Lajme

[Anonimja D]

Komandanti i TMK-së Agim Çeku nesër në orën 9h00 të mëngjesit do të paraqitet para gjykatësit hetues në Kranj





Arrestimin e ka konfirmuar edhe Shtabi i Përgjithshëm i TMK-së. Shemsi Syla, zëdhënës i TMK-së, ka shfaqur shpresën se fjala është për një keqkuptim. “Besojmë se është një spekulim ashtu siç është bërë me zotin Thaçi, që ndodhi kohë më par. Deri me tani nuk kemi konfirmim zyrtar se gjeneral Çeku është liruar, ai ende mbahet nën arrest nga Ministria e punëve të brendëshme të Sllovenisë.

Ndërkaq, Ana Di Leilo këshilltare e Endru Komings, koordinator i UNMIK-ut për TMK-në, nuk ka mundur të jep kurfarë informacionesh, lidhur me akuzën nën të cilën është arrestuar gjenral Çekut. “Ne nuk e dimë, kjo nuk është në kompetencat tona por në kompetencat e Departamentit të drejtësisë pranë UNMIK-ut, të cilët janë në kontakte me autoritetet e Sllovenisë dhe ne nuk mundemi që t’iu japim informata më të hollësishme”, ka deklaruar Di Leilo.

Përndryshe, arrestimi i komandantit të TMK-së gjenerallejtnant Agim Çeku është bërë sot (më 22 tetor) rreth ores 13h00 në aeroportin Bërnik të Lubjanës. Vetë komandant Agim Çeku në bisedë telefonike për gazetën "Java", menjëherë pas arrestimit, ka deklaruar se është arrestuar në aeroportin e Bërnikut gjatë kontrollimit të pasaportave. Atij i është thënë se arrestimi bëhet me kërkesë të qeverisë së Serbisë e cila ka përpiluar për të një fletëarrest ndërkombëtar. Ai ka thënë se beson se lirimi i tij do të bëhet së shpejti, nëse ka drejtësi. "Nuk ka arsye tjetër për arrestim, përpos aktakuzave të Serbisë" ka theksuar gjeneral Çeku.

Zëdhënësi i policisë së Kranjit të Sllovenisë, Zdenko Guzi, i ka konfirmuar RTK-së, se gjeneral Çeku është arrestuar rreth orës 13 e 30 minuta në aeroportin “Bërnik” në Lubjanë, pas një fletarresti të lëshuar nga INTERPOL-i.

Ndalimin e gjeneral Çekut e ka konfirmuar edhe gjenerali Erdrju Kamings, koodinator i UNMIK-ut për bashkëpunim me TMK-në. Edhe Neraj Sing, zedhenes i Shtylles se Parë të UNMIK-ut, ka konfirmuar per radion Blue Sky arestimin e gjeneralit Çeku, por nuk ka dhënë më shumë detaje lidhur me rastin. Evropa e Lirë citon gjeneralin Çeku, t’i ketë deklaruar agjencisë amerikane Asoshieted press, se atij i është komunikuar se është arrestuar me kërkesën e Sërbisë, e cila ndaj tij ka lëshuar fletarrestin ndërkombëtarë, ndërkaq agjencisë Frans Pres i ka deklaruar, perms telefonit cellular, se aktualisht po mbahet, në një kthinë të vogël, nën mbikqyrjen e officerëve të policisë. Sot në Kranj është mbajtur një konferencë për gazetarë, në të cilën është njoftuar vetëm për arrestimin e gjeneral Çekut, por nuk janë dhënë hollësi tjera. Në konferencë është njoftuar se rasti i është dorëzuar gjykatësit hetues i cili do ta sjellë vendimin përfundimtar. Përkundër qarkullimit të informacioneve jozyrtare për lirimin e komandantit të TMK-së, megjithat]atë ai nesër në orën 9h00 do të paraqitet para gjykatësit hetues në Kranj, i cili do ta merrë vendimin definitive lidhur me këtë rast.





Nga: sb/blueskystaff më Oct 22, 03 | 5:58 pm









© BlueSkyLive.com

Design & Hosting : preeMedia.com

[Flash]

Shefi i diplomacisë së Bashkimit Evropian, Havier Solana do të vizitojë më 23 e 24 tetor Beogradin dhe Prishtinëb, njoftoi sot Zyra e përfaqësuesit të lartë për politikë të jashtme dhe siguri në Bruksel.

Vizita synon zhvillimin e marrëdhënieve të BE-së dhe vendeve të Ballkanit në të gjitha fushat, zhvillimin e politikës së brendshme të vendeve të rajonit dhe fillimin e paradokohshëm të dialogut ndërmjet Beogradit dhe Prishtinës.

Solana në Beograd do të takohet me presidentin serbo-malazez Svetozar Maroviq dhe me zv.kryeministrin serb Nebojsha Çoviq, por edhe me kryeministrin serb Zhivkoviq dhe atë malazez Gjukanoviq.

Një ditë më vonë, më 24 tetor, Solana do të qëndrojë në Prishtinë ku do të bisedojë me presidfntin e Kosovës Ibrahim Rugova, me kryeministrin Bajram Rexhepi dhe me kryeparlamentarin Nexhat Daci.

Gjithashtu janë paraparë edhe bisedime me shefin e UNMIK-ut Hari Holkeri, me komandantin e KFOR-it, gjeneralin Holger Kamerof, si dhe me përfaqësuesist politikë shqiptarë dhe serbë, thuhet në një njoftim të Zyrës së Havier Solanës në Bruksel.

[Flash]

Muhamet Hamiti, zëdhënës i Presidentit të Kosovës Ibrahim Rugova, e ka dënuar sot ashpër ndalimin nga autoritetet sllovene të gjeneral Agim Çekut, komandant i përgjithshëm i Trupave Mbrojtëse të Kosovës.Në deklaratë thuhet:“Ndalimi i Gjeneral Çekut është akt i papranueshëm për institucionet dhe popullin e Kosovës. Autoritetet sllovene nuk kanë të drejtë që mbi baza të akuzave të konstruktuara të një shtetit fqi të Kosovës të ndalojnë personalitete të shquara apo qytetarë të Kosovës.

