Lajme Aktuale....

[Zero Cool]

Gazi nga Azerbajxhani kalon në Shqipëri, firmoset marrëveshja





Ministria e Ekonomisë dhe Gazsjellësi Trans Adriatik, firmosën sot një Memorandum mirëkuptimi dhe bashkëpunimi, duke u përqendruar në gjetjen e mundësive për lidhjen e Gazsjellësit Adriatik-Jon (IAP), një projekt madhor rajonal i gazit natyror, me sistemin e Gazsjellësit Trans Adriatik, në një pikë lidhëse në afërsi të Fierit.
Ky projekt ka për qëllim rritjen e sigurise së furnizimit si dhe diversifikimin e furnizimeve me gaz per tregjet Evropiane. Ministri i Ekonomisë Nasip Naço u shpreh se zbatimi i ketij projekti do ta shndërrojë Shqipërinë në një vend të rendesishëm dhe strategjik energjetik. Gazsjellësi Trans Adriatik është një projekt tubacioni gazi natyror.
Tubacioni do të transportoj gaz nga rajoni i Kaspikut duke kaluar nepërmjet Greqisë dhe Shqipërisë në detin Adriatik dhe duke dalë në jug të Italisë dhe me tej në Evropën Perëndimore. Potenciali që krijohet nga lidhja e gazsjellësit TAP dhe gazsjellesit IAP, krijon një energji pozitive duke vendosur Shqipqrinë në një nyje të rëndësishme për rrjetet e gazit në Evropën Juglindore.

[Zero Cool]

Policët e rrejshëm po grabisin turistët e huaj





Mashtrime, plaçkitje, kërcënime, shantazh ... Këto janë vetëm një pjesë e vogël nga lista e krimeve në dosjet e policëve të rreme të cilët kohët e fundit rregullisht mbushin me lajme buletinin e Ministrisë së Punëve të Brendshme.


Policia për më pak se një muaj ka zbuluar tre kolegë të rrejshëm. Para dhjetë ditëve në qytetin e Katllanovës, një kriminel nga Kumanova duke u shtirur si polic, ka rrahur dhe më pas ka grabitur një turist holandez dhe shoqen e tij, njofton Ina.

Për më pak se një muaj ky është rasti i tretë kur kriminelët të fshehur pas kartave të rrejshme identifikuese të policisë, grabisin, mashtrojnë ose i kërcënojnë qytetarët.

Kohë më parë, policia kriminalistike e Ministrisë së Punëve të brendshme të Maqedonisë ka arrestuar tre persona, të dyshuar se kanë "punuar" si policë trafiku dhe kanë gjobitur vozitësit që i kanë ndalë në autostradën Tetovë – Gostivar.

Nga Ministria e Punëve të Brendshme thonë se po punojnë intensivisht për kapjen e policëve të rrejshëm të cilët po grabisin turistët e huaj por edhe qytetarët e vendit.

[Guri i madh]

Behgjet Pacolli “spiunohet” te ambasadatPublikuar: 23.07.2011 - 12:20Prishtinë 23 korrik- Tronditet koalicioni qeverisës në Kosovë. Një burim ndërkombëtar thotë se ka pasur edhe grushtim tavolinash kur janë kërkuar sqarime pse ka shkuar ministri Besim Beqaj nëpër ambasada me akuza personale për zëvendëskryeministrin , Behgjet Pacolli.



Pushtetarët kosovarë vazhdojnë që problemet apo dhe inatet personale me njëri-tjetrin t’i zgjidhin duke u ankuar nëpër ambasada. I fundit në këtë listë është ministri i Zhvillimit, Beqaj, i cili e ka akuzuar Pacollin se po punon vetëm për interesa personale.

Duke folur në kushte anonimiteti, burime ndërkombëtare i kanë thënë “Zërit” se ministri Beqaj ka qenë shumë i qartë në akuzat e tij, duke thënë se “çdo udhëtim që Behgjet Pacolli po e bën jashtë shtetit, çfarëdo aktiviteti që po ndërmerr ai, po e bën vetëm për përfitime personale”.

Gazeta ka provuar dy ditët e fundit të marrë një prononcim prej ministrit Beqaj, por kjo ka qenë e pamundur.

Jo zyrtarisht mësohet se akuzat e Beqajt, i cili është dhe anëtar i Kryesisë së Partisë Demokratike të Kosovës, e kanë nxitur Pacollin që t’ia nisë një letër shefit të qeverisë, ku është kërcënuar me largimin e AKR-së nga koalicioni qeverisës.

Të njëjtat burime thonë se edhe takimet e mëvonshme, ku i pranishëm ka qenë edhe kryeministri Thaçi, janë zhvilluar me tone të larta dhe jo pak të ashpra. “Ka pasur bile edhe grushtim tavolinash, jo rrallë herë dukej se situata do eskalojë në tërësi”, tha ky burim i “Zërit”.

