Të tjerët për Dr. Rugovën.

[Espresso]

Thaçi: Spektri politik kosovar, i bashkuar
Intervistoi: Arben Xhixho
23-01-2006



Udhëheqës dhe personalitete të shumta botërore e kanë vlerësuar doktor Rugovën gjatë këtyre ditëve për qëndirmin e tij të vendosur dhe rrugën paqësore drejt arritjes së aspiratave të tij. Sot, pas humbjes së zotit Rugova, analistët ndonëse shprehin bindjen për vazhdimin e rrrugës paqësore, u kanë bërë thirrje politikanëve shiptarë të tregojnë maturi dhe unitet. Në emisionin Ditari, Zëri i Amerikës, bisedoi me kryetarin e partisë më të madhe opozitare në Kosovë, zotin Hashim Thaçi.

Zëri i Amerikës: Zoti Thaçi, si drejtues i partisë më të madhe opozitare në Kosovë, fillimisht çfarë trashëgimie ka lënë për ju vdekja e presidentit Rugova?

Hashim Thaçi: Mendoj se Kosova dhe institucionet e saj janë duke u përballur me një situatë të re, me një situatë pa përvojë në Kosovën demokratike. Sot është koha e rritjes së unitetit dhe unifikimit të spektrit politik kosovar, në mënyrë që ajo të mos shoqërohet nga prizmi i pozitës apo opozitës. Jemi në një situatë të kthesës historike, të nxjerrjes së vendimeve historike dhe vdekja e presidentit të Kosovës ka krijuar një rrethanë të re, një rrethanë që duhet të na imponojë dhe më fuqishëm rritjen dhe kultivimin e unitetit politik dhe qytetar, rritjen e unitetit të domosdoshëm për ndërtimin e rendit demokratik e mbi të gjitha, të ndërtimit të shtetit të pavarur dhe sovran të Kosovës, të integruar në strukturat e Bashkimit Evropian dhe në Nato, si përkushtim dhe vullnet ky, i të gjithë qytetarëve të Kosovës dhe i lidershipit kosovar.

Zëri i Amerikës: Në bazë të ligjeve të Kosovës, funksionet e presidentit në raste të tilla si ky i tanishmi, i kalojnë krytarit të parlamentit deri në zgjedhjen e presidentit të ri. A ka ndodhur ky transferim, si hap i parë?

Hashim Thaçi: Mendoj se sot nuk është koha për të diskutuar për çështje të tilla politike. Sot i gjithë sistemi politik, por edhe qytatarët, duhet të fokusohemi se si t’i kalojmë sa më të bashkuar këto ditë të zisë në Kosovë, se si të tregohemi të urtë, të mençur dhe të guximshëm e të kultivojmë kulturën tonë demokratike, qytetare e kombëtare, në mënyrë që të dëshmohemi edhe para botë,s edhe para qytetarëve, se ky vakuum do të tejkalohet në të ardhmen, në mënyrë unike e të bashkuar, në mënyrë të mençur dhe ashtu siç e dëshirojnë të gjithë qytetarët e Kosovës.

Zëri i Amerikës: Zoti Thaçi një pjesë e mirë e analistëve dhe personaliteteve në komentet që kanë bërë pas vdekjes të zotit Rugova, i kanë bërë thirrje klasës politike shqiptare të jetë e bashkuar, dhe të shmangë një luftë të mundshme për pushtet. Duke qënë se jeni kryetar i partisë më të madhe opozitare, çfarë roli do të luani ju në këtë situatë?

Hashim Thaçi: Kosova është e bashkuar. Duhet që energjitë tona t’i fokusojmë në forcimin e unitetit me grupin negociator të Kosovës si etikë kjo e unitetit, por edhe si delegacion i ndërtimit të Kosovës dhe në këtë çështje, edhe opozita, edhe pozita do të jenë të bashkuara në platformën për ndërtimin e shtetit të Kosovës, për ndërtimin e shtetit të pavarur dhe në këtë drejtim unë besoj se do ta kemi edhe mbështetjen e plotë të komunitetit ndërkombëtar dhe të Shteteve të Bashkuara të Amerikës dhe të Bashkimit Evropian. Unë besoj se edhe këtë situatë do ta kalojmë me dinjitet, me respekt për njëri-tjetrin, me kultivim të kulturës qytetare, politike e kombëtare. Kështu që unë nuk shoh ndonjë plasaritje, përçarje, por shoh një kultivim në rritje të unitetit dhe kulturës të bashkimit të spektrit politik kosovar për ndërtimin e një shteti të pavarur dhe sovran.

Zëri i Amerikës: Zoti Thaçi, në komentet e tij të para pas vdekjes së zotit Rugova, i dërguari i posaçëm i OKB-së për negociatat për statusin e Kosovës, Marti Ahtisari tha se dëshira e zotit Rugova do të ishte vazhdimi i bisedimeve i procesit të statusit. Tashmë kuptohet që ky proces është shtyrë për disa ditë. Në këtë moment delikat kur ju sapo hyni në rrugën e përcaktimit të statusit, është një moment që ju duhet të provoni veten tuaj pikërisht për të gjitha këto gjëra që thatë këtu, por a pritet të zgjidhet me shpejtësi çështja e kryesimit të delegacionit në bisedimet për statusin?

Hashim Thaçi: Fillimisht dua të theksoj se çdo lider politik i Kosovës, sot duhet të sillet në mënyrë shumë të përgjegjëshme, të dalë mbi unin e vetë personal dhe grupor partiak, të investojë në kalimin e situatës së re të krijuar, për një kalim sa më me dinjitet, sa më të bashkuar, në mënyrë që të mos lëndojmë asnjë ndjenjë të qytetarëve të Kosovës, të mos e dëshpërojmë komunitetin ndërkombëtar. Ne kemi patur situata të rënda më parë, kemi situata të reja sot, dhe unë besoj se do t’i kalojmë në mënyrë unike, në mënyrë dinjitoze, në atë mënyrë që e dëshirojnë të gjithë qytetarët e Kosovës dhe miqtë tanë ndërkombëtar. //rd//

[Arb]

Thaci as ne kete interviste nuk thote asgje per Rugoven.

[Arb]

Bob Dole: Dr. Rugova ishte një njeri i madh dhe heroik që personifikonte shpresat dhe aspiratat fisnike të popullit të Kosovës

23-01-2006

U dëshpërova thellësisht kur mësova lajmin për vdekjen e Presidentit të Kosovës Dr. Ibrahim Rugovës.

Dr. Rugova ishte një njeri i madh dhe heroik që personifikonte shpresat dhe aspiratat fisnike të popullit të Kosovës për një shtetet sovran, të pavarur dhe të njohur nga komuniteti ndërkombëtar. Ka qënë privilegj për mua të punoja në aspektin profesional me Dr. Rugovën dhe ta konsideroja atë një nga miqtë e mi më të ngushtë gjatë rreth dy dekadave që kur u njoha me të.