Për popullin e Kosovës fletarrestet e Beogradit janë të papranueshme. Prandaj, kërkojmë nga autoritetet sllovene që të lirojnë menjëherë gjeneral Agim Çekun dhe ta trajtojnë atë në pajtim me personalitetin e tij dhe postin që ai mban në Trupat e Mbrojtjes së Kosovës.”

[fadil]

Gjykata e Qarkut në Nish akuzon Çekun për "gjenocid të ushtruar mbi serbët pas hyrjes së KFOR-it në Kosovë"





Nish, 22 tetor - Mediat serbe bëjnë të ditur se gjyqtarja hetuese e Gjykatës së Qarkut në Prishtinë, që vepron në Nish, Danica Marinkoviq, ka thënë se fletarresti ndërkombëtar ndaj gjeneralit Çeku është lëshuar për shkak të siç thuhet "gjenocid të ushtruar mbi serbët pas hyrjes së KFOR-it në Kosovë". Ajo ka thënë se në vitin 1999 kishte filluar hetimet ndaj gjeneral Çekut, për shkak të përgjegjësisë komanduese. Sipas saj, z. Çeku ngarkohet për vrasjen e 669 serbëve dhe 18 pjesëtarëve të minoriteteve tjera, si edhe për shkaktimin e plagëve e lëndimeve të rënda të 518 personave dhe ndalimin e 584 të tjerëve. Danica Markoviqi ka thënë se për të jëjtën vepër penale ishte ngritur aktakuzë edhe nga kryetarit të Partisë Demokratike të Kosovës, Hashim Thaçit.

[fadil]

Ministria e Shërbimeve Publike synon evitimin e mangesive ne menagjimin e pushtetit lokal





Prishtinë, 23 tetor - Ministria e Shërbimeve Publike ka përgatitur një memorandum mbi reformimin e pushtetit lokal në Kosovë. Kështu u njoftua nga zyrtarët e kësaj ministrie, pas mledhjes me kryeshefat ekzekutivë të komunave. Në takim u tha se synim i memorandumit është evitimi i mangësive të shumta në menaxhimin e pushtetit lokal, të cilat konsiderohet se janë pasojë e mungesës së kompetencave të qeverive lokale. Drejtori i departamenti të Administratë lokale, Hysni Bajrami, tha se memorandumi për reformimin e qeverisjes komunale, do të jetë në përputhje me kartën evropiane mbi autonomin lokale. Ministri i Shërbimeve Publike të Kosovës, Jakup Krasniqi, theksoi edhe nevojën për ndryshimin sa më të shpejtë të procedurës për vazhdimin e dokumenteve të udhëtimit. Sipas disa kryeshefave ekzekutivë të komunave, një ndër pengesat kryesore për funksionim efikas të pushtetit lokal është edhe rregullorja 2000/45 mbi qeverisjen lokale, e cila vlerësohet e tejkaluar.

[Dilaver]

Solana tha se "nëse dialogu nuk funksionon, konsekuencat nuk do të jenë të mira për askënd"



Londër, 25 tetor - Përfaqësuesi i lartë i Bashkimit Evropian për Politikë të Jashtme, Havier Solana, në përfundim të vizitës në Prishtinë, deklaori se është i kënaqur me takimet që pati. "Mendoj se ishte vizitë e mirë, konstruktive. Pata rastin të takohem me zotin Holkeri, me të gjithë liderët e Kosovës dhe mendoj se dialogu mes nesh ka qenë shumë konstruktiv, pozitiv dhe shpresoj shumë se ata do ta shqyrtojnë me shumë seriozitet ofertën që do tua bëjë atyre zoti Holkeri", tha Solana për BBC-në.

Solana tha se suksesi i dialogut do të jetë shumë më relevant nëse përfshihen institucionet e Kosovës. "Ai nuk është debat midis shoqërive civile, por debat midis një qeverie me një qeveri tjetër për çështje që u përkasin dy qeverive me bashkëpunimin e bashkësisë ndërkombëtare përmes zotit Holkeri dhe ekipit të tij", u shpreh Solana. Por, sipas Solanës, "nëse dialogu nuk funksionon, konsekuencat nuk do të jenë të mira për askënd, por në veçanti për qytetarët e Kosovës".

[fadil]

TENTOHET TE BASTISET FAMILJA E FAMILJES JASHARI?!



Disa patrulla të forcave franceze të KFOR-it, mbrëmë rreth orës 18.00 kanë tentuar të hyjnë në familjen Jashari të Prekazit, por pas reagimit të banorëve të lagjes, ata janë tërhequr. Ky gjest i ka irituar banorët e lagjes dhe të gjithë qytetarët e Skënderajt, pasi patrullat nuk kanë pasur ndonjë urdhër për kontroll. Nga komanda e KFOR-it, në Mitrovicë janë marrë premtime se një gjë e tillë nuk do të ndodhë më.

[fadil]

Zyrtarët e Serbisë i kërkojnë UNMIK-ut ”gjykimin e krimeve të kryera në Kosovë” kundër serbëve

Fahri Musliu

26 tetor 2003 (18:15 UTC)





Ministri serb i Drejtësisë, Vlladan Batiç, në një letër të hapur drejtuar Administratorit të OKB-së për Kosovën, Hari Holkeri, të cilën e publikoi të djelën përmes mediave elektronike, kërkon që zoti Agim Çeku të shkarkohet nga posti i komandantit të Trupave Mbrojtëse të Kosovës, sepse ”është komprometuese për bashkësinë ndërkombëtare që njeriu i cili ka kyer krime, të jetë në një post kaq të lartë”.

Ministri Batiç kërkon gjithashtu që zotërinjve Agim Çeku, Hashim Thaçi dhe Ramush Haradinaj t’u merren pasaportat dhe t’u pengohet largimi nga Kosova.



Në letër thuhet se Ministria serbe e Drejtësisë ka kërkuar tri herë zyrtarisht nga ish-shefi i UNMIK-ut, Mihail Shtajner, që ata t’u dorëzohen autoriteteve serbe për vuajtjen e dënimit. Mirëpo, UNMIK-u kurrë nuk ka kërkuar ndonjë dokumentacion ”për këto apo krimet të tjera”, ndonëse Ministria serbe e Drejtësisë, me vetë iniciativën e saj, ia ka dorëzuar UNMIK-ut të gjitha ato që i ajo i ”quan prova voluminoze”, thuhet në letër.



