Koalicioni i parë LDK-PDK

[Dilaver]

Lutfi Haziri është në gjendje të bëjë koalicion edhe me djallin, vetëm për t`iu hakmarrë kryetarit të Komunës nga radhët e dardanëve të Nexhat Dacit.

Nebih Maxhuni
Gjilan,28 shkurt – Dardanët e Nexhat Daci në Gjilan kanë humbur pozitën e kryeshefit në këtë komunë. Përpjekjet e kryetarit të Komunës, nga radhët e dardanëve, Xhemail Hyseni që Komuna të udhëhiqet nga kryeshefi i LDD-së të Dacit, kanë marrë fund.
Një marrëveshje mes opozitës në Gjilan, Partisë Demokratike të Kosovës dhe LDK-së së Lutfi Hazirit, ka bërë që pozita e kryeshefit t`i takojë PDK-së, Dega në Gjilan.
Kjo marrëveshje fillimisht i mundëson PDK-së që të propozojë një kandidat si ushtrues detyre të kryeshefit ekzekutiv.
Këtë e ka bërë PDK-ja qysh sot dhe ka emëruar Kabil Osmanin, ushtrues detyre të kryeshefit. Osmani ka filluar punën pas marrjes së bekimit të 21 votave të mbledhura nga këshilltarët komunalë të Gjilanit nga radhët e LDK-së dhe PDK-së.
Qemajl Mustafa, kryetari i PDK-së në Gjilan, thotë se ky nuk është koalicion qeverisës, por vetëm marrëveshje për të vendosur një kryeshef unifikues në krye të qeverisë komunale.
“Kemi bërë marrëveshje me LDK-në, me krahun e Fatmir Sejdiut, me Lutfi Hazirin, nuk është koalicion për të qeverisur, por është marrëveshje vetëm për ta vendosur ushtruesin e detyrës së kryeshefit”, thotë kryetari i PDK-së në Gjilan.
Sipas Mustafës, u.d. i kryeshefit nuk është anëtar i PDK-së, por që anon nga kjo parti.
“Kjo është hakmarrje. Lutfi Haziri është në gjendje të bëjë koalicion edhe me djallin, vetëm e vetëm që të më hakmerret”, i ka komentuar zhvillimet e fundit Xhemail Hyseni, kryetari i Komunës nga radhët e LDD-së së Nexhat Dacit.
Ai ka kundërshtuar këtë marrëveshje duke propozuar që të pritet deri në zgjedhjet e sivjetme dhe të vendoset nga vota e lirë se kush do të udhëheqë me komunën.
Kandidatin për u.d. të kryeshefit e ka propozuar PDK-ja.
“Kandidatin të cilin e ka propozuar PDK-ja, është një kandidat i cili spikatet me aspektet profesionale, nuk ka qenë i involvuar në asnjërën nga partitë dhe qëllim yni ka qenë që të emërohet ky njeri në qeveri, sepse është element unifikues, element profesional dhe në qytet ka reflektuar shumë pozitivisht, reaksionet janë shumë të mira”, ka thënë kryetari i PDKsë.
Kjo marrëveshje është cilësuar edhe si një hap drejt koalicionit LDK-PDK për të udhëhequr Kuvendin komunal të Gjilanit.
Mustafa thotë se të dy partitë, LDK-ja dhe PDK-ja janë të interesuara që punët të ecin normalisht në këtë komunë dhe që të mos ketë bllokime në KK shkaku i interesave të grupeve të caktuara individësh.
“LDK-ja dhe PDK-ja definitivisht janë të interesuara që të ketë rregull dhe rend në Komunë. Ato forca së shpejti do ta marrin Komunën”, është i bindur kryetari i PDK-së.
Por, nëse vendoset për një koalicion mes dy partive më të mëdha në vend, PDK-ja përveç kryeshefit do të kërkojë edhe më shuam se gjysmën e drejtorive komunale.
“Nëse vendosim që të shkojmë në qeverisje, kërkesat tona mund të shkojnë edhe më tutje, por ende nuk jemi ulur për të folur me LDK-në për koalicionin”, tregon ai.
Negociatat për bashkëqeverisje mes LDK-së dhe PDK-së, Mustafa thotë se duhet të zhvillohen në Prishtinë mes liderit të PDK-së, Hashim Thaçi dhe Eqrem Kryeziut, nënkryetarit të parë të LDK-së.
“Nëse vendosim për koalicion të përbashkët LDK- PDK, deri në zgjedhjet e ardhshme, këtë duhet ta bëjnë partitë në qendër”, shpjegon ai.
Kabil Osmani u.d. i kryeshefit, ka qenë shef i zyrës së projekteve pranë kryeshefit ekzekutiv të Komunës së Gjilanit. Ai, sipas Mustafës, ka relacione të mira me të gjithë drejtorët e drejtorive komunale dhe shërbyesit civil në këtë komunë.
Kryetari i PDK-së ka fajësuar LDD-në e Nexhat Dacit si përgjegjësit kryesor të bllokimit të punëve në KK të Gjilanit, duke thënë se ata e kanë çuar Komunën drejt një kolapsi të madh.
Konkursi për kryeshef ekzekutiv do të mbetet i hapur 14 ditë që nga shpallja e tij dhe me gjasë, pas kësaj periudhe, zyrtarisht do të emërohet në postin e kryeshefit kandidati i propozuar nga PDK-ja.
Mosmarrëveshjet PDK-LDD në këtë komunë kanë filluar shumë më herët, kur kryetari i Komunës, Xhemail Hyseni i kishte vazhduar disa herë kontratën e punës ish-kryeshefit Enver Muja.