Mendja dhe zemra ime është në këto momente me familjen e tij dhe me gjithë Kosovën. Përpjekja e madhe e Presidentit Rugova për lirinë, demokracinë dhe pavarësinë e Kosovës ka të njejtat përmasa me fushatat e ngjashme paqësore dhe historike të Mahatma Gandidit, Nelson Mandelës dhe Martin Luther Kingut.

Ashtu si presidenti amerikan, Abraham Lincoln, Presidenti Rugova është bërë tashmë “njeriu i epokave”.
Gjatë muajve të fundit, Dr. Rugova e luftoi kancerin me të njëjtin dinjitet dhe qëllim. Megjithëse ai e humbi këtë betejë, ëndrat e tij për Kosovën do të realizohen së shpejti. Prandaj dhe familja e miqtë e zotit Rugova mund të gjejnë edhe rehati kur e dinë se dashurin e tij e sinqerët dhe e pamasë për Kosovën do të mbijetojë. Është shpresa ime e madhe se administrata amerikane, negociatorët ndërkombëtarë dhe udhëehqësit e tjerë të Kosovës do të respektojnë vizionin e zotit Rugova, duke ndjekur një proces për statusin përfundimtar politik të Kosovës që do të çojë në sovranitetin e Kosovës, njohjen nga komuniteti ndërkombëtar dhe shtetin e pavarur plotësisht dhe pa kushte me një vend në Kombet e Bashkuara në vitin 2006. //rd//

[Zana_ch]

Filips: Vdekja e Presidentit Rugova duhet të pasohet nga angazhimi në objektivin e përbashkët - pavarësinë
Ardita Simiçia
22-01-2006



Dejvid Filips, Drejtor Ekzekutiv i Fondacionit Eli Vizel për Njerëzimin, i themeluar nga laureati i Çmimit Nobel, shkrimtari Eli Vizel, e ka njohur nga afër Presidentin Rugova. Zoti Filips shprehu besimin se udhëheqësit e shqiptarëve do të vazhdojnë punën në rrugën që ndoqi zoti Rugova, për të bërë realitet pavarësinë e Kosovës. Analisti i bëri këto komente në një intervistë për Zërin e Amerikës, ku paralajmëroi gjithashtu që të mos ketë zvarritje në procesin e negociatave për të shmangur një radikalizim të mundshëm të klimës politike në Kosovë:

Presidenti Rugova, thotë analisti Filips, ia kushtoi jetën e tij pavarësisë së Kosovës, dhe është për të ardhur keq që ai nuk arriti të shohë përmbushjen e ëndrrës së tij tani që ajo është kaq pranë realizimit: "E kam njohur Dr. Rugovën për thuajse 20 vjet. U takova me të para pak muajsh në Prishtinë. Ai tha hapur se e dinte që do të vdiste, por shprehu vendosmërinë për të parë përmbushjen e suksesshme të negociatave. Është një realitet tragjik që të kujton Moisiun në Bibël, i cili për 40 vjet u end në shkretëtirë, por nuk u lejua të futet në tokën e shenjtë. Lëvizja për pavarësi në Kosovë është udhëhequr nga Dr. Rugova, por tani që po fillojnë negociatat ai nuk do të jetë në tryezën e bisedimeve. Është e rëndësishme që trashëgimia e tij të çohet përpara."

Analisti u bën thirrje udhëheqësve të Kosovës të vazhdojnë me të njëjtën këmbëngulje si Dr. Rugova përpjekjet për pavarësi. Ai shpreh besimin se Kosova ka udhëheqës që do të jenë në gjendje të punojnë për të mirën e Kosovës, duke lënë mënjanë ambicjet personale për pushtet: "Pa dyshim që vdekja e tij do të krijojë një vakum politik. Ai ishte një figurë shumë e madhe në skenën politike. Por unë i njoh udhëheqësit politikë në Kosovë dhe mendoj se secili prej tyre është i vendosur për realizimin e objektivës kryesore duke lënë mënjanë ambicjet personale. Ata duhet të angazhohen për të marrë përsipër rolin udhëheqës, por duhet ta kenë të qartë gjithashtu rëndësinë e bashkërendimit të qëndrimit të tyre dhe kam besim se do t’ia arrijnë kësaj."

Megjithë largimin nga skena të Presidentit Rugova, thekson zoti Filips, negociatat për status duhet të vazhdojnë pa vonesë, për të mos lejuar një radikalizim të klimës politike në Kosovë: "Ekziston një prirje për radikalizim, por nëse politika radikalizohet, shkaku nuk do të jetë vdekja e Dr. Rugovës, por mungesa e përparimit në negociata. Nëse negociatat fillojnë në shkurt, dhe nëse zoti Ahtisaari tregon përpjekje të vendosur për të arritur një marrëveshje, nuk mendoj se do të ketë radikalizim."

Trashëgimia e Dr. Rugovës, përfundon Dejvid Filips i Fondacionit Eli Vizel, është qëndrimi i moderuar dhe udhëheqja e vendosur dhe mendoj se udhëheqësit e shqiptarëve të Kosovës do të ndjekin po këtë rrugë. //ad//

[Zana_ch]

HAMITI: " RUGOVA- MONUMENT KULTURE DHE HISTORIE SHQIPTARE"


Dr. Sabri Hamiti, deputet, mik e bashkëpunëtor shumëvjeçar i presidentit Rugova


RADIO EVROPA E LIRË
Zoti Hamiti ju e keni njohur Dr. Rugovën për një kohë të gjatë dhe për një kohë të gjatë keni qenë ndër miqtë dhe bashkëpunëtorët e tij më të ngushtë. Si do ta portretizonit sot Dr. Ibrahim Rugovën?

SABRI HAMITI
Është vështirë në këtë moment kur përzihen edhe emocionet për shkuarjen e tij edhe koha është shumë e shpejtë që të bëhet portreti total i Rugovës – total e kam parasysh edhe njeriun si qenie individuale, edhe krijuesin letrar, më tej edhe prijësin politik të Kosovës, sepse janë tre vija që e karakterizojnë Rugovën dhe pa u analizuar bashkë të treja, është vështirë të nxirret portreti total i tij. Por, një gjë është shumë e sigurt, që është një nga figurat më të mëdha të shekullit XX të shqiptarëve. Kur them figura, them duke i lidhur këto tre aspekte të Ibrahim Rugovës – njeriun, krijuesin dhe prijësin politik.

RADIO EVROPA E LIRË Zoti Hamiti, ju e keni njohur zotin Rugova qysh nga koha e studimeve, besoj që ai të ketë qenë ndoshta një vit a dy para jush. Çfarë mbani mend nga ajo kohë, domethënë si do ta përshkruanit një detaj nga ajo kohë?

