NJË KANDIDATURË PËR MINISTRINË E RENDIT TË KOSOVËS

[fesatiiiiii]

NJË KANDIDATURË PËR MINISTRINË E RENDIT TË KOSOVËS VJEN NGA ZVICËRA

Bajram Mehmeti kandidat i preferuar nga vendorët dhe ndërkombëtarët

Shkruan : Kastriot SHEHDADI

Për dy postet e para të ministrive të sapoformuara në Kosovë është folur dhe përfolur me të madhe në mediume, ku nga ndonjë medium ka pasur dhe tendenca spekulimesh. Përkundërse janë përmendur disa emra se kush do të emërohet në postin e ministrit të Ministrisë së Rendit, megjithatë, edhe përkundër kontakteve të shpeshta që ka pasur disi ka kaluar si në heshtje dhe një kandidaturë që është e njohur në qarqet më të larta në Kosovë por edhe për përfaqësuesit e zyrave kryesore perëndimore që janë në Prishtinë si dhe vet zyra amerikane. Është ky Bajram Mehmeti, me prejardhje nga komuna e Gjakovës që jeton dhe punon në Zvicër. Është kandidati që edhe pse kanë qenë në dijeni këto qarqe, qofshin vendore dhe ndërkombëtare, përfshirë dhe vetë presidentin e ndjerë dr. Ibrahim Rugova, megjithatë ai ka qenë i “pazbuluar” dhe i papërmendur si kandidat nga mediat pikërisht për shkak të heshtjes së tij dhe personalisht deri vonë ka parapëlqyer të jetë ashtu e heshtur kjo kandidaturë e tij. Përmes kontakteve të para përmes postës elektronike dhe komunikimit me celular, ai ka pranuar të tregojë për “Bota Sot” se është ndër kandidatët e mundshëm dhe se për këtë kandidaturë edhe ka pasur kontaktet fillestare me personalitete dhe autoritete të larta në Kosovë që janë dhe faktor vendosës. Këto pohime Bajram Mehmeti na i konfirmoi edhe këto ditë sa po qëndron në Kosovë. Ai për opinion në mënyrë të kufizuar, pasi momentalisht nuk pëlqen të përmend emra konkret, ka bërë të ditur dhe nga i kanë ardhur propozimet, respektivisht sugjerimet, pasi ai përkohësisht nuk jeton në Kosovë dhe është me punë avancuese në segmentet shtetërore zvicerane dhe njeherit vazhdon aktivitetin e tij partiak si kryetar i nëndegës së LDK-së në kantonin e Fribourgit të Zvicrës. “Sugjerimi më ka ardhur nga një pjesë e mirë e intelektualëve të mirëfilltë nga Kosova dhe diaspora. Gjithashtu një sugjerim i tillë më ka ardhur edhe nga çarqet e caktuara ndërkombëtare që ia duan të mirën Kosovës” ka thënë për gazetën Bajram Mehmeti. Njeherit, ai ka bërë të ditur se kontaktet me Prishtinën i mban ende të vazhdueshme porse asgjë deri më sot nuk është vendosur. Kontakte të tilla ka dhe gjatë këtyre ditëve sa po qëndron në Kosovë kur brenda pak ditëve edhe pritet të bëhet i ditur emri i ministrit, për të cilin post Bajram Mehmeti shkurtimisht thotë se do e pranonte nëse e shohin të arsyeshme.”Sikurse në të kaluarën edhe tani jam i gatshëm që të vazhdojë të jap kontributin tim”, ka thënë shkurtimisht Mehmeti. Meqenëse ka vite që jeton dhe punon në Zvicër, megjithatë emri i Bajram Mehmetit nuk është i panjohur pasi ka qenë i kyçur në lëvizjet kombëtare të kohës, e sidomos është i njohur për ata që kanë qenë të kyçur në aktivitete ushtarake.

Kush është Bajram Mehmeti?


Është i lindur me 26 janar 1963 në fshatin Botushë të komunës së Gjakovës. Është i martuar dhe ka tre fëmijë. Ka të mbaruar gjimnazin ushtarak si dhe ka studiuar në akademinë ushtarake në Beograd, ku në mars të vitit 1983 nën akuzën për veprimtari armiqësore arrestohet dhe nga gjyqi ushtarak në Beograd dënohet me tre vite e gjysmë burgim ( i njohur si procesi i kadetëve ushtarak në akademinë ushtarake në Beograd).Ka të kryer Fakultetin e Gjuhës në Fakultetin Filologjik të Universitetit të Prishtinës në vitin 1990, si dhe Fakultetin Ekonomik po të të njëjtit universitet në vitin 2001, ndërsa Gjuhën Angleze e ka kryer në “Wall Street Institut” në Fribourg të Zvicrës në vitin 2004. Pos gjuhës amtare është njohës shumë i mirë edhe i gjuhës frënge, gjermanishtes, anglishtes, serbokroatishtes dhe ka njohuri mesatare për gjuhën italiane. Bajram Mehmeti ka në biografinë e tij edhe veprimtarinë profesionale në lëmin e arsimit ku për tre vite (1990-1993) ka qenë profesor në shkollën e mesme « Vëllezërit Frashri » në Deçan. Për veprimtarinë ushtarake dhe në lëmin e sigurisë Bajram Mehmeti ka një përvojë të dukshme dhe të shquar. Që nga viti 1997 është bashkëpunëtor profesional në Ministrinë e Drejtësisë dhe Policisë të Zvicrës ndërsa prej vitit 2000 është bashkëpunëtor profesional në Shërbimin e Policisë për të Huaj në Fribourg të Zvicrës. Veprimtaria e mëhershme e Bajram Mehmetit në Kosovë është kjo: i dënuar për kundërrevolucion nga Gjykata Ushtarake në Beograd. Prej vitit 1990 deri me 1993 ka qenë komandant Shtabi për territorin e komunës së Gjakovës e në kuadër të vazhdimësisë së formimit dhe krijimit të sistemit të Mbrojtje të Republikës së Kosovës ndërsa nga viti 1994 ka qenë i dënuar në mungesë me gjashtë vite burg për shkak të aktivitetit të tij ushtarak në kuadër të formimit dhe krijimit të sistemit të mbrojtjes siç u cek më lartë.