Zoti Batiç thekson se ”veprat penale për të cilat ngarkohen zotërinjtë Çeku, Thaçi dhe Haradinaj, janë kryer para ardhjes së UNMIK-ut në Kosovë, për ç’ka procedimi i tyre është në kompetencën e organeve gjyqësore të Serbisë”. Ai rikujton se zoti Thaçi është dënuar nga gjykata serbe në vitin 1997 për terrorizëm dhe se kundër zotërinjve Çeku dhe Haradinaj po zhvillohen hetime: kundër zotit Çeku për gjenocid, ndërsa kundër zotit Hardinaj për terrorizëm.



”Në qoftë se mbeteni në qëndrimin tuaj se për këta persona janë kompetente organet gjyqësore të Kosovës, atëherë arrestojini dhe gjykojini”, thekson Batiç në letër.



Ndërkaq, Prokurori i Posaçëm i Serbisë për Krimet e Luftës, Vlladimir Vukçeviç, deklaroi për mjetet e shtypit në Beograd se është "përpunuar" rasti i varrezave masive me trupat e shqiptarëve të Kosovës në Batajnicë, afër Beogradit dhe po vazhdojnë hetimet ndaj personave të panjohur. ”Në këtë rast kanë qenë të implikuar shumë njerëz, përfshirë edhe shoferët, të cilët nuk kanë raportuar për këto raste, edhe pse kanë patur dijeni për ç’ka ka ndodhur dhe nga janë kufomat”, thotë prokurori Vukçeviç.



Ditë më parë Zyra e Komisionerit të lartë të OKB-së për të Drejtat e Njeriut në Beograd ftoi autoritet serbe të formojnë një komision të posaçëm, i cili do të merrej hetimet mbi varrezave masive në Serbi. ”Ky komision do të përbëhej nga specialistë të pavarur dhe paanshëm, si dhe do të kryente hetime të plota”, tha zonja Lori Vajzberg, shefe këtij Misioni, duke theksuar posaçërisht varrin masiv në Batajnicë pranë Beogradit me afër 900 kufoma shqiptarësh, por edhe varrezat në fshatrat Petrovë dhe Peruçac.



Këto varre janë zbuluar para dy vjetësh, kurse autoritetet serbe deri më tani nuk kanë nisur asnjë procedurë gjyqësore. //az//

[fadil]

Kryeministri Rexhepi: Dialogu Prishtinë-Beograd, në kohën dhe kushtet e përshtatshme

Ilir Ikonomi

30 tetor 2003, 20:45 UTC





Zëri i Amerikës: Zoti Kryeministër, si e vlerësoni raportin e zotit Holkeri?

Bajram Rexhepi: Ndoshta është herët dhe unë nuk kisha dashur ta vlerësoj raportin për arsye se ishte kohë e shkurtër e zotit Holkeri si kryeadministrator dhe mendoj që shumica e hapësirës së raportit tremujor është e mbuluar me çështjen e dialogut, për arsye se ai ishte edhe aktiviteti kryesor i zotit Holkeri, por po ashtu edhe dhuna, incidentet të cilat kanë ndodhur në muajt dhe javët e kaluara, pra kemi pritur që në një raport tremujor të tillë, kryesisht vëmendja do të përqendrohet në çështjen e dialogut dhe çështjen e incidenteve, dhunës, vrasjeve që kanë ndodhur sidomos të disa pjesëtarëve të komunitetit serb. Mirëpo megjithatë pozitive është se zoti Holkeri është angazhuar për operacionalizimin e standardeve, i cili do të jetë një projekt i përbashkët me UNMIK-un dhe është një gjasë e mirë që të bëhet përparimi në fusha të caktuara dhe secili do të ketë të definuar se për çka është përgjegjës dhe angazhimi për vazhdimin e procesit të provatizimit dhe po ashtu mënyra indirekte e kërkesës që për përgjegjësitë të cilat janë të rezervuara, Këshilli i Sigurimit të ketë konsideratë dhe me ndonjë vendim të posaçëm t’i krijojë mundësitë që edhe ato në një të ardhme të afërt të transferohen në institucionet e Kosovës.



Zëri i Amerikës: Zoti Kryeministër, ju përmendët dialogun, por zoti Holkeri shprehu pakënaqësinë për mospjesëmarrjen tuaj në takimin e Vienës, duke shfaqur natyrisht shpresën se ju do të përfshiheni në procesin e bisedimeve me Beogradin, me themelimin e grupeve të punës. Por cili është në thelb qëndrimi juaj ndaj këtij procesi?



Bajram Rexhepi:Por mendoj, unë edhe me prononcimet e mia dhe në qëndrimin unanim të qeverisë, ne ndjekim vijën institucionale, kemi kërkuar që parlamenti të mbajë një qëndrim politik, me një konsensus, pro ose kundër dialogut, ajo ishte arsyeja që unë si kryeministër dhe anëtarë të tjerë të qeverisë nuk kemi marrë pjesë, për arsye se kemi menduar se shkuarja pa një përgatitje të mirëfilltë do të kishte konsekuenca në punën e mëtejshme të qeverisë. Megjithatë mendoj se nuk është vetëm kërkesa e zotit Holkeri, por edhe e Këshillit të Sigurimit, Unionit Evropian dhe në përgjithësi faktorit ndërkombëtar se dialogu duhet të vazhdojë dhe ne po ashtu nuk jemi në princip kundër dialogut, mirëpo mendoj që duhet të gjendet një formë më optimale për pjesëmarrjen e qeverisë dhe mendoj se kjo mund të ndodhë nëpërmjet operacionalizimit të standardeve, ku do të krijohen grupet punuese për secilin standard veç e veç dhe ne kuadër të këtyre standardeve ku është edhe dialogu, mund të gjendet forma edhe e kyçjes së pjesës teknike të qeverisë në dialogun e ardhshëm në kohën e përshtatshme.