SABRI HAMITI
Unë Rugovën e njoh që nga viti 1968, me ardhjen në studime në Prishtinë. Asokohe Prishtina i ka mbledhur të gjithë talentet e botës shqiptare në Kosovë dhe rreth Kosovës. Ai ka qenë në shkollë një vit para meje në fakultet, por asokohe kemi qenë breza që shumicën e lëndëve i kemi bërë bashkë dhe faktikisht ne jemi një brez studimesh me Rugovën. Jemi njohur si njerëz që e duan letërsinë, edhe të artikuluar publikisht. Asokohe ai shkruante tekste estetiko-poetike te Fjala kryesisht dhe unë botoja poezi. Dhe, mund të them menjëherë dhe kjo s’ka pse të mos thuhet, jemi bërë miq shumë shpejt, miqësi e cila ka vazhduar tërë jetën dhe nuk ka pasur kurrfarë ndryshimesh, veçse është thelluar. E kemi njohur njëri-tjetrin në imtësi, aq në imtësi sa që veç ata që merren me letërsi, e dinë se çfarë afërsie është kur njeriu me dikë shkruan libër bashkë. Ne kemi botuar një libër të përbashkët dhe mendoj se kjo i thotë të gjitha.

RADIO EVROPA E LIRË
Pikërisht në aspektin e studimeve letrare zoti Hamiti, si do ta karakterizonit punën e Dr. Ibrahim Rugovës?

SABRI HAMITI Është specifik, edhe kjo është mirë të thuhet edhe me këtë rast, se Ibrahim Rugova ka kaluar në kritikë letrare si poet. Këtë e di pakkush. Ai shumë herët ka shkruar vjersha me një sensibilitet të veçantë, ka shkruar edhe për fëmijë, edhe vjersha që nuk kanë destinim të literaturës për fëmijë. Dhe, përnjëherë ai ka kaluar në kritikë letrare. E them këtë për arsye se gjithmonë, edhe në nivelet më të mëdha të mëvonshme të abstragimit teorik të letërsisë, të interpretimit të saj, të analizave dhe edhe më vonë kur është bërë një sistematizues i madh i ideve letrare shqiptare, por edhe i ideve të modernitetit të literaturave të tjera, kurrë diskursi i tij kritik nuk është larguar nga një sensibilitet i krijuesit imagjinativ, ta quaj kështu. Dhe, kjo e ka çuar tekstin e tij kah natyra e eseut. Dhe, sidomos unë do të thosha në librin e tij tashmë shumë të përmendur për Bogdanin, edhe pse tendenca është që të merret me nocionet, me klasifikimet e diskurseve, të ideve, të problematikës së veprës, në esencë kur e lexon tekstin, ai është plot figurë dhe sensibilitet.

RADIO EVROPA E LIRË
Zoti Hamiti, në fund të viteve ’80, kur Qarku Kulturor i Prishtinës jo vetëm që ishte konsoliduar përfundimisht, por kishte nisur edhe të prodhonte pasardhës të tjerë, zoti Rugova e la studimin e shkencës së letërsisë dhe iu kthye politikës. Çka ishte përcaktuese për këtë?

SABRI HAMITI
Këto janë probleme që duhen diskutuar shumë më thellë sesa kemi shans ne tash, por unë po i skicoj shpejt – Rugova ka ardhur në studime si njeri i formuar. Pse e them këtë, dhe si i diferencuar nga brezi. Unë ju thashë se kemi qenë në një vit të studimeve, por na kanë ndarë gjashtë vjet moshe. Unë kam qenë ai i riu i adhuruar në atë mes, sepse i riu është gjithmonë më i dashur, më interesant. Në këtë raport ai ka ardhur si njeri që ka hyrë në shkollë pak më vonë, e ka kryer normalen me pesë vite e të tjera dhe ka ardhur si një tip i formuar në një kulturë, unë do ta quaja nacionale. Dhe, atëherë Ibrahim Rugova ka qenë, po them tash qartë, nacionalist i kultivuar shqiptar, domethënë i kultivuar dhe i përpunuar në kulturën dhe literaturën shqipe. Në brezin e njerëzve dhe rreth tij, në këtë pikë, në kultivimin nacional sigurisht e ka pasur më të lartin dhe moshën më të madhen dhe atëherë kush e ka njohur, më 1968, për të është krejt normale Ibrahim Rugova i 1987-it që ka hyrë në politikë, në kuptimin e prijësit nacional. Tek ai ka ndejtë “cuc” do të thosha ambicia e prijësit që është mbjellë shumë herët. Dhe, për ata që e kanë njohur masandej si njeri publik, si kritik shumë të madh dhe kjo duhet të thuhet menjëherë si vlerësim se është kritik shumë i madh i letërsisë, momenti kur jeta ka diktuar rrjedhën e kolektivitetit, Rugova unë mendoj se vetëm është çelur dhe ka hyrë në ambientin e vet. Prijësi shqiptar tek Ibrahim Rugova ka ndejtë "cuc" unë mendoj prej fëmijërisë së tij dhe kjo duhet të arsyetohet pak më thellë me problem të familjes, por rastësi nuk është. Për mua nuk është paradoksale që Rugova është cilësuar si njeri i tërhequr kushtimisht, në ato që unë i quaj llafologji politike se ato ndihen gjithmonë më shumë e veprimin e kanë më të vogël, kjo nuk do të thotë se tek ai nuk ka qenë brenda ajo që unë e quaj tharm i prijësit. Pak naimian ka qenë, nëse ju kujtohet Naim Frashëri, sepse nuk ka qenë më pak prijës i Lidhjes së Prizrenit Naimi sesa Abdyli. Në këtë rast, Rugova i ka pasur të dyjat brenda, pasi ky dysh nuk ka ekzistuar në një rreth të tillë familjar për shembull.

Radio Evropa e Lirë
Dhe, për fund, profesor, po mundët të na thoni shkurt, se cila është përmasa e humbjes me rastin e vdekjes së presidentit të Kosovës, Ibrahim Rugova?

SABRI HAMITI
Përmasa e humbjes është e jashtëzakonshme. Unë po them vetëm një gjë, që ai ka qenë një dhe i papërsëritshëm. I tillë ka qenë për shkak të vetvetes dhe për shkak të rrethanave – këtu as që do të përsëritet vetvetja e tillë dhe as që do të përsëriten rrethanat. Ai ka qenë një pasuri nacionale, do ta quaja unë, ndryshe një monument kulture dhe historie shqiptare. Jam unë vetë që para shumë vitesh e kam quajtur kryetarin historik të Kosovës dhe ajo tash është bërë një formulë dhe është e vërtetë që mbetet kryetari historik i Kosovës. Kur i mblidhni të gjitha këto që nuk janë fraza, por janë artikulime të një njohjeje dhe një përfundimi, atëherë mund ta merrni me mend se çfarë do të thotë shkuarja e tij. Shkuarja e Rugovës është humbje e madhe për Kosovën, absolutisht është e pamundur që Kosova të jetë njëlloj si me të si pa të. Pa marrë parasysh se është e vërtetë që ka krijuar trashëgimi politike dhe kulturore, por personi ka shkuar dhe nuk do të jetë njësoj Kosova pa Rugovën në mesin tonë, si me Rugovën në mesin tonë. Shkurt është një humbje e madhe – ka shkuar shumë i ri, ka pasur 60 vjeç, në kulmin e fuqisë, por ky është fati, fat a fatum, që nuk varet nga individi as nga dëshirat e tij.

