Express sulmohet nga "mbrojtesit e islamit"

[pirro]

Express sulmohet nga “mbrojtësit e islamit”


Nga Express më 11.08.2009 në ora 11:35

Uebsajti i gazetës Express, sot në orët e hershme të mëngjesit, është bërë objekt i sulmeve të hakerave, të cilët veten e prezantojnë si “mbrojtës të Islamit”.

“Ky është vetëm një mesazh për këtë gazetë antiislame, që nuk di të ndalur, duke përqeshur fenë e bukur Islame. Feja Islame meriton respekt. Greetings To All Muslims. Proud te be Muslim & Albanian (KosovaR)”, thuhet në mesazhin e hakerave anonimë.

Në disa prej faqeve te Express Online është paraqitur një flamur me shkronja arabe, ndërsa përgjegjësinë për sulmin nuk e ka marrë ndonjë grup i veçantë, sikur ndodh zakonisht në këto raste.

Këto sulme vijnë pas shkrimeve të gazetës Express për arrestimin e Hysen Sherifit, i akuzuar për terrorizëm në SHBA.

Gazeta ka botuar transkripte të bisedave dhe fotografi ekskluzive të siguruara nga Prokuroria e Karolinës Veriore, që dëshmojnë përfshirjen e grupit të dyshuar xhihadist në planifikimin e akteve terroriste. Grupi prej shtatë vetash, ku përfshihet edhe Hysen Sherifi nga Gjilani, sipas FBI-së, planifikonte sulme terroriste edhe në Kosovë.

Express ju kërkon falje të gjithë lexuesve të cilët nuk kanë mundur të kenë qasje, për disa orë, në disa prej faqeve online të gazetës.

Me ndërhyrjen e ekipit teknik të Expressit, sajti është kthyer në funksion të plotë. Të gjitha shënimet, përfshirë arkivi, janë ruajtur dhe janë sërish në dispozicion të lexuesve