[Zero Cool]

Gjermani, turisti ia vodhi kambanën lopës






Policia gjermane njoftoi se një turist holandez u përpoq t’ia vidhte kambanën lopës në Bavari.


Policia në Bavarinë jugore njoftoi të hënën se turisti 30-vjeçar vodhi kambanën dhe shiritin – me vlerë rreth 200 euro – nga qafa e lopës derisa ajo po kulloste në një livadh në jugperëndim të Muenchenit, njoftojnë mediat gjermane.

Kalimtarët e rastit ishin dëshmitarë të hajnisë, e cila ndodhi të premten duke mos e lejuar turistin të largohej derisa nuk arriti policia në vendin e krimit.

Policia njoftoi se turisti, emri i të cilit nuk u bë publik, deklaroi se vetëm po kërkonte një suvenir nga Gjermania. Ai u lirua vetëm pasi pagoi 500 euro.

[Zero Cool]

Panik në Oslo, në kërkim një 42-vjecar





Pas atentatit të dyfishtë të së premtes,vepër e 32-vjecarit, tashmë më të famshëm në botë, Anders Behring Breivik, kryeqyteti norvegjez Oslo sërish është përfshirë nga paniku.
Sipas informacioneve të fundit policia ka evakuuar një pjesë të stacionit qendror, pas gjetjes së një valixheje të dyshimtë.

"Një valixhe pa pronar u gjet pranë binarit numër 19. Zona përreth është evakuuar dhe për momentin është ndaluar qarkullimi i trenave dhe autobusëve", thotë zëdhënësi i transportit hekurudhor në Oslo.
Ne kerkim 42-vjecari me probleme

Policia po kërkon një person, psikologjikisht të paqëndrueshëm, i cili ka mundësi që të imitojë aktin e Breivik, i cili të premten shkaktoi vdekjen e 76 personave.

Por mësohet se ky person rreth 42 vjec nuk ka lidhje me 32-vjecarin. Ky person ka dalë nga burgu vetëm dy ditë më parë. Ndodhej pas hekurave sepse kishte sulmuar policinë dhe kishte kërcënuar agjentët.

Tjeter akuze per Breivik

Policia norvegjeze mendon të ngrejë një tjetër akuzë kundër Anders Behring Breivik, autorin e ngjarjeve në Oslo dhe Utoja, ku humbën jetën 76 persona.

Sipas prokurorit Kristian Hatlo, i cituar nga gazeta“AftenPosten”, kjo do të mbështetet në një normë të re të kodit penal, e cila parashikon dënimin me 30 vjet burg, ndërsa akuza e mëparshme për terrorizëm ishte 21 vjet heqje lirie.

Hatlo i tha të përditshmes norvegjeze se akuzat e reja që do të ngrihen mbi ligjin e 2008, mbetet e vetmja mundësi. Ndërsa avokati i tij, në një konferencë për shtyp, tha se e gjithë çështja tregon se klienti i tij është i papërgjegjshëm, por është ende herët për të kërkuar shpalljen e saj.

[Guri i madh]

Qeveria turke, plane për të mbrojtur gratë

Publikuar: E premte 29 Korrik 2011, 14:47 0 Komente 0 Rekomandime
Gjatë pesë muajve të parë të këtij viti, më shumë se 100 gra turke vdiqën si rezultat i abuzimit. Në përgjigje të kësaj statistike, autoritetet e larta shtetërore njoftuan plane për të penguar dhunën ndaj grave. Javën e shkuar, presidenti Abdullah Gul ju drejtua Bordit të Kontrollit Shtetëror (DDK) për të kryer një hetim në thellësi të rasteve të dhunës familjare dhe efektshmërisë së shërbimeve ligjore e administrative lidhur me to. Në të njëjtën kohë, kreu i ministrisë së sapoformuar të familjes dhe politikave sociale, Fatma Shahin, njoftoi plane për mbikëqyrjen elektronike të keqbërësve. Plani kërkon që keqbërësit të vendosen nën një urdhër kufizues dhe të mbikëqyren rregullisht nëpërmjet prangave elektronike.