[Kercovari]

24.01.2006 16:26
Politika-Austri

Beisetzung von Kosovo-Präsident Rugova

Der an einem Krebsleiden verstorbene Kosovo-Präsident Ibrahim Rugova wird neben den "Märtyrergräbern" im Ort Velanija vor den Toren der Hauptstadt Pristina beigesetzt. An der Bestattung des 61-Jährigen werden zahlreiche Staats- und Regierungschefs erwartet. Zurückgewiesen haben die Behörden in Pristina indes den Wunsch des serbischen Präsidenten Boris Tadic, an der Bestattung teilzunehmen.





In Pristina nahmen auch am Dienstag den zweiten Tag in Folge tausende Kosovo-Albaner von der am Samstag verstorbenen Führungsfigur Abschied. Bei Temperaturen unter 15 Grad minus reihten sie sich in einer langen Warteschlange vor dem Sarg Rugovas ein. Darunter waren auch ehemalige politische Gegner von Rugova wie der Rebellenführer Hashim Thaci.

Zahlreiche ausländische Staatsgäste haben sich für die Bestattung angekündigt, unter anderem auch Außenministerin Plassnik, die die österreichische EU-Ratspräsidentschaft vertritt. Zurückgewiesen wurde der Wunsch der Teilnahme des serbischen Präsidenten Tadic. Tadic hatte am Montagabend gesagt, er halte es für angemessen, wenn er an der Trauerfeier teilnehme, und bat die UNO-Übergangsverwaltung in der Provinz um eine entsprechende Erlaubnis. "Es wäre einfach anständig, dass der Präsident Serbiens ins Kosovo fährt, das integraler Bestandteil dieses Landes ist, und dem Führer des albanischen Volkes die gebührende Ehrerbietung erweist", sagte Tadic.

Diese Äußerung rief in Pristina große Verärgerung hervor. "Tadic ist zu dem Begräbnis nicht willkommen, vor allem nicht nach seinen jüngsten Äußerungen" sagte ein ranghoher Regierungsvertreter. Ein UNMIK-Sprecher sagte, die Planung der Zeremonie obliege einem Ausschuss der Kosovo-Regierung und man werde dessen Entscheidung respektieren.
-------------------------------------------------------------------------------------

"Tadic ist zu dem Begräbnis nicht willkommen"
"Tadic nuk eshte i miresardhur ne varrim"
Qeveria e Kosoves hedh poshte kerkesen e Tadicit per te marre pjese ne ceremonin mortore te Presidentit Rugova.

[Murgesha]

Itali: Humbje e madhe jo vetëm për Kosovën dhe shqipatrët, por për mbarë botën




--------------------------------------------------------------------------------

Romë, 24 janar 2006 /TN /QIK (Egjëll Koliqi enkas për QIK-un). Massmediat italiane po i kushtojnë hapësirë të gjerë veprës së madhe të Presidentit të ndjerë të Kosovës - Dr Ibrahim Rugova. Çdo ditë botohen deklarata të personaliteteve të cilët e kanë njohur nga afër dhe dëshmitë e tyre për veprën madhore të Rugovës, në shërbim të paqes dhe mirëqenies në Kosovë e edhe më gjerë.

Vlerësime të përgjithshme se Ai ishte një njeri i madh, një intelektual i rangut më të lartë botëror, një strateg i paqes dhe demokracisë, një mbrojtës i paepur i jetës së njerëzve dhe një vizionar largpamës i proceseve që garantojnë mirëqenien e njerëzve.

Vlerësohet sidomos moslëkundja e Tij për asnjë çast e për asnjë milimetër nga këmbëngulja për pavarësi dhe demokratizim të vërtetë të Kosovës. Vlerësohet shumë lartë edhe organizimi i nderimeve të fundit dhe dinjiteti i lartë i popullit shqiptar në këto çaste dhembjeje e zije kombëtare.

Me të marrë lajmin se Presidenti Rugova ka ndërruar jetë, në emër të institucioneve më të larta shtetërore të Italisë, zëvendëskryeministri dhe minstër i jashtëm - Xhanfranko (Gianfranco) Fini, duke ngushëlluar Familjen Rugova dhe popullin e Kosovës, ndër të tjera ka thënë:

"Nga Presidenti kosovar Ibrahim Rugova do ta ruajmë gjithmonë kujtimin e personalitetit të tij dhe të mesazhit të tij të paqes, për konstruktimin e një Kosove demokratike dhe multietnike, të projektuar drejt një ardhmërie europiane".


Tek Rugova kurrë nuk është zbehur shikimi kah Europa

Lideri i opozitës italiane e kandidat për kryeministër në zgjedhjet e sivjeme - Romano Prodi (ish kryetar i Komisionit të BE së), duke e quajtur Presidentin Rugova si njeri i madh që gjithmonë ka ëndërruar Europën, në ngushëllimin e tij ka thënë: "Dua të shpreh ngushëllimet e mia, duke marrë pjesë në zinë që sot e ka kapluar popullin e Kosovës, për humbjen e Ibrahim Rugovës.

Tash na mungon një figurë që në këto vite gjithnjë është interpretuar me aspiratat e lirisë së popullit të tij, me një perspektivë të bashkëjetesës paqësore të njerëzve të Ballkanit. Në Të kurrë nuk është zbehur shikimi kah Europa, duke përceptuar në familjen e kombeve europiane cakun e lirisë, të paqes dhe të demokracisë".

Miku i tij i vjetër, ipeshkvi i Ternit e për shumë vite drejtues i Bashkësisë Shën Exhidio, trasuese dhe zëdhënëse e diplomacisë së Vatikanit - Imzot Vinçenco Pala, duke i shprehur ngushëllime Familjes Rugova dhe popullit të Kosovës, ndër të tjera ka thënë: "Presidenti i Republikës së Kosovës Ibrahim Rugova ishte një mik i madh i të gjithë atyre që punonin për paqe e dashuri midis popujve dhe njerëzve.

Ai ka qenë mik i madh edhe i Papës Gjon Pali II, i cili e quante 'Haveli i Ballkanit'. Vendosmëria për realizimin e aspiratave të popullit të tij dhe sinqeriteti i Tij do të mbeten shembull i një njeriu të madh dhe një intelektuali të mirëfilltë, me përmasa botërore".

