Lajme nga Mjekesia

[Jana]

Dieta për zemër ndihmon kundër mbipeshës

Dieta për zemër të shëndoshë, e cila zvogëlon sasinë e konsumuar të kalorive ditore dhe llojet e ndryshme të yndyrave, proteinave dhe karbohidrateve, mund t’u ndihmojë personave me mbipeshë që ta arrijnë dhe ta mbajnë peshën e dëshiruar trupore.
Në studimin e realizuar nga The National Heart, Lung, and Blood Institute (NHLBI) dhe i cili është botuar në revistën “Neë England Journal of Medicine”, ekspertët kanë vërejtur humbjen e peshës trupore te personat e shëndoshë por me mbipeshë, të cilët kanë përdorur këtë lloj diete.

Vlerat e materieve ushqyese kanë qenë këto: yndyrat 20-40%, proteinat 15-25% dhe karbohidratet 35-65% në raport me kërkesat energjetike.

Ky lloj diete është e ordinuar për njerëzit të cilët kanë probleme me zemër, ndërkohë që rezultatet treguan se mund t’u ndihmojë edhe personave me peshë të lartë trupore që të humbin kilogramët e tepërt.

(Vlen të përmendet se te kjo dietë mungonin sidomos yndyrat e ngopura, ndërkohë që me shumicë kishte fibra ushqyes dietetik).

[shfletuesi_]

Shtimi i qelizave nervore në trup pothuajse dyfishohet me anë të injeksionit me faktorin rritës IGF-1. Këtë e kanë zbuluar studiuesit në Göteborg, Suedi. Kjo mund të shfrytëzohet për kurimin e trurit pas një ataku zemre, kur qelizat e trurit nuk kanë marrë gjak, apo në rastin e ndonjë sëmundjeje tjetër.

Më parë besohej se tek njerëzit nuk mund të lindin qeliza të reja pas foshnjërisë, por para një gjysëm viti neurologu Peter Eriksson dhe grupi i tij dhanë prova mbi se si truri i njeriut ndërton qeliza të reja nervore përgjatë tërë jetës.

[Jana]

Operimi, mbipesha dhe kanceri
Femrat me mbipeshë mund ta zvogëlojnë rrezikun për t’u sëmurë nga kanceri nëse vendosin t’i nënshtrohen ndërhyrjes kirurgjike, ndërsa e njëjta gjë nuk vlen për meshkujt.
Shkencëtarët nga Universiteti Sahlgrenska në qytetin Gothenburg të Suedisë, kanë analizuar më shumë se 2.000 pacientë, të cilët i janë nënshtruar ndërhyrjes kirurgjike për shkak të masës trupore.

Pacientët janë përcjellë për një periudhë kohore dhjetë vjeçare dhe janë krahasuar me një numër të njëjtë pacientësh të cilët nuk kanë pranuar t’i nënshtrohen ndërhyrjes kirurgjike për ta zvogëluar mbipeshën.

Shkencëtarët kanë zbuluar se femrat të cilat i ishin nënshtruar ndërhyrjes kirurgjike për të larguar kilogramët e tepërt kishin qenë për 42% më pak të rrezikuara për t’u sëmurë nga kanceri gjatë periudhës sa ka zgjatur studimi.

Mirëpo, te meshkujt, të cilët kishin pranuar t’i nënshtroheshin të njëjtës procedurë, nuk është vërejtur zvogëlim i rrezikut për zhvillimin e kancerit.

[Jana]

Me pemë dhe perime kundër kancerit të prostatës
Një publikim i ri në revistën "Human Nutrition and Dietetics", tregon se ushqimi me pak mish dhe yndyrë, por i pasur me pemë dhe perime, ndihmon në parandalimin dhe mjekimin e karcinomës së prostatës.
Studimi i realizuar nga Universiteti New South Wales ka zbuluar se ushqimi i cili përmban shumë pemë dhe perime, ndërsa përmban sasi të vogël të mishit, produkteve të qumështit dhe kalciumit, mund të ndihmojë në parandalimin, por edhe në mjekimin e kancerit të prostatës.

