Agnesa Vuthaj, një imazh i ri ....

[Jana]

Po preokupimet në planin dashuror?

Edhepse dashuria nuk planifikohet, ndoshta 2009-ta do të jetë vit i rezultateve edhe në dashuri.

Kur iu bëhet kjo pyetje, shpesh nuk keni përgjigje, ose keni përgjigje lakonike, nuk jeni e drejtpërdrejtë?

Ka ndodhur kështu, sepse jeta ime dashurore ka qenë shumë e varfër në krahasim me karrierën time. Ndonëse kam qenë shumë me fat në zhvillimin e karrierës time, në sferën e dashurisë, nuk ka ndodhur e njëjta.

Kik boksieri Elvir Muriqi ka deklaruar se ka një lidhje emotive me ju. A ka diçka të vërtet, apo ndaj të bukurës të gjithë kanë pretendime?

Është e vërtetë që për të bukurën të gjithë kanë pretendime dhe rasti konkret ishte mënyra më dobët për të shprehur një pretendim të tillë. Mua me vjen keq që është përfolur aq shumë kjo temë, qoftë në media ashtu mes njerëzve derisa në atë deklaratë nuk ka pasur asgjë të vërtetë.

Megjithatë, një ditë dikujt do t”ia falësh zemrën dhe bukurinë, apo jo?

Sigurisht që po, do të vijë edhe ajo kohë.

Çfarë shihni në fillim te një mashkull?

Intelekti tek një mashkull më tërheq më shumë.

Çfarë do të doje që një mashkull të vlerësonte tek ti?

Do doja të vlerësonte karakterin tim, thjeshtë të më vlerëson për atë që jam.

Prej çfarë do të hiqnit dorë për dashurinë?

Nuk e shoh dashurinë si kusht, mendoj që krahas jetës sime private dhe karrierës sime, dashuria do të ishte vetëm një plus, një plotësim.

Jeni me prejardhje nga Vuthaj. A e vizitoni vendlindjen e të parëve tuaj dhe si ndjeheni atje?

Paraardhësit e familjes sime janë shpërngulur nga Vuthaj në Istog, vazhdojmë ta ruajmë mbiemrin për rreth 300 vite, edhe pse nuk kemi familje në Vuthaj. Me keqardhje e pranoj që nuk kam qenë asnjëherë për të vizituar vendin e origjinës sime, megjithatë dëshira është shumë e madhe për të realizuar një vizitë në Vuthaj, aq me tepër për të parë gjithë ato bukuri, për të cilat deri me tani vetëm kam dëgjuar.

[Jana]

Nga Vuthajt është edhe Emine Çunmulaj, duket se nga ai mjedis dalin shumë femra të bukura?

Ky është vetëm një fakt më shumë që dëshmon bukurinë e banorëve të asaj ane, megjithatë ai mjedis është i njohur edhe për njerëz të mençur dhe shumë akademik kanë origjinën nga Vuthaj

Thuhet se njeriu për nga natyra është pesimist dhe se pesimizmi është bërë pjesë e përditshmërisë së njeriut. A keni ju telashe me këtë kategori, apo edhe bukuroshet janë pesimiste?

Ne kosovarët jemi populli më optimist në botë. Unë nuk jam fare pesimiste, ndoshta edhe nga fakti që jeta më ka ecur mbarë, jam me fat që kam mundësi të realizoj atë çka dua, edhepse kërkesat e mia janë gjithmonë në proporcion me atë çfarë mund të arrij.

Ndoshta bëhen pesimiste kur t’ju mbarojë mosha dhe kur iu rikthehen kujtimeve?

Gjithçka në jetë ka kohën e vet, si momentet kulminante, poashtu edhe uljet...nuk mendoj që do të bëhem pesimiste as kur të plakem, besoj që të kaluarës do t’i rikthehem më ëndje

Si e mendoni dhe ku e mendoni Agnesën pas shtatëdhjetë vjetësh?

Shpresoj të jem akoma në jetë pas shtatëdhjetë vjetësh. Nëse po atëherë e shoh vetën të realizuar në shumë sfera, me një karrierë te bujshme prapa vetes, një familje te madhe dhe të shëndosh. Dëshira ime do të ishte të bëhem një motiv për gjeneratat në zhvillim.

Keni deklaruar se do te merreni edhe me çështje humane?

Unë qysh në moshë të re kam filluar të angazhohem për çështje humane, jam anëtarësuar në Kryqin e Kuq dhe kam marrë pjesë në shumë aktivitete të kësaj organizate, pastaj me OJQ jam angazhuar shumë në këtë aspekt, ndërkaq më vonë duke u kurorëzuar Miss dhe duke organizuar Miss Kosovën, mundësitë e mia për të ndihmuar njerëzit në nevojë janë rritur. Përveç aktiviteteve humanitare në Kosovë, kam qenë pjesë e shumë aktiviteteve humane edhe në vende tjera të botës.

[Jana]

Kështu veprojnë të gjithë Vipat pas përfundimit të karrierës?

Do të thoja që me aktivitete humane Vip-at merren edhe gjatë karrierës së tyre, ndoshta në përfundim të karrierës ke më shumë kohë për aktivitete të tilla, megjithatë mendoj që kurdoqoftë, këto aktivitetet janë të frytshme.

A e keni provuar veten në film dhe a keni dëshirë t’i hyni kësaj 'sakrifice'?

Në film e kam provuar veten një herë, vitin e kaluar kam interpretuar në filmin shqiptar “Shkallët”, film që rezultoi shumë i suksesshëm duke u shpërblyer me çmime në festivale ndërkombëtare, si dhe në Shqipëri u vlerësua si filmi më i mirë i vitit 2008. Interpretimi im ishte një sfidë e re, përvojë shumë e bukur dhe qe do doja ta bëja prapë.

Cila është dhurata më e bukur që keni marrë?

Kam marrë shumë dhurata në jetë, secila nga ato ka veçanti, bukuri dhe vlerë për mua. Jam shumë mirënjohëse për dhuratat që marr dhe, poashtu, kam shumë dëshirë edhe të bëj dhurata. Bukuria më e madhe e dhuratave besoj qëndron në momentin e këmbimit të tyre “marrje – dhurim”.

Po më e sikletshmja?

Dhurata që vërtetë më ka bërë të ndjehem në siklet ishte një dhuratë shumë e çmueshme nga dërgues i panjohur që gjeta një mëngjes jashtë derës së banesës time.

[Jana]