Lajme Aktuale.... - Page 16

Llapjani_HH · 14-10-08, 18:52

Gruevski në Hagë për të takuar Johan Tarçullovskin

Dërguar më: 14/10/2008 - 09:43

SHKUP- Kryeministri i Maqedonisë, Nikolla Gruevski do të udhëtojë sot drejt Hagës për të vizituar Johan Tarçullovskin, ish-oficerin e dënuar maqedonas për krime lufte ndaj shqiptarëve.
Ish-oficeri i lartë i policisë, Tarçullovski u dënua me 12 vjet heqje lirie, për vrasjen e civilëve shqiptarë në fshatin Luboten, në mars të vitit 2001 gjatë konfliktit të armatosur në Maqedoni. Në këtë cështje u gjykua edhe ish-ministrin e brendshëm, Lube Boshkovski, por më pas Gjykata Ndërkombëtare e Hagës e shpalli të pafajshëm. Qeveria e Maqedonisë ka marrë nën përkujdesje Tarçullovskin, mbrojtjen e tij dhe familjen.
Ish-Ministri i Brendshëm maqedonas Lube Boshkovski dje paralajmëroi sërish kandidaturën e tij për president të vendit në zgjedhjet e ardhshme. Në një intervistë Boshkovski tha se shpresonte që të përfitonte edhe votat e shqiptarëve, edhe pse sic dihet ai ka qenë një nga të akuzuarit kryesor për krime lufte ndaj civilëve shqiptarë gjatë konfliktit të vitit 2001 në Luboten të Shkupit. Gjithsesi Haga e shpalli të pafajshëm Boshkovskin.

(s.g/Ina/BalkanWeb)

Llapjani_HH · 14-10-08, 18:54

Emiratet e Bashkuara Arabe e njohën Kosovën

Emiratet e Bashkuara Arabe e njohën sot pavarësinë e Kosovës, duke u bërë kështu shteti i parë arab që e njeh Kosovën.

"Emiratet e Bashkuara Arabe shpallin se e njohin Kosovën si shtet të pavarur", ka njoftuar WAM- agjencia zyrtare e lajmeve në EBA.

"Kjo lëvizje është në një linjë me përkrahjen për të drejtën legjitime të popullit për vetëvendosje", citon WAM, agjencia franceze e lajmeve(AFP).

Pesëdhjetë shtete, përfshirë shumicën e vendeve të BE-së dhe të SHBA-së e kanë njohur deri më tani Kosovën, e cila shpalli pavarësinë më 17 shkurt.

Emiratet e Bashkuara Arabe, janë aleat i SHBA-së dhe kanë një kontigjent në forcën ndërkombëtare të NATO-s të vendosur në Kosovë, që nga viti 1999.

Me këtë njohje numri i shteteve që pranojnë pavarësinë rritet në 51.

Emiratet e Bashkuara Arabe bëhen vendi i tretë që e njeh Kosovën pas Malit të Zi dhe Maqedonisë, që kur Asambleja e Përgjithshme e OKB-së votoi pro nismës serbe për ta dërguar çështjen e Kosovës në Gjykatën Ndërkombëtare të Drejtësisë.

Kjo Gjykatë tha të premten se ka marrë kërkesën nga Asambleja e Përgjithshme e OKB-së që të pronocohet mbi legjitimitetin e shpalljes së pavarësisë së Kosovës nga Serbia. /rel/