Patriarku i Venedikut - Kardinali Anxhelo Skola (Angelo Scola), i cili ishte ndërkombëtari i fundit që e takoi Presidentin Rugova, në një intervistë ka deklaruar se në Ibrahim Rugovën ka parë një njeri të madh, çfarë rrallë lindin në këtë botë. Duke komentuar takimin me Presidentin Rugova, Kardinali Skola, ndër të tjera ka thënë: "Ka dashur të më takojë megjithë peshën e rëndë të sëmundjes.

M'i ka dhuruar dy gurë të çmueshëm të Kosovës, duke m'u lutur t'i mbaj në dorë dhe të lutem për të dhe për ardhmërinë e sigurtë dhe të lirë të popullit të tij. E kam njohur që nga viti 1985 dhe jam dëshmitar i vlerave shumë të larta intelektuale dhe politike të tij, gjithmonë në shërbim të paqes dhe të dashurisë njerëzore.

Më ka mahnitur zotësia e tij intelektuale dhe ëmbëlsia e tij shpirtërore. Ishte një takim shumë i përmallshëm dhe më kanë shpëtuar edhe lotët. Për ofensivë katolike në Kosovë nuk mund të flasim, por kemi shumë dëshmi të gjalla për një tolerancë të jashtëzakonshme ndërfetare, në mes myslimanëve dhe katolikëve, që duhet të shërbejë si shembull civilizimi në mbarë botën".


Shtypi italian lavdëron TMK-në për angazhimin e denjë në ceremoni funerale

Sot të gjitha të përditshmet italiane kanë botuar raportet e të dërguarve të tyre nga Prishtina, që përshkruajnë nderimet e fundit që shqiptarët po i japin burrë shtetit të tyre dhe liderit karizmatik që i mbrojti e udhëhoqi drejt realizimit të aspiratave kombëtare, me rrugë paqësore dhe përmes kanaleve diplomatike.

Janë botuar shumë fotografi nga radhët e gjata të qytetarëve të Kosovës dhe të shqiptarëve nga të gjitha trojet tona etnike, në pritje për t'i dhënë nderimet e fundit burrit të madh të kombit e strategut të paqes dhe demokracisë, i respektuar në mbarë botën. Lavdata të mëdha për popullin shqiptar, që megjithë të ftohtit siberik, askush nuk do të mungojë në këto çaste dhembjeje kombëtare.

Dy gazetat më të mëdha të Milanos "Corriere della Sera" dhe "Avvenire", njoftimin se Rugova do të varroset në Varrezat e Dëshmorëve të Kombit në Prishtinë, e komentojnë me një notë shumë të lartë e superlative, duke thënë se edhe me këtë testament Presidenti Rugova hoqi të gjitha dilemat se "kishte plasaritje me krahun e luftës", duke lavdëruar edhe Trupat e Mbrotjes së Kosovës për angazhimin e denjë në këto ceremoni funerale dhe në këto çaste kyçe për vendin e tyre. Ky fakt ciklësohet si vendosje mbarëpopullore dhe mbarëkombëtare, për të mos rrëshqitur asnjë milimetër nga aspiratat për realizimin dhe njohjen formale të pavarësisë së Kosovës.

Gazeta "Avvenire", duke përshkruar faktet që flasin për vendosmërinë e Presidentit të ndjerë Rugova dhe të të gjithë liderëve të tjerë e edhe të popullit, ka publikuar sot edhe një deklaratë të Kryeipeshkvit Administrator Apostullik të Kosovës - Imzot Zef Gashi, i cili ka thënë se do të hetohen zbraztësi dhe vështirësi të mëdha në proceset në Kosovë, pa Rugovën, mirëpo ka shprehur bindjen e tij se do të tejkalohen të gjitha dhe se do të frytëzohet plotësisht vepra madhore dhe shembullore e Presidentit Rugova, me përmbushjen e aspiratave të natyrshme dhe të drejta për liri, pavarësi, paqe dhe demokraci.

Dhembje e thellë i ka kapluar shpirtrat e çdo mërgimtari shqiptar në Itali. Janë mbajtur e po vazhdojnë të mbahen tubime komemorative në shumë qytete italiane. Janë hapur libra të zisë dhe po shkruajnë kujtimet dhe vlerësimet e tyre për Presidentin Rugova shumë mërgimtarë shqiptarë dhe miq italianë.

Sonte në Leko mbahet një mbrëmje komemorative, me pjesëmarrjen e pushtetit vendor në nivelin më të lartë, kryesuar nga Presidenti i Këshillit të Rrethit - Virxhilio Brivio. Qindra mërgimtarë shqiptarë janë nisur për në Kosovë, për të qenë të pranishëm në ceremoninë solemne të varrimit të Presidentit Rugova.

[Psikologu]

PEN Qendra e Kosovës: Vepra e Dr. Rugovës do të mbetet si një thesar shumë i çmuar në panteonin shqiptar të vlerave

Prishtinë, 23 janar - PEN Qendra e Kosovës, nëpërmjet një telegrami ka ngushëlluar familjen e Presidentit Rugova, në të cilin theksohet se Dr. Rugova ishte intelektuali që insistoi tërë jetën në modernizimin e shoqërisë kosovare, në civilizimin e jetës, të njerëzve e të kulturës së Kosovës.
- Jemi të prekur thellë nga vdekja e Presidentit Ibrahim Rugova. Ai ishte intelektuali që insistoi tërë jetën në modernizimin e shoqërisë kosovare, në civilizimin e jetës, të njerëzve e të kulturës së Kosovës. Doktor Rugova i ka dhënë ritmin dhe sensin modern jetës intelektuale, studimeve e shkencës shqiptare në Kosovë për disa decenie. Vepra e tij studimore do të mbetet si një thesar shumë i çmuar në panteonin shqiptar të vlerave.
Dr. Rugova ka udhëhequr aspiratat e shqiptarëve për pavarësi të Kosovës. Ai krijoi imazhin imponues e admirues në tërë botën si njeri i paqes në Ballkanin e luftrave tragjike. Ky imazh ndihmoi shumë të çojë Kosovën drejt pavarësisë.
Ibrahim Rugova do të mbetet përherë i paharruar, i respektuar e i dashur për ne miqtë e kolegët e tij shkrimtarë. Kemi kaluar së bashku vite e vite të rënda që do të shënojnë një kapitull të rëndësishëm të historisë së Kosovës, -
PEN Qendra e Kosovës, kryetari, Dr. Basri Çapriqi.