Domatet, lulelakra, brokoli, çaji i gjelbër, vitamina E dhe seleni etj, janë disa nga ushqimet dhe produktet, të cilat zvogëlojnë rrezikun për paraqitjen e karcinomës së prostatës.

[Jana]

Alkooli shkaktar i një nga 25 vdekje
Një hulumtim i realizuar nga shkencëtarët kanadezë të Universitetit të Torontos, sugjeron se çdo e 25 vdekje është e lidhur me konsumimin e alkoolit.
Revista “Lancet” njofton se po ashtu ndikimi negativ i alkoolit është më i shprehur te shtresat e varfra.

Ndërkohë në Evropë llogaritet se çdo e dhjeta vdekje është pasojë e alkoolit, për shkak të konsumimit shumë më të madh të tij.

Situata është më e rëndë në vendet e ish-Bashkimit Sovjetik ku alkooli është shkaktar i një nga shtatë vdekjeve.

Përgjithësisht, meshkujt janë pesë herë më të rrezikuar të vdesin si pasojë e konsumimit të sasisë më të madhe të alkoolit.

Ndërsa sëmundjet që vijnë si pasojë e konsumimit të alkoolit paraqiten shumë më shpesh te të rinjtë sesa te moshat e pjekura.

Si pasojë e konsumimit të alkoolit paraqiten sëmundjet e mëlçisë, ndërsa në shkallë më të ulët mund të zhvillohet kanceri, depresioni dhe goditja në tru.

[Jana]

Meshkujt të shqetësuar për alkoolin
Ekspertët pohojnë se meshkujt gjithnjë e më shumë janë të shqetësuar për efektet negative të alkoolit dhe me kalimin e kohës shtohet numri i meshkujve që dëshirojnë të heqin dorë nga kjo shprehi e keqe.
Një studim i ri i realizuar në Britani të Madhe tregon se 37% e meshkujve janë munduar të zvogëlojnë sasinë e konsumuar të alkoolit, për shkak të kalorive të tepërta që përmbajnë pijet alkoolike.

1/6 e të anketuarve kanë deklaruar se dëshirojnë të heqin dorë nga alkooli për shkak të paraqitjes së “gjinjve mashkullor”, ndërsa ¼ për shkak të rritjes së barkut.

1/8 e meshkujve e anketuar kanë thënë se alkooli ua ka ndryshuar dukjen, ndërsa 9% kanë pohuar se ua ka prishur jetën seksuale.

Duke analizuar të dhënat, udhëheqësi i studimit Dr. Ian Banks ka thënë se meshkujt janë shumë më tepër të shqetësuar (sesa është menduar më parë) për ndikimet negative të alkoolit mbi organizmin e tyre.

[Jana]

Shumë të rinj mendojnë se do të vdesin herët


Një hulumtim i cili ka përfshirë 20.000 adoleshentë në SHBA, tregon se një numër i madh adoleshentësh, afër 15%, mendojnë se do të vdesin të rinj, prandaj jepen pas drogës, bëjnë sjellje të rrezikshme dhe tentime për vetëvrasje.
I njëjti studim ka dëshmuar të kundërtën e asaj që është menduar deri më tani se “shumica e të rinjve jepen pas gjërave të rrezikshme, pasi që nuk mendojnë për pasojat e tyre dhe se mendojnë që janë të pakëndshëm”,

Sipas të dhënave nga ky studim, një numër i madh i të rinjve jepen pas gjërave të rrezikshme, pasi që “ndjehen të pashpresë dhe mendojnë se s’kanë çfarë të humbin”, thotë autorja e studimit dr. Iris Borowsky.

[Jana]

Mungesa e vitaminës D te nënat dhe të porsalindurit


Shkencëtarët amerikanë nga Qendra Mjekësore e Bostonit kanë njoftuar se në momentin e lindjes, 36% e nënave dhe 58% e foshnjave kanë mungesë të vitaminës D.
Për nevojat e studimit është përcjellë niveli i vitaminës D në gjakun e nënave dhe të porsalindurve në 72 orët e para pas lindjes së foshnjës.