Mesazhi.com E martë, 14 Tetor 2008 18:23

Llapjani_HH · 15-10-08, 18:19

BE e bllokuar, thashethemet për ndarjen e Kosovës qarkullojnë

Shkruan: Sabinë Freizer

Përderisa misioni i Bashkimit Evropian vazhdon të jetë i bllokuar dhe thashethemet për ndarjen qarkullojnë, nuk është koha për komunitetin ndërkombëtar që ta injorojë Kosovën. Që prej shpalljes së pavarësisë më 17 shkurt, Kosova ka qenë në masë të madhe paqësore dhe stabile, por bota e jashtme nuk ka ofruar mbështetje adekuate për të garantuar paqen dhe për të siguruar shmangien e çdo përpjekjeje që synon ndarjen e vendit. Ndarjet midis Qeverisë së Kosovës dhe rajonet e kontrolluara nga serbët, janë thelluar edhe më shumë dhe prospektet për një shtet unitar janë duke u zbehur. Serbët e Kosovës kanë braktisur institucionet, përfshirë këtu policinë, gjyqësinë dhe doganat, aty ku deri vonë kanë punuar bashkërisht me shqiptarët e Kosovës. Misioni i Kombeve të Bashkuara, ndërkaq, tani është hija e asaj që ka qenë dikur, duke e pasur të humbur tashmë legjitimitetin tek shqiptarët e Kosovës dhe duke qenë i zhveshur nga funksionet ekzekutive që ka pasur para pavarësisë. Sektori i sigurisë, institucionet e sundimit të ligjit dhe shërbimet doganore janë të brishta dhe kanë nevojë për monitorim, ndërtim kapacitetesh dhe mbështetje për të cilën është ngarkuar misioni evropian EULEX. Por, serbët e Kosovës përgjithësisht refuzojnë të bashkëpunojnë me këtë mision, zbarkimi i të cilit gjithashtu është dëmtuar nga mosmarrëveshjet me Kombet e Bashkuara për dorëzimin e përgjegjësive. Prishtina deri më tash e ka pranuar këtë pezullim, por akoma shpreson që Bashkimi Evropian të ndihmojë në rimarrjen e kontrollit tek rajonet e banuara me serbë, veçanërisht në veri të lumit Ibër. Kosova është dhe do të jetë një test i rëndë për politikën e Bashkimit Evropian mbi sigurinë dhe mbrojtjen. Vullneti politik, i ndërtuar para vendimit të përbashkët të muajit shkurt për zbarkimin e EULEX it, është në shpërbërje e sipër dhe mungesa e vendosmërisë së bllokut evropian mund të dëshmohet si e rrezikshme për të ardhmen e Kosovës si një shtet i tërësishëm. Bashkimi Evropian nuk guxon ta humbasë këtë shans për të treguar se mund të jetë efektiv në Ballkanin Perëndimor. Për të ecur përpara, blloku duhet të punojë me Beogradin njëkohësisht dhe të mbajë Kosovën në agjendë, kur bëhet fjalë për hapat e ardhshëm drejt anëtarësimit të Serbisë në familjen evropiane. Bashkimi Evropian duhet të përfshihet në bisedimet midis Kombeve të Bashkuara dhe Beogradit në gjashtë fushat e bashkëpunimit, sa më shpejt që të jetë e mundshme, dhe njëkohësisht duhet të jetë funksional në gjithë Kosovën, deri në fund të vitit. Tani, më shumë se kurdo më parë, Bashkimi Evropian duhet të jetë unik në zbatimin e një politike të qëndrueshme për marrëdhënie me jashtë dhe çështje sigurie në Ballkan. (Autorja është drehtoreshë për Evropë e Grupit Ndërkombëtar të Krizave. Marrë nga "Transition Online")