Si të ndalet dhuna
brenda familjes
Lufta kundër dhunës në familje është një nga përparësitë e Fatma Shahin. Si ish-kryetare e Komitetit të Kërkimit për Vrasjet e Nderit të Parlamentit, ajo do të eksplorojë pse shteti ka dështuar të pengojë këto vdekje në të kaluarën. Organizatat e grave i janë përgjigjur pozitivisht planit të ri, ndërsa luftojnë për të penguar normalizimin dhe “ndërkombëtarizimin” e dhunës në familje në Turqi. Në të njëjtën kohë, megjithatë, ato e shohin planin si paraprak, jo parandalues. Presidentja e Federatës së Shoqatave të Grave të Turqisë, Kanan Gullu, mbështet mekanizmin e ri të ndjekjes elektronike. Megjithatë, ajo paralajmëron se çështja e dhunës nuk duhet të mbithjeshtohet. Prangat elektronike mund të ndëshkojnë keqbërësit, por ato nuk pengojnë dhunën fillestare, i thotë ajo ‘SETimes’. Nazan Moroglu, një eksperte në ligjin e të drejtave të grave nga Shoqata e Juristëve e Stambolli, është dakord se dhuna kundër grave nuk mund të reduktohet në gjetjen e zgjidhjeve për incidente individuale. “Ky është një problem gjinor që përfshin aspekte si të hierarkisë dhe pushtetit,” thotë ajo. Përtej normave të mishëruara gjinore në shoqëri, një nga problemet e mëdha që ndesh Turqia janë mospërputhjet midis përmirësimeve ligjore dhe praktikës aktuale.

Nevojiten
përmirësime ligjore
Do të duhet kohë të modelosh këtë infrastrukturë dhe të trajnosh personelin e duhur, thotë ajo. Vullnetarja e Fondacionit të Strehës së Grave (Mor Cati) Zelal Jalçin mendon se që nga 2002 janë bërë përmirësime të ndjeshme ligjore në kodet civile e penale. Megjithatë, ajo vë në dukje se “përmirësimet ligjore mbeten në letër; ato jo gjithmonë zbatohen në praktikë.” Ajo beson se vullneti politik dhe një buxhet racional do të jepnin një zgjidhje të kollajshme. Vildan Jirmibesoglu, një avokat dhe drejtor i Bordit të Guvernatoriatit të të Drejtave të Njeriut i Stambollit, i thotë ‘SETimes’ se “deri kohët e fundit autoritetet politike mendonin se dhuna kundër grave qe e ekzagjeruar dhe përfshinte vetëm raste individuale,” duke shtuar se nismat e kohëve të fundit tregojnë ndryshim pozitiv. Pas pushimeve të verës, parlamenti ka gjasa të kalojë amendamentet e propozuara në ligjin mbi mbrojtjen e familjes. Gullu thekson rëndësinë e këtyre amendamenteve. “Me këtë ligj, gratë që raportojnë dhunë në stacionet e policisë do të vihen menjëherë nën mbrojtjen e shtetit,” thotë ajo. Propozimi përfshin gjithashtu mbrojtjet për gratë e pamartuara në marrëdhëniet dhe mbështetjen financiare për viktimat. Organizatat e grave këmbëngulin se hapësira e programit të mbrojtjes së dëshmitarëve duhet të zgjerohet për të lejuar më shumë viktima të ndryshojnë identitetin e tyre dhe të garantojnë fshehtësinë. “Ky program duhet gjithashtu të mbulojë kërcënimet për vrasje”, thotë Jirmibesoglu.

Kosova rrezikon të ndahet!

Ministri Enver Hoxhaj ka bërë një paralajmërim për rrezikun që po e kanos vendin tendenca e ndarjes së shtetit të Kosovës. Në një intervistë për agjencinë britanike të lajmeve, Reuters, Hoxhaj ka thënë se nëse nuk ka reagim dhe presion ndërkombëtar ndaj Serbisë, ndarja edhe mund të ndodhë.
“Rreziku është shumë real dhe kjo mund të ndodhë. Kjo varet nga reagimi i fuqive të mëdha për situatën në veri. Varet nga ajo sesi NATO-ja do të mbështesë prezencën e KFOR-it në pjesën veriore”, ka thënë ministri Enver Hoxhaj.
Ai ka shtuar se kjo varet gjithashtu nga ajo se sa do të ketë presion dimplomatik ndërkombëtar mbi Beogradin. “Nëse nuk ka presion, realiteti është se ndarja e Kosovës do të ndodhë”.
Por megjithatë, Hoxhaj ka shtuar se ndarja eventuale e Kosovës do të hapte Kutinë e Pandorës me mundësinë e përhapjes së dhunës në shkallë të paimagjinueshme në krejt rajonin.

