Prej muajit të ardhshëm Kosova do të paraqitet në botë me një imazh të ri

[Peja-Boy]

Përmes reklamës, e cila tashmë është në përfundim dhe për të cilën është përkujdesur kompania izraelite për marrëdhënie me publikun - Saatchi & Saatchi, bota do të ketë mundësi ta shohë një imazh bashkëkohor të popullit me moshën më të re mesatare në Evropë. Kosovarët do të paraqiten energjikë, bashkëkohorë, të arsimuar dhe mbi të gjitha, të pavarur. Përmes reklamave televizive që do të jenë 60, 45 dhe 30 sekondash, e që do të transmetohen në televizionet më të mëdha ndërkombëtare, si p.sh. “CNN” rrëfimet për popullin dhe bukuritë e Kosovës për herë të parë do përfaqësohen edhe nga vetë kosovarët.

“Qëllimi primar i kësaj kampanje është që ta vendosë Kosovën përfundimisht në familjen e popujve të Evropës dhe më gjerë”, thotë Shony Rivnay drejtor kreativ i kampanjës.

“Gjëja më e bukur e Kosovës është popullata, e cila është shumë e re me moshë mesatare 25 vjet, ndërsa në vendet tjera është 40, dhe, kjo që në fillim ishim të fascinuar me këtë fakt, dhe për mua ky vend është një “fontanë e rinisë”. Kur shikon njerëzit rrugës të cilët edhe pse shumica mund të jenë të papunë tek ta sheh një lloj optimizmi e energjie që për ne është fascinuese”, ka thëne Shony Rivnay.

Në reklamën, e cila ka për qëllim përmirësimin e imazhit të Kosovës në të gjitha aspektet, në botë do të shihen të rinj kosovarë, bukuritë e qyteteve dhe të natyrës së Kosovës, por gjithashtu nuk do të harrohet asnjë pjesë e hidhur e historisë sonë. Kompania Saatchi & Saatchi, në fillim të vitit ishte fituese e tenderit të shpallur nga Qeveria e Kosovës në vlerë prej 5.7 milionë euro për ta përmirësuar imazhin e Kosovës në botë.

Qëllimi i kësaj kompanie është që më vonë, Kosovën ta prezantojë si një “simbol dashurie” term ky i njohur në industrinë e reklamimit si – “Lovemark”, një vend që të shihet dhe vlerësohet si një anëtar i vlefshëm i komunitetit ndërkombëtar.

Kompania Saatchi & Saatchi ka rreth 150 zyra në 86 shtete të ndryshme të botës. Ka afro 6 mijë punëtorë. Kompania Saatchi & Saatchi në shtatë vitet e fundit ka fituar 3 mijë e 500 çmime dhe mirënjohje të ndryshme për punën e saj.