Zëri i Amerikës: Zoti Kryeministër, cili është vlerësimi juaj për gjendjen e sigurisë për serbët në Kosovë?



Bajram Rexhepi: Po mendoj se gjendja e sigurisë është shumë më e mirë se më parë, megjithatë incidentet të cilat ishin karakteristikë e dy-tre muajve të kaluar dhe sidomos në momentin e ardhjes së zotit Holkeri, ishin ato që në një mënyrë e tronditën këtë regjion, për arsye se ishin disa vrasje makabre të fëmijëve serbë dhe ne ende e paguajmë në një mënyrë çmimin e të gjitha këtyre krimeve, edhe sepse ne jemi pala më e interesuar që këto raste të zbardhen sa më shpejt dhe në përgjithësi mund të them se tani, pas asaj vale dhune, situata është më e mirë, por megjithatë mbeten shumë raste të pandriçuara dhe unë edhe një herë e potencoj se nuk është interesi i kosovarëve që të ketë raste të tilla të dhunës dhe ne do të donim që gjyqësia dhe policia të jetë shumë më efikase dhe sa më shpejt t’i ndriçojë këto raste.



Zëri i Amerikës:Zoti kryeministër, Administratori Holkeri ju kritikoi juve për mosshkuarjen në Vienë por as ju nuk e keni kursyer UNMIK-un nga kritikat sidomos për tolerimin e korrupsionit dhe të prostitucionit. Na thoni ju lutem ku i mbeshtesni këto kritika?



Bajram Rexhepi:Unë do të shtoja edhe diçka tjetër: Po ashtu mund të jetë edhe një kritikë se pse përfaqësuesit vendorë nuk marrin pjesë në Këshillin e Sigurimit, që edhe ata të paraqesin pikëpamjen e vet të zhvillimeve aktuale në Kosovë, ku sigurisht përveç atyre që ka prezantuar zoti Holkeri do të kishte edhe çështje të tjera, të cilat janë prioritete të qeverisë, mirëpo ky është realiteti ynë. Ndërsa përsa i përket korrupsionit dhe krimit ekonomik, ne që prej fillimit, që pas ardhjes së zotit Shtajner si kryeadministrator, me formulën e famshme “zero tolerancë kundër krimit të organizuar, krimit ekonomik, korrupsionit”, e kemi përkrahur plotësisht dhe me të drejtë kemi pritur që të ketë transparencë, të ndriçohen rastet aty ku është dyshuar se ka korrupsion, por deri tani rezultatet kanë munguar dhe nëse ne nuk kemi pasur një kredibilitet moral të kërkojmë se çfarë ka ndodhur me donacionet të cilat i ka dhënë bashkësia ndërkombëtare për Kosovën, kemi obligim moral ndaj qytetarëve tanë që të kërkojmë që këta taksapagues që e mbushin buxhetin e Kosovës dhe mjetet e tyre a përdoren në mënyrë të drejtë, apo ka shpërdorime. Ne kemi dyshime të bazuara se ka elemente të korrupsionit në struktura mjaft të larta të UNMIK-ut, por bashkë me vendorët i kemi bërë publike me qëllimin më të mirë, jo që ta denigrojmë UNMIK-un, por që të lëvizin më aktivisht në drejtim të zbardhjes së korrupsionit dhe krimit ekonomik që sigurisht që ekziston në Kosovë dhe ne presim se edhe Këshilli i Sigurimit, edhe Unioni Evropian do të angazhohen në këtë drejtim dhe do të kemi një transparencë shumë më të madhe se ç’ka bëhet me mjete të caktuara, sidomos në ndërmarrjet publike dhe me rastet e tenderimit ku është një mundësi e madhe e keqpërdorimit.



Zëri i Amerikës: Parlamenti i Kosoves sot miratoi nismën për ndryshimin e Kornizës Kushtetuese. Nëse nisma nuk përkrahet nga UNMIK-u, si do të reagoni ju dhe a mund të çojë kjo në fërkime të reja me administratën ndërkombëtare?



Bajram Rexhepi:Po mendoj se edhe në kornizën kushtetuese ekziston një nen i cili lejon mundësinë që të bëhen disa ndryshime në kornizën kushtetuese. Mendoj se një ndryshim i vogël në kornizën kushtetuese është bërë me rastin e zgjerimit të kryesisë së Kuvendit, e cila u shtua me dy vetë, mirëpo megjithatë që të ketë sukses ndryshimi i disa pjesëve të kornizës kushtetuese, është e domosdoshme që të pritet ardhja e zotit Holkeri, të bisedohet me të, me zyrën ligjore dhe bashkarisht edhe kjo zyrë bashkë me zotin Holkeri, Komisioni i Kuvendit për ndërrimin e kornizës kushtetuese dhe strukturat e qeverisë, bashkarisht të gjejmë formën më optimale, në mënyrë që të mos ketë fërkime. Mendoj se kjo do të jetë forma më e mirë dhe shpresoj se do të gjejmë gjuhë të përbashkët.//kk//

[fadil]

UNMIK-ut thotë se nuk përkrah ndryshimet në Kornizën Kushtetuese të Kosovës





Prishtinë, 4 nëntor - Zëdhënësi i UNMIK-ut, Niraxh Sing, e cilësoi të paqëdnrueshme deklaratën e djeshme të kryeparlamentarit Nexhat Daci se kryeadministratori Hari Holkeri ka mbështetur procesin e ndryshimeve e plotësimeve në Kornizën Kushtetuese të Kosovës."Përfaqësuesi Special i Kombeve të Bashkuara nuk është pajtuar dhe as që ka dhënë ndonjë premtim për ndryshime në Kornizën Kushtetuese të Kosovës", ka thënë ai."Tash për tash kjo nuk mund të ndodhë, por ndoshta mund të ndodh në të ardhmen", ka shtuar z. Sing."Ne të gjithë kemi thënë se kompetancat e kapitullit të pestë do të transferohen deri në fund të vitit, ndërsa për ato të kapitullit të tetë duhet të konsultohemi me Këshillin e Sigurimit, para se të bëhet ndojnë ndryshim", plotësoi Niraxh Sing. Nga ana tjetër, kryesuesi i komisionit parlamentar për Legjislacion, Gjyqësi dhe Kornizë Kushtetuese, Arsim Bajrami, tha se projekti për ndryshimin e Kornizës Kushtetuese të Kosovës nuk është projekt indivdual dhe nuk duhet të ndikohet nga deklaratat e tilla. Ai shprehu bindjen se Kosova do të hyjë në vitin e ardhshëm me ndryshime në Kornizën Kushtetuese. Edhe Fatmir Sejdiu, anëtar i këtij komisioni, tha se i konsideron të domosdoshme ndryshimet e plotësimet në Kornizën Kushtetuese. Ndërkaq, Bajram Kosumi, vlerësoi ar të gjitha çështjet në Kornizën Kushtetuese duhet të jenë të hapura për amandamentim. Sipas anëtarëve të Komisionit për Legjislacion, Gjyqësi dhe Kornizë Kushtetuese, ndihma e Zyrës për Çështje Ligjore e UNMIK-ut për hartimin e ndryshimeve të Kornizës është e mirëseardhur, sikur edhe e ekspertëve të pavarur.