QIK-u

Llapjani_HH · 15-10-08, 18:20

Ndarja e Kosovës

Shkruan: Shkëlzen Gashi

Pothuajse në fund të viteve 80-ta të shekullit të kaluar, Serbia fillon realizimin e projektit “Serbia e Madhe”. Fillimisht realizon pjesën e parë të projektit, duke suprimuar autonominë e Kosovës dhe Vojvodinës. Në përpjekjet e saj për ta realizuar pjesën e dytë të projektit, Serbia përkrah grupet e rebeluara serbe kundër Qeverisë së Kroacisë. Kuvendi i Kroacisë, duke e parë se Serbia synon ndarjen e pothuajse 1/3 së territorit të saj, më 25 qershor 1991, e shpallë Kroacinë shtet të pavarur dhe sovran. Kroacia, e vetëdijshme se Serbia do ta sulmojë pas shpalljes së pavarësisë, paraprakisht kërkon nga ShBA-të ndihmë për të përmirësuar armatimin e policisë, por ShBA refuzon një gjë të tillë për shkak të frikës se Kroacia më pas mund t’i shtypë serbët lokalë. Të mos harrojmë, në fillim ShBA ishte kategorikisht kundër ndarjes së Jugosllavisë. Serbia, përmes APJ-së, armatos serbët lokalë për të parandaluar pavarësinë e Kroacisë. Serbët shpallin mini republikën e tyre në Kroaci. Kroacia importon nga Hungaria armatim të sofistikuar. Përfaqësuesi i Kroacisë në RSFJ, Stipe Mesic', deklaron publikisht se Kroacia ose duhej të blente këtë armatim, ose, në vend të armatimit, të blente stilolapsë dhe me ta të shkruante “Ju lutem, mos na sulmoni”. Për më shumë, Mesic' e paralajmëron Serbinë se së shpejti në Knin do të valojë flamuri kroat. Në fillim të gushtit të vitit 1995, Kroacia vendos kontroll në tërë territorin e vet. Pra, Serbia pas dështimit në Slloveni dhe Maqedoni, dështon edhe në Kroaci. Një dekadë më vonë dështon edhe në Malin e Zi. Por, nuk mund të thuhet se Serbia ka dështuar në Bosnjë e Hercegovinë (për shkak të Marrëveshjes së Dejtonit) dhe në Kosovë (për shkak të Planit të Martti Ahtisaarit). Presidenti i Serbisë, Boris Tadic', në fillim të muajit tetor deklaroi se në qoftë se shterren të gjitha opcionet për zgjidhjen e problemit të Kosovës, atëherë, Serbia do ta shqyrtojë opcionin e ndarjes së Kosovës. Serbia momentalisht është e interesuar të realizojë planin A, i cili parasheh ruajtjen e Kosovës nën sovranitetin formal të Serbisë. Nëse dështon plani A, atëherë, vjen në shprehje plani B, i cili nënkupton ndarjen e Kosovës. Se çfarë do të ndodhë, varet edhe nga vendimi që do të marrë Gjykata Ndërkombëtare e Drejtësisë (GjND). Nëse mendimi këshillues i GjND-së është pozitiv për Serbinë, atëherë, Serbia nuk do të lëshojë pe nga plani A. Por, sipas të gjitha gjasave, GjND-ja do të deklarojë se nuk është nën juridiksionin e saj të japë mendim për shpalljen e njëanshme të pavarësisë së Kosovës ose do të japë mendim ambivalent. Në qoftë se mendimi i GjND-së nuk është krejt qartë në anën e Serbisë, atëherë, sipas të gjitha gjasave, Serbia do të përcaktohet për planin e dytë: ndarjen e Kosovës. Duhet thënë edhe se Serbia, përveç Kosovës, do të synojë ta ndajë edhe Bosnjë e Hercegovinën. Meqë u përmend GjND-ja, nuk është mirë të mos e përmendim margaritarin që na e ofroi një “konsulent i pavarur dhe kontribues” i një gazete proqeveritare. Sipas tij, Serbia ka lëshuar pe në favor të Kosovës sepse në fillim ka kërkuar opinionin këshillues të GjND-së se a është shpallja e njëanshme e pavarësisë së Kosovës në përputhje me Rezolutën 1244, ndërsa tani po kërkon të di nga GjND-ja se a është shpallja e njëanshme e pavarësisë së Kosovës në përputhje me të drejtën ndërkombëtare. Në të vërtetë, Serbia nuk ka lëshuar pe, ashtu siç po pretendon ‘konsulenti i pavarur’, por vetëm ka korigjuar kërkesën e saj sepse sikur Serbia të pyeste GjND-në se ‘a është shpallja e njëanshme e pavarësisë së Kosovës në përputhje me Rezolutën 1244’, atëherë, GjND-ja shumë lehtë do të mund të përgjigjej pozitivisht, meqë edhe teksti i shpalljes së pavarësisë së Kosovës e merr për bazë Rezolutën 1244. Sidoqoftë, deri në marrjen e vendimit të GjND-së, Qeveria e Kosovës do ta kompletojë implementimin e Planit të Martti Ahtisaarit për sa i përket krijimit të komunave të reja serbe dhe të krijimit të partneritetit të komunave serbe në Kosovë. Kështu, Qeveria e Kosovës do t’ia bëjë Serbisë edhe më të favorshme gjendjen terren për ta ndarë Kosovën. Shembulli më i mirë se trupat ndërkombëtare në Kosovë nuk do ta pengojnë ndarjen e Kosovës, është ndarja e Bosnjë Hercegovinës përkatësisht krijimi i entitetit kriminal të quajtur Republika Srpska. Po ashtu, shembull ilustrativ është edhe deportimi në prani të trupave ndërkombëtare i 11 mijë e 364 shqiptarëve nga veriu i Mitrovicës në natën mes 3 dhe 4 shkurtit të vitit 2000. Siç duket, Kryeministri i Kosovës është i vendosur që t’i pajis pjesëtarët e TMK-së me stilolapsë dhe t’i urdhëroj të shkruajnë “Ju lutem, mos e ndani Kosovën”.