Arrihet marrëveshja me KFOR-in

(I plotëduar) - Kryeministri i Kosovës Hashim Thaçi ka bërë të ditur në mbledhjen urgjente të Qeverisë së Kosovës se është arritur marrëveshja për veriun, pas disa takimeve me komandantin e KFOR-it, gjeneralin Erhard Buhler. Ai ka thënë se Qeveria ka arritur pajtimin me KFOR-in për ruajtjen e gjendjes së re të krijuar në pikat 1 dhe 31 që është rezultat i vendimeve të Qeverisë së Kosovës.
Pala serbe ka pranuar marrëveshjen 10- pikëshe me të cilën i jepet një zgjidhje përkohshme e krizës në veri. Paraprakisht kushtet në fjalë janë harmonizuar mes Qeverisë së Kosovës, SHBA-së dhe BE-në dhe më pas ato i janë përcjellë palës serbe.
Ujdia erdhi pasi komandanti i KFOR-it, Erhard Buhler zhvilloi sot një varg takimesh me kryeministrin e Kosovës, Hashim Thaçi, ku të pranishëm ishin edhe Chritopher Dell e Fernando Gentilini. Marrëveshja pritet të publikohet në mbledhjen e sotme të ekzekutivit që mbahet në ora 16:00.
Oferta e Prishtinës u është prezantuar palës serbe, e cila ka pranuar megjithëse kishte kundërshtuar atë më parë.
Marrëveshja do të ketë garancinë e plotë ndërkombëtare, ndërsa do të jetë valide së paku deri më 15 shtator të këtij viti, ndërsa palët marrin obligim për zbatimin e saj dhe angazhimin për të zgjidhur çdo marrëveshje me mirëbesim përmes mekanizmave të përshtatshme.
Lista e hartuar nga qeveria e Kosovës përmban 10 pika:
1. Heqja e bllokadave të rrugëve
2. Në parim mbajtja e gjendjes aktuale në portat kufitare
3. KFOR-i të jetë përgjegjës për portat
4. Në parim portat të jenë të mbyllura për arsye sigurie dhe të jenë zona të kufizuara ushtarake
5. Ndihma humanitare do të lejohet që të hyjë në Kosovë në makina deri në 3.5 tonë, në pika të caktuara kufitare, pas një vlerësimi nga një organ i caktuar dhe i pavarur ndërkombëtar se ekziston nevoja për ndihma humanitare
6. Mallrat për kishën ortodokse serbe do lejohen të kalojnë
7. Çdo person dhe makinë të kontrollohet për armatim
8. Çdo person të kontrollohet për ID
9. Treni Beograd-Prishtinë të kontrollohet nga EULEX dhe Policia e Kosovës, si dhe të ndihmohet nga KFOR-i
10. Pikat e paautorizuara kufitare të mbyllen.

Thaçi: Tash, ndarja as ëndërr e Beogradit

“Me pajtueshmërinë e arritur dje, kemi arritur tri objektiva: respektimin e plotë të reciprocitetit, ndaljen e plotë të kontrabandës dhe vënien nën kontroll të plotë të territorit të Republikës së Kosovës”, thotë kryeministri Hashim Thaçi, për të shtuar se ajo që do të duhej të ndodhte në qershor të vitit 1999, ndodhi në korrik të vitit 2011. Në një intervistë për Radion Evropa e Lirë, kryeministri Thaçi është zotuar se në veri do të sundojë rendi dhe ligji dhe se për këtë ka mbështetjen ndërkombëtare. Ai tha se pas 25 korrikut, ëndrra e Serbisë për ndarjen e Kosovës është shuar.
RADIO EVROPA E LIRË
Zoti kryeministër, një ditë më parë bëtë publik pajtimin për situatën në veri, duke thënë se do të ruhet gjendja e krijuar pas 25 korrikut. Por, parakushti për heqjen e barrikadave në veri nuk është përmbushur ende. Sa do të gjejë zbatim në praktikë?