[fadil]

Intervistë me autorin dhe gazetarin James Pettifer

Nga Arben Xhixho

11 nëntor 2003





James Petiffer, autori i gidës turistike për Shqipërinë dhe Kosovën dhe i librit “Çështja e Re e Maqedonisë”, është duke shkruar një libër për Kosovën që pritet të dalë vitin e ardhshëm. Në një intervistë me kolegun Arben Xhixho, gazetari dhe autori Pettifer jep fillimisht mendimet e tij për konfliktin Nano-Meta në Partinë Socialiste të Shqipërisë.

VOA: Si vëzhgues dhe studiues i zhvillimeve në Shqipëri si e shikoni konfliktin e fundit midis kryeministrit Nano dhe zotit Meta. A kemi të bëjmë këtu me një luftë të bazuar mbi parimet, apo kemi të bëjmë më tepër me një luftë bazuar në interesat e klaneve të ndryshme?





James Pettifer: Një pjesë e mirë e ka të bëjë me personalitetet e tyre. Konflikti mes tyre po vazhdon prej vitesh. Disa herë fiton zoti Meta, disa herë zoti Nano. Por në fund, ata i përkasin të njejtës parti dhe do të vazhdojnë kështu, pasi zoti Nano edhe kur është detyruar të largohej nga pushteti, prapë gëzonte mbështetjen e bazës së partisë, ndërsa mbështetja për zotin Meta është e përqëndruar më shumë në një zonë të vendit, prandaj për të është më e vështirë të sigurojë mbështetjen e shumicës së partisë.





VOA: A mendoni se pas luftës së tanishme Nano-Meta, ata mund të qëndrojnë në të njejtën parti. A mundet Partia Socialiste të funksionojë pas Kongresit të saj me të dy këto personalitete brenda radhëve të saj?



James Pettifer: Pa dyshim kjo që po ndodh nuk ndihmon. Nuk do të çuditesha, në se do të shikoja disa të largoheshin nga partia për t’u bashkuar me parti më të vogla, ose ndoshta edhe për t’u larguar fare nga politika. Problemi me konflikte të tilla është se ato dëmtojnë politikën në përgjithësi, pasi siç shkruante kohët e fundit kolegia ime Miranda Vickers, i bën njerëzit të lodhur me politikanët, cinikë, që të mendojnë se do të ishte më mirë pa ta. Por mos të harojmë se konflikte të kësaj natyre ndodhin brenda partive politike në shumë vende.





VOA: Kohët e fundit Bashkimi Evropian e kritikoi Shqipërinë për vonesa në kryerjen e reformave, gjë që mund rrezikojë bisedimet për asociim stabilizimin. Sa ka ndikuar konflikti i fundit, lufta Nano-Meta, a mos po u heq kjo luftë energjitë politikanëve shqiptarë për t’u marrë me problemet e vendit?





James Pettifer: Nuk mendoj se është ky problemi kryesor. Problemi më i madh është se disa institucione në Shqipëri kanë ende nevojë për t’u zhvilluar. Ato ende nuk i kanë aftësitë të bëjnë ato që kërkon Bashkimi Evropian. Dhe kjo do të ishte kështu edhe në se nuk do të egzistonte konflikti Nano-Meta. Shqipëria ka nevojë për ndërtimin e demokracisë në institucione. Por në të njejtën kohë Bashkimi Evropian nuk duhet të harrojë se Shqipëria ndodhet në një rajon të vështirë dhe Bashkimi Evropian nuk është qeveria e Shqipërisë. Shqipëria është një shtet sovran dhe kjo duhet respektuar.





VOA: Le të kalojmë në një temë tjetër, ju jeni duke shkruar, jeni në përfundim të një libri të ri për Kosovën, që pritet të botohet vitin e ardhshëm. Për çfarë është libri?





James Pettifer: Përgjithësisht është një libër me kujtime nga puna ime disa vjeçare në Kosovë në kohën e regjimit të Millosheviçit. I shqetësuar se disa aspekte të kësaj Kosove kishin filluar të harroheshin, apo siç ka filluar të harrohet periudha para lufte, vuajtjet e këtyre njerëzve. Mendoj se njerëzit, sidomos në komunitetin ndërkombëtar, do ta kuptonin më mirë gjendjen sot në Kosovë, në se do të dinin më shumë për këto. Po ashtu në libër jam përpjekur të tregoj se si e ka pasqyruar shtypi Kosovën. Unë vetë kam qënë i përfshirë në këtë mbulim për 10 ose 12 vjet duke shkruar në gazetat britanike dhe ato amerikane. Mendoj se perceptimi i luftës në Kosovë nga shtypi është interesant. Dhe tani që pavarësia po afrohet, mendoj se libri do t’i bëjë njerëzit të kuptojnë më qartë nevojën e Kosovës për pavarësi.





VOA: Zëvendës-sekretari i Shtetit Mark Grosman ishte kohët e fundit në Kosovë, ku bëri të ditur se bisedimet për statusin përfundimtar mund të fillojnë në vitin 2005, në qoftë se Kosova plotëson më parë standartet, të cilat duhet të jenë tani më të qarta dhe më të sakta. Si e shikoni ju këtë proces, a është realiste të mendohet që në vitin 2005 do të fillojnë bisedimet për statusin përfundimtar?