[Murgesha]

Presidenti Rugova, profeti i kombit

24 janar 2006 /TN /QIK

Shkruan: Bujar Leskaj

Rrallëherë ndodh që teksa thërret një emër, sado gjeni të jetë ky i fundit, njeherësh ke parathënë edhe fate të mëdhenj. Kjo ndodh me Ibrahim Rugoven, njeriun që për diçka më pak se dy dekada, u shndërrua në një legjendë të kohëve tona moderne, në një mit përpara të cilit edhe vetë vdekjes do t’i takonte të tërhiqej në skutat pa dritë të saj.

Ibrahim Rugova, sidoqoftë, ka lënë mes ne shqiptarëvë një dritë të ndezur për të na kujtuar se ardhmëria nuk kërkohet kurrë përmes territ, por siç do të na e mësonte vetë lideri i madh, përmes dritës së paqes. Bash për këtë arësye, edhe statueta e Papa Gjon Palit në kabinetin e Rugovës ishte diçka më tepër sesa vetë përqasja e një filozofie të përqafuar me një klas-elegancë, e admiruar ndjeshëm nga kancelaritë e perëndimit.

Figura e madhe e Ibrahim Rugovës na bën të gjithë ne shqiptarëvë të ndihemi pjesë e nje procesi të gjatë deri në krijimin e një modeli perfekt të funksionimit të ndjesisë humane dhe parimeve universale të dashurisë edhe në kohën e urrejtjes dhe dogmës. Të gjitha këto që citova, janë thjeshtë vetëm njëra anë e dimensioneve që paraqet Rugova. Janë shumë të rrallë rastet në Krestomacinë e shqiptarëve të mëdhenj të të gjitha kohërave ku të rrijë krah për krah, kulturologu, politikani që shndërrohet në lider shpirtëror, dhe përmasa humane, si tek Ibrahim Rugova.

Shembulli i kolosit shumëdimensional shpeshherë ia kalon edhe vetë fantazisë më evolucioniste, ku përmes saj ngjizen në mënyrë perfekte virtytet më të larta dhe më të arrira te vetë rracës tonë. Elita intelektuale dhe politike , këndej dhe andej kufijve, më shumë se kurrë bëhet sot zëdhënëse e ndjesisë që Ibrahim Rugova, presidenti i parë i Kosoves, Gandi bashkëkohor, esteti dhe teoricieni i letersisë është formula shqiptare më frytdhënëse.

Intelektuali i madh i formateve më të arrira të kohës , ia doli që në krye të herës të bëjë realitet atë çfarë secili shqiptar e kish menduar dhe aspiruar, ndonëse dimri ballkanik i kohës ishte shpeshherë një disfavor i madh, në dukje i pakalueshëm.

Veset e racës vepruan dhe ndaj Rugovës , ishte një reagim meskin , një përballje e kahmotshme e mediokritetit me intelektualin, e politikes vizionare e moderne me derivatet negative te saj, të shqiptaresisë së kulluar që kërkon të integrohet me ideologjine e stepave dhe zëdhënesit e tyre shqiptarë e jo.

Është pikërisht kështu sepse ai u ushqye me doktrinën e Pjeter Bogdanit, Nënë Terezës dhe Papa Gjon Palit. Të shkuarën kulturore shqiptare e racionalizoi në bashkëkohësi dhe më tej duke krijuar kështu një mendim politik të një lloji të veçantë. Duke e çuar më tej vështrimin tim në universin Rugovian duhet thënë se përmasat e këtij burri të madh kishin një interferencë të përkryer ku brenda një politikani të pashoq shkrihej një shkrimtar, estet, humanist dhe kulturolog po kaq i madh.

Paralelet e veprimtarise së tij do të bëhen me siguri një objekt jashtëzakonisht i madh i historianëve, biografëve dhe studiuesve. E tillë është vepra e Rugovës, një gur më shumë peshë në historinë moderne te shqiptarëvë, kudo ku ata jetojnë duke aspiruar ardhmërinë. Ky është një ndër mësimet më të mëdha të Ibrahim Rugovës.

Kur kombit shqiptar i qasej ora e ligë andej dhe këtej kufirit, kur perandoria e së keqes shfaqej në format e veta të idhta atje si pushtim i huaj e këtu si urrejtje klasore, vetëm dy burra patën tagrin dhe pergjegjësinë të rrinin brenda përkufizimit kantian “duhet të reagosh ndaj së keqës që të mos bëhesh fajtor për triumfin e saj” quhen Ibrahim Rugova dhe Sali Berisha. Kur sot më tepër se kurrë, Kosova i është afruar ëndërrës së saj shekullore, pavarësisë, ikja e Rugovës tingëllon tejet tragjike.

Njeriu që më shumë se askush ideoi dhe udhëhoqi një nga proceset me delikate të shqiptarëve, pavarësinë, nuk do të mundet që në kuptimin fizik të shohë materializimin e endërrës që e kish ndërtuar vëtë. Lidhur me këtë, për ta avancuar idenë time po citoj në pak fjalë atë çfarë thotë shkrimtari ynë i madh Ismail Kadare: “është e vertetë se ai nuk do ta shohë dot dritën e pavaresisë për të cilën gjithë jetën ka punuar dhe është përpjekur, por le të na ngushëllojë mendimi se ai ishte një vizionar dhe si gjithë vizionarët e ka parashikuar dhe e ka parë pavarësinë e Kosovës shumë kohë më parë, atëherë kur rrallëkush e shihte dhe kishte besim në të”.

Ndërsa konsiderata ime personale do të ishte ajo që pas Skenderbeut në çetën e profetëve të kombit tonë Ibrahim Rugova zë të parin vend.

Lidhur me atë se çfarë ky përfaqësues i elitës intelektuale shqiptare do të rrezatojë gjithmonë ndër brezat që jetojnë dhe ndër ata që do të vijnë më vonë, si anëtar i kabinetit qeveritar te Republikës së Shqipërisë them se nuk do t’i rreshtim asnjëherë përpjekjet tona për ta lartësuar dhe nderuar ashtu si i takon dhe në të vërtetë ashtu siç është në mes nesh, Ibrahim Rugovën.

Hartimi dhe botimi i një përmbledhjeje ku do të përfshihen në të pothuajse të gjitha studimet mbi veprën dhe rolin e tij në fushën e politikës, humanizmit, eseistikës dhe kulturologjisë do të bëhët një realitet i prekshëm gjë që ne e premtuem në takimin e 4 nentorit të vitit të kaluar gjatë promovimit të vepres së plotë të Rugoves.

Një grup i caktuar shkrimtaresh, studiuesish historianësh dhe politologësh nga brenda dhe jashtë kufijve do të angazhohen tërësisht në këtë vepër të madhe. Nga ana tjetër në rastin më të volitshëm do t’i propozoj këshillit të ministrave që një nga rrugët apo sheshet kryesore të Tiranës të marrë emrin Ibrahim Rugova dhe do të vendoset përjetësisht edhe nje monument i liderit të madh.