QIK-u

uliksi31 · 15-10-08, 20:42

Citim:

Postimi origjinal është bërë nga Skyfter

Ka asi njerz qe kur te fundoset anija ankohen se i ka lag uji!

Jo keta jane si "magari", kur e ka honger ujku ka then; ishalla jame enderr.

Gjukanoviq kundër opozitës: Njohja e pavarsisë së Kosovës ishte një veprim serioz

postuar: 15.10.2008

Kryrministri malazez, Milo Gjukanoviq deklaroi se njohja e pavarësisë së Kosovës nga Mali i Zi ishte rezultati i një politike serioze shtetërore dhe shtoi se qeveria nuk ishte nxituar përsa i përket këtij vendimi.
"E dinim që ky do të ishte reagimi i Serbisë, por mendoj se nuk duhet të ndikohemi nga reagimet e askujt jashtë territorit të Malit të Zi në marrjen e vendimeve shtetërore, por nga mbrojtja e interesave tona strategjike kombëtare", deklaroi Gjukanoviç në një intervistë për televizionin serb B92.
Gjukanoviq deklaroi se qeveria malazeze nuk e kishte njohur pavarësinë e Kosovës më parë sepse e kishte konsideruar si një çështje shumë ndjeshme për Malin e Zi, që po përpiqej të mbante marrëdhënie të mira fqinjësie me Serbinë, Shqipërinë dhe Kosovën.

''Çështja e njohjes së pavarësisë së Kosovës u shqyrtua me shumë kujdes deri në momentet kur ishte e qartë se çdo vonesë do të nënkuptonte verbëri politike dhe mospërballje me realitetin politik'', shtoi Gjukanoviq. /lajme.net/

Llapjani_HH · 18-10-08, 18:51

Qeveria dhe opozita kundër propozimit të Hardinajt

Si Thaçi edhe AKR-ja dhe LDD-ja nuk mbështesin Haradinajn për ndarje të parave për serbët e Kosovës.

"Qesharake dhe e pamenduar mirë", është vlerësuar ideja e liderit të AAK-së, Ramush Haradinaj i cili i ka rekomanduar Qeverisë së Kosovës, të bëjë ndarje parash secilës familje serbe që ta kapërcejë dimrin. Kryeministri Thaçi, thotë se Haradinaj ka propozuar që të ndajë nga 5 mijë euro për secilin serbë për këtë dimër. Ndërsa zyrtarë të AAK-së thonë se bëhet fjalë për nga 2 mijë euro për familje. Megjithkëtë shefi i qeverisë, thotë se ideja e Haradinajt nuk mund të realizohet. Në krah të kryeministrit Thaçi janë rreshtuar edhe dy partitë opozitare: AKR-ja dhe LDD-ja. Edhe pse konsiderojnë se qeveria nuk ka një plan për ta zgjidhur problemin e veriut, një integrim serbësh, duke e blerë me para vullnetin e tyre, siç propozon Ramush Haradinaj, sipas tyre i konribuon më shumë ndarjes. Për sebët e Kosovës, të cilët nuk njohin pavarësisnë, e as institucionet e vendit ku jetojnë, nuk kryejn asnjë obligim ndaj shtetit. Lideri i AAK-së, Ramush Haradinaj, pak kohë me parë kishte propozuar se duhet t'u jepeshin para në dorë nga 2 mijë euro si përpjekje për integrim në shoqërinë kosovare. /kohavision/