HASHIM THAÇI
Qeveria e Republikës së Kosovës ka prezantuar qëndrimet e veta në mirëkuptimin e përbashkët me NATO-n, për çka jemi pajtuar në angazhimet tona që do të nënkuptojnë zhbllokimin e rrugëve për në pikat kufitare 1 dhe 31 – pra, largimi i të gjitha barrikadave, e pastaj mbajtja e gjendjes së tanishme në pikat 1 dhe 31.
Në pikën 1 është instaluar KFOR-i amerikan, ndërsa në pikën 31 janë trupat e KFOR-it, Policia e Kosovës, doganierët e Kosovës. Këto dy pika do të vazhdojnë të mbesin të mbyllura, pasi që janë zona të kufizuara ushtarake – kjo, për shkaqe sigurie.
Sa u përket ndihmave humanitare, tani do të lejohen të futen në pikat e lartpërmendura, vetëm pasi të konstatohet nga një organizatë e pavarur ndërkombëtare se ka nevojë për diçka të tillë. E, tani për tani, nuk ka ndonjë krizë dhe nuk është politika dhe politikanët ata që konstatojnë diçka të tillë. Ishte një pretendim i Beogradit për një rrethanë të tillë, por tashmë është tejkaluar.
Mallrat, sa i përket Kishës Ortodokse Serbe, do të lejohen për nevojat e tyre ekzistenciale. Çka është shumë me rëndësi, është se çdo person që do të mund të kalojë kufirin, do të kontrollohet për armë dhe çdo person tani e tutje do të kalojë kufirin me kartë të identitetit.
Për herë të parë pas 12 vjetësh, treni që qarkullon në relacionin Mitrovicë-Beograd dhe anasjelltas do të kontrollohet nga Policia e Kosovës, ajo e EULEX-it, e përforcuar nga NATO-ja.
Gjithashtu theksoj se për herë të parë do të bllokohen dhe në rrethana të caktuara do të kontrollohen edhe rrugët dytësore nga KFOR-i, për të evituar çdo lloj kontrabande apo trafiku.
Dua të theksoj se me vendimet e Republikës së Kosovës për reciprocitet me Serbinë kemi arritur tri objektiva: respektimin e plotë të reciprocitetit, ndaljen e plotë të kontrabandës dhe vënien nën kontroll të plotë të territorit të Republikës së Kosovës. Pra, ajo që do të duhej të ndodhte në qershor të vitit 1999, ndodhi në korrik të vitit 2011.
RADIO EVROPA E LIRË
Kjo pajtueshmëri është thënë se vlen deri më 15 shtator. Çka do të ndodhë pas kësaj date?
HASHIM THAÇI
Ne jemi duke përcjellë situatën nga afër. E para është, do të thotë, krijimi i rrethanave të favorshme të ambientit të sigurisë për të gjithë qytetarët.
Vendimet tona nuk kanë qenë të drejtuara kundër askujt, kanë qenë vendime në interesin e të gjithë qytetarëve, qytetarëve serbë që jetojnë në atë pjesë - nuk janë kundër rendit dhe ligjit.
Këta qytetarë janë mbajtur për 12 vjet peng të strukturave kriminale. Këto struktura tani do të ballafaqohen me drejtësinë, do të ballafaqohen me rendin dhe ligjin. Prandaj, ne do të bashkëpunojmë ngushtë me NATO-n.
RADIO EVROPA E LIRË
Plani i paraqitur dje ka për synim futjen nën kontroll të kufirit. Por, keni ndonjë plan konkret se si do t’i zhbëni strukturat paralele, të cilat vazhdojnë të kenë ndikim mbi popullatën atje?
HASHIM THAÇI
Unë nuk do të thosha struktura paralele. Do t’i vlerësoja dhe, tani kemi fakte të plota, se ato janë struktura kriminale që duhet të ballafaqohen me rendin dhe ligjin.
Nuk do ta kenë komoditetin që e kanë pasur më herët, për çka ne mbajmë përgjegjës direkt Beogradin, për mbështetje dhe inspirim të këtyre strukturave kriminale. Ne mbajmë përgjegjës Beogradin edhe për djegien e pikës doganore, por edhe për vrasjen e policit të Kosovës dhe veprime të tjera të dhunshme.
Pra, angazhimet tona do të jenë të harmonizuara me komunitetin ndërkombëtar. Është shumë me rëndësi që për vënien e ligjshmërisë dhe kushtetutshmërisë në të gjithë territorin e Republikës së Kosovës, tani i gjithë faktori ndërkombëtar është unik, edhe SHBA-ja, edhe BE-ja, por edhe NATO-ja.