Hulumtuesit tregojnë se mungesë e vitaminës D është vërejtur edhe te 30% e shtatzënave, të cilat në tremujorin e fundit të shtatzënisë kishin marrë vitaminë D në formë tabletash nga pesë herë në javë.

Nivel më i ulët i vitaminës D është vërejtur te foshnjat, nënat e të cilave po ashtu kishin pasur mungesë të kësaj vitamine.

Për më shumë nivel të ulët të vitaminës D kanë pasur edhe foshnjat nënat e të cilave kishin mbipeshë, si dhe ato që kishin lindur në muajt e dimrit.

[Jana]

Konsumoni lëngje për të kontrolluar peshën trupore
Ekspertët nga British Nutrition Foundation (BNF) bëjnë të ditur se konsumimi i ushqimeve të cilat kanë nivel të lartë të ujit në përbërje, mund të ndihmojë në uljen e peshës trupore.
Sipas tyre, ushqimet me përqindje të lartë të ujit, përfshirë edhe pastat dhe orizin, të cilat lehtë absorbojnë lëngje, si edhe gjellët, mundësojnë zgjatjen e ndjenjës së ngopjes.

Megjithatë, hulumtimet e reja kanë treguar se kjo nuk është e mundur të arrihet thjesht duke pirë një gotë ujë gjatë ushqimit, pasi lëngu duhet të jetë pjesë përbërëse e ushqimit që konsumohet.

Ekspertët po ashtu shtojnë se tryeza duhet të ketë sasi sa më të mëdha të perimeve, pasi ato krahas ujit përmbajnë edhe lëndë të tjera ushqyese të cilat krijojnë ndjenjën e ngopjes dhe nuk kanë shumë kalori.

[Jana]

Kafe për memorie më të mirë
Konsumimi i pesë filxhanëve të kafesë në ditë, mund t’i lehtësojë vështirësitë me mbajtjen mend te personat që vuajnë nga sëmundja e Alzheimerit, bëjnë të ditur shkencëtarët amerikanë.
Studimet e realizuara në kafshë zbulojnë se kafeina me anë të ndikimit në dy enzima mund të reduktojnë në 50% praninë e shtresave beta-amiloide në tru, të cilat janë karakteristike për këtë lloj sëmundje, shkruhet në ‘Journal of Alzheimer's disease’.

Në hulumtime janë shfrytëzuar minj që janë kultivuar ashtu që të zhvillojnë simptoma të Alzheihmerit.

Studimet kanë treguar se konsumimi i rregullt ditor i kafeinës në sasi të cilat iu përgjigjen pesë filxhanëve kafe, ka qenë i lidhur me një përmirësim të dukshëm të testeve për mbajtje mend.

[Jana]

Shijet e preferuara përcaktohen para se të lindim
Ajo se çfarë do të na pëlqejë të hamë është e ‘shkruar’ madje para se të lindim, bëjnë të ditur studimet e fundit
Preferencat ushqyese të foshnjës së ardhme i përcaktojnë lëndët ushqimore të cilat arrijnë deri te fetusi përmes gjakut të nënës, të cilat përcaktojnë edhe ato që fëmija do t’i refuzojë.

Fakti se i linduri preferon lëndët e ëmbla ushqyese ose të njelmëta, derisa shmang ato të tharbëta dhe të hidhura, tashmë janë një rregull.

Megjithatë, pas lindjes, këtyre preferencave të lindura i bashkohen edhe aromat të cilat fëmija i shijon nga gjiri i nënës.

Journal of Pediatric Gastroenterology and Nutrition, shkruan se edhe krahas preferencave të lindura për shije të veçanta, njeriut i jepet mundësia edhe për të manipuluar me shijet në moshë të hershme, me qëllim që të krijohen preferenca për ushqime dhe pije të shëndetshme.

