Programimi Neurolinguistik

[sakra]

PROGRAMIMI NEUROLINGUISTIK
Traumat dhe mundësit për vetë-shërim

Dinamika e rrjedhave të proceseve jetësore e njeriut të sotëm është e ngarkuar dhe e stërngarkuar me barrën e presioneve nga më të ndryshmet, që nga ato më elementari e deri tek ato superiore, duke e kthyer atë në një automat të mekanizmave dirigjues, si imponim i vetë faktorit kohë dhe hapësirë.
Këto presione permanente kanë ndikuar që në psiken e njerëzve t’i atrofizojnë aftësitë e cilësitë krijuese dhe të krijojnë një gjendje enervacioni, duke provokuar destabilizimin e harmonisë shpirtërore, dhe fatkeqësisht, paraqitjen e simptomave të para të sëmundjeve psikike. Aq më tragjik bëhet fakti, kur këtij presioni ekzistencial i shtohet edhe barra e dhunës, shpërnguljes, terrorit, luftës etj., siç po ndodh në shumë vende të globit. Mjerisht, një katrahurë të tillë e përjetoi edhe populli ynë.
Nga gjithë kjo amulli, mund të themi me plot gojën, se të pakët janë ata shqiptarë të cilët kanë mbetur, s’paku pa pësuar tronditje shpirtërore, pra TRAUMA, të cilat edhe mund t’i përcjellin gjatë gjithë jetës duke u shkaktuar situata të pakëndshme dhe me pasoja, herë-herë, të rënda për higjienën e tyre mentale, e që në instancën e fundit rezulton negativisht në psikologjinë kolektive të mbarë popullatës tonë...
Duke ju falënderuar punës së palodhur të matematicientit Riçard Bandler dhe linguistit Dzhon Grajner, u arrit deri te një metodë e re psikologjike, që u quajt: “Programimi neurolunguistik”, e që vitet e fundit u bë hit i vërtet në lëmin e gjerë të psikiatrisë.
Popullaritet dhe përdorim të gjerë kësaj metode të re i dha Gisela Perren - Klinger, psikologe dhe psikiatre e fëmijëve nga Bazeli i Zvicrës, e cila njëkohësisht është edhe anëtare e Këshillit të Evropës për të Drejtat e Njeriut, si dhe anëtare e shumë asociacioneve tjera ndërkombëtare.
Kjo studiuese e palodhur, njohëse e shumë gjuhëve të huaja, këtë metodë të re arriti ta modifikoj dhe ta afirmojë, nga puna e saj praktike me njerëz të traumatizuar, e sidomos me të burgosurit politikë të Amerikës Latine, me vuajtje të gjata dënimi, si dhe nga erudicioni i saj i gjerë profesional. Këto njohuri, në bashkëpunim me autoren Francoise Zwissig, i komunikoi teoritikisht në librin shumë të njohur “Lernen mit alle Sinnen” (Mësojmë me të gjitha shqisat), si dhe nëpërmjet ligjëratave dhe kurseve të saj në shumë vende të botës. Këto suksese i dhanë edhe titullin “Maestro e programimit neurolinguistik”.
Qëllimi i kësaj metode është njeriu i traumatizuar, si pasoj e shkaqeve të ndryshme. Traumat e shkaktuara nga natyra: vërshimet, tërmetet etj.; pastaj, nga njeriu: nëpërmjet keqtrajtimeve trupore e psikike si dhe keqpërdorimeve të ndryshme seksuale, dhunës etj.; nga shoqëria: nëpërmjet ndeshjeve (automobilistike), ndërhyrjeve mjekësore, shkatërrimit të ambientit nga mbeturinat e ndryshme kimike etj.; nga politika: nëpërmjet përndjekjeve, torturave, burgosjeve, arratisjeve etj.; godasin dhe i tronditin njerëzit në rrafshe të ndryshme në të njëjtën kohë, si në rrafshin fizik, psikologjik, social, ekonomik etj. duke shkaktuar tek ata çrregullime të shkallëve të ndryshme të personalitetit e deri te psikoza të rënda.
Gjithashtu, nëpërmjet kësaj metode u ndihmohet në masë të madhe edhe të huajve, tek të cilët, në mos për asgjë tjetër, ekziston elementi traumatizues i arratisjes nga atdheu, pra metodë që është e nevojshme edhe për njerëzit tanë, një numër mjaftë i madh i të cilëve gjenden në mërgim, posaçërisht të rinjtë që janë caku më i preferuar i sulmeve neuropatike, si pasojë e elementeve të ndryshëm traumatizues, por dhe sjelljeve, zakoneve e botëkuptimeve advente me të cilat ata duhet të përballen në shoqëritë e huaja ku jetojnë dhe veprojnë. Në këso rastesh, aplikimi i programit neurolinguistik mund të përdoret si metodë sedative dhe me shumë sukses në tejkalimin e këtyre pasojave trumatike.
Kjo metodë nuk është vetëm një ndihmë mjekësore, e zbatuar me ndihmën e terapeutit, por në esencë është edhe një vetëndihmë mjekësore, të cilën i traumatizuari pas seancave (kontakteve) me terapeutin, mund ta aplikoj edhe vet, në cilëndo kohë, në çdo moment e në çdo vend për ta ndihmuar vetveten duke aktivizuar, siç thamë, resurset e fjetura.
Libri, për këtë metodë shumë të suksesshme dhe shumë modeste për kohën tonë “Mësojmë me të gjitha shqisat”, me pëlqimin e autorëve, Gisela Perren - Klinger dhe Francoise Zwissig, është përkthyer dhe botuar edhe në gjuhën shqipe (nga gjermanishtja) nga dr. Xhevat Hasani dhe Osman Osmani.

Libri “Mësojmë me të gjitha shqisat” mund të shkarkohet falas ne web faqen www.sa-kra.ch , në sektorin: Literaturë.