18 Tetor 2008 Mesazhi.com

Jana · 21-10-08, 10:28

EULEX-i mund të vendoset vetëm si neutral ndaj statusit të Kosovës

EULEX-i mund të vendoset në Kosovë vetëm duke iu përmbajtur neutralitetit të statusit të Kosovës, ose ky është një imorativ nëse synohet që EULEX të nisë së funksionuari në Kosovë.
Kështu me anë të një letre sekretari i përgjithshëm i Kombeve të Bashkuara, Ban Ki-Moon iu ka drejtuar përfaqësuesit të lartë të Bashkimit Evropian, Javier Solana, shkruan në numrin e sotëm gazeta "Zëri", e cila pohon se posedon një kopje të kësaj letre.

Ban i përkujton Solanës pikat kryesore të procesit të rikonfigurimit të UNMIK-ut.

Ndërkohë UNMIK-u ka nënshkruar një marrëveshje teknike për shitjen e veturave dhe aseteve, ndërsa ndërtesa kryesore e UNMIK-ut i është dhënë EULEX-it për përdorim.

Jana · 21-10-08, 10:29

Qeveria gjermane: OK, planit prej 500.000 euro por me kushte

Kabineti gjerman i ka dhënë dritën jeshile 500 miliardë eurove ndihme për sektorin financiar, por duke vendosur njëkohësisht kushte mjaft të rrepta. Urdhëresa ligjore e qeverisë e cila u përcaktua dje përmban limite për pagat e menaxherëve bankarë dhe për shpërblimet.
Qeveria gjermane me paketën e shpëtimit për sektorin financiar do të marrë përsipër së pari vetëm bankat e landeve.

Banka e landit të Bavarisë, Bayern LB, do të marrë sot si bankë e parë shumën përkatëse nga paketa si mbështetje.

Ndihmat me kapital duhet të përkufizohen me dhjetë miliardë ndërkaq blerja e instrumenteve të rrezikshëm financiarë në pesë miliardë për çdo institut bankar. Po ashtu për çdo pagesë do të ketë taksa.

Jana · 21-10-08, 10:29

Topi shtyn vizitën për në Mal të Zi

Presidenti i Shqipërisë, Bamir Topi ka shtyrë një vizitë dy ditore të planifikuar për ta nisur të martën në Malin e Zi. BBC konfirmoi lajmin edhe nga burime të presidencës shqiptare.
Ende nuk janë dhënë arsye për shtyrjen e kësaj vizite, por mendohet se ato kanë lidhje me tensionet e ditëve të fundit në Malin e Zi të shkaktuara nga opozita proserbe, e cila kundërshton njohjen nga Podgorica të pavarësisë së Kosovës.

Gjithnjë sipas këtyre burimeve, vizita e presidentit Bamir Topi e planifikuar për të nisur të martën është shtyrë për një datë tjetër.

Jana · 21-10-08, 10:34

Krasniqi dënohet me 6 vite e gjysmë burg

Ish-komandant i UÇK-së në Maqedoni, Agim Krasniqi, u dënua të hënën me 6 vjet e gjysmë burg, për prishjen e procesit zgjedhor dhe posedim të armëve në ditën e zgjedhjeve më 1 qershor.
Në arsyetimin e Gjykatës thuhet se ai dhe grupi i tij kanë rrezikuar sigurinë e përgjithshme të qytetarëve dhe shoqërisë, dhe negativisht kanë ndikuar në vlerësimin e bashkësisë ndërkombëtare për rrjedhën e zgjedhjeve.

