Teknologji

[rilinda]

Nokia blen kompaninë softuerike Trolltech

Nokia, njëri prej prodhuesve kryesor i telefonave celular në botë, ka njoftuar për blerjen e kompanisë së njohur softuerike Trolltech nga Osloja. Për kompaninë norvegjeze janë ofruar pothuajse 153 milionë dollarë.
Nokia ka ofruar 2.91 dollarë për aksion, respektivisht 60 për qind më shumë sesa çmimi i aksioneve në bursë. 66 për qind e aksionarëve të Trolltech-ut e kanë pranuar ofertën.

Trolltech, e themeluar në vitin 1994, ka prodhuar softuerë të cilët shfrytëzohen nga Skype, Google Earth, Photoshop Elements dhe shumë tjerë.

Nokia thotë që me blerjen e Trolltech-ut do të përshpejtojë zhvillimin e programeve me më shumë platforma. Duke ju falënderuar shërbimeve të Trolltech, ajo do të përshpejtojë zhvillimin e aplikacioneve të cilat punojnë në internet, në pajisjet mobile të Nokias si dhe ne kompjuterë.

"Jemi të kënaqur që po i bashkojmë forcat me Nokian. Kultura dhe resurset inovative të kompanisë do t’u ofrojnë të punësuarve tonë mundësi të reja dhe interesante si dhe do të përmbushim vizionin tonë", ka thënë Haavard Nord, drejtor ekzekutiv dhe themelues i Trolltech.

Nokia planifikon vazhdoj përmirësimin e produkteve të Trolltech, dhe t’i ofrojë ato nën licencat komerciale si dhe open-source.

www.nokia.com
www.trolltech.com

[rilinda]

Suzuki Equator

Suzuki ka paraqitur ripërpunimin e parë zyrtar të modelit të kamionçinës së tij të re, Equator, e cila do ta ketë premierën botërore të dielën e ardhshme në panairin e automjeteve - 2008 Chicago Auto Show.
Megjithatë, Equator nuk është risi e plotë, sepse këtu në fakt bëhet fjalë për Nissan-in Frontier, vetëm më logon e Suzukit dhe pamjen e ndryshuar të pjesës së përparme. Edhe prodhimi përndryshe do të bëhet në fabrikat e Nissan-it në Tenessy të SHBA-së.

Tani për tani pos kësaj fotografie nuk ka të dhëna tjera, por supozohet se Equator do të shfrytëzojë motorët e njëjtë, të cilët veçse po integrohen në Nissan Frontier.

[rilinda]

Operatori Eagle Mobile fillon aktivitetin në mars

Operatori i ri i telefonisë celulare në Shqipëri, Eagle Mobile, ka përshpejtuar përgatitjet për nisjen e shërbimeve. Ekipi i Eagle Mobile, i cili planifikon të nisë aktivitetin duke mbuluar fillimisht Tiranën, Aeroportin Ndërkombëtar "Nënë Tereza" dhe Durrësin më datën 13 mars 2008, ka nisur të instalojë të gjithë infrastrukturën teknike në këtë zonë.
Lidhur me këtë çështje, drejtori i përgjithshëm i Eagle Mobile, Ali Tapkyn, ka thënë për gazetën “Start” se, “qëllimi i kompanisë është mbulimi i gjithë Shqipërisë me infrastrukturë operative dhe teknike, dhe se po ecet me shpejtësi në këtë drejtim”.

Teknologjia e lartë që do të përdoret për Eagle Mobile, sipas tij, nuk është përdorur ende në shumë vende të Evropës të cilësuara si të zhvilluara.

“Eagle Mobile, që do të shtrihet në të gjithë Shqipërinë në verën e vitit 2008, sjell për të gjithë shoqërinë tonë, jo vetëm tarifa të arsyeshme që do t`i përfshijnë të gjithë, por do ta njohë atë me risi teknologjike që do t`i lehtësojnë jetën dhe do t`i shtojnë ngjyrë asaj!”, ka premtuar Tapkyn.

[rilinda]

Celular me diamant

Operatori mobil japonez Softbank Mobile ka paralajmëruar të hënën bashkëpunimin me përpunuesin amerikan të stolive Tiffany për punimin e celularit luksoz, të dekoruar me diamante, me vlerë mbi 10 milionë jen.
"Ky është një artikull të cilën absolutisht dua të ofroj", ka thënë drejtori gjeneral i Softbank Mobile në konferencë për gazetarë në Tokio.