James Pettifer: Është një gjë shumë e mirë që zoti Grosman shkoi atje. Të gjitha të dhënat tregojnë se pa një angazhim më të madh amerikan, në proces nuk do të ketë shumë përparim. Ajo që uroj unë është që të dihet si do të vlerësohen standartet. Pasi politika nuk është një shkencë ekzakte. Unë jam dakort me atë që ka thënë ligjvenësi Tom Lantosh që në se disa prej këtyre standarteve do t’i ishin vënë Shteteve të Bashkuara, zor se Amerika do të fitonte pavarësinë në atë kohë. Duhet kohë që të zhvillohen institucionet. Por ndërhyrja amerikane ishte shumë e vlefshme. Mendoj se bisedimet e fundit të Vjenës ishin të përgatitura shumë keq. Në raste bisedimesh të tilla mes palëve, si shqiptarëve edhe serbëve u duhet bërë shumë e qartë se çfarë pritet konkretisht prej tyre, në vend që të bëhen bisedime pa një plan të qartë. Prandaj është shumë e vlefshme tani që Amerika po angazhohet më shumë. Pa rolin e Amerikës, pas bisedimeve të Vjenës, mund të kishin filluar probleme serioze.

[fadil]

U. Klark: "Kosova do të jetë e pavarur"





Prishtinë, 15 nëntor - Kandidati i Partisë Demokratik për President të Shteteve të Bashkuara të Amerikës, Uesli Klark, u takua me drejtues të Këshillit Kombëtar Shqiptaro-Amerikan dhe me komunitetin shqiptaro-amerikan në Nju Hampshir."Kosova do të jetë e pavarur, sepse ky është vullneti i shumicës së popullit atje. Ky është parimi i duhur dhe ne do të punojmë për ta arritur këtë qëllim, sepse kjo është mënyra më e mirë për të mënjanuar konflikte të tjera në të ardhmen", theksoi z. Klark. Ai premtoi se Kosova do të jetë një prej pririteteve të politikës amerikane, në qoftë se ai zgjidhet president. Z. Klark tha SHBA-të duhet të punojë me vëmendje të madhe në Ballkan, për të bashkuar e forcuar lidhjet ekonomike dhe për të ulur nivelin e armiqësive dhe urrejtjes historike, të cilat në vitin 1999 shkaktuan konflikte etnike të përgjakshme në rajon, për shkak të nacionalizmit të egër serb, nën udhëheqjen e të akuzuarit për krime lufte Sllobodan Millosheviq.

[MEDALIM]

SERBI-MAL I ZI, Vrasësi i Ana Lind, do të dekorohej për trimëri nga Serbia

Lajmi i ores 6:45 PM





BEOGRAD (15 Nëntor) - Vrasësi i ministres suedeze, Ana Lind, Mihajlo Mihajloviç, priste që pas vrasjes së saj të merrte një dekoratë për trimëri nga Serbia. Këto komente janë bërë dje në të përditshmen suedeze "Expressen", e cila citon disa burime të policisë, sipas të cilave këtë e kanë bërë të njohur miqtë e vrasësit Mihajloviç. Tezën e motivit për vrasjen e Ana Lind e para e kishte dhënë gazeta britanike "The Observer". Në shkrimin e saj për vrasësin Mihajloviç thuhet se arsyeja e vetme e vrasjes së Lindit ishte fjalimi i saj me anë të të cilit ajo përkrahu sulmet e NATO-s mbi Serbinë në mars të vitit 1999. Gjykimi i vrasësit pritet të nisë në fillim të vitit tjetër. ro/ro (BalkanWeb)

[Anonimja D]

Duket si një gjë e pabesueshme, porse dy nga kozmonautët më të famshëm Amerikanë Alan B. Shepard dhe William Gregory kanë origjinë shqiptare. Dr. Moikom Zeqo, Drejtor i Muzeut Historik Kombetar, shkruan për revistën Mbrojtja të datës 4 gusht 2003 sesi duke kërkuar në arkivin e Muzeumit Historik Kombëtar gjeti një dokument të jashtëzakonshëm nga të gjitha pikëpamjet. Mbi një karton të fortë është vendosur një fotografi e anijes kozmike Apollo 14, fotografi e bërë nga sipërfaqja e Hënës. Krahas kesaj fotografie është vendosur një flamur shqiptar i përmasave të vogla. Nën fotografinë është shkruar: Antares at fra mauro, kurse poshtë fotografisë është ky mbishkrim: This flag was carried to the moon onboard Apollo 14 January 31 through February 9, 1971. It is presented by Rear Admiral Alan B. Shepard, Jr., United States Navy, delegate to the 26th Session of the United Nations General Assembly.











Dhurata që Shepard u ka bërë shqiptarëve

(foto e revistës Mbrojtja).





Nga ky shkrim mësohet se flamuri Shqiptar (zyrtar) është mbartur në Hënë në trupin e anijes kozmike Apollo 14 nga 31 Janari deri më 9 Shkurt 1971. Ky flamur është paraqitur prej zëvëndës Admiralit Alan B. Shepard Jr., i Flotës së Shteteve të Bashkuara të Amerikës dhe që ka qenë delegat në Sesionin e 26-të të Asamblesë së Përgjithshme të Kombeve të Bashkuara.

Antares është pjesa e anijes që zbriti në Hënë dhe Fra Mauro eshte emri i vendit në Hënë ku zbriti anija. Ka edhe një mbishkrim dore shkruar me bojë të zezë nga Alan Shepardi, qe lexon: With the compliments of the astronautes of the United States. Alan Shepard 02.10.71 (Përgëzime nga astronautët e Shteteve të Bashkuara. Alan Shepard, 2 Tetor 1971).