Grupi prej gjashtë vetave që shoqëruan Krasniqin në ditën e zgjedhjeve u dënuan me nga 6 vjet burg, ndërsa dy të tjerë me nga 5 vjet e gjysmë burg.

Të gjithë do të ngelen në paraburgim deri në hyrjen në fuqi të vendimit të Gjykatës.

Llapjani_HH · 23-10-08, 18:58

Prishtina kundër idesë së Ki Moon për vendosjen e EULEX në Kosovë
» Dërguar më: 23/10/2008 - 11:20

• Prishtina zyrtare reagon kundër kërkesës së Sekretarit të Përgjithshëm të OKB-së Ban Ki Muun mbi funksionimin e misionit të EULEX në Kosovë. Ban Ki Muun thotë që EULEX të vendoset në Kosovë vetëm duke iu përmbajtur neutralitetit të statusit të Kosovës.

PRISHTINE- Prishtina zyrtare reagon kundër kërkesës së Sekretarit të Përgjithshëm të OKB-së Ban Ki Muun mbi funksionimin e misionit të EULEX në Kosovë.

Nëpërmjet një letre, që Ban Ki Mun i dërgoi dje shefit të diplomacisë evropiane Havier Solana, kërkoi që misioni EULEX të jetë neutral në lidhje më statusin e Kosovës. Në letrën që Ban Ki Moon i ka dërguar zotit Solana, thuhet se EULEX-i mund të vendoset në Kosovë vetëm duke iu përmbajtur neutralitetit të statusit të Kosovës.

Pikërisht për këtë cështje reagon politika dhe analistët kosovarë. Udhëheqësit politikë kosovarë, thonë se misioni EULEX duhet të funksionjë në bazë të Kushtetutës së Kosovës. Analistët nga ana e tyre, thonë se kërkesa e Ban ki Mun, tregon qartë dallimet konceptuale, që kanë OKB-ja dhe BE-ja në lidhje me statusin e Kosovës.

Neutraliteti i EULEX-it thotë Ban ki Mun, shihet si imperativ, nëse synohet që EULEX-i të jetë funksional në Kosovë. Por udhëheqësit politik kosovar dhe analistët thonë se misioni i ri i BE-së duhet të funksionojë në bazë të Kushtetutës së Kosovës dhe jo të ketë një status neutral për faktin që për këtë nuk ka mandat. Udhëheqësit politikë rikujtojnë se kuvendi i Kosovës edhe në deklaratën e pavarësisë mirëpret misionin evropian, i cili ka për detyrë vetëm mbikqyrjen e zbatimit të pakos së Marti Ahtisarit, e cila Kosovën e përcakton shtet të pavarur. "Ne do ta zbatojmë pakon e Ahtisaarit. EULEX-i është një strukturë e përbërë nga vendet e BE-së dhe prezencës së Shteteve të Bashkuara të Amerikës, sepse kjo ka qenë ide dhe kërkesë edhe e jona dhe mendojmë se e gjithë veprimtaria e këtij misioni duhet të përputhet me pakon e Ahtisaarit. Mandat tjetër nuk ka", thotë presidenti Sejdiu për seksionin shqip të radios gjermane Dëelle.
Ndërkohë analisti i pavarur Driton Lajqi thotë kërkesa e Kombeve të Bashkuara që EULEX të jetë neutral në lidhje më statusin e Kosovës tregon qartë dallimet konceptuale, qe kanë kombet e Bashkuara dhe Bashkimi Evropian në lidhje me statusin e Kosovës. "Unë këtë e shoh edhe si një mungesë të gatishmërisë së Kombeve të Bashkuara që ta pranojnë realitetin e ri të krijuar në Kosovë dhe në anën tjetër mungëse të gatishmërisë për t´u përballur me strukturat paralele serbe në Kosovë dhe qeverinë e Beogradit", thotë Driton Lajqi.