[Jana]

Vrasësit e mëlçisë
Një studim i realizuar nga shkencëtarët amerikanë në Seattle ka zbuluar një lidhshmëri direkte ndërmjet përmbajtjes së ushqimit dhe sëmundjeve të mëlçisë.
Studimi i botuar në revistën “Hepatology” ka treguar se ushqimi i pasur me proteina dhe yndyra shpesh sjell deri te zhvillimi i sëmundjes së quajtur “mëlçia yndyrore”- gjendje e cila është paraprirës i sëmundjeve serioze të mëlçisë, siç është cirroza, por madje edhe karcinoma e mëlçisë.

Faktorë tjerë të rrezikshëm për paraqitjen e “mëlçisë yndyrore” janë mbipesha, jo-ndjeshmëria në insulinë dhe sëmundja e sheqerit- që po ashtu janë të lidhura me ushqyerjen e gabuar dhe me konsumimin e pabalansuar të kalorive.

[Jana]

Ndikimi i ushqimit te kanceri i gjirit
Pjesëmarrja e karbohidrateve dhe "ngarkesës së përgjithshme glikemike" në ushqim, është e lidhur me rrezikun për zhvillimin e kancerit të gjirit, njoftojnë shkencëtarët suedezë nga Instituti Karolinska.
Duke analizuar të dhënat e ushqyerjes së 61.433 femrave të grumbulluara gjatë 17 viteve, shkencëtarët nga ky institut kanë treguar se konsumimi i shpeshtë i ushqimeve me indeks të lartë glikemik (pas konsumimit të të cilave vjen deri te rritja e shpejtë e nivelit të sheqerit në gjak) shton rrezikun për t’u sëmurë nga kanceri i gjirit.

Autorët e studimit të botuar në revistën “International Journal of Cancer”, besojnë se indeksi glikemik i ushqimit ndikon në rritjen e përqendrimit të hormonit insulinë dhe disa hormoneve seksuale në mënyrë që shton rrezikun për zhvillimin e kancerit të gjirit.

[Jana]

Ajo çka dëmton dhëmbët, dëmton edhe shëndetin
Problemet me dhëmbë dhe mishin e dhëmbëve janë shenjë për alarmim se jeni duke konsumuar ushqim jokualitativ, njoftojnë shkencëtarët nga Universiti i Washingtonit, të cilët po ashtu thonë se dhëmbi i sëmurë është paralajmërim për problemet shëndetësorë në të ardhmen.
Ushqimi i cili prish buzëqeshjen e bukur, është ushqimi i pasur me sheqerna të thjeshtë (ushqimi i cili ka indeks të lartë glikemik).

Konsumimi i sheshtë i këtij lloji të ushqimit shkakton oscilimet e shpeshta dhe të përnjëhershme të nivelit të glukozës në gjak, që është bazë e një numri të madh të sëmundjeve të kohës sonë, shkruan revista “Journal of Dental Research”.

Për më shumë, kariesi i dhëmbëve është shenja më e dukshme se duhet të ndryshoni diçka në ushqimin tuaj që tani

[Jana]

Gjumi ndihmon në kontrollimin e peshës trupore
Femrat të cilat kanë vështirësi në kthimin e masës trupore që e kanë pasur para shtatzënisë, duhet që t’i kushtojnë rëndësi më të madhe kohëzgjatjes së gjumit- sugjeron një studim i ri.
Një hulumtim i realizuar në SHBA tregon se gjumi i natës ndihmon në kontrollimin e peshës trupore, ngjashëm sikurse dieta ose aktiviteti trupor.

Përkundrazi, të dhënat e grumbulluara tregojnë se nënat e reja të cilat gjashtë muaj pas lindjes flenë nga 5 orë ose më pak, janë tri herë më të rrezikuara që ta kthejnë peshën të cilën e kanë pasur gjatë shtatzënisë

Sipas shkencëtarëve, mungesa e gjumit sjell deri te ndryshimet në nivelin e hormoneve të cilët janë të përfshirë në rregullimin e apetitit.