për ta shënuar golin e dytë personal (47’).

Se kjo nuk ishte mbrëmja e Furisë së Kuqe e dëshmoi edhe Sergio Ramos duke huqur penaltinë që iu dha përfaqësueses së tij (54’).

Brazili ka mundur të shënojë gola të tjerë deri në fund të takimit, përballë një Spanje të dobët në këtë përballje. Për më shumë, Pique u përjashtua me karton të kuq pas ndërhyrjes në Neymar si lojtar i fundit (68’).

Ky është triumfi i katërt i Brazilit në këtë kupë dhe i treti radhazi (1997, 2005, 2009, 2013). Spanja, nga ana tjetër, do të vazhdojë të mos e ketë në sirtar këtë trofe.

[Zero Cool]

Presidentja ia merr medaljen Aziz Salihut







Prishtinë, 19.12.2013

Presidentja e Republikës së Kosovës, zonja Atifete Jahjaga, ka vendosur që të revokojë dekoratën “Medalja Presidenciale e Meritave” dhënë sportistit Aziz Salihu, bazuar në nenin 14, paragrafi 1 dhe 4 i Ligjit për Dhënien e Dekoratave nga Presidenti i Republikës së Kosovës në të cilin thuhet: “Të dekoruarit mund t’i revokohet Dekorata nëse vepron në kundërshtim me rendin publik, moralin dhe kryen vepra të tjera që e bëjnë të padenjë për bartjen e Dekoratës”. (Neni 14, paragrafi 1- Ligjit për Dhënien e Dekoratave)

Me dekoratë vlerësohet veprimtaria, aktiviteti dhe puna e dalluar e një qytetari, organizate dhe institucioni për meritat në fusha të caktuara dhe Presidentja me këtë motivacion edhe e ka dekoruar zotëri Aziz Salihun. Akti i shqyerjes së Dekoratës e bën të padenjë bartësin e saj për mbajtjen e së njëjtës. Dekorata nuk ka ndonjë shpërblim financiar apo ndonjë favor tjetër material dhe nuk mund të konsiderohet si mjet për të kërkuar përfitime materiale apo favore të tjera.

[Zero Cool]

Aziz Salihu shqyen dekoratën e presidentes



Legjenda e boksit shqiptar, Aziz Salihu, ka shfryrë mllefin e tij për gjendjen e tij të vështirë ekonomike, duke shqyer dekoratën më të lartë të presidentes Atifete Jahjaga.


Salihu këto komente i bëri në një intervistë për Zëri, ku ka shprehur edhe njëherë pakënaqësinë me gjendjen ne të cilën thotë se e kanë lënë institucionet.

Ai publikisht ka shqyer dekoratën e presidentes Atifete Jahjaga, duke thënë se mirënjohje është mbushur dhe se nuk i duhen ato kur nuk mund t’ua plotësojë kërkesat elementare fëmijëve të tij.

“Mirënjohje e dekorata jam mbushur. Edhe pse i çmoj, çka më duhen ato kur sot jetoj në një situatë kur as para për kafe me shoqëri nuk kam. Sot fëmijëve të mi nuk mund t’ua plotësoj asnjë kërkesë”.

“Këto institucione nuk më ndihmojnë, asnjë kërkesë timen uk ma përmbushin. Boll më, nuk po mund të nduroj”, u shpreh Salihu për Zëri.

[Zero Cool]

Aktori Çun Lajçi i shkruan letër të hapur presidentes për Aziz Salihun



Ndër të tjera aktori i përkujton presidentes së shtetit se sportistët, shkrimtarët, muzikantët nuk e ushqejnë dot familjen me “dekorata”.

“Zonja President! Aziz Salihu është jo vetëm sportisti i shekullit, por është krenaria e shumë gjeneratave”, kështu e fillon një letër të hapur që i ka drejtuar presidentes së shtetit të Kosovës, Atifete Jahjaga, aktori i dramës shqipe, Çun Lajçi në profilin e rrjetit social, Facebook.