Administrata e Kombeve të Bashkuara po përpiqet të gjejë forma për shtrirjen e misionit EULEX në të gjitha rajonet e Kosovës, por e ka të vështirë, sepse në vendbanimet serbe misioni EULEX nuk pranohet. Udhëheqësit politikë kosovarë vazhdimisht përsërisin se misioni EULEX nuk duhet të jetë zëvëndësues i UNMIK-ut, por duhet të ndihmojë institucionet e Kosovës ne vendosjen e rendit dhe ligjit në të gjitha rajonet e Kosovës përfshirë edhe vendbanimet serbe. Ata thonë se përzierja e pushteteve në Kosovë e bënë vendin jofunksional.

(s.g/BalkanWeb)

Llapjani_HH · 23-10-08, 19:00

“Ritmi i reformave” shkak për dorëheqjen e “reformatorit” të LDK-së, Blerim Kuçi

Blerim Kuçi, udhëheqës ekzekutiv i Lidhjes Demokratike të Kosovës ka ofruar dorëheqje 24 orë pas kërkesës që Presidenti i Kosovës, Fatmir Sejdiu ka kërkuar një gjë të tillë. Sipas Kuçit, kërkesa për dorëheqje është bërë për shkak të reformave në parti, e jo ngadalësimit apo stopimit të tyre. Ndërkohë asnjë zyrtar në Lidhjen Demokratike të Kosovës nuk ka bërë të ditur se kur do të mblidhet Kryesia për të shqyrtuar dorëheqjen e Kuçit.

Letrën me të cilën ka ofruar dorëheqjen Kuçi thuhet t’ia ketë dorëzuar nënkryetarit të LDK-së, Fadil Ferati, ndërkohë që ka qenë vetë Kuçi i cili konfirmoi ofrimin e dorëheqjes së tij, të mërkurën.

Kuçi ka thënë se arsyeja e kërkesës së presidentit Sejdiu, i cili mban të “ngrirë” postin e Kryetarit të LDK-së, ka qenë dinamika e reformave brenda partisë. Çudia qëndron se, sipas Kuçit, kërkesa për dorëheqje është bërë për shkak të reformave në parti e jo ngadalësimit apo stopimit të tyre. Kërkesa i është dorëzuar Kryesisë së partisë dhe asaj tani i mbetet ta procedojë atë më tej.

Presidenti Fatmir Sejdiu i cili e ka ngrirë postin e kryetarit të LDK-së, nuk ka dashur që të flas rreth kërkesës së tij për dorëheqjen e shefit ekzekutiv të partisë, Blerim Kuçi. Ndonëse vetë ka kërkuar dorëheqjen e Blerim Kuqit, presidenti Sejdiu ka vazhduar edhe sot që të mos jap sqarime pse e ka bërë një gjë të tillë.

Në pyetjen pse e ka kërkuar dorëheqjen e Blerim Kuçit, Sejdiu është përgjigjur : “Ju faleminderit, ju përshëndes, skam nevojë të komentoj kurrfarë komentesh tjera, të lutem dhe ju faleminderit shumë“

Nga ana tjetër, nënkryetari i LDK-së, Eqrem Kryeziu, mendon se arsyeja pse presidenti Sejdiu ka kërkuar që shefi i ekzekutivit të LDK-së të japë dorëheqje, mund të ketë qenë dinamika e shpejtë e punës së Kuçit, gjë që, sipas tij, ka qenë pothuaj e pamundur për pjesën tjetër të partisë që ta përcjellë atë ritëm.

“Është problemi që objektivisht zoti Kuçi ka një ritëm shumë të shpejtë të kërkesave, sesa që një mekanizëm shumë i madh mund ta përcjellë. Në atë shpejtësi, në atë energji shpeshherë bëhen do hapa që janë te përshpejtuar. Unë mendoj se kërkesat e tij për përshpejtime, në fakt të linin në një farë forme pa frymë në faza të caktuara", tha Kryeziu.

Megjithatë, Kryeziu pohon se pavarësisht zhvillimeve të fundit dhe disa pakënaqësive brenda partisë, reformat në Lidhjen Demokratike të Kosovës do të vazhdojnë.

