''RIKTHIMI I BERISHES ESHTE I RREZIKSHEM''?

[Odise]

Deklarata e kryetarit të komitetit amerikan për zgjerimin e NATO-s dje në Tiranë

"Rikthimi i Berishës është i rrezikshëm"
Brus Xhekson: Dëmton integrimin e Shqipërisë




Edlira Prenga

Brus Xhekson, lëshoi dje mesazhin e mos ndryshimit të qeverisjes në vendin tonë. kryetari i komitetit amerikan për zgjerimin e NATO-s ndodhej dje në Tiranë. Këtë herë, për të sjellë një tjetër mesazh amerikan për Shqipërinë. Deklarata e bërë dje se rikthimi i një qeverisje si ajo e viti `92-`96, do të përbënte një rrezik serioz për integrimin e Shqipërisë në BE, është një paralajmërim i qartë se ndryshimi nuk duhet të ndodhë.

LAJMI

Zgjedhjet që do të bëjnë votuesit shqiptarë do të ndikojnë jo vetëm në të ardhmen e vendit të tyre, por edhe në stabilitetin e Ballkanit Perëndimor dhe indirekt në Europë e SHBA", theksoi Xhekson, sipas të cilit, "pa patur një udhëheqje të moderuar në Tiranë shpresat që kemi për zgjidhjen e një të ardhmeje demokratike për Kosovën, do të jenë më të varfra". Ai shton se: pa një Shqipëri bashkëpunuese, sfida e Maqedonisë për të integruar popullsinë maqedonase dhe etnike shqiptare do të jetë akoma dhe më e vështirë. Pa modernizur dhe zhvilluar Shqipërinë, perspektiva e zhvillimit ekonomik në Ballkanin Perendimor do të zvogëlohet dhe pa një Shqipëri liberale në rrugën drejt Europës, projektit të ndërtimit të një paqeje të qëndrueshme në Ballkan do t'i duhen vite më tepër", shtoi ai. Xhekson deklaroi se: Duhet të afirmohet dëshira e Shqipërisë për NATO-n dhe BE-në. Kështu u shpreh dje Brus Xhekson, Kryetari i Komitetit Amerikan për Zgjerimin e NATO-s, duke sjellë në Tiranë një mesazh të qartë nga SHBA. Xhekson, një nga përfaqësuesit e lobit republikan në Kongresin amerikan, por edhe i njohur si mbështetës i revolucionit portokalli në Ukrainë, ndodhej dje në kryeqytet për të bërë publik shqetësimin e organizatës së drejtuar prej tij për problemet e fushatës zgjedhore në Shqipëri.
"Jemi të shqetësuar që të mos ketë asnjë shfaqje të idesë së kthimit të formës së qeverisjes të vitit `92-`97, pasi kjo do të jetë shkatërruese për integrimin e Shqipërisë dhe ecjes drejt demokracisë", vuri në dukje Xhekson në konferencën e tij për shtyp, duke cituar se në Amerikë do të botohet një shkrim mbi këto çështje shqetësuese. Kryetari i Komitetit Amerikan, Brus Xhekson dha dje paralajmërimin e qartë në emër të grupit që përfaqëson, se duhet një udhëheqje e moderuar që të mos këtë rrezik për të ardhmen e Kosovës dhe të Ballkanit Perëndimor. Duke bërë të qartë se ishte republikan në SHBA, por që sillte dhe mesazhin e demokratëve, që sipas tij i shohin me të njëjtin shqetësim mundësinë e kthimit të situatave të tetë viteve më parë. Xhekson në deklaratat e tij ka mbajtur një qëndrim kritik ndaj opozitës aktuale dhe e përqëndruar mendimin e tij në deklaratën se rikthimi i qeverisjes së viteve 1992-1997 është shumë i rrezikshëm për vendin. Xhekson në drejtimin e komitetit pranë NATO-s ka bërë vazhdimisht lobing pro anëtarësimit të Shqipërisë në këtë organizatë të rëndësishme. Ky kontribut i tij i vazhdueshëm është vlerësuar vazhdimisht nga ana e qeverisë Shqiptare. Xhekson është përfaqësues republikan, (që janë në pushtet me Presidentin Bush në SHBA). Ai e ka pohuar vetë këtë dje në Tiranë gjatë konferencës për shtyp që ka dhënë.