Një nga rastet unikale ku një personalitet ka ndërtuar njëherësh me aktivitetin e tij shumedimensional edhe mitin e pathyeshëm të paqës edhe monumentin e përjetësisë.

Një jetë që vazhdon, ashtu siç ishte nisur, për të mbërritur tek harmonia njerëzore, tek aspirata që kishte lindur së bashku me Ibrahim Rugovën. Tani Rugova fillon jetën e tij, atë më të gjatën, udhëtimin përgjatë historisë, jetën pas vdekjes, duke mbetur për shqiptarët e Kosovës dhe të Shqipërisë, gjeopolitikë dhe model human e intelektual i përjetshëm.

Autori është Minister i Turizmit, Kultures, Rinise dhe Sporteve të Republikës së Shqipërisë

Tiranë, 24 janar 2006

[Urata]

"Ndërsa konsiderata ime personale do të ishte ajo që pas Skenderbeut në çetën e profetëve të kombit tonë Ibrahim Rugova zë të parin vend. "

Bujar Leskaj

[Urata]

Presidenti Rugova, simbol i pavarësisë së Kosovës e i Dardanisë Antike


Shkruan: Akad.Mark Krasniqi

Presidenti i Kosovës, dr.Ibrahim Rugova i cili ndërroi jetë më 21 janar të këtij viti, gjatë 16 vjetëve ka qenë prijës dhe udhëheqës i popullit shqiptar në Kosovë në rrugën e të drejtës së vetëvendosjes, përkatësisht drejt Pavarësisë së shtetit të lirë e Sovran të Kosovës që është e drejtë historike, etnike e politike e shqiptarëve të kësaj treve.
Kjo rrugë ka qenë shumë e vështirë në kushtet e okupacionit serb i cili gjatë shekujve, e sidomos më vitet 1998-99, bëri gjenocid e pastrim etnik të popullsisë shqiptare nga vatrat e tij shekullore të Dardanisë antike.
Presidenti Rugova këtë rrugë të gjatë e të veshtirë e bëri para se gjithash duke e senzibilizuar problemin e Kosovës në botën euroatlantike e cila për Kosovën nuk kishte njohuri e aq më pak mirëkuptim për t’i realizuar edhe ne aktet dhe qëndrimet ndërkombëtare për vetëvendosje. Mirëpo me këmbënguljen dhe me qëndrimin e zgjuarësinë intelektuale e politike të dr.Ibahim Rugovës, filloi faktori ndërkombëtar ta kuptojë të drejtën tonë dhe përpjekejt tona për të qenë të lirë e të pavarur në shtetin Sovran të Kosovës.
Me meritat e dr.Ibrahim Rugovës, ne sot kemi mikun më të fortë, fuqinë më të madhe ekonomike dhe ushtarake në botë – Shtetet e Bashkuara të Amerikës dhe aleatët e saj të Bashkimit Evropian. Në saje të veprimtarisë politike të Presidentit Rugova dhe në saje të përpjekjeve të gjithë popullit shqiptar në Kosovë dhe të gjitha strukturave paqësore e ushtarake të tij, forcat e NATO-s, bombarduan 72 ditë pa ndërprerë okupatorin serb të cilin e detyruan të gjunjëzohet e të tërhiqet nga Kosova më 12 qershor të vitit 1999.
Falë angazhimit dhe suksesit të tillë, dr. Ibrahim Rugova fitoi simpatinë dhe përkrahjen e gjithë shqiptarëve të Kosovës e të gjithë shqiptarëve kudo që jetojnë si dhe të botës demokratike ndërkombëtare.
Partia Shqiptare Demokristiane e Kosovës gjatë 15 vjetëve të kaluara ka qenë krahu i djathtë i Lidhjes Demokratike të Kosovës dhe kryetarit të saj dr.Ibrahim Rugovës. Në këtë rrugë të interesit kombëtar, edhe partia jonë, e cila gjatë kohë ka qenë forca e dytë politike në Kosovë, ka dhënë kontributin e vet në Kosovë e në diasporë duke marrë pjesë në Institucionet paralele në kohëne e okupacionit serb dhe në vepritmaritë e tjera të nevojshme të asaj kohe.
Dr.Ibrahim Rugova, me qëndrimet e tij demokratike e paqësore ka fituar simpati e përkrahje të autoriteteve politike përëndimore.
Dr. Ibrahim Rugovën, kushdo që e ka njoftë dhe që ka dashur të jetë objektiv, e ka rrespektuar si njeri shumë të ndershëm, të dashur, të afërt, intelektual i madh, demokrat, tolerant e paqëdashës. Të gjitha këto veti pozitive morale janë traditë e kulturës tradicionale shqiptare. Prandaj shtresat më të gjëra të popullit shqiptar, Ibrahim Rugovën e kanë çmuar si shembull i njeriut të madh, të mençur dhe të guximshëm, i cili meriton të jetë në ballë të këtij populli, ta ketë përkrahjen e besimin e pjesës më të madhe të tij,
Me vdekjen e presidentit të Kosovës, d.Ibrahim Rugova, është shkaktuar një boshllëk i madh në jetën institucionale e politike, në momentet më të vështira për Kosovën, e cila gjendet në udhëkryq për vendosjen e fatit të saj përfundimtar. Në këtë moment personaliteti i dr.Ibrahim Rugovës ka qenë i domosdoshëm.
Mirëpo, Ibrahim Rugova me sakrificën e tij, me guximin e mendjen e tij të holë e vizionare ka qenë dhe ka mbetur arkitekti dhe babai i Pavarësisë së Kosovës. Pavarësia e Kosovës, pa marrë parasysh kush do ta nënshkruajë aktin final të saj, është meritë e gjithë popullit shqiptar, por merita kryesiore
Dhe e pamohueshme i takon atij i cili gjatë dy decenieve e trasoi këtë rrugë të vështirë kombëtare, e ky personalitet është vetëm dr.Ibraim Rugova.
Presidenti i Kosovës dr.Ibrahim Rugova është i pazëvendësueshëm. Por me humbjen e tij fizike nuk do të humb rruga e idealit të cilin e ka ndjekur me përkushtim gjatë gjithë jetës së tij. Në këtë rrugë, siç e ka përcjellë deri tash PSHDK-ja, do të qëndrojë e paluhatshme edhe më tutje së bashku me partinë e tij, aleatën e natyrshme të saj, Lidhjen Demokratike të Kosovës dhe mbarë popullin e Kosovës i cili e ndjek këtë rrugë kombëtare.
Me këtë rast, Partia Shqiptare Demokrstikane e Kosovës dhe unë personalisht, i shprehim ngushëllimet më të sinqerta familjes së nderuar të dr.Ibrahim Rugovës, Lidhjes Demokratike të Kosovës dhe mbarë popullit shqiptarë.