Celularët ekskluziv, të stolisur me diamante, do të prodhohen në një seri të kufizuar, e do të kushtojnë rreth 65.000 euro.

Ata do të shiten vetëm në Japoni, dhe do të kanë funksione specifike siç është mundësia e shikimit të televizionit digjital japonez.

[rilinda]

Probleme të shumta në softuerin e ri për iPod

Softueri i ri i Applet për modelet iPod Classic prej 80 e 160GB, sipas të gjitha gjasave shkakton probleme të shumta në vet pajisjen, siç janë dridhje nga rryma, zhurmë statike në dëgjuese dhe fshirje të dosjeve të përgatitura muzikore, njofton iLounge.
Firmware-i i ri, versioni 1.1, shkakton dërgimin e impulseve elektrike nëpërmes shkyçësit të dëgjuese me fuqi prej 500mV, i cili prapë shkakton probleme në pajisjet shtesë të kyçura në të.

Gjithashtu, disa prej shfrytëzuesve janë ankuar për tingëllimin e shushurimës, zhurmës dhe gumëzhimës në vet pajisjen, pasi që e kanë rifreskuar, derisa disa tjerë janë ankuar që iPod u bllokohet dhe thjesht ua fshin të gjitha dosjet e arkivuara.

Deri më tani, për këtë problem Apple nuk është deklaruar zyrtarisht, gjë që së shpejti, me shumë gjasë, edhe mund të pritet.

Telegrafi

[rilinda]

Në përgatitje Logani i ri

Fabrika në Mioveni çdo 52 minuta qet në rrugë edhe nga një Dacia Logan. Mirëpo kjo nuk është e tëra, sepse, kompania rumune është duke përgatitur gjeneratën e re të modelit.
Me një dizajn më të bindshëm sesa paraardhësi i tij, Logan nga ana estetike do të jetë më i ngjashëm me Renault Sanderon, i cili është paraqitur pak kohë më parë, i dedikuar për komercializim në tregjet e Amerikës jugore.

Si Sandero, ashtu edhe Logan, shfrytëzojnë plaformën B0, e po ashtu edhe qëllimin e kanë të njëjtë – me matje të mirë të çmimit dhe kualitetit, të fitojnë tregjet në zhvillim e sipër. Logan veçmë ka pasur sukses, andaj pritet se edhe modeli i ri suksesin më të madh do ta arrijë në bazë të dizajnit. Me këtë do t’i afrohej konkurrencës së lartë.

Në çdo rast, është reale të pritet që Dacia të mbajë paraqitjen Sedan të Loganit. E njëjta vlen edhe për ofertën e motorëve. Përveç motorit me benzinë të konstruksionit të thjeshtë, dhe, atij ekonomik me naftë, Logan do të jetë në dispozicion edhe në kombinim me motorët modern.

[rilinda]

Evropa, mbretëria e re e spamit

Edhe pse Amerika veriore (SHBA dhe Kanada) qe një kohë është cilësuar si, vendi nga ku rrjedh sasia më e madhe e porosive të padëshiruara, gjërat kanë ndryshuar para tre muajve, lajmërojnë nga Symantec.
Sipas pohimeve të Symantec, Evropa ka marrë kurorën nga Amerika veriore (SHBA dhe Kanada) e mbretërisë së spamit sepse gjatë tre muajve të fundit, me sasinë e porosive të padëshirueshme të dërguara, ka mundur “liderin” e deritanishëm.

Aktualisht nga Evropa rrjedh madje 44 për qind e spamit të përgjithshëm të dërguar në mbarë botën.

Gjatë nëntorit të vitit të kaluar, sasia e pjesës evropiane të porosive spam ka qenë 30.6 për qind, derisa në atë kohë nga Amerika veriore janë dërguar 46 për qind. Gjatë tre muajve gjërat kanë ndryshuar në mënyrë dramatike sepse, Evropa ka marrë fronin duke dërguar 44 për qind, përderisa SHBA ka dalë në vendin e dytë me 35.1 për qind. Në vendin e tretë është pozicionuar Azia me 15.1 për qind, derisa në vendin e katër është radhitur Amerika Jugore me diç më pak se pesë për qind.

Si arsye kryesore për numrin çdo ditë e më të madh të spamit nga Evropa - në Symantec thonë se është numri në rritje i shfrytëzuesve të internetit, me rrip të gjerë të internetit – broadband.

Raporti tashmë tradicional i Symantec-ut mbi këtë problematikë i emëruar State of Spam mund të gjendet në www.symantec.com.