RADIO EVROPA E LIRË
A do ta keni ndihmën e EULEX-it? Dihet se keni qenë mjaft kritik ndaj këtij misioni pasi ndërmorët aksionin në veri...
HASHIM THAÇI
Ne duam një EULEX që do të ketë sukses dhe ky sukses do të varet nga bashkëpunimi me institucionet e Republikës së Kosovës.
Dua t’i besoj zotimit të shefit të EULEX-it, zotit Marnak, i cili ditë më parë deklaroi se EULEX-i do ta respektojë Kushtetutën dhe ligjet e Kosovës. Ky angazhim i përbashkët do të mund të forcohet në të ardhmen.
RADIO EVROPA E LIRË
Zoti kryeministër, vazhdimi i bisedimeve është paralajmëruar në muajin shtator. A do t’i vazhdojë Qeveria e Kosovës bisedimet pas gjendjes së krijuar, kur ju vetë thoni se politika e Beogradit qëndron pas dhunës në veri?
HASHIM THAÇI
Duhet bërë dallimin mes shtetit të Kosovës dhe Serbisë në Bruksel dhe agjendës së përcaktuar nga Bashkimi Evropian, e mbështetur nga SHBA-ja, dhe zhvillimeve në veri.
Tani kemi një rrethanë të re, një situatë të re, një kapitull të ri, i cili nuk do të ketë në asnjë rrethanë kthim mbrapa. Për Kosovën nuk do të ketë rikthim në gjendjen e para 25 korrikut, do të ketë vetëm ecje përpara.
Angazhimet tona do të jenë të koordinuara me komunitetin ndërkombëtar dhe për rregullimin tonë të brendshëm do ta respektojmë vetëm Kushtetutën dhe ligjet e Kosovës dhe nuk do të dialogojmë apo negociojmë me askënd.
RADIO EVROPA E LRIË
Pavarësisht zhvillimeve të fundit në veri, edhe më tej qarkullojnë deklarata në opinion për rrezikun nga ndarja eventuale e veriut. Madje, edhe një ministër i qeverisë suaj e ka ngritur këtë shqetësim. A ka arsye për shqetësime?
HASHIM THAÇI
Kosova nuk do të ndahet, në asnjë rrethanë, me asnjë çmim, as de facto, as de jure. Kosova do ta ushtrojë autoritetin e vet kushtetues dhe ligjor në tërë territorin e Republikës.
Ne kemi theksuar më herët se ka pasur qëllime dhe pretendime të Beogradit për ndarje, por tani kjo gjë, pas krijimit të rrethanave të reja, nuk do të mund të jetë as ëndërr e Beogradit.
Prandaj, Kosova nuk mund të ndahet. Ne jemi për hapje të kufijve, për mosndryshim të tyre, për kufij evropianë, por pretendimet e mëhershme që kanë qenë, natyrisht edhe shpirti për ndarje, shpirti pretendues politik i Beogradit për ndarje, kanë dështuar.
Askush nuk pajtohet me atë ëndërr të Beogradit dhe Kosova nuk ka rrezik për ndarje. Çdo pretendim për ndryshim të kufijve të Mitrovicës, nënkupton ndryshim të kufijve për gjithë rajonin.
RADIO EVROPA E LIRË
Keni thënë dje se me planin është qartësuar perspektiva evropiane e Kosovës. Keni vërejtur ndonjë ndryshim të qasjes së BE-së, meqë edhe ju vetë keni qenë kritik për qasjen që ka pasur Unioni karshi Prishtinës zyrtare...
HASHIM THAÇI
Natyrisht se vendimet e Qeverisë së Republikës së Kosovës kanë qenë vendime të modelit evropian për vënien e ligjit në të gjithë territorin e Republikës së Kosovës dhe jo dorëzimin para strukturave kriminale.
Bashkimi Evropian përkrah vënien e kushtetushmërisë dhe ligjshmërisë në gjithë territorin e Republikës së Kosovës dhe ne mund të afrohemi në BE vetëm duke penguar dhe luftuar strukturat kriminale, duke penguar dhe luftuar kontrabandën, por edhe duke vënë rend dhe ligj.
Ne po implementojmë dokumente dhe kritere demokratike, të domosdoshme për integrim. Pra, kritere legjislative, ekonomike dhe politike. Edhe këto vendime për ligjshmëri në gjithë territorin e Republikës së Kosovës nga Qeveria e Kosovës do të ndihmojnë në përshpejtimin dhe qartësimin e agjendës evropiane për Republikën e Kosovës, për udhërrëfyesin për liberalizimin e vizave, marrëdhëniet kontraktuale dhe marrëdhëniet tregtare.