Ky dokument që përmban flamurin Shqiptar me fotografinë në Hënë së bashku me mbishkrimet i është dorëzuar prej vetë astronautit Alan Shepard një diplomati shqiptar, i cili pati marrë pjesë edhë ai në Sesionin e 26-të të Asamblesë së Përgjithshme të Kombeve të Bashkuara. Alan Shepard, kur ka përgatitur këtë dhuratë dhe për ta bërë më të vërtetë dokumentin, ka shkruar me dorën e tij përshëndetjen jo vetëm nga vetvetja, por edhe nga astronautët e tjerë të SHBA-s. Kjo do të thotë që fakti i mbartjes së flamurit shqiptar ka qenë temë bisede e astronautëve bashkëudhëtarë. Pra Shepard u ka folur atyre për origjinën e tij shqiptare. Gjesti i Shepardit është i madhërishëm.



Alan Shepard lindi ne East Dery, në Hampshire të SHBA më 18 Nentor 1923. Është me origjinë shqiptare. Ka kryer Akademinë Detare Amerikane në Anapolis ku mbaroi dhe një shkollë fluturimi për pilot joushtarak. Më pas bëri edhe Shkollën e Marinës për pilot në Patuxent, Maryland, si dhe Shkollën Detare të Luftës në New Port Rhode Island më 1958. Më 1961 u ngrit në hapësirë si njeriu i parë në botë rusi

Alan Shepard



Juri Gagarin. Ai fluturoi në kozmos si pasagjer, kurse Shepardi në misionin Apollo 4 në Janar-Shkurt 1971 e manovroi vetë anijen kozmike. Si kozmonaut, ai është i pari që ka fluturuar në kozmos si amerikan dhe i pesti që ka shkelur në Hënë. Para daljes ne pension Alan Shepard gradohet Admiral. Ai ndërroi jetë më 21 Korrik 1998; pra jetoi 75 vjet.



William Gregory William Gregory është një tjetër astronaut shqiptaro-amerikan. Ai lindi në Lock-port, Nju Jork më 14 Maj 1957. Është me origjinë nga fshati Dardhë e Korçës. Më 1979 u diplomua per shkenca inxhinierike në Akademinë e Forcave Ajrore. Mori doktoratën si inxhinier mekanik nga Colombia University më 1980 dhe Doktoratën për drejtues më 1984. Ne vitet 1981 - 1986 ka qenë pilot fluturimi me avionët Fl11. Më pas shërbeu si mësues pilotësh pranë Forcave Ajrore Britanike. Ka fluturuar në më shumë se 40 lloje avionësh dhe ka kapërcyer mbi 5000 orë fluturimi. U zgjodh nga NASA në Janar 1990 dhe u shpall astronaut në Korrik

1991. Fluturimin e tij të parë Shuttle STS-67 në hapësirë e kreu më 2 Mars 1995 nga Qendra e Hapësirës Kenedi dhe u ul në tokë më 18 Mars 1995. Ka vendosur rekordin e fluturimeve në hapësirat kozmike me 16 ditë dhe 15 orë duke plotësuar 262 rrotullime drejt tokës. Ai fluturoi mbi 11 milion km në kozmos, ka mbi 400 orë fluturime në hapësirën kozmike, krahas 5000 orëve si pilot. Tani punon si drejtues për zhvillimin e biznesit në Arizona të SHBA.







Tani në program





rrjeti tokësor









rrjeti satelitor











Aforizmi i ditës:

S'ka krim më të rëndë se t'i lëshë anash cilisitë njerëzore.



I. Hardshek











Koha e shënuar është CET (Central European Time)

Copyright © RTK. All Rights Reserved. Powered by RTK Web Unit

[fadil]

Muaji i parë i këtij viti në Kosovë, nxori në pah edhe problemet e sfidat me të cilat do të përballet Kosova në perpjekjet për plotësimin e standardeve, kalimin e pergjegjësive nga Misioni i Kombeve të Bashkuara tek institucionet vendore dhe përgatitjen e zgjedhjeve parlamentare. Për të diskutuar për këto çështje, Zëri i Amerikës intervistoi kryetarin e Partise Demokratike te Kosoves, Hashim Thaçi.

Zëri i Amerikës:Zoti Thaçi, fillimi i këtij viti shënon edhe fillimin e procesit të konkretizimit dhe përmbushjes së standardeve ndërkombëtare për Kosovën. A mund të thuhet se institucionet e Kosovës, forcat kryesore politike të saj, janë angazhuar seriozisht për të punuar si një ekip i vetëm për plotësimin e këtyre standardeve?

Hashim Thaçi: Unë vlerësoj se standardet nuk janë vetëm angazhim për një parti politike. Standardet janë obligim i institucioneve të vendit dhe atyre ndërkombëtare në Kosovë. Janë standarde që janë të artikuluara, të formuluara e të aprovuara nga organet politike të përbashkëta të institucioneve të Kosovës dhe të UNMIK-ut e të mbështetura edhe prej Grupit të Kontaktit. Janë standarde që do të avancojnë procesin politik, gjithashtu edhe përsa i përket realizimit të kritereve të domosdoshme për t’u integruar Kosova në strukturat veriatlantike, për të ndërtuar realitetin demokratik. Vlerësoj se në këtë drejtim, të gjitha partitë politike, por edhe qytetarët e vendit do të jenë më të përkushtuar në realizimin e tyre, në masë të duhur që do të lehtësonte dhe përshpejtonte fillimin e zgjidhjes përfundimtare të statusit politik të Kosovës. Në këtë drejtim vlerësoj se edhe sa i përket funksionimit demokratik të institucioneve, spektri politik kosovar është duke bërë një punë të mirë, kuptohet me gjithë ato mangësi, dobësi, por edhe kufizime që ka në angazhimet e veta. Duke krijuar një klimë të përshtatshme të funksionimit demokratik, efektiv të institucioneve, funksionim në tërë territorin e Kosovës, kjo do të nënkuptonte edhe shpërbërjen e gjithë institucioneve paralele, krijimin e lëvizjes së lirë për gjithë qytetarët në tërë territorin e Kosovës, pastaj bashkimin e Mitrovicës, funksionimi, apo sundimi i ligjit bashkëkohor, shfuqizimi i të gjitha ligjeve serbe dhe ndërtimin e legjislacionit sipas standardeve perëndimore. Gjithashtu jemi duke i kushtuar rëndësi që askush të mos jetë mbi ligjin, por nuk duhet të lejojmë askënd që kurrsesi të keqpërdorojë ligjin për çfarëdo motive qofshin ato. Është duke u punuar edhe në standarde të tjera, përsa i përket procesit të ekonomisë, privatizimit, kthimit, dialogut dhe zhvillimit të trupave mbrojtëse të Kosovës në një strukturë që të jetë me interes për vendin dhe për perspektivën e tij.