Prishtinë, 24 janar 2006

[Psikologu]

Ministria e Ekonomise, Tregtise dhe Enegjetikes, Tirane

Me keqardhjem me te madhe jam i detyruar te respektoj Presidentin e Kosoves ne keto momente me te veshtira per popullin shqiptar. Duke kujtuar te gjithe misionet e mija ne Kosove, pritjen dhe trajtimin e jashtezakoneshme te vellezerve te mij kosovare, ndjehem shume i lumtur se jane pikerisht ata, qytetaret e nderuar te Zotit Rugova, qe punonin dhe punojne per rindertimin e Kosoves dhe zhvillimin social ekonomik te popullit shqiptar te Kosoves. Me mesimet e Doktor Ibrahim Rugoves dhe klases politike shqiptare, populli i Kosoves po punon me vetmohim per konsolidimin e shtetit te pavarur te Kosoves, te shtetit te se drejtes, per krijimin e nje shteti demokratik dhe te shvilluar ne pikpamjen ekonomko shoqerore me orjentim anetaresimin ne bashkesine europiane. Duke qene gjithnje prane vellezerve te mij kosovare, duke ndjere shume afer rrahjet e pulsit te tyre si ne te mira ashtu dhe ne keto dite fatkeqe, e ndjej se jam prane tyre, se jam prane familjes se zotit Ibrahim RUGOVA me shpresen se endrra e te gjithe kosovareve, misheruar nga qendrimet e zotit Ibrahim, per nje popull dhe shtet te pavarur te Kosoves do te zhvillohet me tej, duke bere te mundur plotesimin ekesaj endrre reale dhe fatlume. I paharruar qofte kujtimi dhe vepra e shqiptarit te madh Ibrahim RUGOVA!!!!! Ilir KODRA, Ministria e Ekonomise, Tregtise dhe Enegjetikes, Tirane, Shqiperi

[Urata]

Presidenti Rugova ishte dhe do të mbetet sinonim i pavarsisë së Kosovës

Marsej, 24 janar - Lorik Cana, futbollist i ekipit Olimpik të Marsejit në Francë dhe përfaqësues i Kombëtares së Shqipërisë në një mesazh ngushëllimi shkruan:
"Me pikëllim të thellë mora lajmin për vdekjen e Presidentit të Kosoves Dr. Ibrahim Rugova.
Dr. Rugova ishte dhe do të mbetet sinonim i pavarsisë së Kosovës. Vdekja e tij ndodhi në çastin kur do të realizohej pikësynimi i tij i kahmotshëm dhe i gjithë popullit të Kosovës, përjetësimi formal i pavarsisë së Kosovës. Besoj, që ne të gjithë do të respektojmë dhe ndjekim rrugën e trasuar nga z. Rugova, atë të paqes, mirëkuptimit dhe unitetit ndërmjet shqiptarëve, kudo që të jemi

[Urata]

Atë Nikolla Marku: Vepra e zotit Rugova do të jetë e perjetshme në dobi të kombit shqiptar
Elbasan, 24 janar – "Në emër të komunitetit orthodhoks, ju shprehim ngushellimet tona për humbjen e Presidentit të Kosovës, zotit Ibrahim Rrugova. Sinqerisht jemi pranë jush në këto ditë hidhërimi, duke vleresuar se vepra e zotit Rugova do të jetë e perjetshme në dobi të kombit shqiptar.
Zoti e bekoftë dhe e bëftë realitet endrrën e tij dhe të kombit shqiptar", thotë në mesazhin e tij Atë Nikolla Marku, në emër të Kishës ortodokse autoqefale kombëtare shqiptare "Shën Maria", në Elbasan

[Urata]

Goldberg: Presidenti Rugova ishte simbol i Kosovës në gjithë botën


Prishtinë, 24 janar - Kosova pa Presidentin Rugova është një Kosovë e ndryshme, politikisht dhe në çdo mënyrë tjetër, por njerëzit këtu do ta respektojnë shumë trashëgiminë e tij dhe do të shkojnë përpara me idetë që u la, - u shpreh shefi i Zyrës amerikane në Prishtinë, Filip Goldberg, në një intervistë për "Zërin e Amerikës".
Presidenti Rugova, tha Goldberg, ishte simbol i Kosovës në gjithë botën, ishte edhe simbol në Kosovë dhe këtë mund ta shohësh nga grupet e shumta të njerëzve që kalojnë para trupit të tij, në ndërtesën e Parlamentit. "Ata po e bëjnë këtë me dinjitet dhe respekt shumë të madh dhe dashuri shumë të madhe. Është një pjesëmarrje e jashtëzakonshme".
"Mendoj se Kosova pa Presidentin Rugova është një Kosovë e ndryshme, politikisht dhe në çdo mënyrë tjetër, por njerëzit këtu do ta respektojnë shumë trashëgiminë e tij dhe do të shkojnë përpara me idetë që u la ai. Mendoj se kjo është shumë e rëndësishme", u shpreh Godlberg.
Diplomati amerikan theksoi se vizioni i Presidentit Rugova për të ardhmen ishte shumë i lidhur me procesin e statusit përfundimtar. "Dhe çdo gjë që do të bëhet në periudhën që pason, duhet marrë parasysh procesin e statusit përfundimtar, jo vetëm për të mirën e të gjithë popullit të Kosovës, por edhe në kujtim të 'Presidentit Rugova'", tha Goldberg.
Ndërkaq duke folur për procesin e negociatave për statusin përfundimtar, ai tha se ky proces do të vazhdojë nga grupi i unitetit që ngriti Presidenti Rugova të cilin e udhëhoqi aq mirë.
"Ky proces do të vazhdojë, sepse është në interes të të gjithë njerëzve këtu dhe sepse do të nderojë kujtimin e tij sepse kjo është ajo që ishte më e rëndësishme për të, e ardhmja e Kosovës. Kjo do të thotë se duhet të jetë një grup uniteti, njerëzit duhet të bëhen bashkë dhe shpresoj se vdekja e Presidentit Rugova do të ndihmojë dhe do ta bëjë më solid këtë unitet edhe pse ai nuk është këtu për të ndihmuar, për ta udhëhequr", tha Godlberg.
Ai shprehu mendimin se pas zisë zyrtare është mirë të nisë procesi për të zgjedhur një president të ri, "sepse është shumë e rëndësishme, për të ardhmen dhe kujtimin e Dr.Rugovës".
"Ai luajti një rol unik, ai është i pazëvendësueshëm në kaq shumë mënyra, si udhëheqës, si simbol dhe si një figurë e madhe për botën dhe popullin e Kosovës. Por ajo që mund të bëhet është që kujtimi i tij të nderohet duke e çuar këtë proces përpara, në të cilin ai besonte kaq shumë. Kjo mund të bëhet përmes zgjedhjes së një personi konsensual, dikush që do t'i bashkojë njerëzit", u shpreh Goldberg në një intervistë për Z.A.