Aktakuza kundër Limajt

[Guri i madh]

I akuzuari për ryshfet me thes, nënshkruan kontrata milionëshe







Publikuar: 20.03.2013 - 09:55Prishtinë, 20 mars – Prokurimi i Ministrisë së Infrastrukturës drejtohet nga një i akuzuar për marrje të ryshfetit me thes bërlloku. Dy prokurorë po e ndjekin penalisht Nexhat Krasniqin për korrupsion e krim të organizuar, derisa ai vazhdon të nënshkruajë kontrata milionëshe në ministrinë që drejtohet nga Fehmi Mujota.

Ligji e obligon sekretarin e përhershëm, Shasivar Haxhijaj, që ta suspendojë atë me 50 për qind pagesë deri në përfundim të procedurave. Këtë nuk e ka bërë qe pesë muaj. Nuk ka dhënë përgjigje se pse.

Më 15 nëntor 2012, prokurori special Besim Kelmendi ka ngritur një aktakuzë kundër shefit të prokurimit të Ministrisë së Infrastrukturës, Nexhat Krasniqi, për veprën penale të shpërdorimit të detyrës zyrtare, mashtrimit në detyrë, marrje të ryshfetit, e kontratë të dëmshme në lidhje me dhënien e tenderit për ndërtimin e Parkut Industrial në Drenas. Një ditë më vonë prokurori gjerman Johannes Pickert ka ngritur një aktakuzë kundër tij për krim të organizuar, shpërdorim të detyrës zyrtare, marrje të ryshfetit, lidhje të kontratave të dëmshme për tenderë të dhënë nga Ministria e Transportit dhe Telekomunikacionit.

Megjithëkëtë, Nexhat Krasniqi mbetet në krye të prokurimit në Ministrinë e Infrastrukturës, e cila ka në dispozicion mbi 200 milionë euro për investime kapitale sivjet.

Eprori i tij, Shasivar Haxhijaj, sekretar i përhershëm i MI-së, nuk ka ndërmarrë asnjë veprim për të përmbushur obligimet ligjore që ka. Nuk e ka suspenduar atë me pagesë, ani se e obligon Ligji për shërbimin civil të Kosovës. Ai nuk ka dhënë sqarime se pse nuk e ka bërë një veprim të tillë. Ka kërkuar që t’i dërgohen pyetje nëpërmjet postës elektronike, të cilave nuk u është përgjigjur.

Ligji për shërbyes civilë saktëson se kur një zyrtar duhet të pezullohet nga puna.

Ai është i akuzuar së bashku me ish-ministrin Fatmir Limaj, Demir Limajn, Florim Limajn, Endrit Shalën, Florim Zukën e Gani Zogajn. Ata akuzohen, mes të tjerash, për manipulimin e procedurave të tenderëve, dhënien dhe marrjen e ryshfetit dhe pengimin e mbledhjes së provave dhe dëshmive në lidhje me tre tenderë në MTPT për përfitime personale dhe/apo materiale (gjerësisht në “Kohën Ditore”).