Marrëveshja për veriun, zbatim i 6 pikëshit të Ban Ki-Munit

Lëvizja Vetëvendosje ka shprehur shqetësim për arritjen e marrëveshjes 10 pikëshe mes Qeverisë së Kosovës dhe KFOR-it, duke thënë se kjo marrëveshje është zbatim i gjashtë pikëshit të Ban Ki-Munit, i cili nuk e ndan Kosovën, por e rrit fuqinë e Serbisë brenda Kosovës. Ky subjekt politik vlerëson se për të gjitha këto përgjegjës është kryeministri i Kosovës Hashim Thaçi, i cili sipas kësaj Lëvizjeje ka përgjegjësi politike dhe historike për këtë zmbrapsje.
Në një konferencë për media të shtunën, lideri i kësaj lëvizjeje, Albin Kurti dhe nënkryetari Shpend Ahmeti kanë vlerësuar se marrëveshja e arritur me KFOR-in lidhur me veriun është një humbje për Kosovën dhe jo fitore siç paraqitet nga kryeministri Thaçi.
“Konsiderojmë që kryeministri Thaçi bart përgjegjësi politike dhe historike për këtë zmbrapsje dhe shans të humbur. Policia e Kosovës ka treguar dhe ka dëshmuar aftësi dhe gatishmëri. Është Qeveria e Kosovës më në krye kryeministri Thaçi ajo e cila ka treguar dhe dëshmuar se nuk është as e gatshme dhe as e aftë për gatishmërinë dhe aftësinë e Policisë së Kosovës. Prandaj ne kërkojmë përgjegjësi nga kryeministri Hashim Thaçi dhe këtë sigurisht që do të bëjmë edhe brenda institucioneve të Kosovës në të ardhmen”, ka thënë Kurti.
Ai ka thënë se me 10 urdhrat e dorëzimit, Qeveria e Kosovës ia dorëzoi pushtetin KFOR-it i cili me fajin e Qeverisë së Kosovës po bëhet Qeveria e vërtetë e Kosovës, ndërkohë që dihet se KFOR-i nuk e njeh pavarësinë e Kosovës.
Sipas Kurtit, Qeveria e Kosovës nuk po e tregon të vërtetën pse nuk bëri marrëveshje me shkrim me KFOR-in. Për më tepër ai ka thënë se marrëveshja nuk është nënshkruar pasi që KFOR-i nuk e njeh shtetin e Kosovës, përderisa 10 pikat e marrëveshjes sipas tij nuk janë 10 kushtet e Qeverisë së Kosovës për KFOR-in, por 10 urdhrat e KFOR-it për Qeverinë e Kosovës, ku së pari KFOR-i u mor vesh me Serbinë e mandej mbi atë bazë u pajtua edhe Qeveria e Kosovës.
“Këto të ashtuquajtur 10 kushte të qeverisë për KFOR-in ne thamë se janë 10 urdhrat e KFOR-it për Qeverinë e Kosovës dhe njëkohësisht paraqesin 10 urdhrat e dorëzimit. Mendojmë që 10 pikat e pajtueshmërisë midis qeverisë së Kosovës dhe KFOR-it janë tërësisht në kuadër dhe si zbatim i 6 pikëshit të Ban Ki-Munit, i cili nuk e ndan Kosovën, por e rrit fuqinë e elementeve të Serbisë brenda Kosovës”, ka deklaruar ai.
Kurti duke i bërë një analizë kësaj marrëveshjeje ka thënë se në portat 1 dhe 31 në veri autoritet suprem do të jetë KFOR-i dhe jo Policia dhe Doganat e Kosovës.
Sipas tij pasi që strukturat ilegale serbe vranë Enver Zymberin dhe i plagosën dhjetëra policë të tjerë, njësitë speciale të Policisë së Kosovës nuk do të dërgohen më në veri, kurse aksioni i 25 korrikut ishte i pari dhe i fundit i Qeverisë Thaçi në veri.
Vetëvendosja konsideron se Qeveria e Kosovës ia ka lidhur duart vetes dhe çfarëdo aksioni i saj drejt realizimit të vendimit të 25 korrikut do të përbënte shkelje të pajtueshmërie me KFOR-in.
Nga ana tjetër Shpend Ahmeti nga kjo Lëvizje ka thënë se Qeveria e Kosovës me këto veprime të saj, më pak çdo ditë Kosovën po e bën shtet, gjithmonë duke u fokusuar në formalitete dhe po e humb rëndësinë e të qenit shtet.

Stefanoviq fton serbët të tërhiqen nga barrikadat

Kryenegociatori serb i ka ftuar serbët në fshatin Rudare që të tërhiqen nga barrikadat, pas arritjes së marrëveshjes me KFOR-in. Ai ka pohuar se marrëveshja nuk është ideale, por është e përkohshme dhe do të vlejë deri më 15 shtator. Borko Stefanoviq ka thënë se nuk do të ketë dogana, dhe asnjë simbol të shtetit të Kosovës. “Marrëveshja nuk është ideale, kemi biseduar në kushte shumë të rënda, por reagimi ynë e ka ndaluar kryeministrin Hashim Thaçi që të bëjë atë që dëshironte”, u ka thënë të pranishmëve Stefanoviq. Ndërkohë, raportet e fundit nga Rudare tregojnë se serbët lokalë kanë refuzuar të largohen nga barrikadat pas ftesës së Borko Stefanoviqit. Ata kanë thënë se do të qëndrojnë aty së paku deri nesër kur pritet të mbahet një mbledhje e të të ashtuquajturit Këshilli i Komunave Serbe të Veriut.