Ndërkohë askush nga zyrtarët e lartë në Lidhjen Demokratike të Kosovës nuk ka bërë të ditur se kur do të mblidhet Kryesia për të shqyrtuar dorëheqjen e Kuçit.

| s.b & RTK staff |

Llapjani_HH · 24-10-08, 17:50

Serbët me peticion kundër EULEX-it

Mitrovicë, 24 tetor - Dje serbët në veri të Mitrovicës, ndërsa sot edhe në Kosovën qendrore kanë filluar nënshkrimin e një peticioni, me të cilin kundërshtojnë vendosjen e misionit evropian në Kosovë, EULEX. Nënshkrimi i këtij peticioni është iniciuar me moton "Stop EULEX it". Kryetari i të ashtuquajturit "Kuvend i Komunave Serbe në Kosovë," Radovan Niciq, ka deklaruar se "misioni EULEX ka shumë mangësi, por më e madhja është se synon të zbatojë planin e Marti Ahtisarit" si dhe "instrumentalizimin e një shteti, një krijesë kriminale në hapësirën e Kosovës". Serbët e Kosovës e konsiderojnë të jashtëligjshëm këtë mision sepse sipas tyre, nuk ka marrë miratimin e Këshillit të Sigurimit të OKB së dhe Serbisë.

QIK

Llapjani_HH · 24-10-08, 17:52

Këshilli i Sigurimit më 7 nëntor miraton ardhjen e EULEX-it në Kosovë ?

Këshilli i Sigurimit sipas të gjitha gjasave më 7 nëntor do të miratojë ardhjen e EULEX-it në Kosovë. "Me vendimin e Këshillit të Sigurimit të KB do të përmbushen të tria kushtet për ardhjen e EULEX-it, në të cilat ka insistuar presidenti i Serbisë Boris Tadiq", kanë thënë burime diplomatike për gazetën "Veçernje novosti" të Beogradit.

Tadiq ka thënë se EULEX është i pranueshëm për Serbinë me tri kushte: që misioni i BE të miratohet nga Këshilli i Sigurimit të KB, të jetë neutral sa i përket statusit të Kosovës dhe që të mos zbatohet plani i Ahtisarit. Sipas gazetës burimet diplomatike nuk kanë saktësuar se në cilën formë KS i OKB-së do të përmbushë kushtet e Tadiqit - a do të jetë kjo një rezolutë e re apo komunikatë, por kanë theksuar se kërkesat e kreut të shtetit të Serbisë do të respektohen.

RTK

Llapjani_HH · 27-10-08, 17:24

Prishtina nuk do të qeverisë me veriun e Kosovës, as Beogradi me Prishtinën

Beograd, 27 tetor

Ish-ministri i jashtëm jugosllav Goran Svilanoviq, duke komentuar deklaratën e djeshme të ish-kryeministrit Agim Çeku, tha se askush nuk guxon të nënçmojë gatishmërinë e Serbisë. "Nëse dikush beson se Prishtina do të qeverisë me veriun e Kosovës, mendoj që gabon shumë, sikur që gabon çdokush në Beograd që beson se Beogradi do të qeverisë me Prishtinën. Këto gjëra nuk do të ndodhin", ka thënë Svilanoviq, i cili ka shtuar se qeveria e Serbisë dhe ajo e Kosovës duhet të përgatiten për dialog, i cili do të zhvillohej për çështjet jetësore të qytetarëve. Ish-kryeministri i Kosovës dhe aktualisht kryetar i PSDK, Agim Çeku ka propozuar që qeveria e Kosovës veriun e vendit ta shpallë zonë të interesit të veçantë si mënyrë për ta rritur përqendrimin institucional në këtë pjesë të vendit të kontrolluar nga Beogradi. Çeku nuk ka përjashtuar madje as mundësinë e përdorimit të forcës për ta vënë veriun e Kosovës nën autoritet të institucioneve të Prishtinës.

QIK-u