Zëri i Amerikës: Zoti Thaçi, ky është viti më i rëndësishëm për plotësimin e standardeve. Por ky vit po ashtu përkon edhe me zgjedhjet e përgjithshme parlamentare dhe gjatë fushatave elektorale, është e natyrshme që qëndrimet politike të polarizohen. A pritet që fushata zgjedhore të bëhet pengesë për plotësimin e standardeve?

Hashim Thaçi: Nuk besoj që fushata zgjedhore të bëhet pengesë. Ne duhet ta kuptojmë se edhe funksionimi i partive politike, organizimi i zgjedhjeve, fushata, sa më të qeta demokratike dhe të ndershme të jenë zgjedhjet, ne do të plotësojmë një prej standardeve kryesore, funksionimin demokratik të institucioneve dhe ndërtimin e tyre në baza të standardeve perëndimore. Prandaj jam shumë optimist se do të kemi një angazhim të gjithë spektrit politik për realizimin e këtyre standardeve. Fushata do të jetë e qetë, demokratike, rezultati zgjedhor do të jetë i pranueshëm nga tërë spektri politik kosovar dhe mbi të gjitha do të kemi implementim, apo do të kemi ndërtimin e institucioneve demokratike menjëherë pas zgjedhjeve që nuk do të krijojë ndonjë vakuum institucional. Kështu që vlerësoj që standardet do të jenë angazhim i të gjithëve dhe fushata zgjedhore është në vazhdën, apo plotësimin e këtyre standardeve si të domosdoshme për të njohur bota realitetin demokratik në Kosovë.

Zëri i Amerikës: Me një fjalë ju pohoni se mund të ekzistojë një marrëveshje e heshtur që plotësimi i standarteve do të ketë përparësi ndaj interesave të ngushta partiake?

Hashim Thaçi: Standardet janë për shtetin e Kosovës. Të gjithë jemi të përcaktuar për të ndërtuar shtetin. Mirëpo vlerësoj se Partia Demokratike e Kosovës është duke treguar një shembull të mirë të mirëkuptimit me gjithë spektrin politik, që të punohet me përkushtimin më të madh dhe me faktorin ndërkombëtar për implementimin sa më të shpejtë të këtyre standardeve, standarde të cilat do të ndikojnë që të kuptohen edhe më drejt zhvillimet që jemi duke kaluar, të kuptohet më drejt bota demokratike dhe realiteti që është krijuar në Kosovë dhe uroj që të jenë natyrisht edhe partitë e tjera politike jashtë ndikimit të interesave partiake, përsa i përket realizimit të standardeve për Kosovën.

Zëri i Amerikës:Zoti Thaçi, siç e dini edhe ju në kontaktet tuaja me përfaqësues të huaj, për ndërhyrjen e NATO-s dhe për çlirimin e Kosovës, ekzistojnë një sërë pikëpamjesh në arenën ndërkombëtare. Si mund t’i bindni ju vendet e tjera, se ndërhyrja e NATO-s ishte vërtet një hap i zgjuar i Perëndimit dhe se shqiptarët e Kosovës po ndërtojnë sot një shoqëri moderne dhe demokratike. A mund të cilësohet Kosova si një shembull suksesi i ndërhyrjes nga jashtë?

Hashim Thaçi: Fillimisht ishte zgjuarsi e jona që ne bindëm botën perëndimore për të intervenuar në Kosovë. Ata na besuan në përpjekjet tona për luftë të drejtë dhe për ndërtimin e rendit demokratik. Bota perëndimore, veçanërisht miqtë tanë që fillimisht na kuptuan e besuan, nuk janë të dëshpëruar për atë intervenim, as ne nuk i kemi dëshpëruar. Mund të konkludoj se sot Kosova është vend më demokratik sesa disa vende të tjera të rajonit që janë të pavarura dhe Kosova me këto standarde që është duke i realizuar tash ka ecur më përpara sesa disa vende të tjera të Evropës Juglindore që po punojnë prej dhjetë vjetësh për këto standarde dhe mund të konkludoj se Kosova është duke reflektuar sot paqe, stabilitet, mirëkuptim dhe tolerancë për rajonin. Në këtë drejtim është inkurajuese edhe deklarata e Podgoricës e tre kryeministrave të Shqipërisë, Malit të Zi dhe Maqedonisë për Kosovën, që për herë të parë vlerësojnë arritjet e standardeve demokratike në Kosovë dhe se kjo është shumë mirë për Kosovën, është një sinjal mjaft i mirë i vendeve fqinje për Kosovën dhe sinjal shumë i mirë për botën perëndimore se edhe fqinjët po e kuptojnë dhe po e njohin realitetin pozitiv në Kosovë. Por gjithashtu besoj se në të ardhmen e afërt, as Kosovën, as Serbinë, e kaluara e hidhur nuk do t’i mbajë peng, por do të punohet edhe më tepër që këto dy vende t’ia lehtësojnë njëra-tjetrës rrugën si entitete të veçanta, për t’u integruar në strukturat veriatlantike.

Zëri i Amerikës: Aktualisht një nga problemet më të mëdha në Kosovë, është procesi i privatizimit, i cili siç duket është bllokuar. A jeni optimist se qeveria, institucionet vendore dhe UNMIK-u do të gjejnë një zgjidhje për privatizimin i cili është konsideruar si një element i rëndësishëm për zhvillimin e Kosovës?

Hashim Thaçi: Unë besoj se procesi i privatizimit do të vazhdojë, do t’i iket ndikimit politik në këtë proces, do të ngadhnjejë arsyeja e institucioneve vendore ndaj disa pengesave procedurale dhe do të gjendet një zgjidhje e pranueshme edhe për vendorët, edhe për ndërkombëtarët dhe ky proces do të vazhdojë së shpejti.//kk//