Britani, Gjermani: Të gjendet zgjidhje që i njeh kufijtë e Kosovës

Britania dhe Gjermania i kanë tërhequr vërejtjen Serbisë dhe Kosovës, se i dëmtojnë gjasët e tyre për integrim në Bashkimnin Evropian, nëse lejojnë vazhdimin e tensioneve etnike përgjatë kufirit të tyre.
Ministrat e punëve të Jashtme të Britanisë së Madhe dhe të Gjermanisë, William Hague dhe Guido Westerwelle kanë paralajmëruar Beogradin dhe Prishtinën, se rrezikojnë shanset e tyre për t`u afruar pranë BE-së dhe do të humbasin “rastin historik” në qoftë se nuk i eliminojnë tensionet ndëretnike përgjatë kufirit. Agjencia e lajmeve AFP, transmetoi deklaratën e dy ministrave për situatën në veri të Kosovës.
“Serbia dhe Kosova duhet të gjejnë zgjidhje diplomatike që i njeh kufijtë e Kosovës, e përmirëson jetën e secilit dhe të dy shtetet i vë në rrugë të anëtarësimit në BE”, thanë të dy ministrat, për të shtuar se nëse ata nuk e bëjnë këtë, do të humbin rastin historik.

[Guri i madh]

Mbi 1200 shqiptarë shkollohen në maqedonishte

Më shumë se 1 250 është shifra e nxënësve shqiptarë që evidentohen nga Enti Republikan i Statistikave (ERS) në kategorinë e nxënësve shqiptarë, por që arsimin fillor nuk e ndjekin në gjuhën shqipe. Konkretisht, sikurse qëndron në raportin e ERS-së, nga klasa e parë deri në të tetën numërohen gjithsej 133 mijë e 468 nxënës në paralelet maqedonase.
Prej tyre, 112 272 janë të përkatësisë maqedonase, 1 230 të përkatësisë shqiptare, 3 115 turke, 9 710 rome, 400 vllahe, 1 718 serbe, 2 002 boshnjake, 2 989 të përkatësive të tjera, 15 të papërcaktuar dhe 17 nxënës evidentohen me etnitet të panjohur.
Në vitin shkollor 2009/2010, periudhë kjo në të cilën është bërë evidentimi i numrave të referuar, janë shënuar edhe 24 nxënës shqiptarë, por që mësimin e ndjekin në gjuhën turke. Në paralelet shqiptare, ndërkaq, figurojnë 69 922 nxënës, raportojnë mediet.
E analizuar për nga numri i përgjithshëm i nxënësve shqiptarë, sipas përkatësisë etnike, e që në total është 1 254 nxënës, pjesëmarrja e shqiptarëve në arsimin fillor është mbi 33.5 për qind. Konkretisht, duke llogaritur edhe ata që ERS i ka regjistruar si shqiptarë, por që mësojnë maqedonisht apo turqisht, numri i nxënësve shqiptarë deri në vitin e kaluar ishte 70 069 nga klasa e parë deri në të tetën.
E përpjesëtuar me 208 980, sa është numri në total i të gjithë nxënësve të shkollave fillore, numri i nxënësve shqiptarë është 33.5 për qind.

[Guri i madh]

Erhard Buhler, dhëndër i Kosovës







Publikuar: 09.08.2011 - 13:53Prishtinë, 9 gusht - Komandanti i KFOR-it, Erhard Buhler do të largohet këtyre ditëve nga Kosova pasi përfundon misionin, transmeton Telegrafi.

Edhe pse ai kërkoi edhe një vit angazhim në vend për ta përfunduar punën e nisur të ndërmjetësimit për situatën në veri, shefat e tij në NATO nuk ia vazhduan kontratën.

Megjithatë gjermani është i lidhur emocionalisht me shqiptarët. Klan Kosova raportoi se ai nuk do të largohet i vetëm nga Kosova por me një nuse shqiptare, me të cilën u njoftua në Prizren gjatë vitit 2004 kur shërbente në trupat gjermane

Urdhërarrest për ish-drejtoreshën e PTK-së

Policia e Kosovës është vënë në kërkim të ish drejtoreshës së Postë-Telekomit të Kosovës, Leme Xhema.

E marte 9 Gusht 2011 15:11
Klan Kosova mëson se Gjykata Supreme ka lëshuar një urdhër-arrest, ku kërkon nga policia arrestimin e saj.
Mësohet se ajo është thirrur në gjykatë disa herë, por ka refuzuar të paraqitet në vendin ku ndahet drejtësia, dhe në mungesë të saj, Gjykata Supreme e ka dënuar më tri vjet heqje lirie, për veprën penale shpërdorim i detyrës zyrtare dhe lidhje e kontratës së dëmshme.
Sipas policisë, fletarrestim për Leme Xhemën atyre u ka shkuar më 5 gusht, ndërsa policia ka marrë masat dhe në momentin kur të gjendet do të arrestohet.
Ndërkohë, avokati i saj, Tomë Gashi tha se nuk ka asnjë informatë se klientja e saj është dënuar dhe se për të është lëshuar flet-arrest. Ai tha se lënda ka qenë në Gjykatën Supreme, dhe se për një hap të tillë Gjykata është dashur ta njoftojë at