Fitore Aliu: Letër për disa nga motrat e mia

[panta_rhei]

Të jesh femër është diçka shumë e bukur por të jesh femër shqiptare është kryesisht detyrë e madhe por edhe privilegj sepse në duart tona po e ndryshojmë pozicionin e femrës shqiptare për të ardhmen. Në atë që jemi si jemi dhe si po zhvillohemi po e thurim pikturojmë dukjen- pamjen tonë në Evropë. Për këtë arsye vendosa ta shkruaj një letër për disa nga motrat e mia shqiptare që pamjes-dukjes sonë, kanë filluar qysh tani t’i japin një shije shumë të hidhur...

Motrat e mia të dashura!



Fotografitë e postuara dhe të vendosura nga ju në Facebook nuk duhen patjetër të prekin edhe kufijtë e pornografisë. „Të veshurën“ që një pjesë jo e vogël po e quani modë, është modë që e gjeni vetëm në lokale striptizi dhe nëpër rrugë ku bëhet prostitucion! Rrugët e qytetit nuk janë plazh. Të ecësh gjysmë e zhveshur nuk është emancipim apo ndonjë veprim modern. Përkundrazi! Është prapambeturi!
Paraqitja e vetvetes si objekt dhe ofendim për çdo femër. Të kërkosh fatin nëpër internet dhe nëpër kafene e diskoteka nuk do e gjen kurrë. Por e gjen të kundërtën e saj. Të shminkohesh deri në atë masë sa që të duket nga larg lëkura e pluhosur, sikur e ka përjetuar një stuhi tornadoje, nuk është bukuri. Të ulesh me këmbë të hapura kur veshur ke fund apo minifund dhe të qeshësh e hapësh dhëmbët pa kontroll, duke ngrënë e mbllaçitur me gojë hapur, nuk është "cool" por shenjë që s’ke asnjë fije edukimi dhe kulturë. Të jetë qëllimi i jetës tënde të gjesh një burrë, duke i kaluar paraprakisht nga njëzetë nëpër përqafimin apo përgojimin tënd, është shkatërrim i vetvetes duke u bërë edhe një marionetë argëtimi e dëfrimi për meshkuj!
Femra shqiptare është e njohur për krenari- Është edhe, sidomos, simbol bukurie dhe plot mençuri. Ne jemi ato që e bëjmë botën të sillet! Ne jemi ato që e bëjmë botën të shtanget! Ne jemi bukuria e kësaj bote në kombinim me tiparet e një engjëlli. Ne jemi edhe burrnesha! Mos e kundërshtoni vetën. Mos e lejoni vetën të bëheni lodër pse i përkisni, të ashtuquajturës, gjinisë së dobët në këtë aspekt. Mbahuni motrat e mia. Askush nuk ka mbetur pa u martuar! Martesa dhe burri nuk duhet të jetë qëllimi i jetës, sepse ajo është natyra dhe çdo gjë e natyrës vjen se nuk bën ndryshe. Qëllimi juaj duhet të jetë, forcimi i personalitetit tuaj, shkollimi juaj dhe emancipimi juaj me plot kuptimin e fjalës. Nuk është shijim i jetës kërcimi nga një krevat në tjetrin apo duke e bërë krevatin tuaj shumë të përgjuar dhe të vizituar. Nëse do ishte ashtu, çfarë do na dallonte nga kafshët?!! Është tejet e natyrshme të kesh lidhje dashurie dhe ta ndërpresësh atë kur nuk funksionon, por të kesh vetëm afera me meshkujt që bëjnë vetëm qejf me ju, është dobësi dhe naivitet. Përqendrojeni energjinë tuaj në shkollim, në studime, në punë, në lexim. Lëvizni gjërat ashtu siç dimë vetëm ne. Bëhuni nëna të mençura, të lexuara, plot dije dhe dashuri. Fëmijët tuaj do t’u falënderojnë përjetësisht, do t’u kenë të ardhme, do t’u kenë pasqyrë ku mund të shikojnë dhe të drejtohen.
Mos lejoni që Evropa të na shikojë si prostituta të thjeshta që ofrojnë shërbime falas. Mos lejoni që Evropa të na mbulojë bukurinë me moral të fëlliqur. Mos lejoni që femrat e huaja të kanë frikë nga ajo se ne femrat shqiptare do t’ua marrim burrat! Ne nuk jemi ashtu dhe, fal Zotit, njoh shumë shoqe që më rrethojnë të e vërtetojnë të kundërtën. Por njoh, fatkeqësisht, edhe asosh që më bëjnë të qaj nga inati dhe turpi! Femrat që do mbesin në kujtesë dhe histori mbajnë emrin: Inva Mula, Arta Dobroshi apo Emina Çunmulaj, e jo disa që i keni idole nga estrada shqiptare: që zhvishen duke bërë striptiz jo profesional dhe duke kënduar me nota që nuk ekzistojnë në muzikën shqipe.
TI ke lindur femër dhe mban KUPTIMIN e jetës. Ti je JETA dhe MREKULLIA e saj. Me plot arsye krenohu me gjininë që ke dhe përditë vërtetoje dhe dëshmoje se e meriton të jesh AJO!
Shëndet, forcë, krenari e mençuri për jetë!

Fitore Aliu
Fillimpranvere, 2010
Revista TUNG