Reagimi i aktorit vjen një ditë pas vendimit të presidencës së Kosovës për të revokuar “Medaljen presidenciale të meritave” për ish-fituesin e medaljes së bronztë olimpike, Aziz Salihu, pasi që ky nga dëshpërimi që po jeton në varfëri kishte vendosur që publikisht ta shqyente këtë dekoratë.

“Ne, ashtu siç jemi krenuar më legjendën e filmit Bekim Fehmiun (për vdekjen e të cilit ju në Parlament as që i lëvizet prapanicat tuaja - turp ju qoftë). Ne gjithashtu jemi krenuar edhe me boksierin më të mirë që ka pasur ndonjëherë Kosova, më olimpistin Aziz Salihu. Prandaj gjesti i tij vjen si pasojë e gabimeve të shtetit!”, thuhet në letrën e Lajçit.

“Sepse ju mendoni se artisti, sportisti, shkrimtari, muzicienti, piktori dhe çdo lloj krijuesi, jeton duke e ushqyer veten e familjen më ‘dekoratat’ që Ju zonjë ua ndani. Krijuesit, pra edhe sportistit kalibër, çfarë është Aziz Salihu i duhet një vend pune, një rrogë më të cilën do ta mbante familjen, jo letra e fjalë miradije”.

“z. Presidente, kurseni pak nga rrobat, mos shkoni aq shpesh të stilisti juaj, sepse ato janë paratë e tatim paguesve, por kujdesuni pak edhe për ata që aq shumë i dhanë këtij vendi. Respekt z. Presidente!”, përfundon letra e aktorit, Lajçi.

[Ylli-1]

Publikuar: 14:37 / 25.10.2014



Kjo është ndeshja që të gjithë po e presin, El Clasico. Të dyja skuadrat vështirë se mund të jenë në formë më të mirë. Real Madrid vjen në këtë ndeshjen pas pesë fitoreve të njëpasnjëshme në La Liga dhe kanë shënuar gola për qejf, falë formës së jashtëzakonshme të Cristiano Ronaldos. Barcelona, gjithashtu, i kanë fituar të gjitha ndeshjet deri tani dhe ende nuk kanë pranuar asnjë gol.

Si gjithmonë, shumëçka nga kjo ndeshje sillet rreth betejës mes dy futbollistëve sensacionalë: Ronaldos dhe Messit. Ronaldo është në avantazh ndaj rivalit të tij në gola, me 15 të shënuar në shtatë ndeshje. Megjithatë, argjentinasi mund ta vjedhë spektaklin nëse i shënon dy gola, me të cilët do ta thyente rekordin e Telmo Zarras prej 251 gola të shënuar në La Liga, rekord ky që po qëndron prej vitit 1955. Dhe, dihet se sa shumë e ka në ‘qejf’ Messi skuadrën madrilene. Deri më tani, ai i ka shënuar 21 gola kundër Los Blancos në karrierën e tij.




Faktor kyç për gjasat e Real Madridit në këtë ndeshje do të jetë edhe fakti se a do të luajë Sergio Ramos apo jo. Përfaqësuesi spanjoll mori një lëndim para dy javësh dhe i është kthyer stërvitjeve këtë javë. Carlo Ancelotti shpreson se ai ka fituar kondicionin e duhur për këtë ndeshje.

Një tjetër faktor në këtë ndeshje është edhe rikthimi i Luis Suarez. I suspenduar nga FIFA që prej se vendosi që ta kafshonte krahun e Giorgio Chiellinit në Kupën e Botës, uruguaiani ende është duke pritur për debutimin me katalunasit. Dhe, kur ai të debuton sonte, do të krijojë një sulm tmerrësisht potent përkrah Neymarit dhe Messit.

Bastexhinjtë e Spanjës po e favorizojnë Real Madridin, dhe jo vetëm. Edhe pse Barca është duke udhëhequr në tabelë, nikoqirët e El Clasicos kanë qenë në formë më të mirë, duke shënuar shumë gola dhe duke luajtur futboll atraktiv. Gjithçka duket në rregull në ‘Casa Blanca’, mirëpo nëse dikush mund t’ua prishë serinë pozitive, kjo është Barcelona, sikur që është edhe Lionel Messi.